Meeryn ass Traa dy Liooar, Jelune 11ed Mee Houney 2024
Lurg ooilley y vusthaa mychione Kiarail Vannin ceau rour as goll £16.8 millioon punt erskyn y chlaare argidoil echey, as er yn oyr shen v'ee er n'ghoaill toshiaght er giarrey shirveisheyn 'sy strane toshee son surransee, myr cheayll shin yn chiaghtin shoh chaie, haink sarey veih Coonceil ny Shirveishee da Kiarail Vannin, gyn dy ghiarrey tooilley shirveishyn jeh'n sorch shen. Ren yn eear Hirveishagh Slaynt as Kiarail y Theay, Lawrie Hooper, ren irree ass, gra dy row shoh ny barriaght vooar as caghlaa ayns polasee y Reiltys.
Ta'n Ard Shirveishagh, Alfred Cannan, gra dy row eh er ny vriaght dy formoil er Coonceil ny Shirveishee dy hessal ny saaseyn er-lheh son dooney 'sy strane toshee cur roish ec Kiarail Vannin. T'eh gra dy row ad currit roish Coonceil ny Shirveishee er yn oyr dy row ad dy trome streeu noi y churrym va currit er Kiarail Vannin, as dy jarroo dy ren ad cur-lesh edyr builley feer vooar er surransee, va'n chied chooish as ny ard chooish ta'n tosheeaght oc, as dy baghtal dy row builley eiyrtyssagh cummyssagh ass shen, as stiagh 'sy pholitickaght neesht.
Ta Mnr Cannan gra dy row shen yn oyr va ny saaseyn shoh currit roish, as dy vel Coonceil ny Shirveishee er n'yiooldey shen myr saaseyn dy spaarail argid,as er vriaght jeh Kiarail Vannin dy reayll rish jeeaghyn cre ny ardyn elley, cheumooie jeh dooney shirveishyn 'sy strane toshee, foddee ad scrutaghey dy ghoaill toshiaght er cur-lesh ad hene back gys red ennagh gollrish y chlaare argidoil va currit daue ec toshiaght ny bleeaney.
Bentyn da Kiarail Vannin, ta Mnr Cannan gra dy vel claare feer vooar dy hareaghey costyssyn er ny ghoaill ayns laue, agh dy vel feme ersyn goll back gys yn ynnyd er-nyn-son ooilley dy ghoaill toshiaght, bentyn da ny va currit 'sy chlaare argidoil mleeaney, as y bishaghey ayns keesh hie lesh shen, ny £43 millioon elley va currit 'sy chlaare argidoil, as y currym va er ny livrey liorish yn Shirveishagh Slaynt ec y traa shen, ren gra dy voddagh Kiarail Vannin livrey ny shirveishyn oc cheusthie jeh'n chlaare argidoil. T'eh gra dy row shen soit dy baghtal er y churrym, as dy shickyr dy row shen yn ynnyd v'ad ooilley jerkal rish.
Ta Mnr Cannan gra dy dooar ad magh daa ny ghaa vee ny s'anmee nagh vel shen yn stayd, dy row faaishnys ec Kiarail Vannin jeh ceau rour liorish red ennagh gollrish £16 millioon gys £18 millioon, (a) dy daink shen myr greain, as 'sy nah ynnyd nagh row stayd dy ve ry hoiaghey jeh my vees shin dy reayll slaneid ny tashtaghyn ain dy argid freillt.
Bentyn da spaarail argid gyn dooney shirveishyn 'sy strane toshee, ta Mnr Cannan gra dy vel ad er chur slane boayrd ayn, as dy vel shen yn oyr ta fwirran ard sheckteragh ayns Kiarail Vannin, as dy vel eh orroo jannoo shickyr dy vel saase obbree gyn cumrail, as chammah's jeeaghyn er livrey shirveishyn dy vel ad ayns rieughid jeeaghyn neesht er fondid y wirran reiree, y wirran sheckteragh, ta pohlldal shoh ooilley.
Ta Mnr Cannan gra, ny vees goll er gra rish Kiarail Vannin, shen dy vel feme orroo freayll rish feddyn saaseyn dy yannoo smoo fondagh as s'aghtaley, as dy ghoaill toshiaght er dooney y vaarney argidoil, as dy vel feme orroo gobbraghey dy creoi dy reayll rish dooney y vaarney argidoil shen, feddyn ny saaseyn dy yannoo smoo fondagh as dy spaarail hooar ad mleeaney, as dy vel feme orrin ooilley dy jarroo cur nyn inchyn da jannoo shickyr dy vel, cochianglt rish y chlaare argidoil son y nah vlein, plan obbree kiart as currym vees ry livrey cheusthie jeh'n chreatlagh argidoil vees goll er chebbal daue cheusthie jeh'n chlaare argidoil.
Ta Mnr Cannan gra, ny vees feme ain jannoo, shen dy vel plan obbree ain bentyn da'n obbyr vees goll er jannoo cheusthie jeh Kiarail Vannin, coardail rish y churrym, dy yannoo shickyr dy vel ny ta'n mandate dy ghra, rieughagh as ry livrey, as dy vel shen currit stiagh cheusthie rish y chlaare argidoil. T'eh gra, ec y traa t'ayn, dy vel eh jeeaghyn dasyn dy vel ny oltyn dy mooar ass kianglys, bentyn da tra ta'n currym currit roish, tra ta'n plan obbree currit roish, as yn aght ta'n chlaare argidoil coardail rish shen. T'eh gra dy nee baghtal eh dy vel ardyn son jannoo reddyn ny share, as dy vel feme oc feddyn ny reddyn shen dy hareaghey as feme oc er co-obbraghey cooidjagh dy chur eab er cur doaie er shoh rere cooishyn smoo yn Ellan.
