Traa dy Liooar, Jelune 28oo Jerrey Fouyir 2024

Meeryn ass Traa dy Liooar, Jelune 28oo Jerrey Fouyir 2024

Ta shen goaill toshiaght lesh kiarail Oltey yn Chiare as Feed son Carbory, Balleychashtal as Malew, Tim Glover, dy chur treealtys roish dy ghra nagh vel barrant ec olteynyn yn Chiare as Feed 'syn Ard Shirveishagh, Alfred Cannan.

Va Mnr Cannan hene gra dy lhisagh Mnr Glover goaill ayns laue eh, dy beagh eh fosyn shen y yannoo, as dy jarroo shen ren eh. Va Mnr Glover smooinaghtyn dy beagh eh ro doaltattym dy chur treealtys roish soie yn Chiare as Feed Jemayrt shoh chaie. T'eh gra dy row fys echey dy beagh shirveishee assaaragh, as nagh beagh caa er ve ayn agh dy cheau teiy. Ren eh reaghey, myr shoh, dy uirraghtyn rish shiaghtin, myr shoh dy chur tooilley traa da olteynyn elley dy yannoo aarloo, as dy bee caa dy resooney magh y treealtys echey, shaghey ynrican dy cheau teiy. Hed yn treealtys echey roish soie yn Chiare as Feed laa ny vairagh, Jemayrt yn 29 Jerrey Fouyir. 
 
Tra va Mnr Glover loayrt rish Radio Vannin shiaghtin er dy henney, Jelune yn 21 Jerrey Fouyir, v'eh gra dy row eh gennaghtyn dy vel yn traa cooie er jeet dy chur-rish y doilleeid; dy ren yn eear Hirveishagh Slaynt as Kiarail y Theay, Lawrie Hooper, gra dy vel eshyn credjal dy lhisagh teiy ve ayn nagh vel barrant ayn; dy vel mooarane coloayrtys er ve ayn; as dy vel earroo dy chooyl-vinkeyderyn ayn ta mee-vaynrey; as dy vel queig eear Hirveishee er ny binkyn cooylloo; as dy vel shoh yn traa, nagh vel agh daa vlein er-mayrn, myr shoh my vees caghlaa dy ve jeant, ta feme er jannoo shen nish.

Tra va feysht currit da Mnr Glover, row eh shickyr dy jinnagh eh geddyn ny 13 teiy femoil, t'eh gra nagh vel, dy vel mooarane coloayrtys foast goll er,  agh er-lesh dy vel feme er goaill ayns laue y chooish, as cre erbee yn aght t'eh cheet magh, dy gholl er y toshiaght. T'eh gra dy voddagh eh er n'yannoo ymmyd jeh Reillyn Beayn dy chur y chooish roish soie yn Chiare as Feed Jemayrt shoh chaie, yn 22 Jerrey Fouyir, agh dy row eh gennaghtyn nagh row shen kiart er y fa va fys echey dy beagh daa Hirveishagh ersooyl as dy vel kied oc dy ve assaaragh, as er-lesh dy vel feme er y clane thie ve ayns shen dy yannoo eh dy cairagh as dy cooie.
 
Ta Mnr Glover gra dy vel yn aght t'eh jannoo eh nish cur traa da olteynyn dy aarlaghey roish yn soie, as dy chur roish y barel oc as ny foddee dy beagh ny imneaghyn oc neesht, as dy vel shen aght share dy yannoo eh. T'eh ra dy dooyrt yn Ard Shirveishagh, Mnr Cannan, dy row eh er ve loayrt rish cumraagyn Tinvaal mychione cooishyn, as dy vel eh shickyr dy row shoh fer jeu,

Ta Mnr Glover gra dy vel Olteynyn yn Chiare as Feed ayn as son shickyrys dy vel ad er choayl barrant, agh dy vel eh neesht dy ghoaill ayns laue neu-aash foddey skeaylt mastey'n theay, as dy vel Olteynyn yn Chiare as Feed chaghteryn y phobble, as my vees y pobble mee-vaynrey eisht dy vel feme er ve chaghteryn ny feallee shen. 

Ta Mnr Glover goaill rish ny nee lheamys 'syn oardagh shoh eh, nagh vel fys ec peiagh erbee er quoi vees cheet rish, as er-lesh dy vel shen red ennagh as traa elley dy vel feme er goaill ayns laue, agh ec y traa t'ayn dy vel ad kianglt rish ny t'ayn, as rishny oardaghyn t'oc, agh er-lesh dy vel feme er jeeaghyn er y choarys s'lhea lurg shoh neesht.

Cha nel Mnr Glover son jannoo faaishnys bentyn da'n chooish, t'eh gra dy jean eh fuirraghtyn as feddyn magh ny vees taghyrt laa ny vairagh, Jemayrt yn 29 Jerrey Fouyir. T'eh gra nagh bee eh cur roish yn ennym echey hene, cha nee ec y traa shoh, dy beagh shen lurg three bleeaney myr Oltey yn Chiare as Feed, as er-lesh nagh vel qualleeaght dy liooar ec peiagh ennagh dy ve'n Ard Shirveishagh, as dy vel feme er ve fer jeh'n sleih syrjey ayns shen, as shen choud's t'eh arryltagh dy gholl er shen. T'eh gra nagh vel eh er chlashtyn veih'n Ard Shirveishagh, agh dy vel eh er chlashtyn veih olteynyn elley, as, dy jarroo, dy vel freggyrt mooar dy liooar er jeet veih'n theay.

Er-lesh Mnr Glover dy vel neu-wooiys, agh er-lesh chammah's shen dy vel mastey paart jeh ny cooyl-vinkeyderyn neesht as neu-wooiys oc, imnea mychione quoi yinnagh shoh lhiggey stiagh ayn. T'eh cheet er-lheh er yn Er-lhee Allinson, va ny hirreyder elley va cur roish eh hene tra va'n chied reihys oc son yn Ard Shirveishagh. T'eh gra, myr shoh, dy vel imneaghyn ayn mychione shoh cheet roish y thie, agh dy jinnagh eh shirrey er ny olteynyn elley, lhig dooin cummal resooney magh oney as foshlit mychione y stayd t'ayn nish, as eisht dy vel shin goll er nyn doshiaght, cre erbee yn aght vees yn teiy goll.

Ta Mnr Glover gra dy nee baghtal eh dy vel doilleeidyn echey bentyn da polaseeyn as yn ard vees goll er troailt bentyn da'n raad ta shin dy gholl, agh nagh vel eh neesht er ve maynrey lesh yn cheint dy leeideilys ny keayrtyn, as dy jinnagh eh cur aghin, my vees eh cheet lesh 'sy teiy dy vel eh agh cheet dy loayrt ayns rieughid rish ny smoo na Coonceil ny Shirveishee ynrican as cur-lesh dy chooilley pheiagh roish. T'eh gra, dasyn, dy vel leeideilys cur-lesh sleih mayrt, as nagh vel eh er nakin shen choud's nish.

