Meeryn ass Traa dy Liooar, Jelune 9oo Mee ny Nollick 2024
Ta Oltey yn Chiare as Feed son Middle, Stu Peters, greinnaghey y Reiltys dy yeeaghyn reesht myr cooish phreaysagh er ny deanyn as ny claareyn argidoil echey bentyn da net-zero as dy ghoaill ayns laue obbyr bentyn da caghlaa emshyraght ayns aght smoo pragmatagh. T'eh cremmey y reaghys jeant 2022 dy chur £40 millioon punt da'n Voayrd Caghlaaee er Caghlaa Emshyraght, as t'eh coyrlaghey jeeraghey eabyn er niartaghey y tarmaynys.
Ga dy vel feme er cooilleeney deanyn er net-zero rere yn leigh, ta'n Ard Shirveishagh, Alfred Cannan, er n'ghoaill rish dy vel eh doolaneagh dy yannoo ny sloo yn towse dy stoo currit magh liorish 35% liorish 2030. Ta Reiltys y Reeriaght Unnaneysit fo'n Phartee Obbraghys er chur gialdyn son deanyn eer ny s'geyrey dy yannoo ny sloo yn towse vees goll er cur magh, agh ta argane Mnr Peters dy vel yn ymmyrkey shen goll er imman liorish eie-oaylleeaght politickagh.
Ta Mnr Peters gra nagh vel coyrlaghey dy nee foalsey ta caghlaa emshyraght, agh dy vel eh coyrlaghey dy vel aghtyn elley dy yannoo reddyn, as fakin ny cumrailyn argidoil er yn Reiltys ec y traa t'ayn, nagh vel argid son scoillyn ny son kiarail slaynt ny son bun-troggalys, dy lhisagh shin sur-smooinaghtyn reesht er ny tosheeaghtyn ain, as nagh vel eh credjal dy vel caghlaa emshyraght jannoo seose tosheeaght. T'eh gra myr shoh dy vel feme, er-lesh, er jeeaghyn rish foddey as dy geyre er ooilley ny reddyn fouesyn ta shin er chur yn ennym ain, as dy by chosoylagh eh dy row eh lesh yn aigney share 'sy theihll as lesh kiarail vie.
Ta Mnr Peters gra dy vel ymmodee cheeraghyn mygeayrt-y-mooin er n'yannoo briwnys nish dy jean ad cur streean er reddyn gollrish shoh, myr shoh dy vel y Reeriaght Unnaneysit, Nalbin, shiartanse dy cheeraghyn yn Oarpey, er n'ghra nish, 2030, 2035, 2050, foddee nagh jean mayd bwoalley ny deanyn shen, as foddee nagh lhisagh ad, ansherbee, er yn oyr dy vel gaue trome ain jeh jannoo assee da'n tarmaynys. T'eh gra dy vel shen red ennagh lhisagh shin jannoo ayns Ellan Vannin, as er-lesh dy vel feme ain er caghlaa gys yn aght mie shenn emshiragh shen jeh Traa dy Liooar bentyn da caghlaa emshyraght.
Bentyn da kiarail y Phartee Obbraghys 'sy Reeriaght Unnaneysit dy yannoo ny s'geyrey aghtyn dy chur-rish caghlaa emshyraght, ta Mnr Peters gra nagh nee sheanse eh, dy vel eh eie-oaylleeaght politickagh t'ayn, as y Partee Obbraghys 'sy Reeriaght Unnaneysit currit dy bollagh da stroie dy chooilley red dy chur eab er cooilleeney ny deanyn shoh er caghlaa emshyraght, dy hroggal myljyn geayee, dy cheau fortanyn, gyn veg ry akin dy heet back voue bentyn da yannoo ny sloo ayns tempreilyssyn vees goll seose ny yannoo ny sloo CO2, as nagh vel eh agh kiarail dy ghoaill lesh ard-vree gyn streean er.
Ta Mnr Peters gra, cosoyley rish shen, nish ta Donald Trump er chee goll back ayn ayns ny Steatyn Unnaneysit, dy vel eshyn ayns rieughid er n'ghra nish dy yarrood shen ooilley, nagh jean ad shen arragh er yn oyr dy vel eh jannoo assee da'n tarmaynys oc as dy vel y tarmaynys 'sy chied ynnyd. T'eh goaill rish dy jean sleih gra dy vel shen ooilley mie dy liooar, agh dy smooinaghtyn er ny oeghyn as dy bee yn seihll er aile, nagh vel shen agh boghtynid eh, as dy row neayr's Al Gore 2006, as dy vel earroo feer vooar dy ard skeeandee nagh vel ayns coardail rish y skeeal t'ayn nish bentyn da caghlaa emshyraght, as dasyn dy nee credjue eh, dy nee cult eh, as dy vel feme ain er jeeaghyn er ayns aght foddey ny smoo pragmatagh.
---oooOooo---
Va Mnr Peters cheet er Reiltys y Reeriaght Unnaneysit vees jeant ec olteynyn y Phartee Obbraghys, as ta fogrey ass Straid Downing gra dy nee lane-femoil eh goaill ayns laue creoighys y chaghlaa emshyraght bentyn da shickyrys ashoonagh son bree, son aase tarmaynagh, as eabyn dy choadey sheelogheyn t'ayn nish as ry heet.
