Meeryn ass Traa dy Liooar, Jelune 4oo Mee Houney 2024
As myr ta shin er ve clashtyn rish kuse dy hiaghteeyn, ta argane mychione giarraghyn ayns shirveishyn kiarail slaynt er jeet gys lheid y stayd dy ren Oltey yn Chiare as Feed son Rhumsaa, Lawrie Hooper, irree ass yn oik echey myr Shirveishagh Slaynt as Kiarail y Theay, as ren Oltey yn Chiare as Feed son Carbory, Balleychashtal as Malew, Tim Glover, cur treealtys roish soie yn Chiare as Feed yn shiaghtin shoh chaie, Jemayrt yn 29 Jerrey Fouyir, gra nagh row olteynyn cur barrant ny sodjey ayns Oltey yn Chiare as Feed son Ayrey as Maayl, Alfred Cannn, dy chooilleeney yn oik echey myr leeideilagh Coonceil ny Shirveishee myr yn Ard Shirveishagh.
Myr haink eh magh, cha row agh shey oltey, goaill stiagh Mnr Glover hene, ayns coardail rish y treealtys echey. Cha nyrrys dooin dy ren Mnr Hooper ceau teiy ayns coardail rish y treealtys, as Oltey yn Chiare as Feed son Doolish Hiar neesht, Joney Faragher, ren irree ass myr oltey politickagh yn Rheynn Slaynt as Kiarail y Theay agh minnidyn lurg da Mnr Hooper ginsh da Mnr Cannan dy row ee girree ass.
Yn troor elley ren ceau teiy dy ghra nagh row ad cur barrant ayns Mnr Cannan myr Ard Shirveishagh, v'ad yn troor dy olteynyn ta gra dy vel eh foue gobbraghey cooidjagh myr noidys neu-oikoil da'n lught-reill Cannan, as daa jeu nyn eear Hirveishee: Oltey yn Chiare as Feed son Doolish Veanagh, Chris Thomas, va gra dy row eh arryltagh dy ghoaill ersyn currym yn Ard Shirveishagh, ren ceau paart dy hraa myr Shirveishagh Bun-troggalys roish my row yn raad currit da liorish Mnr Cannan; Oltey yn Chiare as Feed son Connaghyn, Julie Edge, va ny Shirveishagh Ynsee, Spoyrt as Cultoor ayns lught-reill Mnr Cannan; as Oltey yn Chiare as Feed son Doolish Yiass, Claire Christian.
Tra va Mnr Cannan reiht dy ve'n Ard Shirveishagh 'sy vlein 2021, va 14 teiy er-e-hon as hoght noi echey, myr shoh ayns aght ta'n stayd echey er hareaghey, lesh shey teiy ayns coardail rish y treealtys nagh row olteynyn cur barrant ayn ny sodjey, agh y cheayrt shoh va 16 teiy jeig noi'n treealtys shen, gra dy row ny olteynyn shen foast cur barrant ayns Mnr Cannan. Va ny 16 oltey shen Mnr Cannan hene, as dagh oltey yn Choonceil Slattyssagh – shen dy ghra:
• yn Lhiass Ard Shirveishagh ta ny Shirveishagh Cooishyn Sthie as Oltey son Middle, Jane Poole-Wilson;
• yn Shirveishagh Tashtee as Oltey yn Chiare as Feed son Rhumsaa, yn Fer-lhee Alex Allinson;
• yn Shirveishagh Chymmyltaght, Bee as Eirinys, as Oltey son Doolish Hiar, Clare Barber;
• yn Shirveishagh Ynsee, Spoyrt as Cultoor, as Oltey son Garff, Daphne Caine;
• yn Shirveishagh Bun-troggalys, as Oltey son Glionfaba as Purt ny Hinshey, Tim Crookall;
• yn Shirveishagh Gastid Dellal, as Oltey son Ayrey as Maayl, Tim Johnston;
• Shirveishagh Oik Coonceil ny Shirveishee, as Oltey son Glionfaba as Purt ny Hinshey, Kate Lord-Brennan;
Chammah's ny hoght oltey Coonceil ny Shirveishee shen, ren hoght olteynyn elley votal ayns foayr jeh Mnr Cannan:
• yn Oltey son Doolish Hwoaie, David Ashford;
• yn Oltey son Connaghyn, Rob Callister – as eshyn fer elley va currit ass oik 'sy lught-reill liorish Mnr Cannan lurg da ceau traa myr yn Shirveishagh Slaynt as Kiarail y Theay;
• yn Oltey son Doolish Veanagh, Anne Corlett;
• yn Oltey son Rushen, yn Doctor Michelle Haywood;
• yn Oltey son Doolish Yiass, Sarah Maltby;
• yn Oltey son Carbory, Balleychashtal as Malew, Jason Moorhouse;
• yn Oltey son Middle, Stu Peters;
• yn Oltey son Garff, Andrew Smith;
• yn Oltey son Rushen as Loayreyder yn Chiare as Feed, Juan Watterson;
• as yn Oltey son Doolish Hwoaie, John Wannenburgh.