Ta Mnr Glover gra dy vel eh credjal dy chionn dy vel feme ain er cur-rish shen t'ain nish as ny doilleeidyn t'ain nish, as er-lesh, my vees shih goaill ayns laue ad shen, eisht dy jean aase y phobble taghyrt myr red dooghyssagh dasyn hene, agh nagh vod mayd ec y traa t'ayn cur ny shirveishyn ta shin geearree son y phobble t'ain. T'eh gra nagh row ain ayns ny manifesto-yn aase y phobble, nagh row ain bishaghey ayns keesh cheet stiagh noadyr, as dy vel shen goaill argid dy ve ceaut magh ass y tarmaynys. T'eh gra dy vel ad shen agh kuse dy ardyn, agh dy vel shoh ny smoo bentyn da leeideilys Mnr Alfred Cannan. 

---oooOooo---

Ta faaue dy vel shiartanse dy Olteynyn yn Chiare as Feed cummal teiy folliaghtagh bentyn da'n treealtys nagh vel barrant ayns Mnr Cannan. Agh ta fer-oayllee er cooishyn bunraghtoil yn Ellan, yn Olloo Peter Edge, gra dy beagh neu-chadjin eh dy gholl back gys shen. T'eh gra dy row teiyyn folliaghtagh keayrt dy row jannoo seose paart jeh coarys bunraghtoil Vannin, as er-lesh dy vel yn sampleyr smoo jeh shen pointeil olteynyn y Choonceil Slattyssagh, dy vel adsyn pointit ec yn Chiare as Feed, as derrey traa gerrid dy liooar dy row shen liorish teiy folliaghtagh. T'eh gra, foddee dy vel shen fer jeh ny oyryn, traa erbee dy moghey ayns ny 2000yn, dy beagh feme er earroo mooar dy heiynyn dy lhieeney ynnyd follym, er yn oyr dy row sleih abyl dy reirey ny cochianglyssyn oc rish Olteynyn cummyssagh 'sy traa ry heet y Choonceil Slattyssagh liorish shickyraghey eh dy jinnagh ad pohlldal ad, agh eisht gyn livrey shen. T'eh gra dy vel oo feddyn earroo dy cheayrtyn as sleih cheet er lheh er ayns resoonaghyn magh, dy by vie lesh peiagh ennagh cur booise da ny 13 peiagh ren votal er-e-hon chammah's ny 15 peiagh as dooyrt ad dy jinnagh. 

Ta'n Olloo Edge gra, yn oyr ren teiyyn folliaghtagh goll magh ass ennoilid lesh Olteynyn y Choonceil Slattyssagh, as er-lesh dy vel shen cooie da'n teiy shoh – shen dy ghra y teiy bentyn da barrant ayns Mnr Cannan – ayns deynlaght chaghteragh, lhisagh fys ve ain er yn aght ta ny chaghteryn ain ceau teiy, myr shoh nagh lhisagh y ve ayns rieughid teiyyn folliaghtagh ayn liorish Olteynyn yn Chiare as Feed er cooishyn bunraghtoil, vees barrant ny'n aght elley 'syn Ard Shirveishagh. Er-lesh, myr shoh, dy vel eh neu-chadjin dy ghoaill yn kesmad shen gour y drommey gys teiy folliaghtagh.

Ta'n Olloo Edge gra, rere y toiggalys echey, dy vel reillyn beayn yn Chiare as Feed ec y traa t'ayn cur feme er teiy foshlit. T'ee gra dy vod ny reillyn beayn ve castit, agh son shen hene dy beagh feme er tromlagh er-lheh jeh 16 Oltey yn Chiare as Feed, myr shoh dy vel shen ymmoddee Olteynyn yn Chiare as Feed as feme orroo geearree freayll shoh folliaghtagh. T'eh gra er-lesh dy beagh shen hene symoil er yn oyr dy by vaghtal eh dy beagh y teiy shen foshlit, as abbyr dy ren nuy Oltey yn Chiare as Feed votal dy beagh teiy folliaghtagh eh, as dy vel nuy peiagh votal noi'n Ard Shirveishagh, nagh beagh aght shickyr dy chochiangley ny leeidyn shen, agh dy jinnagh eshyn er smooinaghtyn dy jinnagh yn Ard Shirveishagh cur cooidjagh eh. T'eh gra myr shoh nagh vel eh smooinaghtyn dy vel eh ry yeearree, as er-lesh dy vel eh neu-lickly dy liooar.

---oooOooo---

'Sy teiy 'sy vlein 2021, tra va Mnr Cannan reiht dy ve'n Ard Shirveishagh, va Mnr Glover fer jeh ny 14 oltey ren ceau ass-lieh Mnr Cannan. Cha daink eh lesh yn Er-lhee Alex Allinson 'sy teiy shen, lesh hoght teiy ceaut er-e-hon. Va brock jeant jeh'n phabyr teiy oc liorish Chris Thomas as John Wannenburgh.

Myr cheayll shin ayns Traa dy Liooar tra va shin feddyn magh mychione yn aght ren Oltey yn Chiare as Feed son Rhumsaa, Lawrie Hooper, irree ass yn oik echey myr Shirveishagh Slaynt as Kiarail y Theay, as ren oltey politickagh yn Rheynn, Joney Faragher, irree ass yn oik shen ecksh neesht, ta Mnr Cannan er n'ghoaill ersyn hene currym y Hirveishagh. Va Bnr Faragher oltey politickagh yn Rheynn marish Oltey y Choonceil Slattyssagh, Tanya August-Hanson, agh nish marish Bnr August-Hanson, ta Mnr Cannan er phointeil daa oltey politickagh noa yn Rheynn Slaynt as Kiarail y Theay, Oltey yn Chiare as Feed son Doolish Hwoaie, as eshyn ny eear Hirveishagh Slaynt as Kiarail y Theay ayns lught-reill Howard Quayle, David Ashford, as Oltey yn Chiare as Feed son Doolish Veanagh, Chris Thomas.

Nish ta Mnr Thomas er chur roish yn ennym echey dy heet dy ve yn Ard Shirvishagh. Va Mnr Thomas ny Hirveishagh Bun-Troggalys rish paart dy hraa roish my row y raad currit da liorish Mnr Cannan, as lurg shen ta Mnr Thomas er ve gobbraghey rish daa oltey elley, Oltey yn Chiare as Feed son Connaghyn, Julie Edge – as ish ny eear Hirveishagh Ynsee, Spoyrt as Cultoor 'sy lught-reill Cannan – as Oltey yn Chiare as Feed son Doolish Yiass, Claire Christian. 