Ayns soie Tinvaal Mee ny Nollick laa ny vairagh nee Mnr Peters cur roish treealtys dy vel barel Tinvaal eh dy lhisagh Coonceil ny Shirveishee aa-scrutaghey myr cooish phreaysagh ooilley ny deanyn as claareyn argidoil bentyn da caghlaa emshyraght, lesh kiarail dy niartaghey tarmaynys s'lhea Vannin son vondeish ny cummaltee ooilley lesh ymmyrkey smoo pragmatagh er caghlaa emshyraght.
Agh ta'n Ard Shirveishagh, Mnr Cannan, gra dy vel eh credjal dy vel yn traa er jeet dy gholl er nyn doshiaght ny dy gholl gour nyn drommey bentyn da caghlaa emshyraght. Va Mnr Cannan kionefenish ard-chaglym y Choonceil Goaldagh-Yernagh, as va caghlaa emshyraght fer jeh ny cooishyn mastey ny agenda, as t'eh fendeil yn aght ta Reiltys Vannin currit da'n chooish.
Ta Mnr Cannan gra, tra ta sleih jeeaghyn er ny vees ry yannoo bentyn da shoh, as jeeraghey er bree as gientyn bree 'sy traa ry heet as shickyrys bree 'sy traa ry heet, dy vel feme ain ayns rieughid er goaill ayrn, as er cur stiagh ny vees femoil er baih ayn, bentyn da ny reillyn femoil, agh bentyn neesht da baih ayns shareaghey caaghyn da sleih 'sy voayl shoh, as dy vel ad er vaih paart dy argid myr sampleyr ayns yn skeim son fondid bree, liorish va caa da sleih dy gheddyn cooney veih'n Reiltys son aghtyn dy yannoo ny share thieyn, as er-lheh sleih as ta cheet stiagh sinshley oc.
Ta Mnr Cannan gra dy vel eh smooinaghtyn dy jean sleih fakin tra t'ad cheet gys yn resooney magh shoh nagh vel ad ayns rieughid er maarail towseyn feer vooar dy argid foast 'syn ard er-lheh shoh, as er-lesh dy nee bit dy far-skeeal eh dy ghra dy vel er maarail ymmodee millioonyn dy phuint, ga dy vel ad er vaih paart dy argid. T'eh gra dy vel eh mychione goll er nyn doshiaght ny goll gour nyn drommey. T'eh gra dy vel dy chooilley pheiagh mygeayrt-y-mooin nish goaill toshiaght er ny agenda shoh.
Ta Mnr Cannan gra dy vel scughey caghlaaee feer vooar ayn, as er-lheh bentyn da gientyn bree vees aa-noaghey, as er-lesh dy beagh yn imnea echey, dy jinnagh shin tayrn magh ass shen, mannagh ren shin baih argid ayn, mannagh row shin shirrey ny caaghyn, dy jinnagh shin feddyn dy row shin faagit cheu-chooylloo jeh'n chlaare son baih argid ooilley cooidjagh, as lhiassaghey ny tarmaynyssyn ooilley mygeayrt-y-mooin, myr shoh dy vel eh orrin dy mooar goaill ayrn 'sy chooish shoh, as er-lesh dy vel feme ain er goll er nyn doshiaght, as er-lheh lesh bree vees aa-noaghey, as feme ain er sur-smooinaghtyn er yn aght ta shin shareaghey ny thieyn ain.
Ta Mnr Cannan gra, fy yerrey dy vel eh smooinaghtyn dy vel eh lane-femoil dy yeeraghey ayns ooilley jeh shoh, er deanyn, dy vel ad scanshoil ayns caghlaa emshyraght, agh chammah's shen ny caaghyn da sleih son thieyn s'choe dy ve oc, as dy treishteilagh lectraghys sloo costallagh, dy ve abyl dy lhiassaghey y vea oc dy kiart choud's ta chagnoaylleeaght as y co-voodeeys ayns ardyn elley as ayns lughtyn-reill elley lhiassaghey, myr shoh dy vel eh scanshoil dy reayll rish ve rea rish ny vees taghyrt ooilley mygeayrt-y-mooin as shegin dooin freayll rish baih ayn, agh dy vaih ayns ny ardyn kiart as son shickyrys dy vaih dy creeney.
Ta Mnr Cannan gra dy vel feme er freayll dy chooilley red ayns cormid, as dy nee scanshoil eh dy vel shin gimman er e hoshiaght y tarmaynys, agh dy jarroo dy vel ymmodee eddinyn ec y tarmaynys. T'eh gra dy vel jeadys ayns shirveishyn argidoil feer lajer ain 'syn Ellan, as dy vel eh er loayrt mychione baih argid dy jeeragh veih cheeraghyn joarree dy vel ny Croghaneyn Crooiney ooilley cooidjagh gientyn son y Reeriaght Unnaneysit trooid speeideilys kerroo ny shirveisyn argidoil ain, as dy vel startaghyn jeh mieys trooid ny jeadyssyn speeideilagh ain feer scanshoil, as dy jarroo dy vel eh orrin gientyn shen 'sy turryssid as ayns ardyn elley, ayns jannoo cooid myr sampleyr.
Ta Mnr Cannan gra nagh lhisagh shin jannoo veg jeh'n nhee, myr dooyrt eh, dy vel palchey argid goll er baih, as er-lheh ayns gientyn bree, harrish ny Ellanyn Goaldagh, harrish yn Oarpey, my vees yn Ellan dy jarroo geearree tannaghtyn myr ayrn jeh'n chlaare, as dy ve freggyrtagh dy kiart da goaill caaghyn son argid dy ve baiht, da goaill caaghyn tarmaynagh, eisht dy vel feme ain dy jarroo er freayll rish baih ayn, agh dy vel feme ain er ve glick mychione ny ardyn ayn ta shin baih as jannoo shickyr dy vel shin cleeir mychione y dean s'jerree jeh.
