On Air Christmas on Manx Radio Marc Tyley & Stu Lowe | 5:00pm - 7:00pm
- Download
Listen Live
On Demand
On Air Christmas on Manx Radio Marc Tyley & Stu Lowe | 5:00pm - 7:00pm
- Download

Abbyr Shen Reesht - Say That Again 3rd November 2024

Abbyr Shen Reesht - Say That Again

Sunday, 3 November 2024 - 29 minutes

Shoh diu y podcast, Abbyr Shen Reesht, lesh meeryn 'sy Ghaelg ass kuse dy chlaareyn Radio Vannin er yn chiaghtin shoh chaie. Ta shin goaill toshiaght lesh 'Shiaght Laa', as she Fiona McArdle va chebbal y chlaare shen.

SHIAGHT LAA

Fiona McArdle as 'Shiaght Laa', vees ry chlashtyn fastyr Jerdein ec 5.30pm.

Ta 'Kiaull as Cooish' ny claare vees goll er jannoo eddyr yn BBC as Radio Vannin, as she Daniel Quayle ta dy chebbal. Shoh dooin Daniel as ny cooishyn v'echey 'sy chlaare, agh gyn kiaull erbee.

KIAULL AS COOISH

'Kiaull as Cooish' marish Daniel Quayle.

Va David Kinley marish Phil Gawne ayns 'Goll as Gaccan' fastyr Jedoonee eddyr 4.00pm as 6.00pm, as ren ad jeeaghyn er kuse dy ockleyn 'sy Ghaelg as er shiartanse dy enmyn buill, agh cha row meer er-lheh 'sy Ghaelg son y phodcast shoh.

Fastyr beg Jedoonee ec 6.00pm ta 'Claare ny Gael' goll er skeayley-magh, as va episode elley er-nyn-son ass Dracula liorish Bram Stoker. Choud's ta'n Chiarn Godalming as Jonathan Harker faagail y baatey liauyr oc dy varkiagh er-mooin cabbil, as choud's ta Quincey Morris as yn Fer-lhee John Seward er-mooin cabbil hannah, as ooilley jeu fo raad gys Cashtal Dracula, ta'n Olloo Van Helsing er n'aagail Mina Harker coadit ayns kiarkyl Casherick as t'eh goll ny lomarcan stiagh 'sy chashtal.

CLAARE NY GAEL

Memorandum yn Er-lhee Van Helsing.

5 Mee Houney, fastyr.—Ec y chooid sloo ta mee er my cheeayll. Booise da Jee son y vyghin shen er chor erbee, ga dy row prowal shen er ve agglagh. Tra ren mee faagail y Ven-seyr Mina ny cadley çheusthie jeh'n chiarkyl Casherick, ren mee goll roym gys y chashtal. Va oard y ghaaue doo ren mee goaill 'sy charriads veih Veresti ymmydoil; ga dy row ny dorryssyn ooilley foshlit ren mee brishey ad veih ny jeushanyn mergagh, er aggle dy jinnagh drogh-chiarail ny drogh-haghyrt ennagh dooney ad, myr shoh lurg dou goll stiagh ayn foddee nagh beign abyl dy chosney magh ass. Va keeayll chionnit harroo Jonathan cooney lhiam ayns shoh. Lesh cooinaghtyn aym er y lioar-laa echey ren mee feddyn y raad aym gys y çhenn chabbal, er y fa va fys aym dy row ayns shoh va'n obbyr aym ny lhie. Trome-ghroamagh va'n aer; v'eh jeeaghyn dy row torcan sulphuragh ennagh ayn, va ny keayrtyn cur orrym ve thollaneagh. Edyr va buirrooghey ayns my chleayshyn ny ren mee clashtyn foddey voym y gull jeh moddee oaldey. Eisht ren mee smooinaghtyn er my Ven-seyr Mina veen, as va mee ayns cront agglagh. Va mee goit eddyr yn daa ghoilleeid. Ish, cha b'lhoys dou cur-lesh stiagh 'sy voayl shoh, agh daag mee ee sauçhey veih'n Sooder Folley 'sy chiarkyl Casherick shen; as ny yeih eer ayns shen veagh y moddey oaldey! Ta mee reaghey dy vel yn obbyr aym ny lhie ayns shoh, as bentyn da ny moddee oaldey shegin dooin injillaghey shin hene, my vees aigney Yee eh. Aghterbee cha row eh agh baase ny seyrsnys çheu-hoal jeh shen. Myr shen ren mee reih er-e-son. Dy beagh eh er ve agh er-my-hon ynrican veagh yn reih er ve ny sassey, va beeal y voddey oaldey ny share dy ve ny lhie ayn na oaie yn Sooder Folley! Myr shoh ren mee reih dy gholl er lesh my obbyr....

Va fys aym dy row three oaiaghyn ec y chooid sloo dy gheddyn—oaiaghyn as ta fir ayndaue; myr shoh ta mee ronsaghey, as ronsaghey, as ta mee geddyn fer jeu. V'ee ny lhie 'sy saveen eck jeh Sooder Folley, cha lane dy vioys as dy aalid miandagh dy vel mee er creau myr dy beign er jeet dy yannoo dunverys. Ah, cha nel mee dooyteil ayns ny shenn laghyn, tra va reddyn jeh'n lheid ayn, dy ren ymmodee deiney ren goll rhymboo dy chooilleeney lheid yn churrym as v'aym, feddyn magh fy yerrey dy row eh e chree failleil, as eisht y daanys echey. Myr shoh t'eh cumrail, as cur shaghey, as cur shaghey, as cur shaghey, derrey vees eer aalid as cleayn y Neu-varroo rouanagh er chur eh fo phishag; as t'eh tannaghtyn foast ayn as foast ayn, derrey ta'n lhie-ghreiney çheet, as ta saveen yn Sooder Folley ec kione. Eisht ta sooillyn aalin y ven stoamey fosley as ta shilley y ghraih ayndaue, as ta'n beeal miandagh currit son paag—as s'faase ta dooinney. As ayns shen ta tannaghtyn dreih elley ayns fank yn Sooder Folley; fer elley dy vishaghey straneyn graney ny Neu-verriu!...