Ta Mnr Thomas gra nagh vel eh cloie noi'n phersoon 'sy pholitickaght, agh dy vel eh jannoo yn red kiart son polasee theayagh 'sy traa ry heet as son yn ymmyd jeh tashtaghyn theayagh dy chur reddyn ta'n theay feme as geearree, as myr shoh dy vel eh feer dy vel eh er chremmey dy mooar ymmodee jeh polaseeyn yn Tashtey ayns kuse jeh ny bleeantyn t'er n'gholl shaghey. T'eh gra, rere yn aght t'eh fakin y chooish, myr fer ta shirrey yn red share, dy lhisagh yn Reiltys cheet magh ass yn Chiare as Feed lurg reihys reaghey ny tosheeaghtyn, rere ny ta'n theay er ninsh da ny politickeyryn ayns yn reihys.

Ta Mnr Thomas gra, ec y traa t'ayn, dy vel eh jeeaghyn dasyn dy vel yn Tashtey stiurey dy chooilley red. T'eh gra dy vel ec yn Tashtey oaseiryn currit stiagh ayns ooilley ny Rheynnyn, ta ginsh da ny Rheynnyn shen er-e-hon foddee dy jean ad cosney argid as er-e-hon foddee nagh jean ad cosney argid, as dy by vie leshyn goll back gys yn traa va claare ashoonagh y Reiltys ain ceau nyn argid freillt mooar-leagh theayagh 'sy voayl va feme ain er jannoo eh, rere reihys. T'eh gra, vel eh cremmey yn Fer-lhee Allinson? Well, dy vel eh cremmey yn Tashtey as ny polaseeyn echey, shen myr t'eh.

Ta Mnr Thomas gra, ec y traa t'ayn, ayns chymshal reihyssagh, cheet stiagh 'sy chiaroo vlein, dy jean keeayll chionnit madyral, er y fa, ny ta shin feme nish, dy vel feme ain er karraghey ny doilleeidyn t'ayn as ta feme karraghey dy preaysagh preaysagh, as dy vel feme ain er soilshaghey magh dy cleeir ny reihyn t'ayn son reddyn bunnidagh gollrish Strateish er Bree, Urryssaght Ashoonagh, pensionyn, as foddey ny smoo elley – thieys – dy cleeir dy vod yn teiy cooney lhien jannoo ny reaghyssyn daaney mooarey dy vel eh orrin jannoo.

Myr cheayll shin, ren Mnr Thomas brock jeh'n phabyr teiy echey, shaghey ceau teiy son fer erbee jeh ny shirreyderyn, Mnr Cannan as y Fer-lhee Allinson, as t'eh gra, 'naght cheddin as nagh ren eh ceau teiy son fer erbee jeh ny shirreyderyn son Ard Shirveishagh back 'sy vlein 2021, er yn oyr nagh row raad cleeir son polaseeyn er y voayrd, dy vel eshyn ry gheddyn nish, as dy row ny cumraagyn echey ayns feme jeh, as son y theay dy vel feme oc er politickeyr gollrishyn, peiagh ennagh as yn sorch echey dy chur geill da myn-phoyntyn, e vyn-vrishey quaiyllagh, soilshaghey magh reihyn as costyssyn oc as yn aght ta'n argid dy ve currit daue, rish daa vleih, gys y reihys, dy yannoo shickyr dy vel yn reihys 2026 ny share na shen ayns 2021, dy beagh cair eh dasyn dy hirveishagh.    

Ta Mnr Thomas gra dy vel doilleeidyn chelleeragh ain as feme er karraghey ad nish, as dy row yn oyr haink eh dy ve ny oltey jeh'n Rheynn Slaynt as Kiarail y Theay myr oltey politickagh, as nagh row rieau eer feysht dy jinnagh eh cheet dy ve ny oltey myr Shirveishagh, er yn oyr nagh vel eh coardail rish plan y Reiltys, Plan yn Ellan, as ren eh ceau teiy noi echey, as ren eh ceau teiy noi'n chlaare argdioil s'jerree, as dy vel prinsabylyn echey as dy vel eh onnoroil, nagh jinnagh eh cheet dy ve ny Hirveishagh myr Shirveishagh my vees polaseeyn eu nagh vel eh coardail rish. 

Ta Mnr Thomas gra y vel ny doilleeidyn ayns kiarail slaynt cho down dy row feme er karraghey ad, as er-lesh dy row David Ashford as eh hene feer wooiagh dy ren Mnr Cannan shassoo seose as dy vel eh goaill palchey hraa as cur palchey gheill da as jannoo ymmyd jeh ooilley yn cheeayll chionnit echey dy chur-lesh stiagh 'sy doilleeid shoh, as marish Mnr Ashford dy cheet cooidjagh rish ayns shen.

Son shen as ooilley, cha nee teiy slattyssagh eh, as eer my vees eh goll noi Mnr Cannan, cha bee feme ersyn irree ass yn oik echey, as cha bee feme er Shirveishagh erbee 'sy lught-reill echey faagail noadyr. Agh son shickyrys, veagh beggan doillee dy reayll rish, myr dy beagh eh nagh ren veg taghyrt, as fys ec dy chooilley pheiagh nagh row sleih cur barrant aynsyn as 'sy lught-reill echey.

As lesh imnea ec Sheshaght Lught-Traghtee Vannin mychione musthaa 'sy pholitickaght lurg da Mnr Hooper irree ass,  t'ee gra nagh nhegin da'n Reiltys jarrood y scansh jeh shickyrys ayns cummal seose stayd yn Ellan myr ynnyd traghtee eddyr-ashoonagh. T'ee gra dy vel shickyrys politickagh foast jannoo seose undin jeh tarmaynys lajer, as dy lhisagh shen ve ard-tosheeaght y Reiltys. T'ee gra, gollrish dy chooilley lught-reill mooie, dy vel caghlaaghyn doolane fo'n Ellan as feme er cur-rish ad dy yannoo shickyr dy vel bishaghey foast goll er 'sy tarmaynys. 

---oooOooo---

As lesh y vushtaa 'sy pholitickagh er coontey argane mychione shirveishyn slaynt as kiarail y theay, ta Oltey yn Chiare as Feed son Connaghyn, as fer jeusyn ta gobbraghey cooidjagh rish Chris Thomas nish, Julie Edge, credjal dy vel feme er caghlaaghyn da strughtoor Kiarail Vannin dy yannoo shickyr dy vel yn shirveish claynt tannaghtyn ayns 'sy traa ry heet. T'ee gra dy lhisagh aa-chummey kiarail slaynt jannoo seose tosheeaght son yn Ard Shirveishagh, as Shirveishagh Shallidagh Slaynt as Kiarail y Theay, Mnr Cannan, as dy vel feme er immeeaght kiart nish. 

Agh ta Mnr Edge gra nagh lhisagh coloayrtyssyn ve ayn ynrican bentyn da shirveishyn y thie lheiys, agh neesht ec y vun-cheim, jeh'n lheid as ve abyl dy reaghey quaaltys rish fer lhee cadjin ny rish feeackleyr. T'ee gra dy vel fir phrofeshoonagh as qualleeaghtyn oc gobbraghey da ny shirveishyn ain, as dy vel ad gra dy vel feme ain er caghlaa strughtooroil; dy vel fys oc dy vel aghtyn dy hareaghey ayn; dy vel ad er chur eab er shareaghey reddyn; agh dy vel mooarane coyrle as eieyn miey veih'n voayl obbree as er-lhee dy vel feme er sleih geaishtagh roo. T'ee gra dy vel feme ain er jannoo shickyr dy vel fir lhee ain as sleih lhee er Boayrd Kiarail Vannin, ta gobbraghey ayns Ellan Vannin as cha nee 'sy Reeriaght Unnaneysit as dy vel treisht goll er cur ayn. 