Myr shoh lhig dooin geaishtagh rish paart jeh'n resooney magh shen bentyn da'n treealtys. Ta Bnr Poole-Wilson gra, dy ve baghtal, foddee dy vel yn treealtys cheet er yn Ard Shirveishagh, agh dy fondagh dy nee treealtys eh nagh row olteynyn cur barrant ayns Coonceil ny Shirveishee. T'ee gra, dy jinnagh olteynyn pohlldal y treealtys, dy beagh eh foee irree ass.
Ta Rob Callister gra, ayns yn daa vlein t'er n'gholl shaghey, dy vel trughaneys er ve ayn mastey olteynyn ta nyn gooyl-vinkeyderyn, chammah's mastey olteynyn as shirveishee t'er nirree ass Coonceil ny Shirveishee son caghlaaghyn oyr, as dy vel oyr echey ny smoo na ec yn chooid smoo ayns yn Chiare as Feed dy vroo y cramman geayney ec jerrey y resooney magh shoh y laa shen, as er-lheh lesh yn angaaish as y pian hug yn Ard Shirveishagh er y lught-thie echey as er e chaarjyn as ersyn hene dy persoonagh 'sy vlein 2022 as 2023.
As myr cheayll shin, ny yeih shen as ooilley, ren eh broo y cramman jiarg ec jerrey y resooney magh, as cha row eh ayns foayr jeh'n treealtys noi Mnr Cannan.
Ta David Ashford gra dy row yn traa er jeet son firrinyssyn bunnidagh, as dy vel fer jeu red ennagh vees goll er gra rish dy kinjagh liorish sleih cheumooie jeh'n Chiare as Feed ayns ny traaghyn jeieanagh, as shoh yn sleih lhisagh Olteynyn yn Chiare as Feed y ve chaghteryn er-nyn-son, as shen dy vel ad skee dy bollagh jeh fakin shin caggey ny mast'ain. T'eh gra dy dooyrt cubbyl dy leih dasyn laa ny ghaa er dy henney, dy vel ad skee dy bollagh jeh ny t'ad dy akin myr soiaghyn-er persoonagh, as freggyrtyn "dooyrt eshyn, dooyrt ish", ny myr dooyrt cummaltagh y rheynn reihyssagh echey, dy vel eh skee jeh ny t'ad dy akin myr shin ooilley caggey gollrish kiyt ayns saeck, as dy lhisagh shin goaill ayns laue yn obbyr va shin currit ayns shen dy yannoo.
Loayr Mnr Cannan hene 'sy resooney magh, as t'eh gra dy by vie lesh er-lheh cur booise da Coonceil ny Shirveishee echey, as y pohlldal oc y laa shen er chur ersyn ve imlee. T'eh gra dy vel ymmodee olteynyn er smooinaghtyn mychione y traa ayn ta shin baghey, dy vel ad creoi, agh neesht goll er caghlaa, as nagh vod eh agh cur enn er as toiggal ny oyryn son ve tarmsestit ec y cho-voodeeys ain ec y traa t'ayn. T'eh gra nagh vel ourys ayn dy vel Covid er n'yannoo ny smoo ny aghtyn ta'n tarmaynys sthie brishlagh, as dy vel eh er chur earroo dy ghoilleeidyn er neayr's y brishey argidoil 'sy vlein 2008.