Ta Mnr Cannan gra dy vel Coonceil ny Shirveishee feer chleeir mychione yn varel oc er y cheau rour liorish Kiarail Vannin, as nagh vel eh ry hoiaghey jeh, as er-lesh nagh vel eh ry hoiaghey jeh son kuse dy oyryn, as cha nee'n fer sloo, nurree dy dug shin £43 millioon elley ayns slaynt as dy dug ad eam er y tackeyder son tooilley keesh.
Ta Mnr Cannan gra, my vees shin lhiggey lesh y stayd shoh tannaghtyn ayn, dy vel eh myr dy beagh shin shirrey er y tackeyder son bishaghey 10% elley ayns keesh. T'eh gra nagh eh shen ynrican, agh mannagh vel shin cur-rish eh, as my vees shin freayll rish y chreatlagh cheddin, dy bee jeeill feer vooar jenat da ny tashtaghyn ain dy argid freillt liorish y troggal seose kinjagh shoh jeh ceau er kiarail slaynt cheu-hoal jeh as erskyn ny ta'n chlaare argidoil eck, bentyn da'n argid vees currit roish er-e-son.
Ta Mnr Cannan gra, son kuse dy oyryn, dy vel eh stayd nagh vel ry hoiaghey jeh, as dy vel Coonceil ny Shirveishee er ninsh dy kiart da boayrd Kiarail Vannin as er hirrey er boayrd Kiarail Vannin dy yannoo ooilley oddys ad dy yannoo gyn cumrail yn sheshaght as dy ghooney y vaarney argidoil. T'eh gra nagh vod ad cummal seose giarraghyn gys shirveishyn 'sy strane toshee t'er ve currit roish 'sy chummey oc ec y traa t'ayn, 'sy stayd t'ayn nish.
Ta Mnr Cannan gra dy vel feme ain er ve rieughagh ayns shiartanse dy ardyn, agh dy vel feme ain neesht er ve cleeir nagh vel shoh ny stayd vees ry hoiaghey jeh er chor erbee, as dy vel feme ain er caghlaa eh dy bollagh, dy gheddyn Kiarail Vannin back gys y chlaare argidoil eck, dy aa-reaghey ardyn ayndaue ta neu-fondid, dy hareaghey y cochianglys obbree, er yn oyr, mannagh vel shin, as dy vel shin lhiggey lesh kiarail slaynt freayll rish coayl as dy cheau rour gys yn sorch as gys yn towse dy cheau rour as t'eh ec y traa t'ayn.
Ta Mnr Cannan gra dy bee ny eiyrtyssyn 'sy traa sodjey, eer ny eiyrtyssyn 'sy traa meanagh, feer vooar, myr shoh dy vel shen y stayd dy ghaue, as dy row shen oyr v'eh orroo gra rish Kiarail Vannin nagh vel ny treealtyssyn oc dy ghiarrey shirveishyn 'sy strane toshee dy ve coardit rish 'sy vlein argidoil shoh.
Bentyn da barel Mnr Hooper dy nee shoh jannoo seose barriaght, lesh caghlaa ayns polasee y Reiltys, ta Mnr Cannan gra nagh vel eh caghlaa da polasee y Reiltys, as nagh row Coonceil ny Shirveishee er heet gys y voayl shoh, as dy jagh Lawrie Hooper magh roish dy daink y Coonceil gys yn ynnyd shoh, jeh scrutaghey ny treealtyssyn shoh lesh myn-phoyntyn erbee ayndaue, as nagh vel eh shickyr vel eh jannoo seose barriaght son peiagh erbee, ayns rieughid. T'eh gra dy vel ceau £16 millioon rour noi £43 millioon elley currit 'sy chlaare argidoil as bishaghey ayns keesh son y cho-voodeeys, nagh vel shen dy feer barriaght son peiagh erbee.
Ta Mnr Cannan gra dy vel feme ain er obbraghey cooidjagh dy chur doaie er shoh, as dy chur-lesh shin hene back ayns stayd as fod mayd treishteil as soiaghey jeh dy vel ny shirveishyn ta shin dy livrey coardail rish ny vees ry oardrail 'sy chlaare argidoil as 'sy tarmaynys. T'eh gra my vees briwnys jeant nagh vel ad coardail, eisht dy jarroo dy vel feme ain er jannoo reaghyssyn elley, agh dy vel yn chied obbyr oc dy yannoo shickyr dy vel ad jannoo dy chooilley red vees possible dy gheddyn rey rish saaseyn neu-fondagh, dy chur doaie er ardyn as ta boirey ayn, as son shickyrys cur doaie er ny vees jeeaghyn dasyn dy ve ard feer vooar dy jarroo son streeu eddyr y currym, y chlaare argidoil vees currit as y plan obbree ta Kiarail Vannin cur roish.