---oooOooo---

Ayns freggyrt da feysht scruit ec Bnr Edge, ta Kiarail Vannin gra dy vel 14 startey son reireyderyn er ve currit er bun neayr's va Kiarail Vannin currit er bun 'sy vlein 2021, as dy vel faill ny reireyderyn shoh costal £800,000 'sy vlein. Ta ny startaghyn noa goaill stiagh fer toshee ny shirveishyn vaccine myr freggyrt da'n phandemagh Covid; reireyder y vun-troggalys; as fer toshee son plannal egin. Ta fer jeh ny startaghyn bentyn da reirey obbreeyn cheusthie jeh Oik ny Obbreeyn, lesh argid currit er-e-hon liorish Kiarail Vannin, agh ta'n paart shen er ve follym neayr's jerrey Mean Fouyir. 

Ayns aght ro jeeragh, ta kuse dy leih cosoyley ceau £800,000 er reireyderyn dagh blein ec y traa ta Kiarail Vannin shirrey dy spaarail argid liorish jannoo ny sloo yn traa lowit son goaill ayns laue obbraidyn myr reih as liorish giarrey shirveishyn elley y strane toshee. 

Ta Kiarail Vannin er chlou fogrey vees goaill rish dy row coloayrtyssyn theayagh er y gherrid bentyn da jannoo ny sloo dy shallidagh ny obbraidyn jeant myr reih as cur er bun oikyn leeideilagh noa, as dy vel eh lane-femoil dy yannoo baghtal eh dy vel yn daa chooish shoh scarrit dy bollagh as dy vel ad goaill ayns laue daa feme er-lheh ayns strateish as obbyr jeant, as dagh jeu soit dy bunnidagh ayns saaseyn share son kiarail slaynt as kiarail y theay vees ry chummal seose.

T'ee gra dy vel jannoo ny sloo ny obbraidyn myr reih paart jeh strateish ta jeeraghey er couyral argidoil, as yn dean jeh dy reirey y towse ceaut rour as dy leodaghey ny costyssyn dagh mee jeh costyssyn ny olteynyn banc fwirran ny shamyryn obbraidagh as fwirran yn anloaghtaghey. T'ee gra dy vel shoh cummal seose yn aght ta Kiarail Vannin currit da freayll seose reenid shirveishyn Kiarail Vannin gyn jannoo ny sloo sauchys ny surransee ny mieys y chiarail. T'ee gra dy vel eabyn dy ailley fo raad dy lhieeney startaghyn ard-scanshoil ayns fwirranyn ayns ny shamyryn obbraidagh, as dy vel aa-scrutaght er y gherrie er chur currym er yn reireydys dy reaghey 'syn aght share ymmyd ny shamyryn obbraidagh, dy yannoo shickyr dy vel ymmyd fondagh jeant jeh couyryn. T'ee gra dy nee shallidagh ta ny saaseyn shoh dy leodaghey, as dy vel Kiarail Vannin currit da dy chur back obbraidyn myr reih myr v'ad cho leah's ta caa jee shen y yannoo. 

Agh ta Kiarail Vannin gra, dyn y wooise da jannoo ny sloo yn earroo dy heshoonyn currit son ymmyd ny shamyryn obbraidagh, dy vel aa-scrutaght jeh ny fysseree bentyn da surranse ayns ny queig shiaghtin shoh chaie soilshaghey magh dy vel ee er livrey yn earroo cheddin dy ooryn son obbraidyn as 'sy traa cheddin nurree, er coontey saaseyn t'er hareaghey shirveishyn as fondid ayns ny shamyryn obbraidagh.

Ta fogrey Kiarail Vannin gra dy vel eh lane neu-chiart dy ghra dy vel ny saaseyn femoil dy spaarail argid ayns shirveishyn cochianglt ayns aght erbee rish cur er bun 14 startey son leeideilee ayns reireydys, as sleih pointit daue ayns ny three bleeaney shoh chaie. T'ee gra dy vel ny paartyn shoh ard-scanshoil ayns niartaghey yn aght ta Kiarail Vannin cooilleeney gurneil, sauchys obbree, fondid, biallys da stundayrtyn slattyssagh, as cummal seose olteynyn y wirran 'sy strane toshee ayns livrey kiarail sauchey jeh ard-vieys. T'ee gra, gyn ny startaghyn shoh, dy beagh gaueyn mooarey cummyssagh son Kiarail Vannin, goaill stiagh nagh row eh biallagh da lughtyn-reill as scruteyryn yn Ellan, as dy jinnagh shen cur ayns gaue yn ablid eck dy livrey shirveishyn slaynt as kiarail sauchey da pobble Ellan Vannin.

Ta Kiarail Vannin gra neesht dy vel kuse jeh ny startaghyn shoh ayns leeideilys er jeet myr freggyrt da moyllaghyn yn Aa-scrutaght Neu-chrogheydagh er Covid-19, va goll er leeideil liorish Kate Brunner, Turneyr yn Ree, jeusyn ren Tinvaal soiaghey. T'ee gra dy ren yn aa-scrutaght soilshaghey magh y scansh jeh gurneil as leeideilys fondagh ayns goaill ayns laue doolaneyn fo ny coaryssyn slaynt as kiarail edyr nish as 'sy traa ry heet, as liorish cur bree da ny moyllaghyn shoh, dy vel Kiarail Vannin goaill ayns laue aghtyn er-lheh dy yannoo shickyr jeh'n reenid echey ayns obbraghey, jeh'n viallys echey da reillyn, as jeh shickyrys cheusthie jeh'n cheshaght, as fy yerrey freayll sauchey mieys y chiarail son ny surransee as ymmyderyn ny shirveishyn ain.

Ta Kiarail Vannin gra dy vel eh freayll rish ve currit dy slane da reill baghtal currymagh as da livrey kiarail jeh ard-vieys. T'ee gra dy vel ee goltaghey y coloayrtys vees goll er as dy vel ee cur barrant ayn dy jean ny reaghyssyn strateishagh shoh niartaghey Kiarail Vannin, as jannoo shickyr dy vel ee ayns ynnyd mie dy chur shirveishyn barrantagh, fondagh, biallagh da co-voodeeys Ellan Vannin rish bleeantyn ry heet.