Ta Mnr Cannan gra dy vel faill rere coontey rieugh son cosneyder injil gys meanagh er n'gholl sheese, ta errey yn cheesh er vishaghey ayns shiartanse dy ardyn as ta aggyrt son shirveishyn theayagh sheeyney magh shirveishyn 'sy strane toshee. T'eh gra, tra currit cooidjagh lesh caghlaaghyn ayns ymmyrkey 'sy cho-voodeeys as ayns cummey y phobble, dy vel eh ry hoiggal dy vel ard ny ghaa y tarmaynys ain strepey ny smoo na ardyn elley. T'eh gra dy vel ad shoh as oyryn son ve tarmestit er er nakin ymmodee caghlaaghyn ayns leeideilys politickagh harrish ny Hellanyn Goaldagh as ny sodjey ersooyl ayns ny bleeantyn t'er n'gholl shaghey er y gherrid, agh dy vel eh shickyr, agh dy vel eh neu-vaghtal as neu-hickyr cre dy jeeragh v'er ny eaysley.
Ta Mnr Cannan cheet er fockleyn Franklin Delano Roosevelt, nagh vel eab gyn marranys as lheamys ayn, as dy vel fys echey dy vel eh ny keayrtyn kyndagh rish shen, as t'eh gra, ayns ny buill va lheamys ayn er-coontey jeh, dy vel ammys echey. T'eh gra, ayns ny hoght bleeaney shoh chaie as eh shirveishagh myr yn Ard Shirveishagh as yn Shirveishagh Tashtee, dy vel eh dy kinjagh er chur stiagh yn eab smoo dagh laa, 'syn obbyr echey.
Ec jerrey y resooney magh, va Tim Glover gra dy row eh jerkal rish sleih cremmey eh, as nagh jig eh lesh y treealtys echey. Agh t'eh gra dy row feme ec olteynyn cummal y resooney magh shoh. T'eh gra dy row y clane chooish bentyn da ceau teiy mychione cur barrant 'syn Ard Shirveishagh er ve gingyragh rish foddey ny sodjey na blein ayns shoh as 'sy theihll mooie.
Ta Mnr Hooper, as yn irree ass echey jeeaghyn dy chur brod da Mnr Glover dy chur roish yn treealtys echey bentyn da barrant ayns Mnr Cannan, gra nagh vel agh mysh daa vlein er-mayrn, fo ny harrish, nish roish y nah reihys mooar cadjin. T'eh briaght, vel nish yn traa son aa-vestey mooar, as t'eh gra nagh vel yn ansoor echey da shen, er-lesh nagh vel, agh rere y varel echey dy vel feme er jeeraghey er cooilleeney reddyn. T'eh gra, myr shoh, dy vel y feysht er-e-hon, cha nee mychione Plan yn Ellan ve kiart ny neu-chiart, agh mychione y peiagh kiart ec y stiurey foddee livrey ayns rieughid bentyn da ny t'ayns shen, dyn y wooise da'n phlan hene, er yn oyr, my vees reaghys nish dy gholl dy slane gys y laue chiare, dy jean oo cheet ec jerrey yn daa vlein gyn veg, dy bunnidagh.
As eh loayrt rish Radio Vannin mychione yn eiyrtys jeh'n resooney magh, ta Mnr Cannan gra, sheeyney magh gys dagh oltey politickagh ayns aght beayn, nagh vel shen dy kinjagh ro aashagh, as dy jarroo dy vel caghlaaghyn saase as aght dy eddyr-insh: dy vel geaishtagh ayn, as eisht caghlaa yn eaishtagh dy yannoo red ennagh as dy dooghyssagh toiggal ny t'eh geaishtagh rish as yn bentynys jeh ny t'eh geaishtagh rish, er yn oyr nagh vod eh feasyley crontyn dy chooilley pheiagh; as dy jarroo my vees doilleeid ayn eisht dy vel feme er caghlaa shen gys sorch ennagh dy yantys.
Ta Mnr Cannan gra dy vel eh er n'ghra dy vel yn dorrys echey dy kinjagh foshlit, as dy vel eh dy kinjagh er chummal seose yn stayd shen, as my ta sleih er ve geearree cheet dy akin eh, eisht dy vel eh er reaghey traa 'sy jeelane echey dy yannoo shen. T'eh gra dy jean eh bout elley dy loayrt rish sleih nish, ansherbee, rish olteynyn politickagh geiyrt er y resooney magh shen, as clashtyn ny t'ad dy ghra, as er-lheh dy hoiggal ny paartyn t'ad geearree dy ghoaill cheusthie jeh'n reiltys, er yn oyr, kiare blein stiagh ayn ny stiagh 'sy chiaroo vlein, dy vel dy chooilley pheiagh geearree livrey as cur-lesh reddyn dy ve jeant t'er ve er nyn lhiassaghey ny va polasee bentyn daue goll er lhiassaghey rish ny three bleeaney shoh chaie.