---oooOooo---
Chammah's shen as ooilley, ta Kiarail Vannin foast cur raaue dy bee feme er shiartanse dy leih fuirraghtyn rish traaghyn sodjey 'sy gheurey shoh er coontey gennid dy argid dy eeck son tooilley olteynyn y wirran ayns ny meeaghyn s'feayrey. T'ad gra dy bee kuse dy skeimyn ayn ayns eab dy veeinaghey y builley, as Kiarail Vannin gra dy vel kiare meeaghyn mysh y gheurey dy mennick jannoo seose traa s'tarroogh ny bleeaney.
Neayr's va Kiarail Vannin currit er bun 'sy vlein 2021, va argid currit da dy yannoo shickyr dy beagh caa dy ailley tooilley olteynyn y wirran dy ghoaill ayns laue yn obbyr elley, agh nagh bee shen yn aght mleeaney er-coontey feme er boayrd Kiarail Vannin dy yannoo corrym coontyssyn y heshaght.
Ta Kiarail Vannin jannoo prowalys jeh shirveishyn via yn eddyr-voggyl as chellvane, as ta skeim prowallagh neesht lesh shappyn potecaree, Skeim Doghanyn Beggey, vees goaill stiagh shiaght cassanyn noa as ta goaill stiagh jeirr, sinusitis as doghanyn cleayshey.
Nee Kiarail Vannin aa-scrutaghey neesht y creatlagh bentyn da keimyn choud's ta cooishyn cheet dy ve ny strimmey, as jannoo shickyr dy vel fir lhee choyrlee er-lheh 'syn Unnid Lhee Trome as 'sy Rheynn Egin.
Agh lesh gennid dy olteynyn y wirran elley, bee feme er fir lhee choyrlee ta goaill kiarail jeh surransee mooie ceau tooilley traa gobbraghey ayns wardyn y thie lheiys, as myr shoh bee ablid smoo ec lheelannyn son surransee mooie, as er-lheh son lheiys ennalagh.
As ta'n earroo dy leih fuirraghtyn er ve recortit er rolley son feeackleyr y Hirveish Claynt Ashoonagh freayll rish bishaghey. Ta ny fysseree s'noa veih Kiarail Vannin soilshaghey magh dy row 5,779 peiagh fuirraghtyn dy ve currit er rolley ec jerrey Mean Fouyir, as shen heose liorish ny shlee na 300 peiagh cosoyley rish Jerrey Souree.
Er mean ta sleih fuirraghtyn dy ve recortit lesh lheelann feeackleyr rish bunnys 400 laa, agh ta paart dy leih er ve fuirraghtyn eer ny sodjey, as un pheiagh fuirraghtyn beggan ny sodjey na 1,600 laa.
Ta boayrd Kiarail Vannin gra dy vel y bishaghey shoh jeh 300 peiagh jannoo seose oyr son imnea.
Ta kied er ve currit son seyraad dy hroarey kennip son ymmyd lhee. Nee'n colught Grow Lab Organics troggal kione-cherroo as ynnyd troarey ayns Pairk Dellal Runnysvie. Ta ny plannyn goaill stiagh sub-stashoon y lectraght noa, cummey reayrt ny cheerey, entreilys as ynnydyn pairkal, as y bun-troggalys cochianglt rish ny reddyn shen. Ren olteynyn y Ving Phlannal coardail rish ny plannyn lesh un aigney.
Va imnea ec shiartanse dy leih, row yn ynnyd ry chummal seose. Dooyrt peiagh ennagh va noi yn yeearree dy row eh goll noi deanyn y Reiltys er net-zero, as dy jinnagh y seyraad cur er towseyn dy stoo currit magh bishaghey dy mooar. Dooyrt un oltey y ving dy beagh y seyraad cur preays er bun-troggalys y lectraght er yn oyr dy jinnagh eh tayrn wheesh veih'n voggyl t'ayn. Ren Caairlagh y Voayrd Caghlaaee er Caghlaa Emshyraght, ta ny Shirveishagh Chymmyltaght, Bee as Eirinys neesht, Oltey yn Chiare as Feed son Doolish Hiar, Clare Barber, goaill rish, ayns freggyrt scruit da feysht Tinvaal, dy row eh doillee dy hoiggal yn aght oddys troarey kennip lhee 'syn Ellan goll er meihghey noi deanyn y Reiltys er yn emshyraght.
Cur freggyrt da'n yeearree plannal, ta'n Fwirran Caghlaaee er Caghlaa Emshyraght gra dy dug y yeeareyder tooilley fys, va goaill stiagh myn-phoyntyn mychione yn stoo troggee, ny veagh currit magh choud's va'n keim troggee goll, as dy row y colught currit da'n Tailley Barrantit er Bree Glass, as mychione mholmaghey as jannoo ymmyd jeh orch glass dy ghientyn conney, as ta'n Fwirran gra dy row ad jeant booiagh liorish ny freggyrtyn.
Va feyshtyn currit er chaghteryn Grow Lab Organics mychione yn oyr nagh row panelyn greiney ayns ny plannyn, ga dy vel cummey mullagh yn ynnyd troarey gollrish feeackleyn saaue dy yannoo eh cooie son jannoo ymmyd jeh killeenyn photovoltaagh. Ta fer jeusyn hug y colught er bun, Charlie Price, gra dy vel plannyn ec y cholught dy chur stiagh panelyn greiney 'sy traa ry heet.