Bentyn da'n aght ren fir lhee obbraidagh ceau yn traa cheddin ayns shamyryn obbraidagh as ren ad 'sy traa cheddin nurree, ta Ard Sheckter Kiarail Vannin, Teresa Cope, gra dy vel shoh feanish vees soilshaghey magh yn obbyr creoi, yn aght ta olteynyn ny fwirranyn clinicoil as obbraidagh currit da'n obbyr oc as yn aght t'ad gobbraghey cooidjagh, as dy vel ad er n'yeeraghey er bishaghey ny t'ad dy livrey dy chooney dy vel builley cho sloo as vees possible er keeayll chionnit ny surransee.

Ta Bnr Cope gra dy vel ad goaill moyrn ass ny fwirranyn oc as yn aght t'ad currit da dy hareaghey fondid as son cummal seose ny stundayrtyn syrjey dy chiarail son surransee 'sy traa shoh. T'ee gra dy vel fwirran y leeideilys clinicoil er reayll arrey geyre, as dy vel ad foast freayll arrey geyre, er livrey shirveishyn jeh mieys, ny yeih ny caghlaaghyn femoil 'syn aght t'ad gobbraghey.

Ayns soie yn Chiare as Feed Jemayrt shoh chaie, hug Bnr Edge feysht er Mnr Cannan myr Shirveishagh shallidagh Slaynt as Kiarail y Theay, shirrey aa-hickyrys nagh jinnagh Shirveish Vannin ny Fir–lhee Egin dy ve dooint dy spaarail argid. V'ee shirrey er Mnr Cannan dy rheynn er olteynyn ny myn-phoyntyn jeh ny reihyn ren Kiarail Vannin smooinaghtyn er dy spaarail argid as tannaghtyn cheusthie jeh'n chlaare argidoil oc liorish jerrey ny bleeaney argidoil shoh.

Hug Mnr Cannan mygeayrt docamadyn, as ayndaue va enn currit er aghtyn dy spaarail dy cummyssagh £24 millioon, as assdauesyn ta coardail er ve currit da aghtyn dy spaarail £12 millioon. Ren Bnr Edge cheet er-lheh er, dy row ad goaills tiagh £500,000 as caa cummyssagh dy spaarail shen liorish dooney Shirveish Vannin ny Fir-lhee Egin. 

Ayns soie yn Chiare as Feed dooyrt Bnr Edge dy row ee boirit dy mooar dy vel 'syn ys hug Mnr Cannan yn laa shen dy row Shirveish Vannin ny Fir-lhee Egin spaarail mysh lieh-villioon dy phuint dy ghooney ee, as dy vel ee ayns rieughid boirit dy mooar er yn oyr dy vel shen lheelann yn er lhee cadjin ass ooryn son pobble Ellan Vannin, as dy row ee shirrey paart dy aa-hickyrys veih'n Shirveishagh jiu dy vel eh er chee jeeaghyn feer chiarailagh er y vuilley smoo er surransee ayns shoh as jannoo shickyr nagh vel ny shirveishyn shen dooney.

Ayns freggyrt, ta Mnr Cannan gra dy vel shin ooilley geearree coadey livrey ny shirveishyn, agh dy vel eh ersyn neesht gra rish olteynyn dy vel ny freggyrtyn da kuse jeh ny feyshtyn shoh nyn lhie ayns yn aght ta'n currym currit, jeh'n cochianglys rish Kiarail Vannin as yn aght dy vel shen goll er jannoo.

Ayns fogrey elley clouit fastyr Jemayrt shoh chaie ta Kiarail Vannin gra nagh vel plannyn echey dy ghooney Shirveish Vannin ny Fir-lhee Egin ec y traa t'ayn. T'ee gra, dy moghey Mean Fouyir, dy row sarey currit da Kiarail Vannin liorish yn Shirveishagh Slaynt as Kiarail y Theay ec y traa shen - shen dy ghra Mnr Hooper, va kiart er nirree ass y voghrey shen – dy chur enn er yn aght oddagh ee cosney gys cormid argidoil 'sy vlein argidoil shoh, erskyn ny saaseyn dy spaarail argid as va coardit ec Boayrd Kiarail Vannin hannah. 

Ta'n fogrey gra, 17 Mean Fouyir, dy ren Kiarail Vannin cur docamad folliaghtagh da'n Rheynn cur myn-phoyntyn jeh aghtyn dy spaarail £4 millioon elley 'sy vlein argidoil. Va dooney Shirveish Vannin ny Fir-lhee Egin 'sy rolley shen, oddys spaarail £550,000 ayns shey meeaghyn jerrinagh ny bleeaney argidoil.

Ta Kiarail Vannin gra dy row ymmodee skeimyn 'sy rolley folliaghtagh shen, goaill stiagh dooney dy shallidagh Shirveish Vannin ny Fir-lhee Egin, er ve sur-smooinit er liorish Boayrd Kiarail Vannin as jiooldit er yn oyr nagh row eh ry hoiaghey jeh, er-son dy beagh drogh-vuilley mooar er mieys as ablid dy livrey kiarail da surransee as er keeayll chionnit ny surransee as ymmydeyryn y hirveish. 

Ta'n fogrey cheet gy kione liorish gra dy jinnagh Kiarail Vannin cur ee hene dy chur bree da ny skeimyn shoh as dy reayll arrey er y vuilley jeu, dy beagh sarey currit urree dy yannoo shen liorish yn Rheynn Slaynt as Kiarail y Theay as Coonceil ny Shirveishee.

As ec y traa cheddin as ta Kiarail Vannin eignit dy chur eab er feddyn aghtyn dy spaarail argid, ta preays cheet orroo veih ny fir-lhee ta shirrey bishaghey 'syn aill oc. Ta paart jeh doilleeid Kiarail Vannin dy row bishaghey ayns faill son shiartanse dy olteynyn y wirran hannah, as myr shen va feme er jannoo ymmyd jeh argid ass y chlaare argidoil eck son shen, shaghey kionnaghey druggaghyn ny eeck son lheiys elley son surransee.

Ta'n Sheshaght Lhee Ghoaldagh gra dy vel ee shirrey bishaghey 12.6% son y vlein argidoil 2023-24. Ta'n Sheshaght gra, gollrish thousaneyn dy ir-lhee choyrlee as dy ir-lhee cummalagh 'sy Reeriaght Unnaneyist, ta'n chooid smoo dy ir-lhee gobbraghey ayns Ellan Vannin er nakin dy vel yn aill oc er ve giarrit liorish wheesh as 29% rere yn rieughid neayr's 2008. T'ee gra dy vel teiy mastey ny fir-lhee 'syn Ellan son y chied cheayrt.

Ta'n Sheshaght gra, neayr's y vlein 2008, dy vel bolgey argidoil 'syn Ellan er vishaghey liorish 56.3%, choud's ta faill smoo son fer-lhee coyrlee er vishaghey liorish agh 27.3% 'sy traa cheddin, as shen dy ghra dy vel eh er n'gholl sheese ayns rieughid liorish 29%. T'ee gra, choud's ta feedyn dy ir-lhee elley 'sy Reeriaght Unnaneysit er varganey dy speeideilagh reaghyssyn noa er faill, dy vel gaue ayn dy bee fir-lhee ayns Ellan Vannin faagit er-nyn-gooyl, er yn oyr nagh vel ad reiltagh son ny bishaghyn ayns faill ta fir-lhee choyrlee elley, fir lhee chummalagh as fir-lhee er-lheh er chosney.  