Ta Mnr Cannan gra dy vel fys ain dy nee doolaneagh ta'n chlaare er caghlaa emshyraght bentyn da deanyn er-lheh, agh tra vees shen currit rere reddyn ry yannoo, as dy vel ny reddyn shen ry yannoo mychione jannoo shickyr dy vel shin jeant aarloo son gientyn bree foddey 'sy traa ry heet, nagh vel eh bentyn ynrican da'n cho-voodeeys y laa t'ayn jiu, dy vel eh bentyn da ny paitchyn ain as cloan nyn baitchyn as jannoo shickyr dy vel ny saaseyn coadee ain as y bun-troggalys t'adsyn feme son reddyn dy heet lhieu neesht.
Ta Mnr Cannan gra dy vel eh doillee tra ta caghlaa mooar ec sleih as tra ta reddyn goll er caghlaa, as nagh vel eh dy kinjagh aashagh, agh dy vel caaghyn ayn, as dy vel eh shickyr jeh shen, as my vees shin speeideilagh dy jean mayd geddyn shickyrys bree, as my vees eh feer speeideilagh dy jean mayd geddyn priosyn foddey ny sloo son bree, as dy jarroo dy jean mayd lhiassaghey schleiyn as chagnoaylleeaght nee cur caaghyn da sleih as lhiggey da paart jeh ny kerrooyn ain dy hannaghtyn lesh lhiassaghey, as dy phrowal jannoo cooid fer jeh ny caaghyn shen.
Ta Mnr Cannan gra, my vees shin cheet dy hoiggal ny share ny vees femoil son geuley livrey son jannoo oltyn beggey cochianglt rish gientyn geayee ny rish caaghyn elley son gientyn, eisht dy vod mayd dy treishteilagh troggal caa son geuley livrey smoo speeideilagh dy vod mayd goaill ayrn, myr shoh dy vel ymmodee ardyn ayndaue dy vod mayd sur-smooinaghtyn er dy vel caaghyn ayn, as jannoo yn red share jeusyn shen, as cur orroo taghyrt, dy jarroo, dy vel shen jannoo seose neesht paart jeh'n freggyrt da shoh, myr shoh dy vel mooarane obbyr ry yannoo. T'eh gra dy vod sleih fakin dy cleeir dy vel caaghyn ayn roin, as dy vel jannoo yn red share jeusyn as cur orroo taghyrt, dy jarroo, dy vel shen y paart echey as y paart ec yn Reiltys.
---oooOooo---
Cooish elley vees goll roish olteynyn Tinvaal, shen Freggyrt Polasee y Voayrd er Thieys as y Cho-voodeeys da'n chied Sess Neu-chrogheydagh er Feme son Thieyn jeant ec yn Ellan. Ta dean y vree dy chur-rish gennid dy hieyn liorish troggal, cur ny cooney lesh thieyn vees ry fordrail, lurg cur geill da sess vees tannaghtyn ayn jeh feme er thieyn. Agh nee shen ny lhie er geddyn argid, cur enn er ynnydyn dy lhiassaghey, as er reirey couyryn troggee.
Ta Caairlagh y Voayrd, David Ashford, gra dy vel fer jeh ny cooishyn feer vooar, shen dy vel feme ain er jeeaghyn er yn aght ta shin jannoo tosheeaghtyn son troggal. T'eh gra dy vel ymmodee skeimyn lesh ny lughtyn-reill ynnydoil, myr sampleyr, tra ta lughtyn-reill ynnydoil jeeaghyn er y sthock, as ta claare jeih bleeaney ec Doolish, as ny vees feme orrin jannoo, shen dy yeeaghyn er yn aght ta shin cur argid ec y traa t'ayn son thieyn sheshoil, as er-lesh dy vel eh goll er jeeaghyn er dy mooar ec y traa t'ayn dy yannoo seose paart dy lhiastynys, agh shaghey shen dy vel eh ayns rieughid baih argid.
Ta Mnr Ashford gra dy vel shoh bentyn da jeeaghyn er ny cummaghyn son cur argid as jannoo shickyr dy vel shin abyl dy lhiggey magh bun-argid jehsyn foddee sleih ayns rieughid jannoo ymmyd dy gheddyn ny thieyn shen troggit dy jarroo. T'eh gra dy vel yn Reiltys ve feer shickyr ayns gra dy vel eh 1,000 thie harrish 10 bleeaney, as dy vel shen bunnidagh dy liooar, mooar-vianagh dy liooar, as dy vel eh yn chied cheayrt choud's oddys eh fakin dy row rieau scruit sheese gioal shickyr veih lught-reill dy yannoo shoh as dy imman er y hoshiaght eh.
Ta'n docamad cheet er cur er bun Sheshaght Hieys, as ta Mnr Ashford gra dy vel y cummey son yn Cheshaght Hieys ec y traa t'ayn goll er kiaddey, as nagh vel eh son cheet rolaue er shen nee goll dy cummyssagh roish Tinvaal fy yerrey, as she reaghys son Tinvaal eh er yn aght foddee dy jean yn Sheshaght Hieys gobbraghey, ny, dy jarroo er y chooish, bee Sheshaght Hieys ain er chor erbee. T'eh gra dy vel foast shiartanse dy cheimyn dy gholl trooid ayns oardagh yn ard-whaiyl. T'eh gra dy beagh y plan ec y toshiaght dy beagh yn Cheshaght Hieys ynrican reireyder sthock y Rheynn Bun-troggalys, dy jinnagh eh croo yn scoltey shen nagh vel ayn ec y traa t'ayn.