Ta jerkalys dy jig ny shlee na 60 startey ass yn shalee shoh, as dy bee 90% jeh ny startaghyn shen, ta'n colught dy ghra, son cummaltee yn Ellan. Ta'n colught gra dy vel eh treishteil dy bee'n seyraad troggit as fo raad cheusthie jeh blein.
---oooOooo---
Lhig dooin goll back gys y chooish shen bentyn da'n resooney magh, as yn feysht row Olteynyn yn Chiare as Feed cur barrant ayns Mnr Cannan myr yn Ard Shirveishagh. Chammah's cur eh hene roish myr arryltagh dy ve'n
Ard Shirveishagh, ren Oltey yn Chiare as Feed son Doolish Veanagh, Chris Thomas, ceau teiy ayns foayr jeh'n treealtys nagh row eh cur barrant ayns Mnr Cannan.
Haink y treealtys shen ass y chooish bentyn da Kiarail Vannin, hug er Mnr Hooper irree ass, as lurg da Mnr Hooper irree ass, ren Oltey yn Chiare as Feed son Doolish Hiar, Joney Faragher, irree ass myr oltey politickagh yn Rheynn Slaynt as Kiarail y Theay neesht. Ayns ynnyd jeh Bnr Faragher, ren Mnr Cannan pointeil daa oltey politickagh, as she Mnr Thomas va fer jeu, as eh pointit yn 18 Jerrey Fouyir. Agh nish ta Mnr Cannan er screeu rish Mnr Thomsa, gra dy row eh jeh yioin jannoo neu-hickyr y cochianglys eddyr yn shirveishagh – as Mnr Cannan goaill ersyn y currym myr Shirveishagh Slaynt as Kiarail y Theay ec y traa t'ayn – as oltey politickagh yn Rheynn, as myr shoh nagh vod eh tannaghtyn myr oltey politickagh yn Rheynn ny sodjey.
Ta Mnr Thomas gra dy row traa feer jarrooagh as jannooagh 'sy Rheynn Slaynt as Kiarail y Theay, agh dy vel Coonceil ny Shirveishee er reaghey nagh voddym ve jarrooagh as jannooagh cheusthie jeh'n Rheynn Slaynt as Kiarail y Theay, va red ennagh v'eh geearree jannoo, as son y vondeish ashoonagh, er yn oyr dy ren eh votal noi'n Ard Shirveishagh, as dy jarroo dy ren eh chebbal eh hene myr shirreyder son Ard Shirveishagh 'sy teiy er ve gyn barrant ayn, ayns yn Chiare as Feed mysh shiaghtin er dy henney.
Bentyn da ve currit magh ass yn Rheynn, ta Mnr Thomas gra nagh row eh ny Hirveishagh, as nagh row eh rieau agh ny chooyl-vinkeyder jannoo shirveish er yn Rheynn, as ny chooyl-vinkeyder as keeayll chionnit echey as t'er ve ny Hirveishagh. T'eh gra dy vel mooarane as feme er jannoo eh ayns kiarail slaynt mychione yn argid, mychione cur-lesh cooidjagh y currym, y plan obbree, y chlaare argidoil. T'eh gra dy vel corree veih ymmodee jeh fir phrofeshoonagh y chiarail slaynt er y reireydys as vice versa, as dy vel eh mie ec cur-lesh sleih ry cheilley, myr shoh dy vel eh mollit nagh vel eh abyl dy yannoo shirveish son y vondeish ashoonagh marish Mnr Cannan.
Ta Mnr Thomas gra dy vel eh smooinaghtyn dy vel eer Mnr Canna, dy ve cairagh, beggan mollit nagh vel eh ayns shen jannoo shirveish marish, er yn oyr dy vel eh ayns rieughid Coonceil ny Shirveishee t'er vriaght jeh dy aagail, nagh vel eh yn Ard Shirveishagh y cheayrt shoh. T'eh nagh bee fys echey er arragh, agh dy vel eh lhaih y screeuyn as jeeaghyn er ny t'er haghyrt, as dy vel eh smooinaghtyn rishyn hene nagh vel Coonceil ny Shirveishee ynrican ginjillaghey yn Ard Shirveishagh ec y traa t'ayn, agh er-lesh cooidjagh dy vel Coonceil ny Shirveishee er n'yannoo briwnys er shoh.
Er-lesh Mnr Thomas, ayns ny resoonaghyn magh back ayns Tinvaal Jerrey Fouyir, dy row eh jeeaghyn dasyn nagh vel yn Ard Shirveishagh credjal ayns rieughid wheesh ayns Plan yn Ellan as ta sleih gollrish Mnr Hooper as er-lesh dy by chosoylagh eh dy vel yn Shirveishagh Tashtee, yn Fer-lhee Allinson, myr shoh nagh vel shin er jeet gys stayd nish as ta'n Ard Shirveishagh myr dy beagh eh pryssoonagh jeh Plan yn Ellan nagh vel eh ayns rieughid coardail rish. Er-lesh dy row eh ynnyd bolvaneagh ec olteynyn Coonceil ny Shirveishee ayns y resooney magh, tra v'ad cheet er leighalys, as dy jagh ad erskyn ny va feme er, er yn oyr dy dooyrt ad ayns rieughid dy jinnagh ad ooilley irree ass en masse.