Ta Caairlagh Sheshaght Lhee Ellan Vannin, yn Fer-lhee Prakash Thiagarajan, gra nagh vel fer lhee erbee geearree stholkey, agh dy vel ad er chur eab er shareaghey stayd obbree ny fir-lhee ayns Mannin ayns aghtyn elley rish bleeantyn, agh ayns fardail. T'eh gra dy vel fir-lhee 'syn Ellan toilchin cosney faill dy cairagh son yn obbyr vees jeant oc. T'eh gra dy vod Kiarail Vannin foast cur lhiettrimmys er shoh veih goll ny sodjey liorish jannoo red ennagh mychione ny giarraghyn ayns faill rere yn rieughid dy vel fir-lhee ayns Ellan Vannin er hurral.

Ta Caairlagh Coonceil y Heshaght Lhee Ghoaldagh, yn Olloo Phil Banfield, gra dy vel eh eer clashtyn veih fir-lhee 'syn Ellan kiart cho dowin as t'ad tarmestit, as dy vel ad sheeynt magh rour as gyn faill dy liooar oc. T'eh gra dy vel yn Sheshaght Lhee Ghoaldagh ny shassoo aarloo dy phohlldal fir-lhee ayns Mannin ayns streeu son enn cooie er ny schleiyn as er y cheeayll chionnit oc.  

Nee'n Sheshaght Lhee Ghoaldagh fogrey magh date son y teiy ayns ny shiaghteeyn shoh cheet. Ta 155 fer-lhee as kied oc ceau teiy, goaill stiagh fir-lhee chummalagh, fir-lhee choyrlee as fir-lhee chadjin er faill, as adsyn bunnys ooilley ny fir-lhee 'syn Ellan. Ta possan beg dy ir-lhee – fir-lhee traenit er-lheh 'syn Ellan agh vees gobbragh da failleydere ayns Sostyn Heear-Hwoaie, as fir-lhee chadjin vees nyn barteayssyn – nagh bee reihalagh dy cheau teiy. My vees yn chooid smoo jeusyn ta ceau teiy ayns foayr jeh jantys jeadyssagh.

Ta Ard Sheckter Kiarail Vannin, Teresa Cope, gra nagh vel ee smooinaghtyn dy vel ad eer faggys da ve abyl dy lhieeney y varney feer vooar shen eddyr ny vees Kiarail Vannin abyl dy chur cheb cheusthie jeh'n chlaare argidoil eck, as dy baghtal jerkalyssyn y Heshaght Lhee Ghoaldagh. Er-lhee dy vel shoh geiyrt er ny reaghyssyn t'er ve jeant nish 'sy Reeriaght Unnaneysit as y reaghys ayns lughtyn-reill elley.  

Ta Bnr Cope gra dy vel ee cur enn er dy vel shin er tuittym ergooyl, agh dy ren Kiarail Vannin chebbal 6% son 23-24, son y vlein shoh chaie, as dy vel yn Sheshaght Lhee Ghoaldagh shirrey 12.6%, as dy vel barney vooar dy liooar ayns shen, myr shoh dy lhieeney y varney shen dy beagh feme er Kiarail Vannin feddyn £3.5 millioon gys £4 millioon elley dy chooilleeney y reaghys shen ec 12.6%. T'ee gra dy vel ad goaill toshiaght er barganaghyn faillee son y nah vlein, as dy vel Kiarail Vannin er hebbal 4% son 24-25, y vlein t'ayn nish. Agh t'ee smooinaghtyn dy vel eh oyr mooar son preays ec dy chooilley pheiagh ta cochianglt rish, nagh row ad abyl dy reaghey yn argane faillee shoh.

As imnea 'sy traa sodjey, mannagh vel wheesh faill ry gheddyn ayns Mannin, nagh jig eh lesh Kiarail Vannin failley sleih, ta Bnr Cope gra dy row ablid oc failley son yn chooid smoo dy startaghyn scanshoil follym son fir-lhee, myr shoh, tra ren Kiarail Vannin goaill toshiaght, dy row earroo mooar dy ir-lhee trooid jantyssyn as dy ir-lhee locum gobbraghey jee, as dy vel shen dy bollagh sheese gys yn earroo sloo nish, myr shoh dy vel yn earroo beg shen dy startaghyn follym son ir-lhee harrish y cheshaght, vees red jarrooagh. T'ee gra dy vel yn aill vunnidagh ain son ir-lhee foast ny syrjey na 'sy Reeriaght Unnaneysit, myr shoh dy vel ablid oc foast eeck beggan ny smoo na 'sy Reeriaght Unnaneysit, as ec mullagh y scaailley shen dy vel eh mysh £25,000 na £30,000 ny share na'n Reeriaght Unnaneysit. 

Ny yeih, ta Bnr Cope gra, mannagh vod shin freayll rish ve cohirreydagh 'sy vargey shen harrish traa sodjey,  dy jean mayd dy cummyssagh fakin yn ablid ain dy ailley er ny leodaghey. T'ee gra dy jig builley mooar ass jantys jeadyssagh erbee. T'ee gra dy vel sorch erbee dy yantys jeadyssagh erbee tayrn geill ersooyl dy mooar, dy vel eh cur boirey dy mooar, as dy jean ee cheet er reesht, nagh vel eh ny yinnagh peiagh erbee jin dy gheearree.

Ta'n Ard Shirveishagh, Mnr Cannan, gra dy bee feme er imman cooidjagh dy reaghey paart jeh'n doilleeid shoh: dy vel son shickyrys paart son Tinvaal ayns shoh; dy vel paart ayn son yn Rheynn Slaynt as Kiarail y Theay as yn Shirveishagh; as dy vel paart ayn dy shickyr son Kiarail Vannin. Er-lesh dy vel feme er ooilley jeh shoh cheet ry cheilley nish, er kuse jeh ny parteayssyn shoh dy heet ry cheilley nish, as dy vel feme ain er toiggal dy tappee ny buill ta ny doilleeidyn shen ayn, as dy vel feme ain er imman gys reaghys jeu dy vod Kiarail Vannin myr sheshaght goll er y hoshiaght cooidjagh, as dy vod Tinvaal goll er y hoshiaght, lesh paart dy vaghtalys mychione y stayd son cur argid as neesht yn stayd bentyn da'n churrym, rere ny ta shin dy yerkal rish veih Kiarail Vannin bentyn da livreyys. 

Ta Mnr Cannan gra dy vel fys echey dy vel paart jeh'n cheau rour shoh er ve goll er rish bleeantyn ayns caghlaaghyn keim as ayns caghlaaghyn ard cheusthie jeh'n choarys dy chiarail slaynt, agh dy vel y chooish vunnidagh ee dy vel 10% dy fondagh bishaghey 2p, 10% ayns keesh cheet stiagh nurree, £43 millioon elley currit er conaant gialdynit dy jinnagh ad freayll cheusthie jeh'n chlaare argidoil, dy jean smoashal shen liorish £16 millioon, dy vel yn faaishnys oc £16 millioon, cur doilleeid dy jarroo.