Ta paart dy chleayn ayn, dy shickyr, tra ta mee goll er meiyghey liorish veg agh fenish y lheid myr shoh, eer ny lhie myr v'ee ny lhie ayns oaie boirit lesh eash as trome lesh joan ny cheeadyn dy vleeantyn, ga dy vel y rah eajee shen ayn jeh'n lheid v'ec lhiaghtyn y Chount. Va, va mee er my veiyghey—mish, Van Helsing, lesh ooilley yn chiarail aym as lesh yn oyr aym son cur dwoaie—va mee er my veiyghey gys yeearree dy chur shaghey va jeeaghyn dy chur ny ablidyn aym gyn mhioyr as dy phlooghey yn eer annym aym. Foddee dy row eh dy row feme jeh cadley 'syn aght cadjin, as tranlaase quaagh yn aer goaill toshiaght er goaill mainshtyraght orrym. Shickyr v'eh dy row mee tuittym ayns saveenys, y saveen shen lesh sooillyn foshlit jeh peiagh ta lhiggey lesh cleayn millish, tra ren çheet trooid yn aer jeant marroo lesh y sniaghtey dobberan liauyr injil, cho lane dy hrimshey as dy hreihys dy ren eh doostey mee gollrish feiyr y chayrn. Er yn oyr dy row eh coraa my Ven-seyr Mina veen ren mee clashtyn.

Eisht ren mee jannoo reen mee hene reesht gys my churrym eajee, as ren mee feddyn liorish tayrn ersooyl mulleeyn ny oaiaghyn fer elley jeh ny shuyraghyn, y fer dorraghey elley. Cha b'lhoys dou farkaghey dy yeeaghyn urree myr ren mee er e shuyr, er aggle keayrt elley dy jinnin goaill toshiaght er ve goit fo chleayn; agh ta mee freayll rish ronsaghey derrey, lurg tammylt beg, ren mee feddyn oaie vooar ard myr dy beagh eh jeant son fer braew-ennoil y shuyr aalin elley shen va mee, gollrish Jonathan, er nakin tayrn cooidjagh ee hene ass breneenyn y chay. V'ee cho stoamey dy yeeaghyn er, cho gial lesh aalid, cho miandagh ard-yindyssagh, dy row yn eer cheeayll myr dooinney çheusthie jeem, vees cur eam er kuse jeh'n cheintys aym dy chur graih er as dy choadey fer jeh'n cheintys eck, cur er my chione cassey mygeayrt lesh ennaghtyn noa. Agh booise da Jee, cha row y dobberan shen veih'n annym ec y Ven-seyr Mina er lheie ersooyl ass my chleayshyn; as, roish my voddagh y phishag ve jeant ny smoo orrym, va mee er niartaghey my nearagyn gys yn obbyr keoie aym. Liorish y traa shoh va mee er ronsaghey ooilley ny oaiaghyn 'sy chabbal, choud's va fys aym er; as er yn oyr nagh row agh three jeh ny scaanjoonyn Neu-varroo shoh mygeayrt-y-mooin 'syn oie, va mee shein nagh row fer erbee elley jeh ny Neu-verriu lheiltagh ayn. Va un oaie vooar smoo çhiarnagh na ooilley ny fir elley; feer, eer vooar v'ee, as jeh cummaghyn stoamey. Urree cha row agh un ockle

DRACULA.

Shoh eisht va thie Neu-varroo Ree ny Sooderyn Folley, er-e-hon va whilleen elley yn oyr. Va'n folmid eck ginsh dou dy baghtal dy yannoo shickyr ny va fys aym er. Roish my ren mee goaill toshiaght dy chur er ash ny mraane shoh da ny kirp varroo oc hene trooid yn obbyr atçhimagh aym, ren mee cur ny lhie ayns oaie Dracula paart jeh'n Oalan, as myr shoh ren mee eebyrt eh voee, Neu-varroo, dy bragh.

Eisht ren my obbyr eajee goaill toshiaght, as va mee goaill aggle mooar roish. Dy beagh eh er ve agh unnane, veagh eh er ve aashagh, fo ny harrish. Agh troor! Dy ghoaill toshiaght daa cheayrt elley lurg dou goll trooid immeeaght dy scoigh; er-son my row eh agglagh marish yn Inney Lucy villish, cre'n aght nagh bee eh marish ny fir joarree shoh v'er hannaghtyn ayn trooid cheeadyn dy vleeantyn, as v'er n'gholl er niartaghey liorish ny bleeantyn goll shaghey; as veagh ad, dy voddagh ad, er chaggey son y vioys feohdoil oc....

Oh, my charrey John, agh v'eh obbyr y vutçhoor; mannagh beign er ve jeant daaney liorish smooinaghtyn er sleih elley va marroo, as jeusyn va bio as er-nyn-skyn va croghey lheid y vrat dy aggle, cha beign er ve abyl dy gholl er lesh.

-----

Meer elley ass chyndaays 'sy Ghaelg jeh Dracula, y lioar ard-ghooagh shen scruit ec Bram Stoker. Va shen ry chlashtyn ayns 'Claare ny Gael'.

As myr shoh, shen eh y cheayrt shoh, as veih'n phodcast shoh, Abbyr Shen Reesht, slane lhiu.

Subscribe to this podcast

Share