Ta Mnr Cannan er n'ghra dy vel eh son loayrt rish dy chooilley oltey lurg yn resooney magh. Ta Mnr Thomas gra dy vel eh smooinaghtyn fy yerrey dy jean yn Ard Shirveishagh hene irree ass. T'eh gra nagh vel eh er shirrey loayrt rishyn son y coloayrtys 15 minnid echey mychione echey, agh dy vel eh sheiltyn resoonagh fakin dy vel eh kiart er vriaght jeh dy aagail, ny dy vel Coonceil ny Shirveishagh er n'yannoo shen, ansheerbee. T'eh gra nagh vel fys echey dy vel eh er vriaght jeh ooilley yn sleih, as ayns rieughid dy ren eh seyr dy chur eam chellvane er dy chooilley pheiagh ren votal nagh row barrant oc aynsyn, as t'eh jeeaghyn nagh vel fer erbee jeusyn er n'gheddyn cuirrey da coloayrtys 15 minnid choud's nish, myr shoh dy jean mayd fakin ny vees taghyrt lurg shoh.
Ta Mnr Thomas er ve currit magh ass kuse dy oikyn roish nish, as t'eh er nirree ass oikyn elley, er yn oyr dy vel cooishyn er jeet dy ve ayn nagh vod eh coardail rish. T''eh cur coontey jehsyn hene myr politickeyr as prinsabylyn echey ta credjal ayns polasee. T'eh gra dy ren politickaght Vannin failleil 'sy reihys 2021 eer ny smoo na ren eh ayns 2016, son daa oyr: 'sy chied ynnyd, cha row y currym cleeir, as cha row ny polaseeyn reaghit 'sy reihys, as dy vel shen leeideil gys ny doilleeidyn t'ain nish; as 'sy nah ynnyd, ta'n Reiltys shoh dy sonaasagh, eer ny sonaasee na fer 2016 v'eh paart jeh veih'n toshiaght, dy bunnidagh ren goaill toshiaght reesht ass y noa, as dy ren eh jarrood mychione dy chooilley red v'er n'gholl roish shen, as dy ren shin coayl wheesh.
Ta Mnr Thomas gra dy ren shin coayl wheesh: va'n cheead laa toshee ain jeh'n Reiltys shoh 2021, cur eab er reaghey shaghrynys mychione ny va er chee goll er cur stiagh ayns Plan yn Ellan. T'eh gra dy vel Reiltyssyn kiart freggyrtagh da aigney y phobble, as ec y toshiaght dy vel ad goaill toshiaght ayns coardail rish aigney y phobble kiart ny lurg yn reihys, as shen yn ynnyd lhisagh shin er ve jannoo, as shen yn oyr nagh ren eh ceau teiy ass-lieh fer erbee jeh ny shirreyderyn dy ve Ard Shirveishagh. Fy yerrey haink eh magh dy row eh bunnys Tony Blair ec derrey heu boayrd Coonceil ny Shirveishee as Boris Johnson ec cheu elley y voayrd, as my vees shen ayd, shen stayd bolvaneagh t'ayn.
---oooOooo---
Roish y resooney magh er treealtys Tim Glover mychione cur barrant ayns Alfred Cannan myr yn Ard Shirveishagh, dooyrt Mnr Thomas, dy beagh eshyn arryltagh dy ghoaill ersyn y currym shen myr Ard Shirveishagh. V'eh loayrt 'sy resooney magh mychione ny eieyn politickagh echey, agh hug eh er olteynyn elley gearey tra dooyrt eh foddee dy jinnagh ad caghlaa as caghlaa reesht.
Ny yeih shen as ooilley, er-lesh Mnr Thomas dy lhisagh politickeyryn cur cooishyn shickyr roish y theay lesh aghtyn feayslee bentyn daue dy cheau teiy er roish y nah reihys mooar cadjin. T'eh gra, liorish cur shaghey goaill toshiaght er reaghey polaseeyn derrey lurg reihys mooar cadjin gyn fys shickyr er aigney y phobble, dy vel yn eiyrtys jeh shen nagh vel y reiltys cooilleeney monney.
Ayns soie yn Chiare as Feed Jemayrt shoh chaie, yn 5 Mee Houney, va coloayrtys mychione cummys ny cooyl-vinkeyderyn as parteeyn politickagh dy heet ry cheilley ayns conastaghyn my vees ny barelyn oc coardail. Choud's ta Mnr Thomas smooinaghtyn nagh vel yn Ellan ayns foayr jeh'n pholitickaght rere parteeyn, t'eh coyrlaghey dy vel feme er caghlaaghyn 'syn aght ta politickeyryn soilshaghey magh ad hene roish y theay.
Ta Mnr Thomas gra, ny vees feme ain er 'sy reihys mooar cadjin 2026, shen polaseeyn er y voayrd veih'n toshiaght, er e hon dy hoiggal ny vees ny polaseeyn jeu ta'n theay ayns foayr ec jerrey yn oardagh reihyssagh. T'eh gra dy vel feme er cur-lesh er e hoshiaght shen ayns cur er bun reiltys. Ayns fockleyn elley, t'eh gra nagh vel eh feeu veg ynrican jannoo briwnys dy vel feme ain er jannoo red ennagh bentyn da'n chreoighys rish thieys, ny dy vel feme orrin jannoo red ennagh mychione caghlaa emshyraght, ta feme ayns rieughid er consensus ve ain er ny ta shin er chee jannoo.