Ta Mnr Cannan gra, ayns rieugh, dy vel yn ceau rour shoh reesht as reesht er ve troggit stiagh ny smoo as ny smoo ayns claareyn argidoil ry heet, as dy jean y costys jeh livrey kiarail slaynt 'sy raad t'eh goll ec y traa t'ayn, gyn caghlaaghyn erbee, jannoo jeeill da ny tashtaghyn ain dy argid freillt ayns aght trome, as dy vel feme ain er cur-rish eh, as dy vel feme ain er ve currymagh. T'eh gra dy vel fer jeh ny oyryn v'eh ersyn ve cho lajer er shoh, dy vel keim er-lheh dy churrym echey diuish, y theay, dy yannoo shickyr dy vel sleih toiggal dy vel doilleeid cummyssagh ayn mannagh vel shin feddyn yn aght feayslee, as dy vel eh treishteil, liorish ve daaney dy liooar dy hassoo seose as dy chur enn er shen, dyn y wooise da ooilley yn trauma ta cheet lesh, dy vod mayd ayns rieughid scughey shin hene stiagh ayns stayd share.

---oooOooo---

Ta fogrey er jeet mychione Stiureyder Slaynt y Theay. Ren yn Fer-lhee Henrietta Ewart faagail yn oik shen Mee Voaldyn 2022 as myr Stiureyder Slaynt y Theay interim va'n Olloo Hugo van Woerden cooilleeney yn obbyr. 

Yn 30 Mean Fouyir va Stiureyder Slaynt y Theay noa pointit, as she'n Fer-lhee Matt Tyrer eh. T'eh er jeet gys yn Ellan veih'n Reeriaght Unnaneysit, boayl t'eh er ve Stiureyder Slaynt y Theay da Coonceil Cheshire Hiar rish queig bleeaney, agh ta ny sodjey na jeih bleeaney dy cheayll chionnit echey ayns slaynt y theay. 

Ren yn Fer-lhee Tyrer leeideil fwirran ren cosney aundyryn trooid y phandemagh Covid-19, v'eh ny Chaairlagh jeh Conastey Slaynt Theay Cheshire as Cheu y Versey, as ren eh lhiassaghey yn Cheshire Hiar myr boayl dy hraenal as dy lhiassaghey slaynt y theay. T'eh ny leaghteyr onnoroil neesht ayns slaynt y theay ayns Olloo Scoill Keele.

Ta'n Fer-lhee Tyrer gra dy jean y fwirran echey nish jeeraghey er slaynt 'sy traa liauyr son pobble yn Ellan. T'eh gra dy vel eh geearree cur-lesh y jeeanid echey son shareaghey slaynt as foays son co-voodeeys yn Ellan as reayrt yindyssagh echey as gyn cosoyley. T'eh gra dy vel eh credjal dy shickyr dy vod mayd jannoo reddyn nish nee cur reddyn dy ve ny share er-nyn-son hene, son nyn baitchyn as son sheelogheyn ry heet, as dy vel eh jeeaghyn roish dy obbraghey dy chroo traa ry heet slayntoil maynrey son Ellan Vannin. 

---oooOooo---

Ta sleih gra dy vel stiureyderyn clinicoil jeh vondeish mooar ayns Shamyr Stiuree Cooidjagh ny Shirveishyn Egin. Va'n paart currit er bun daa vlein er dy henney myr aght dy chooney dy reirey aggyrt smoo. Ta ny stiureyderyn clinicoil nyn bara-ir lhee traenit ta feddyn magh yn sorch dy chiarail foddee vees goll er feme liorish peiagh cur eam orroo. Va Gail Anderson mastey ny fir toshee dy heet dy ve oltey y wirran. 

Ta Gail Anderson gra, lurg da ny glackeyderyn eam er n'gheddyn eam 999, bee eh er ny chur ayns rang rere Keint 1, 2, 3,  4 ny 5. Ta Keint 1 ny egin trome vees baggyrt er bioys, as Keint 2 neesht. T'ee gra dy jean Keint 3 ny erskyn shen cheet jeeish, as nee'm cur eam back gys yn surransagh as loayrt roo as cur kuse dy eyshtyn orroo, as feddyn magh bit beg elley mychione ny vees taghyrt, as eisht foddee dy jarroo dy bee feme orroo goll ayns carbyd lheiys myr shoh dy bee shen currit magh, ny foddee ad goll er cur gys yn er lhee cadjin, gys Gortyn Eddrym, ny cosney yn raad hene gys thie lheiys, myr shoh dy vel ymmodee caghlaaghyn reih ayn as cha nel sleih ynrican geddyn shirveish charbyd lheiys.

Ta Bnr Anderson gra dy jean kuse dy obbraghyn cheet trooid ayns brastyl sinshley, agh tra dy vel ee ayns rieughid lurg jee loayrt rish yn surransagh dy vel ad ching dy liooar, as dy leah bee shen currit ayns brastyl syrjey, as dy bee carbyd lheiys cheet cho leah's vees shen feerit. T'ee gra dy vel yn aght elley as foddee ee loayrt rish surransagh, as nagh vel ad cho ching as v'eh jeeaghyn veih ny t'ad dy ghra rish ny glackeyderyn eam, as myr shoh dy vod ee aa-stiurey ad gys kiarail share vees ny s'cooiey er-nyn-son. 

Ta Bnr Anderson gra dy row ee ny para-er-lhee, as dy vel ee ny para-er-lhee foast, as dy vel ee er ve ayns yn shirveish charbyd lheiys rish 22 vlein, as eisht haink y paart noa shoh dy ve ayn as dy row ee smooinaghtyn dy row eh symoil dy liooar. Cha nel eh dy ghra dy vel feme ec sleih er carbyd lheiys ooilley yn traa, as dy vel eh aa-ynsaghey sleih, agh jannoo shickyr dy vel sleih geddyn yn kiarail kiart ec y traa kiart 'sy voayl kiart. 

Ta Bnr Anderson gra, veih'n cheeayll chionnit oc gobbraghey ayns carbid lheiys rish 20 blein, dy row ny para-ir-lhee loayrt er y radio rish yn sleih ooilley yn traa, agh nagh vel ad toiggal kiart wheesh as ta taghyrt ayns shoh – shen dy ghra 'sy Chamyr Stiuree Chooidjagh, as dy jarroo dy vel ny meoiryn shee as yn aile ooilley 'sy nane. Er-lhee dy vel eh feer vie dy chur enn er yn obbyr creoi vees jeant ec sleih, dy vel ad cur ny feyshtyn kiart, dy yannoo shickyr dy vel ad geddyn wheesh fys as vees possible mychione ny vees taghyrt.