Bentyn da'n scoltey shoh, ta Mnr Ashford gra dy vel yn Rheynn Bun-troggalys ec y traa t'ayn chammah's yn chiarn thallooin as yn reilleyder, as nagh row eh rieau dy persoonagh souyr lesh shen. T'eh gra dy jinnagh y reaghys noa cur ablid dy chur harrish sthock y Rheynn Bun-troggalys, as eisht 'sy traa sodjey dy bee'n Sheshaght Hieys jeeaghyn er aghtyn foddee eh imman er nyn doshiaght ardyn elley neesht, jeh'n lheid as thieyn son kionneyderyn yn chied cheayrt, jeh'n lheid as sheeyney magh thieys 'sy cherroo theayagh as neesht dy cummyssagh skeimyn son kionneyderyn yn chied cheayrt.
Ta sleih er ve loayrt mychione slattys noa bentyn da thieyn ta nyn lhie ass ymmyd. Ta Mnr Ashford gra dy vel sleih jeeaghyn er caghlaaghyn cummey, as dy row coloayrtys roish y theay er ymmodee jeusyn shoh hannah, mychione scryssey magh seyrsnys veih eeck keesh valjagh er thieyn ta faagit follym rish tammylt mooar dy hraa, lesh saaseyn dy yeeaghyn er eabyn dy gheddyn ad back ayns ymmyd reesht trooid saaseyn elley, jeh'n lheid as sleih ve abyl dy chur stiagh son shiartanse dy eeasaghtyn dy cummyssagh dy gheddyn thie currit-lesh back ayns ymmyd.
Ta Mnr Ashford gra dy vel caghlaaghyn reih dy chleayney as dy imman ayns ny tuarastylyn shen, va roish y theay as ayns resoonaghyn magh rish tammylt dy liooar nish, as dy vel yn red scanshoil dy vel ad gimman er y hoshiaght y chooish shoh, er yn oyr dy vel thieys dy kinjagh cheet myr mynjeig, as er-lesh dy vel y doilleeid eh dy vel shin ceau roud ny keayrtyn jeeraghey stiagh er ny ayrnyn er-lheh, myr shoh jeeaghyn er kionneyderyn y chied cheayrt nyn lomarcan, jeeaghyn er sleih cheet dy ve nyn daaue as dy cummyssagh goll stiagh ayns thie sloo myr cooish ny lomarcan, jeeaghyn er thieys y cherroo theayagh ny lomarcan, as ny vees feme ain er jannoo, shen dy yeeaghyn er ooilley cooidjagh, as dy vel shen ny va jeant ec yn Sess Neu-chrogheydagh er Feme son Thieyn, as shen ta goll er jannoo liorish strateish y reiltys vees gimman veih'n Sess Neu-chrogheydagh er Feme son Thieyn.
Ta'n Sess Neu-chrogheydagh er Feme son Thieyn jannoo faaishnys dy bee feme er whilleen as 10,000 thie noa dy ve troggit liorish 2041, my vees eh cheet lesh dean y Reiltys dy vishaghey y pobble gys 100,000.
Ta treealtyssyn ard-scanshoil y Hess goaill stiagh-
• y cummys jeh cur er bun Sheshaght Hieys neu-chrogheydagh Mee Averil 2025 dy ve 'sy phaart jeh chiarn thallooin son thieys 'sy cherroo theayagh as dy cummyssagh dy heeyney magh yn towse dy hieyn vees ayn;
• dy ghoaill toshiaght er jannoo ymmyd reesht jeh 48 thie 'sy cherroo theayagh ta nyn lhie follym; as
• ve currit dy chur enn er ynnydyn as s'lesh y Reiltys ad son aaght lesh cooney cheusthie jeh'n 12 vee shoh cheet.
Ta deanyn 'sy traa giare dy jeeraghey er karraghey thieyn 'sy cherroo theayagh ta cheet dy ve shenn as nagh vod sleih baghey ayn er coontey costyssyn cho ard dy charraghey ad ec y traa t'ayn.
My vees olteynyn Tinvaal coardail rish soiaghey jeh'n tuarastyl, yinnagh y freggyrt polasee cheet ry cheilley rish deanyn s'lhea ayns Plan yn Ellan, 'sy Strateish Tarmaynagh as rish moyllaghyn jeant ec Bing Reiht Tinvaal er Boghtynys.
---oooOooo---
Ta'n Shirveishagh Tashtee, yn Fer-lhee Alex Allinson, goaill rish dy vel y costys fy yerrey hoal jeh'n shalee dy hroggal stashoon marrey noa ayns Leyrphoyl foast neu-vaghtal. Shen er coontey strane dy choontyssyn t'ayn as ta argane fo raad my-nyn-gione.
Ayns freggyrt da feysht liorish Oltey yn Chiare as Feed son Doolish Veanagh, Chris Thomas, ta'n Fer-lhee Allinson gra dy vel briwnys leighoil foast fo raad er caghlaaghyn eeckys t'er ve jeant hannah liorish yn Rheynn Bun-troggalys rish ny caghlaaghyn conaanteyder cochianglt rish y skeim cramp dy liooar shoh, as dy vel kuse dy eeckyssyn nish goll er shirrey, as dy vel argane my-nyn-gione. T'eh gra, cho leah's ta'n sym jerrinagh shen ain, as dy bee shen dy baghtal as dy neu-aighoil erskyn yn £70 millioon ren Mnr Thomas cheet er, eisht dy bee shen currit back gys Tinvaal son vote elley liorish yn Rheynn Bun-troggalys.