Ta Mnr Cannan gra dy vel livrey neesht feer scanshoil, as dy vel reddyn as feme er goaill ayns laue ad, as er-lheh ayns reddyn gollrish ceau rour ayns kiarail slaynt, quoid ta shin baih ayns kiarail slaynt, cre vees yn co-chianglys rish Kiarail Vannin, as cre ny shirveishyn vees goll er livrey. T'eh gra dy vel feme er jantys bentyn daue, er yn oyr dy vel shin er n'yannoo mooarane feer vooar dy loayrtys as lhiassaghey polassee mychione shen, as ta feme ain er jannoo reddyn dy heeley shen, as er yn oyr shen dy vel feme er ennaghtyn dy phreays bentyn da gra, cre vees feme er livrey.
Ta Mnr Cannan gra, tra t'ou geaishtagh rish sleih, shen er yn un cheu shen, as shen dy bollagh, as eisht dy vel feme er cur feysht ort hene, foddee ayns rieughid jannoo red ennagh mychione echey, ny vel yn doilleeid t'oc ayns rieughid goll dy slane noi polasee y Reiltys ny Plan yn Ellan ny'n aght ta shin goll er nyn doshiaght.
As fastyr Jelune 4oo Mee Houney haink naight dy vel Coonceil ny Shirveishee er chur sarey da Kiarail Vannin dy scuirr veih giarraghyn elley ayns shirveishyn 'sy chied strane, as t'eh er jiooldey kuse jeh ny treealtyssyn liorish Kiarail Vannin dy spaarail tooilley argid.
Ta Mnr Cannan gra nagh vel peiagh erbee geearree fakin shirveishyn 'sy strane toshee goll er leodaghey, agh dy vel currym baghtal ec y reiltys dy livrey shirveishyn y chiarail slaynt as kiarail y theay cheusthie jeh'n argid currit son shen.
Ta Ard Sheckter Kiarail Vannin, Teresa Cope, gra dy vel ee goltaghey y reaghys shoh liorish Coonceil ny Shirveishee, agh dy vel ee cur enn neesht er currym Kiarail Vannin dy livrey shirveishyn cheusthie jeh'n chlaare argidoil. T'ee gra dy vel eh doillee, as ny keayrtyn cramp, dy ghurneil dy slane dy chooilley ard jeh ceau er slaynt as kiarail y theay, as dy vel Kiarail Vannin goltaghey y caa currit jee dy hareaghey y creatlagh ayn t'ee gobbraghey as smoo scanshoil y caa son eiyrtyssyn share son ny surransee oc, son ymmyderyn ny shirveishyn as son tackeyderyn Vannin.
She doilleeid bentyn da'n towse dy argid vees goll er ceau ec Kiarail Vannin ta moir y voirey as cree ny cooish hug er Mnr Hooper as Bnr Faragher irree ass as er Mnr Glover cur roish y treealtys echey mychione barrant ayns Mnr Cannan.
Va Kiarail Vannin currit er bun rere coyrle y Reejerey Jonathan Michael ayns tuarastyl ren Tinvaal coardail rish, agh 'sy tuarastyl shen neesht va coyrle er yn aght dy chur argid son shirveishyn slaynt ec rate erskyn shen jeh'n volgey argidoil. Ga dy row Kiarail Vannin currit er bun, cha row rieau argid currit da Kiarail Vannin 'syn aght ren Jonathan Michael coyrlaghey.