---oooOooo---
Va musthaa nurree ec y traa va Oltey yn Chiare as Feed son Connaghyn, Julie Edge, foast ny Shirveishagh Ynsee, Spoyrt as Cultoor mychione reaghys dy ghooney loghan snaue y jiass ayns Balleychashtal er yn oyr dy row eh coayl argid as dy beagh feme er ceau argid er cummal seose eh neesht. Va ymmodee sleih gaccan mychione shen, as haink lughtyn-reill ynnydoil y jiass cooidjagh dy reaghey aght dy reayll foshlit y seyraad shen. Neayr's shen ren yn Ard Shirveishagh, Alfred Cannan, briaght jeh Bnr Edge dy irree ass yn oik shen eck, as ren eh pointeil Daphne Caine ayns ynnyd jee veih Toshiaght Arree mleeaney.
Ta Bnr Caine, gra dy vel yn Rheynn cheet quail dy reiltagh ooilley ny loghanyn snaue ardjynagh as ta coloayrtys echey roo mychione cur argid as mychione aghtyn dy hareaghey fondid bentyn da bree as spaarail argid dy cummyssagh. T'ee gra nagh vel ee er n'gheddyn fys erbee nagh bee ablid ec loghan snaue erbee dy heet stiagh cheusthie jeh'n chlaare argidoil echey, agh dy vel yn Rheynn as yn loghanyn snaue ardjynagh nish meeiteil dy reiltagh.
Rere plannyn, bee loghan snaue noa troggit ayns Balleychashtal myr ayrn jeh'n shalee mooar
dy hroggal scoill ard noa ayns ynnyd jeh Scoill Ard Cashtal Rushen. Er-lesh Bnr Caine dy vel eh mie dy liooar dy ghra dy vel ymmodee coloayrtyssyn er ve oc 'sy Rheynn neayr's haink ee gys yn Rheynn Toshiaght Arree, as dy vel ad er hirrey dy chionn son reddyn dy gholl er nyn
doshiaght, chammah's er y scoill ard ayns ynnyd jeh Scoill Ard Cashtal Rushen as er y ghlout sheanse, chagnoaylleeaght, jeshaghteyrys as maddaght Scoill Ard y Nah Ven-rein Ealisaid. T'ee gra dy vel Scoill Ard Cashtal Rushen lesh unnid reirey shaleeyn yn Rheynn Bun-troggalys as goll er e toshiaght, as dy vel yn Rheynn jerkallagh dy jean ad fakin red ennagh jeant ayns ny meeaghyn shoh cheet, as dy by chosoylagh eh dy bee shen ayns meeaghyn moghey ny bleeaney shoh cheet dy bee yn Rheynn ayns ynnyd dy heet er linnaghyn traa as ny t'ad dy yeeaghyn er, agh ec y traa t'ayn dy vel ee goll er e toshiaght.
---oooOooo---
Va feysht er yn Shirveishagh Tashtee, yn Fer-lhee Alex Allinson, ayns soie yn Chiare as Feed Jemayrt shoh chaie, yn 5 Mee Houney, mychione y reaghys echey dy gheddyn rey rish Kaartyn Aym, as va shiartanse dy leih jannoo ymmyd jeu dy gheddyn cooney cadjin argidoil ny pensionyn veih'n Oik Postagh. Hig jerrey er y choarys yn 31 Mee ny Nollick 2025.
Ta'n Fer-lhee Allinson gra, tra ta shin jeeaghyn er yn earroo ooilley cooidjagh jeusyn ta geddyn cooney cadjin argidoil, as jeeaghyn er yn earroo ooilley cooidjagh ta dy gheddyn via Kaart Aym, dy nee corrillagh feer eer veg jeh shen. T'eh gra, ny ta'n Tashtey dy yannoo, cha nee goaill ersooyl yn entreilys oc da argid roie, agh jannoo yn entreilys da argid roie ayns aght elley. T'eh gra, myr shoh, ayns rieughid, dy jinnagh eh treishteil dy bee sleih er nyn n'ghreinnaghey eer ny smoo dy cheau shen 'sy cho-voodeeys ynnydoil.
---oooOooo---
Ta jantys y Rheynn Gastid Dellal, Argidys Ellan Vannin, er hayrn y vreid veih ny t'eh cheet er myr caslys cheerey ny raaidyn enmyssit Argidys Ry Chummal Seose son yn daa vlein shoh cheet. T'eh cur enn er ardjyn as ta caaghyn son colughtyn shirveishyn argidoil 'syn Ellan dy lhiassaghey shirveishyn as saaseyn dy ve freggyrtagh da ny t'eh cheet er myr aggyrt dowanagh vees bishaghey dy bieau son baih argid ayns aghtyn vees ry chummal seose.
Ta'n docamad goaill stiagh plan jantys as jeih cooish ayn, as ayn ta deanyn dy ghoaill ayns laue niee glass – shen dy ghra, colughtyn ta goaill ayrn ayns reddyn ta jannoo jeeill da'n chymmyltaght as dooghys y theihll, agh t'ad ceau argid eddyr er cosney daill er carbon, liorish t'ad jannoo ymmyd jeh eabyn liorish sleih elley dy hareaghey, as geddyn daill gyn cur eab er shareaghey ny t'ad dy yannoo. Ayns aghtyn elley, ta colughtyn myr shoh shirrey dy ve cochianglt rish cooish ennoil gollrish thie tashtee ny lout ellyn, rish thie cloie ny olloo scoill, ny rish reddyn gollrish fwirranyn spoyrt dy vel yn ennym oc cochianglt rish red ennagh ennoil, dy chur er sleih jarrood y jeeill vees goll er jannoo oc. Ansherbee, shen daa aght ta niee glass goll er jannoo ec shiartanse colughtyn.