Ta'n Fer-lhee Allinson gra dy vel fer jeh ny reddyn cramp mychione y chonaant, shen foddee dy vel briwnys as argane leighoil erbee er paart jeh ny symyn cochianglt rish as ta argane ayn my-nyn-gione goll er rish whilleen as 12 vee lurg kione ve currit er y chalee, myr shoh dy vel shin son shickyrys jeeaghyn 'sy chied ny'n nah raiee 'sy vlein shoh cheet, agh dy vel yn Tashtey geddyn coyrle leighoil er-lheh dy chur eab er jannoo shickyr dy bollagh, raad ta'n Rheynn Bun-troggalys gennaghtyn nagh vel goll shaghey yn traa ny baarail rour er coontey caghlaa erbee ayns cummaghyn, ny eiyrtys jeh yn aght ta'n skeim cho cramp, dy vel doolane currit fo shen dy bollagh, as dy jean yn Tashtey cur eab er cur prios jeeragh er y skeim as kione er choud's ta shin goll er nyn doshiaght.
---oooOooo---
Ta'n Fer-lhee Allinson gra dy vel eh treshteilagh dy bee kione currit er shalee dy lhiassaghey eear thie ny boandyryn ayns Raad Westmoreland ayns Doolish 'sy traa as son y chlaare argidoil reaghit er-e-hon. She'n Tashtey ta'n un ronneyder ayns Co-chorp Lhiassee Vannin, t'er ve gobbraghey dy caghlaa eear thie ny boandyryn dy ve 37 cummal rea. Va thie ny boandyryn troggit 1953 as trooid ny bleeantyn ta aaght shallidagh er ve ayns shen son cheeadyn dy voandyryn va gobbraghey da Thie Lheiys Noble.
'Sy vlein 2022, ren Co-chorp Lhiassee Vannin fograghey magh dy beagh ny cummalyn rea noa, lesh edyr un shamyr lhiabbagh ayndaue ny daa hamyr lhiabbagh, son studeyryn cheet back dy obbraghey 'syn Ellan as son obbreeyn ard-scanshoil, shaghey ve creckit da sleih dy chosney argid magh ass mayle.
Va caa da politickeyryn goll mygeayrt y seyraad er y gherrid. Agh ec y toshiaght va'n Co-chorp gra dy jinnagh yn obbyr lhiassee costal ny sloo na £9 millioon, agh nish t'eh gra dy bee'n costys jeh ny smoo na £11 millioon.
Dinsh yn Fer-lhee Allinson da Olteynyn yn Chiare as Feed Jemayrt shoh chaie dy vel eh treishteil dy bee sleih baghey 'sy teyraad 'sy chied raiee jeh'n vlein shoh cheet. T'eh gra dy nee shalee eh jeh scaailley mooar, as dy by vaghtal eh dy vel eh er n'ghoaill palchey hraa as eab dy gheddyn kiart eh, as dy vel eh feer wooisal da olteynyn ren goaill vondeish jeh'n chuirrey son turrys mygeayrt y troggal dy yeeaghyn er yn aght t'eh er n'gholl er lhiassaghey dy feer dy aa-vioghey shenn troggal treigit dy ve currit back gys ymmyd tarmaynagh.
---oooOooo---
Faggys da eear thie ny boandyryn ayns Doolish, ren yn Reiltys baarail bunnys £70,000 er lhieggal eear bunscoill Ballacloan ayns Raad Demesne, agh nagh vel eh shickyr cre'n leagh t'er ve currit er yn ynnyd shen. Ghow toshiaght er obbyr dy lhieggal yn eear vunscoill Jerrey Geuree nurree, lurg jee dooney 'sy vlein 2016. Va feyshtyn er yn Er-lhee Allinson ayns soie yn Chiare as Feed Jemayrt shoh chaie mychione creck yn ynnyd shen, as ren eh feeraghey nagh row eh currit er y vargey foshlit. Va feysht currit er neesht, row Co-chorp Lhiassee Vannin geeck mayle son jannoo ymmyd jeh'n ynnyd dy stoyral carbid as greienyn troggee.
Va Oltey yn Chiare as Feed son Carbory, Balleychashtal as Malew, Jason Moorhouse, va ny mast'ocsyn va gindys cre'n fa va reddyn jeeaghyn dy ve goll cho moal. T'eh gra dy row eh bunnys three bleeaney neayr's y lhieggal, as dy vel Co-chorp Lhiassee Vannin er ve rheynn seyraadyn yn ynnyd rish tammylt dy liooar dy hraa, as t'eh briaght jeh'n Shirveishagh Tashtee vod eh ginsh da olteynyn cre cho faggys t'ad dy choardail prios son creck yn ynnyd, as cuin t'eh jerkal rish y choardail jerrinagh dy ve jeant.
Ta'n Fer-lhee Allinson gra dy row leagh currit er yn ynnyd follym liorish feeackeyder y Reiltys Mean Souree mleeaney, as dy vel obbyr goll er jannoo dy chreck yn ynnyd shoh er yn leagh shen.