Ta'n Shirveishagh Tashtee, yn Fer-lhee Alex Allinson, gra, bentyn da tuarastyl yn Reejerey Jonathan Michael, er-lesh dy vel feme er sleih cur shen ry lhiattee, as dy vel shen y barel echey dy feer. T'eh gra dy ren eh coyrlaghey croo Kiarail Vannin, dy ren eh coyrlaghey slane reayn dy reddyn as oddagh ymmyd ve jeant jeu. T'eh gra, my vees oo lhaih yn tuarastyl echey, dy vel eh loayrt neesht mychione aghtyn elley dy chur argid son kiarail slaynt, as eer mychione preevaadjaghey, ta'n lught-reill shoh dy bollagh er naagail magh. Ta'n Fer-lhee Allinson gra, ny va jeant ec Jonathan Michael, as lurg yn tuarastyl, dy row shen dy yeeaghyn er cur argid son kiarail slaynt, as dy dooyrt eh dy row cur argid son kiarail slaynt dy kinjagh erskyn yn rate bolgey argidoil er coontey priosyn son druggaghyn, as bolgey argidoil bentyn da faill, as saaseyn chagnoaylleeagh noa.
Ta'n Fer-lhee Allinson gra, ny va er ny choyrlaghey, va shen bishaghey 3% erskyn yn rate bolgey argidoil dagh blein, as blein er vlein dy vel eh er jeet lhien ayns rieughid freayll rish shen. T'eh gra 'sy vlein 2023-24, tra ren bolgey argidoil roshtyn 9.8%, nagh ren ad cur y clane 9.8% er yn oyr dy beagh shen er ve bishaghey feer vooar, agh t'eh gra dy ren eh loayrt rish yn Reejerey Jonathan Michael mychione shen as dy vel eh coardail dy bollagh, dy vel yn red 'sy tuarastyl echey, nagh row eh jerkal rish bolgey argidoil dy heet dy ve cho ard, myr shoh dy row ad er ve cur eab er jannoo shickyr dy bollagh dy vel argid goll er cur son kiarail slaynt 'syn Ellan shoh, vees yn oyr hooar ee £43.8 millioon elley mleeaney.
Ta'n Fer-lhee Allinson gra, bentyn da'n vishaghey ayns keesh veih 20% gys 22%, dy dooyrt eh Toshiaght Arree dy row yn mian echey dy chur er bun saase er-lheh dy hroggal argid ayns ynnyd jeh shen y nah vlein, as t'eh gra dy vel shen er jeet dy ve foddey ny smoo cramp na v'eh smooinaghtyn as dy by chosoylagh eh nagh bee ablid echey dy gheddyn rey rish y vishaghey 2% shen, agh dy jean ad jeeaghyn er saase er-lheh dy hroggal argid cho leah's vees possible. T'eh gra dy vel fer jeh ny doilleeidyn lesh shirveishyn slaynt, shen nagh vod mayd freayll rish ceau argid orroo, nagh vod mayd cur daue sheck gyn caglieeyn.
Ta'n Fer-lhee Allinson gra nagh vel shen y barel ynrican echeysyn hene, dy row shen dooyrt yn Chiarn Darzi ayns tuarastyl 'sy Reeriaght Unnaneysit tra ren ad er y gherrid jeeaghyn er yn un stayd cheddin as t'ad ayn. T'eh gra dy vel feme er reirey fondagh nee cur doolane fo kuse jeh ny jerkalysyn, fo paart jeh'n cheau rour. Bentyn da faaishnys Kiarail Vannin jeh ceau rour liorish £17 millioon, dy row shen jeant lane vaghtal ayns ny coontyssyn eck Jerrey Souree. T'eh gra dy vel yn Tashtey er ve ayns shen dy chummal seose yn Rheynn Slaynt as Kiarail y Theay ayns rieughid dy ronsaghey y ceau rour shen as dy chur feyshtyn mychione y cheau rour shen, dy akin ny oddys y ve ry yannoo cheusthie jeh'n vlein dy chur-lesh shen back cheusthie jeh claare argidoil jeant corrym.
Ta'n Fer-lhee Allinson gra dy vel eh doillee, as dy vel shen yn oyr dy vel caghlaaghyn argane er ve ayn, ren leeideil gys irree ass Lawrie Hooper, as dy by hreih lesh shen dy mooar, agh dy ren eshyn goaill polasee as rere shen ayns rieughid ny va taghyrt nagh row ceau rour, as nagh vel eshyn ayns coardail rish, er-lesh dy vel saaseyn dy spaarail oddys ve jeant, dy vel aa-chummaghyn oddys ve jeant da'n shirveish claynt ain, dy livrey ny shirveishyn 'sy strane toshee.