Ta Oaseir Shamyr Stiuree Chooidjagh ny Shirveishyn Egin, Glen Corlett, gra nagh vel ny shirveishyn egin ayns Mannin goll er cur fo'n aggyrt cheddin foast as ta goll er cur orroo ayns y Reeriaght Unnaneysit. Ta aggyrt freayll rish bishaghey ayns Sostyn, dy vel traa sodjey goll er ceau ayns cur freggyrt da eamyn as ayns feddyn magh quoi vees ayns feme smoo jeh cooney.

Ta Mnr Corlett gra dy vel aggyrt ny keayrtyn goll erskyn ny couyryn ta ry gheddyn oc, as dy vel shen yn oyr ta'n coaryssyn triage oc ayn, as son y chooid smoo dy vel shen yn doolane smoo fo'n cheu shen, dy yannoo shickyr dy vel ad cur cooney da'n sleih shen 'sy traa kiart, vel shen ny meoiryn shee, aile ny carbyd lheiys, son dy by vaghtal eh, myr tri-hamyr stiuree dy vel ooilley yn troor dy hirveishyn t'ad cur-rish. T'eh gra, myr shoh, dy vel shen yn doolane smoo, as dy jarroo, ayns traaghyn feer tarroogh, dy vel eh beggan gollrish cassey claareyn, agh dy nee doolane jesh eh.

Ta Mnr Corlett gra dy vel keayrtyn oc tra, cha nee cooid obbree neu-chooilleenit ayn, agh foddee dy vel eh goaill traa beggan ny sodjey dy gheddyn reddyn currit trooid gys sleih, reesht dy vel yn coarys triage dy kiart ayns shen son yn oyr shen. T'eh gra nagh vel ad cho olk as shiartanse jeh ny thieyn lheiys ny Treishtyn y Hirveish Claynt Ashoonagh 'sy Reeriaght Unnaneysit, ayndaue ta 20 carbyd oc ec yn ard Drogh-haghyrt as Egin oc fuirraghtyn er goll stiagh ayn – nagh vel ad ec y cheim shen, as dy vel eh booisal son shen, as yn red cheddin lesh ny meoiryn shee as aile bentyn da couyryn. T'eh gra dy vel eh smoo tarroogh, agh dy vel reddyn oc currit stiagh ayn dy ve abyl dy chur er ny reddyn kiart ve jeant ec yn traa kiart, dy vel eh treishteil nagh vel rouyr builley er sleih.

Ta Mnr Corlett gra dy vod obbraghyn ve oc ta cheet stiagh ayn as magh ass shen t'ad geddyn beggan dy arbyl. T'eh gra dy vel obbraghyn Keint 1 ayn, myr sampleyr, as dy by vaghtal eh dy vel ad jeh'n vrastyl syrjey oc son eamyn er carbid lheiys. T'eh gra dy vel offisheyryn fo churrym ny carbid lheiys ayn ta dy kinjagh er eam, myr shoh nagh vel yn reaghys cheet gy kione leshyn, as reesht t'eh cur booise son shen. T'eh gra, rish mooarane jeh'n traa, dy vod ad feddyn couyryn elley, dy vel freggyrtee toshee oc 'sy cho-voodeeys fo churrym ta nyn arryltee, dy vel olteynyn y wirran shassoo aarloo, as dy vel olteynyn y wirran oc neesht ayns kione-cherroo ny carbid lheiys. T'eh gra, myr shoh, dy cadjin, dy vod ad geddyn ny couyryn magh, lesh beggan dy - cha nee myr red 'sy vinnid s'jerree, agh dy cadjin dy vod ad feddyn ny couyryn dy gholl huggey, as nagh vel ad er ve goit dy bollagh foast.  

---oooOooo---

Ayns shiaght laa er y gherrid, haink eh lesh olteynyn Shamyr Stiuree Cooidjagh ny Shirveishyn Egin chymsaghey ny shlee na £7,000 dy chur myr toyrtys da Shirveish Carbid Lheiys Aer y Twoaie Vooar – shen dy ghra yn Twoaie Vooar jeh Sostyn, shaghey yn Twoaie Vooar myr ta shin cheet urree ayns Ellan Vannin. Ta'n shirveish shoh ny sheshaght ghiastyllagh as yn ablid er-lheh eck dy ghoaill kiarail jeh surransee gortit dy trome roish my vees caa dy chur-lesh ad gys thie lheiys. Va eam er etlan cassee yn Chirveish dy heet gys Ellan Vannin 62 keayrt ayns yn daa vlein dy lieh t'er n'gholl shaghey. Foddee yn Shirveish cur anloaghtyn, fuill as eer goaill ayns laue obbraidyn, roish my vees ad gymmyrkey surransee gys thieyn lheiys 'syn etlan cassee. 

Ta Amanda as Cheryl gobbraghey da'n cheshaght ghiastyllagh. T'ad gra dy vel ad cur skimmee dy chiarail gheyre dy heet as dy hauail peiagh erbee as goaill kiarail jeh peiagh erbee as ta feme echey er y chooney oc ec y traa t'ad feme eh, myr shoh dy vel ad dy bunnidagh cur-lesh y shamyr egin gys yn ynnyd va drogh-haghyrt ny red ennagh taghyrt. T'ad gra dy vel yn shirveish foast noa dy liooar ayns shoh ayns Mannin, as dy vel eh daa vlein dy lieh er-nyn-son, as dy vel 62 eam oc dy gholl magh jeant oc ayns yn daa vlein dy lieh shen, myr shoh dy vel eh er phrowal dy ve feer speeideilagh, as feme er dy mooar, as dy by vaghtal eh, choud's ta reddyn goll rhymboo, dy vel yn chagnoaylleeaght shareaghey, dy vel feme er jannoo dy chooilley horch dy red myr eiyrtys jeh shen.  

Ta Amanda as Cheryl gra, lesh 62 eam ayns daa vlein dy lieh, dy vel shen mysh 25 eam 'sy vlein, myr shoh, gyn shen, dy by vaghtal eh nagh jinnagh yn 62 peiagh shen er hannaghtyn bio, as dy vel ad er nakin ben y moghrey shen ayns rieughid as dy dooyrt ee ree, dy daink peiagh ennagh magh da'n vraar-'sy-leigh eck, as nagh beagh eh ayn jiu, dy jinnagh eh er n'gheddyn baase mannagh ren shiuish er hauail eh, myr shoh dy row shen yindyssagh dy chlashtyn y ven shen moghrey jiu, kiart choud's v'ad cur leaght er y ghellal. 

Ta Amanda as Cheryl gra, dagh keayrt t'ad ec yn ard oik, as dagh keayrt t'ad clashtyn etlan cassee jus goaill toshiaght er cassey, dy vel ee cheet dy ve greesit. T'ad gra dy vel fys oc dy vel shoh yn laa smessey ec peiagh ennagh, agh dy vel fys oc dy vel yn Shirveish ayns shen, as dy vel eh lhieeney oo lesh moyrn.