---oooOooo---
Ta enn er ve currit er Thie Lheiys Noble son yn obbyr echey dy streeu rish ny gaueyn jeh myn-vioee cheet dy ve reen noi stoo lheeys. Ta rour ymmyd jeh medshinyn, gollrish stoo anti-biotagh, cur er shiartanse dy haaseyn lheiys ve gyn ymmyd choud's ta myn-vioee er jeet dy ve reen noi oc. Magh ass shoh, ta feme ny keayrtyn er sleih tannaghtyn ny sodjey 'sy thie lheiys, gaue smoo jeh geddyn baase, as gaue dy jean doghanyn skeayley-magh gys sleih elley.
Ta'n thie lheiys er chosney enn recortit veih Sheshaght Goaldagh y Chemotherapee Anti-vyn-vioeeagh. Cha nel agh earroo beg dy heshaghtyn y chiarail slaynt trooid ny Hellanyn Goaldagh t'er chosney yn enn recortit shoh.
---oooOooo---
Ga dy ren Oltey yn Chiare as Feed son Doolish Yiass, Claire Christian, ceau teiy er y gherrid ayns foayr jeh treealtys nagh row barrant eck ayns Alfred Cannan myr yn Ard Shirveishagh, t'ee er jeet stiagh ayns yn lught-reill Cannan myr Shirveishagh Slaynt as Kiarail y Theay. Ta Bnr Christian gra, liorish cheet dy vel oltey yn lught-reill, dy vel pooar smoo eck ayns cur stiagh bentyn da reaghyssyn scanshoil er polasee.
Ta Bnr Christian gra, lurg y vote mychione ve gyn barrant, dy ren yn Ard Shirveishagh shirrey chaglymyn rish Olteynyn yn Chiare as Feed as Olteynyn y Choonceil Slattyssagh, as 'sy chaglym shen as loayrt rish yn Ard Shirveishagh dy row caa jee loayrt rishyn ny nuy tosheeaght shen er-e-son, as dy row eh ec yn traa shen dy ren ee gennaghtyn dy jinnagh cheet dy ve ny oltey jeh Coonceil ny Shirveishee cur jee y caa dy chur stiagh er as dy chooney dy chummey ny tosheeaghtyn shen 'sy Reiltys, as dy ren eh screeu shen 'syn oraid eck.
Ta Bnr Christian, gra dy daink ee stiagh 'sy pholitickagh dy chur er reddyn caghlaa ayns aght jarrooagh ayns bea sleih, myr shoh traa ennagh dy jinnagh oo jerkal rish paart myr shirveishagh as dy ghoaill kesmad seose, agh dy vel ennaghtyn feer lajer eck jeh cooilleeney currym, as dy row ee gennaghtyn dy feer dy row eh y currym urree dy ghoaill y kesmad seose, as nagh vel ee peiagh ennagh vees tayrn back veih doolane.
Ta Bnr Christian gra dy vel paart jeh ny schleiyn eck, dy vel ee mie dy eaishtagh, dy vel shen red ennagh t'ee cur-lesh veih ve ny cooyl-vinkeyder, as dy vel ee mie ec soilshaghey magh reddyn, as dy vel ablid eck dy obbraghey cooidjagh rish sleih elley rish dy chooilley pheiagh cochianglt rish y chooish, as dy vel shen goaill stiagh y co-voodeeys 'sy trane toshee.
---oooOooo---
Choud's va'n Ard Shirveishagh, Mnr Cannan, gaghtey myr Shirveishagh Shallidagh Slaynt as Kiarail y Theay, ren eh fograghey magh plannyn dy chur 5,800 peiagh ta fuirraghtyn er feeackleyr y Hirveish Claynt Ashoonagh ec y traa t'ayn er rolley Lheelann Feeacklagh Lhiattee y Chrink. Agh ec y traa t'ayn cha nel y Lheelann goaill sleih noa as cha nel eh reaghey quaaltyssyn elley eer er nyn son ta recortit lesh, choud's t'eh cur eab er gobbraghey trooid ny quaaltyssyn va reaghit hannah ec y chiareyder v'ayns shen roish nish.
Ta Kiarail Vannin gra dy vel ee treishteil dy bee toshiaght currit er obbyr dy hroggal chiaroo shamyr son feeackleyryn 'sy lheelann cheusthie jeh ny three mee shoh cheet, as dy vel y lheelann shirrey cur faill da feeackleyr elley, agh dy vel feme er ny neesht jeh ny reddyn shoh ve ayn roish my vees caa dy ghoaill stiagh tooilley sleih 'sy recortys echey.
---oooOooo---
Ta Slaynt Theay Ellan Vannin gra nagh vel yn Ellan surranse liorish yn un vishaghey 'syn earroo dy chooishyn dy influenza as va ry akin ayns Sostyn er y gherrid. Ayns Sotyn ta'n earroo dy leih currit da thieyn lheiys lesh y doghan er vishaghey liorish 352% cosoyley rish yn chied shiaghtin, Mee ny Nollick 2023.
Ta'n Fer-lhee Ross Keat Lhiass-Stiureyder Slaynt Theay Ellan Vannin. T'eh gra dy vel oyr lickly eh son y vishaghey ec traa shoh ny bleeaney, ny rateyn son geddyn vaccine ayns Sostyn, dy vel data ec y traa t'ayn cowraghey magh dy vel ad er n'gholl sheese, veih mysh 77% gys 71%, as chammah's shen, nagh vel y chlaare vaccine mleeaney goaill stiagh adsyn ta 60 gys 65 blein dy eash, my shoh 'syn aght cadjin dy vel earroo sloo dy leih as yn vaccine oc myr eiyrtys jeh shen. T'eh gra nagh vel shin er nakin beoyn jeh'n lheid cheddin ayns shoh, agh dy by vaghtal eh dy vel ad freayll arrey geyre er yn aght ta reddyn goll. T'eh gra dy row ad loayrt rish nyn gumraagyn ayns Thie Lheiys Noble jeeaghyn son bishaghey ayns cooishyn, as roosyn neesht ta gobbraghey neesht, nyn gumraagyn ny fir lhee chadjin, as nagh vel ad fakin veg cosoyley rish shen ec y traa shoh.