Ta'n plan jantys goaill stiagh saaseyn dy hareaghey baghtalys as dy chur brod da caaghyn dy chroo startaghyn 'sy cherroo bentyn da reddyn vees ry chummal seose.
Ta'n Shirveishagh Gastid Dellal, as Oltey yn Chiare as Feed son Ayrey as Maayl, Tim Johnston, gra dy vel eh jeant booiagh fakin Caslys Cheere ny Raaidyn son Argidys Ry Chummal Seose goll er clou, as dy vel eh jeeraghey dy bunnidagh er lhiassaghey schleiyn as cur argid baiht stiagh ayns ardyn as ny deanyn oc net-zero as jarrooagh son najoor, as va currit er bun trooid co-obbraghey rish leeideilee y jeadys. T'eh gra dy vel eh treishteil dy jeant y kerroo shen as co-voodeeys s'lhea y dellal glackey y bree shoh myr saase ymmydoil dy stiurey gys y vargey ghowanagh shoh vees caghlaa dy tappee.
Ta Mnr Johnston gra dy ren y Strateish Tarmaynagh cur enn er dy vel shirveishyn argidoil jannoo seose fer jeh ny ardyn lane-scanshoil ec cree y tarmaynys as feme er coadey eh. T'eh gra nagh vel y bree son Argidys Ry Chummal Seose ynrican cummal seose tarmaynys yn Ellan liorish freayll as pohlldal obbreeyn as ard schleiyn oc, agh neesht dy vel cummys baghtal echey dy chummal seose goll er e hoshiaght gys ny deanyn bentyn da'n chymmyltaght as reddyn sheshoil vees ry chummal seose ec ymmodee thieyn dellal, as dy jarroo ec y clane Ellan.
Ta Ard Sheckter Argidys Ellan Vannin, Michael Crowe, gra dy vel y bishaghey dowanagh ayns argidys ry chummal seose ayns rieughid er n'gholl veih ve ayrn er-lheh co-voodeeys ny shirveishyn argidoil dy ve ny chree smoo 'sy vean jeh margaghyn argidoil noa-emshiragh. T'eh gra dy vel jeadys ny shirveishyn argidoil ayns Ellan Vannin jannoo seose mysh lieh-ayrn y tarmaynys ain, as dy nee feer scanshoil eh dy vel shin jannoo shickyr dy vel shin freayll rish jannoo ass y noa as aase 'sy cherroo shoh, as dy vel croo y bree shoh er yn Argidys Ry Chummal Seose as lhunney caslys cheerey ny raaidyn ard-scanshoil son sheeyney magh 'sy traa ry heet
as freayll rish y speeideilys t'ayn nish jeh co-voodeeys ain ny shirveishyn argidoil.
She Greg Easton ta Caairlagh y Phossan Stiuree er Argidys Ry Chummal Seose. T'eh gra dy row y Possan Stiuree currit er bun ec Argidys Ellan Vannin, ayns rieughid dy chur-lesh cooidjagh yn oaylleeaght vees ayn hannah ayns Ellan Vannin, agh neesht eisht dy chummey caslys cheerey ny raaidyn daa vlein, vees goll er lhunney oc ayns yn symposium, as dy vel caslys cheerey shen ny raaidyn goll trooid kiare ard phillar, ayns rieughid. T'eh cheet er Pillar 1 myr Chymmyltaght Vees Niartaghey, as dy vel shen jannoo shickyr myr kerroo argidoil dy vel ad jeant aarloo as freggyrtagh da.
Ta Mnr Easton gra dy vel Pillar 2 Lhiassaghey yn Ablid, myr shoh ayns yn daa vlein shoh cheet dy vel schleiyn jeant ny syrjey harrish dagh kerroo, dy vel y fys as yn oaylleeaght as y cheeayll chionnit shen ec 30% jeh ny failleydee ain harrish ny shirveishyn argidoil.
Ta Mnr Easton gra eisht dy by chosoylagh eh dy vel Pillar 3 yn fer smoo greesaghey, as dy vel shen y smooinaghtyn er noaid as cur bun-argid 'sy chooish, myr shoh dy vel eh jeeaghyn er reddyn gollrish margey Ellan Vannin son y najoor, dy chur-lesh y bio-chaghlaays as yn argidys cooidjagh.
Ta Mnr Easton gra dy vel Pillar 4 ayns rieughid ayns aght ny vees goll er jannoo ayns shoh, liorish cur-lesh shen magh dy dowanagh, dy vod margaghyn eddyr-ashoonagh cur enn er y vondeish dooghyssagh ain myr biosphere jeh'n clane ashoon, as cheet dooin, vel ad shirrey reirey ayns baih argid vees ry chummal seose ayns bancal as argid er eeasaght, vel ad jeeaghyn dy recortey ny couyryn eco-oaylleeagh oc ayns shoh, ny jeeaghyn er reddyn gollrish kerroo y chappeeys neesht as yn aght ta'n coarys shen caghlaa – ta colught y chappeeys fer s'lesh colught elley dy bollagh as vees reaghey cooishyn argidoil son yn shellooder shen.