Ta'n Fer-lhee Allinson ra dy vel eh er n'yannoo lane vaghtal eh nagh vel eh smooinaghtyn dy vel yn Shirveish Claynt Ashoonagh ain brisht. Er-lesh, tra ta shiu jeeaghyn er kuse jeh ny bishaghyn smoo ayns ceau ayns Kiarail Vannin, dy vel eh bentyn da sauchys ny surransee, as ayns rieughid ny shirveishyn currit da sleih. T'eh gra nagh vel sleih goaill tastey jeh sauchys ny surransee agh dy vel eh feer, eer scanshoil, lurg shiartanse dy huarastylyn cheet magh. T'eh gra dy jarroo dy vel ad cur feyshtyn er ceau Kiarail Vannin, dy vel ad cummal seose yn Rheynn Slaynt as Kiarail y Theay bentyn da jannoo shen,
Ta'n Fer-lhee Allinson gra dy vel ad jeeraghey dy mooar, 'sy chied ynnyd dy yeeaghyn ny vees ry yannoo oc son y vlein argidoil shoh, agh neesht, son ny caghlaaghyn bunnidagh shen as feme er jannoo ad bentyn da reill y cheau ayns Kiarail Vannin, as ayns yn shirveish claynt as chiarail y theay ain, dy chur ee rere y chlaare argidoil son y vlein shoh cheet as y vlein er-giyn.
---oooOooo---
Er cooish elley, agh foast cochianglt rish slaynt, ta'n Fer-lhee Allinson gra dy vel yn earroo dy leih aegey as chingys 'sy traa sodjey oc er-coontey doilleeidyn lesh y claynt inchynagh oc jannoo seose oyr er-e-hon ve boirit dy mooar. T'eh gra dy vel ad shoh cheet dy ve ny s'cadjiney na doilleeidyn corpoil gollrish dreeym ghonnagh ny gort. T'eh gra dy vel eh nish shirrey saaseyn dy phohlldal ad ayns cosney back gys y voayl obbree.
Ta'n Fer-lhee Allinson gra nagh vel peiagh erbee geearree ve assaaragh er-coontey chingys, nagh vel peiagh erbee geearree faagail yn lught-obbree. T'eh gra, ny vees boirey ersyn, dy vel shin er nakin, ayns ny jeih bleeaney t'er n'gholl shaghey, caghlaa vees mooar dy liooar. V'eh yn aght dy row dreeyminyn gonnagh ec sleih, oltyn brisht, chingys, anlheiltyssyn, agh ta Covid Liauyr ain as Myalgic encephalomyelitis, as slane reayn dy reddyn ta cur orroo ve assaaragh as adsyn ching. T'eh gra, ny ta shin fakin nish, chammah's ayns shoh as hoal, shen mooarane sleih aegey as ta doilleeidyn lesh y claynt inchynagh oc, as er coontey ard imnea as lhag-chreeys nagh vod ad ve mastey yn lught-obbree.
Ta'n Fer-lhee Allinson gra dy vel shen boirey ersyn dy mooar, dy persoonagh chammah's myr fer-lhee as myr yn Shirveishagh Tashtee, er yn oyr dy vel eh fakin shen myr cur caglieeyn dy mooar er y vioys oc, ny reihyn oc son nyn mea. T'eh gra nagh vel y cooney cadjin argidoil ain ro voght, agh nagh vel ad cho mie as shen, as nagh jinnagh peiagh erbee dy arryltagh goll dy gheddyn cooney cadjin argidoil 'sy traa sodjey. T'eh gra, myr shoh, ny ta shin jeeaghyn er, shen yn aght dy chur dauesyn y chooney t'ad feme, lesh coyrle as coarys mentor as cooney, dy chosney back gys yn lught-obbree.
Er-lesh yn Er-lhee Allinson dy vel dy chooilley pheiagh ayns coardail dy vel feme ain er cur tooilley couyryn ayns slaynt inchynagh, vees er-lheh son slaynt inchynagh, agh nagh vel sleih geearree sheeloghe jummit dy leih nagh vel abyl dy obbraghey, as nagh vel abyl dy hareaghey ny jerkalysyn er-nyn-son hene as jerkalysyn y lught-thie oc.