Ta'n Fer-lhee Keat gra dy vel yn red share oddys sleih jannoo dy chur eab er cur lhiettryimmys er preayssyn erbee er y choarys kiarail slaynt oc ayns shoh ny er gennaghtyn ass-layntagh, shen dy yeeaghyn er ynnyd eggey Slaynt Theay Ellan Vannin dy gheddyn magh vel ad reihalagh son geddyn vaccine, as my vees ad reihalagh, dy chur eam er lheelann nyn ver lhee cadjin ny er yn laare vaccine, croghey er yn aght t'ad reihalagh, as dy gheddyn vaccine, er yn oyr dy vel shen yn aght sassey as smoo fondagh dy yannoo sloo yn gaue oc jeh doghan influenza 'syn imbagh shoh.
Ta'n Fer-lhee Keat gra dy vel yn vaccine yn aght earroo nane dy yannoo ny sloo y gaue ec dagh peiagh as y gaue ocsyn mygeayrt-y-moo orroo t'ad graihagh, agh dy vel eh scanshoil neesht dy reayll rish ymmyrkey slayntoil dy yannoo ny sloo skeayley-magh jeh chingyssyn ennalagh erbee gollrish influenza, as dy vel shen goaill stiagh neesht Covid, Virus Syncytiagh Ennalagh, as dy jarroo chingyssyn yn imbagh, gollrish Norovirus. T'eh gra dy vel eh feer scanshoil, etiquette ennalagh, myr shoh my vees oo mughaney, jannoo shickyr dy vel oo greimmey shen ayns bussal mwannal ny ayns uihllin dty roih.
Ta'n Fer-lhee Keat gra, my vees oo gennaghtyn ass-layntagh, cur eab er tannaghtyn ersooyl veih'n voayl obbree ny veih'n scoill, ny jean skeayley-magh eh da sleih elley, as eisht reddyn elley gollrish niee dty laueyn dy reiltagh rish 20 shallid lurg dhyt jannoo ymmyd jeh'n phremmee; yn sorch dy reddyn aashagh foddee oo jannoo dy yannoo ny sloo y skeayley-magh cummyssagh jeh virusyn ec traa shoh ny bleeaney, shen feer scanshoil. T'eh gra dy vel kiare doghanyn yn imbagh ain ta goll mygeayrt ec y traa t'ayn ayns earrooyn mooar dy liooar 'sy Reeriaght Unnaneysit, myr shoh dy vel shen goaill stiagh influenza, Virus Syncytiagh Ennalagh, Norovirus as Covid-19.
Ta'n Fer-lhee Keat gra dy vel mooarane jeh ny chaghteryn bentyn da etiquette ennalagh, myr daink eh er roish nish, dy vel shen cadjin harrish ooilley ny chingyssyn shoh, agh dy dooghyssagh bentyn da three jeusyn shoh possanyn dy leih foddee goll dy gheddyn vaccine, myr shoh dy vel shen influenza, Virus Syncytiagh Ennalagh as Covid, myr shoh liorish geddyn vaccine, jannoo ymmyd jeh cliaghtaghyn slayntoil mie as jannoo shickyr dy vel fys ain, dy vod mayd ooilley gobbraghey ry cheilley myr co-voodeeys as cummal seose y coarys kiarail slaynt ain ayns ny vees dy kinjagh traa doolaneagh son y choarys kiarail slaynt.
---oooOooo---
Ta shirreyderyn er n'ghoaill toshiaght er cheet er-nyn-doshiaght son reihyssyn da'n Choonceil Slattyssagh choud's ta kiare Olteynyn yn Choonceil Slattyssagh jannoo aarloo dy heet gys jerrey ny traaghyn oc. Rere oardagh lhiassit shegin da treishteilee nish cur stiagh CV, as cheet quail Olteynyn yn Chiare as Feed cooidjagh, shaghey ve nyn lhie er enmyssaghtyn er-lheh.
Ta sleih treishteil dy jean ny caghlaaghyn bishaghey caghlaays as greinnaghey feallee noa dy chur roish nyn enmyn.
Dinsh Oltey yn Chiare as Feed son Doolish Veanagh Chris Thomas da Radio Vannin, choud's ta ny caghlaaghyn jannoo seose kesmad er oai, dy vel eh credjal dy vel feme er tooilley aghtyn dy hareaghey y chooish. Ta Mnr Thomas gra dy by vie lesh dy liooar toiggal ny ta sleih cheumooie jeh'n Chiare as Feed smooinaghtyn mychione yn feallee ta cur roish ad hene, ta cur stiagh son y startey.
Myr sampleyryn t'eh gra, ayns fockleyn elley, foddee dy vel ny eirinee cur cooidjagh cubbyl dy yeearreeyn ta jeant oc as ta'n jeadys eirinagh ayns foayr jeu; foddee dy vel lughtyn-reill ynnydoil geearree jannoo shen; foddee dy vel thieyn dellal geearree jannoo shen; foddee dy vel Sheshaght yn Lught-traghtee geearree jannoo shen; foddee dy vel fir lhee geearree jannoo shen.