Ta Mnr Easton gra son shickyrys dy vel scughey mooar er ve ayn, as my vees shin goll back 10 bleeaney ny 15 bleeaney, dy row y vargey bunneydagh dy liooar, as eisht dy row y Coardail Paris ayn, y Creatlagh Dowanagh son Bio-Chaghlaays, as eisht jeeaghyn er ny va taghyrt 'syn Oarpey as 'sy Reeriaght Unnaneysit, dy vel eh smooinaghtyn dy vel dy chooilley pheiagh ny chlient nish, dy vel dy chooilley pheiagh boayl ennagh er y spectrum shen, foddee dy vel ad kiarail dy jeean mychione freayltys ny mychione builley sheshoil, ny foddee dy vel ad geearree ve jeerit ny smoo er tarmaynys er-lheh, myr shoh dy vel eh jeeaghyn er aghtyn fod mayd goaill ny reihyn t'ec clientyn as eisht jannoo ymmyd jeh shen ayns ny nheeghyn t'oc ny lhiassaghey ny jannoo ass y noa bentyn da ny nheeghyn shen, as er-lesh ayns rieughid dy vel shen jannoo seose caa feer vooar son dy chooilley cherroo harrish yn Ellan.
Ta Fer toshee son Bancal as Treishtyn da Argidys Ellan Vannin, Paul Blake, gra, er-lesh, tra va cummal seose ec kione mooie y smooinaghtyn v'ec sleih, ny vees argidys ry chummal seose nish dy vel eh er ec y cheu-veealloo as 'sy vean jeh'n smooinaghtyn ec sleih 'sy chooish shoh, as dy jean y shalee shoh dy baghtal jannoo shickyr shen goll er nyn doshiaght son Ellan Vannin.
Roish nish ta imnea er ve ec sleih bentyn da daill rere carbon, as ymmyd jeant jeh shen liorish colughtyn ta jannoo jeeill da'n chymmyltaght dy niee glass ad hene, myr va mee gra, shaghey cur eab er shareaghey yn aght t'ad gobbraghey. Lesh caslys cheerey ny raaidey cheet er y doilleeid lesh niee glass, ta Mnr Easton nagh vel agh un aght dy chur-rish shen, as shen lesh ard-ynrickys, as ayns rieughid dy vel sampleyr ry gheddyn ayns ny va jeant oc ec ny Crossagyn, va ny shalee prowalagh, ren cur-lesh cooidjagh kuse dy hieyn dellal chammah's Treisht Bea Feie Vannin, as ynrican dy vel abyl dy hoilshaghey magh, ny t'ad dy yannoo, dy vel yn ynrickys shen ayn. Er-lesh dy vel yn cheu elley jeh shen, shen yn ayrn noi niee glass jeh, as y peesh er cur lipaid er, as jannoo shickyr my vees peiagh ennagh gra dy vel ad jannoo red ennagh vees ry chummal seose, dy vel y creatlagh ain as y feanish as ny data dy ve abyl dy hoilshaghey magh shen.
Ta Mnr Crowe gra dy vel kuse dy gheanyn ayn. T'eh gra dy vel ad treishteil dy yannoo ayns shoh, shen edyr, myr dimraa Mnr Easton bentyn da cur freggyrt da ny ta custymeyryn gaggyrt, ny ta ny kerrooyn argidoil fakin mygeayrt y theihll, as neesht cur shen cooidjagh rish aase tarmaynagh, er yn oyr dy vel caa gyn cosoyley ain ayn shoh, dy chur-lesh cooidjagh livrey kiarailyn ren shen bentyn da'n Choardail Paris ny kiarailyn elley bentyn da'n chymmyltaght ny da reddyn ry chummal seose, ec y traa cheddin cooney lesh ny colughtyn ain gaase, as dy lhiggey gaase y co-voodeeys dellal argidoil ayns Ellan Vannin.
Ta Mnr Crowe gra dy vel shen ayrn feer anaasagh jeh shoh, as dy vel eh fer jeh ny ard oyryn da'n jeadys, y reiltys, y reilleyder, gobbraghey cooidjagh er undin feer lhean, er yn oyr dy vel ad treishteil cooilleeney ymmodee deanyn trooid yn un halee.
Ta Mnr Easton gra dy row Pillar 2, Lhiassaghey yn Ablid, fer jeh ny ard-chooishyn ren ad smooinaghtyn er myr possan stiuree, as she'n nhee shen, my vees oo ayns scoill ny ayns colleish ayns shoh, as dy vel oo geearree dy mooar jeeraghey er yn ard shen, dy beagh feme ort goll gys Lunnin ny goll noon. T'eh gra, ayns rieughid nish, dy bee'n caa ayd dy lhiassaghey as dy shleeu ny schleiyn shen 'syn Ellan, vel oo geearree cheet dy ve jeerit er yn aght dy ve dty reireyder son baih argid ayns aghtyn vees ry chummal seose ny dty vanceyr, ny smoo jeerit er yn aght dy ve dty er eco-oaylleeagh, as bentyn da'n ard er-lheh shen dy vel ad geearree troggal seose yn ablid shen 'syn Ellan, vees cooney dy yannoo reen dy chooilley cherroo son y traa ry heet, as er-lesh da ny va Mnr Crowe dy ghra, dy lhiassaghey y berchys shen vees ry chummal seose, yn aase vees ry chummal seose, 'syn Ellan.