T'eh gra, ayns fockleyn elley, nagh vel yn feallee shoh reiht, cha nel currym reihyssagh deynlagh oc, agh foddee ad ve nyn jaghteryn son oyr.
Ta Mnr Thomas gra dy vel yn feallee shoh shirrey dy heet stiagh ayns ard-whaiyl, as ta feme er paart dy haghteryn y ve ayns ard-whaiyl, myr shoh dy vel shoh aghin vees goll magh gys ooilley yn feallee shen ta geearree nyn goraa er-lheh ve cheusthie jeh Tinvaal dy yannoo shickyr dy vel ny shirreyderyn, as by vie lhieu fakin adsyn myr chaghteryn ass-lieh cooishyn ooilley yn sleih shen haink eh er, cur stiagh yeearree.
Ta Mnr Thomas gra, dy tradishoonagh, va Olteynyn y Choonceil Slattyssagh nyn aldermen, veih'n aght, lurg da peiagh ennagh ve reiht kuse dy cheayrtyn da'n Chiare as Feed, dy row keayrt ny ghaa oc gyn reihys, er yn oyr dy row ad shinney, va'n cheeayll chionnit er jeet orroo, va gravitas oc, va fys oc er ny v'ad dy yannoo. Ta John Moss gra dy vel ad er chosney arrym ny olteynyn elley, as ta Mnr Thomas gra dy vel shen eh dy jeeragh, agh dy vel shen ersooyl nish, as ny t'ain nish, shen caghlaays dy leih, vees sleih saa cheet stiagh ayn, as dy cummyssagh sleih as coorse oc cheusthie jeh Tinvaal rish jeihyn dy vleeantyn
Ta Mnr Thomas gra nagh beagh shen kiart er y oyr, fy yerrey, ayns ard-whaiyl dy vel politickeyryn nyn jaghteryn ass-lieh sleih, edyr dy vel ad reiht ny dy vel ad nyn jaghteryn ass-lieh possanyn as cooishyn er-lheh oc. T'eh gra, myr shoh, dy vel eshyn cur roish yn eie nish dy lhisagh ad cur cagliagh lurg daa cheayrt er yn earroo dy cheayrtyn foddee sleih jannoo shirveish, myr shoh cagliagh jeih bleeaney er yn traa foddee peiagh y ve Oltey y Choonceil Slattyssagh. T'eh gra nagh vel y Coonceil Slattyssagh hene cheet cooidjagh cho mennick as cho reiltagh, as dy vel Olteynyn y Choonceil Slattyssagh eisht jannoo shirveish myr olteynyn ny Rheynnyn as dy vel ad cheet gys Tinvaal, dy vel ad cooilleeney paartyn elley. T'eh gra, dy vel eh ry heiltyn, my vees shin cheet dy ve ayns stayd as ta chaghteryn ass-lieh eirinee, lughtyn-reill ynnydoil, yn lught-dellal, keirdyn, sheshaghtyn keirdey, as ooilley yn feallee elley t'eh kiart er jeet er, dy vel eh ry heiltyn dy vod sleih rheynn yn ynnyd dy ve Oltey y Choonceil Slattyssagh.
Ta'n traa son cur stiagh dooney yn 9 Jerrey Geuree lesh co-whaiyl yn 24 Jerrey Geuree.
Ta traa eisht ec Olteynyn yn Chiare as Feed derrey yn 13 Toshiaght Arree dy chur roish ny dy niartaghey ny reih-hirreyderyn oc. Ta cruinnaght reihyssagh plannit yn 24 Toshiaght Arree as yn reihys geiyrt er shen yn 4 Mee Vayrt. Hig ny shirreyderyn speeideilagh dy ve currit fo loo yn 11 Mee Vayrt.
---oooOooo---
Ta Sterrym Darragh ec y kione shiaghtin fer jeh ny sterrymyn smessey 'syn Ellan rish tammylt, lesh geayaghyn jeh gaalyn tromey as ec niart sterrym lhieggal ny shlee na 200 billey mygeayrt yn Ellan, as cur er kuse dy raaidyn ve dooint.
Ta George Shimmin gobbraghey da'n Oik Emshyraght ayns Runnysvie. T'eh gra dy row readan 74 meeiley 'syn oor recortit ayns shen ec Runnysvie ec nuy 'sy voghrey, as dy row rateyn cosoyley rish shen fo ny harrish trooid yn Ellan. Ren Purt Chiarn recortey readan 62 meeley 'syn oor beggan ny s'moghey 'sy voghrey, mysh queig er y chlag, as va readan 82 meeiley 'syn oor ayns Purt ny Hinshey ec mysh jeih. T'eh gra, heose er y clieau, dy row eh beggan ny smoo geayeeagh, lesh paart dy readanyn gys 96 meeiley 'syn oor ayns shen ec y toshiaght 'sy voghrey.
Ta Mnr Shimmin gra, dy cadjin dy row ny earrooyn ren ad cheet er 'sy raaue jeh readanyn eddyr 60 as 70 as eddyr 70 as 80 meeiley 'syn oor, as dy row shen son y chooid smoo yn aght, lesh mullagh er ny geayaghyn cheet son y chooid smoo 'sy voghrey. T'eh gra dy ren ny geayaghyn lhaggaghey ny veggan as ny veggan 'syn astyr, agh ren ad tannaghtyn ayn myr jeh niart gaal gys gaal trome, as nagh row eh derrey er yn oie dy ren ny gaalyn goll sheese, agh bentyn da ny myn-phoyntyn as ny raaueyn, dy row eh kiart dy liooar myr v'ad jerkal rish.
