Meeryn ass Traa dy Liooar, Jelune 31ed Mee Vayrt 2025
Ta'n Shirveishagh Tashtee, yn Fer-lhee Alex Allinson, gra dy vel aggyrt son kiarail slaynt cheet dy ve ny smoo na'n couyr dy eeck er-e-son jannoo seose doilleeid nagh vel jannoo er yn Ellan ynrican. T'eh gra dy vel ad jeeaghyn er gurneil ny vees ceaut ec yn reiltys, agh dy vel fys oc dy vel yn Shirveish Claynt ayns feme jeh tooilley argid 'sy traa ry heet, dy vel fys ain dy vel pobble ain vees beggan ny shinney, as dy vel ny costyssyn jeh druggaghyn as jeh lheihys gyrjaghey dagh blein. T'eh gra, myr shoh, dy vel eh kiart dy bollagh dy vel ad cur eab er jannoo corrym shoh lesh aght feayslee son y traa sodjey, shaghey ve ny lhie ynrican er keesh cheet stiagh as toyrtyssyn yn Urryssaght Ashoonagh.
a'n Fer-lhee Allinson gra dy vel feme ain dy bollagh er cur argid son yn Shirveish Claynt Ashoonagh ain, as fys ain, blein er blein, dy vel shin cur tooilley argid stiagh aynjee, dy vel shin cur £25 millioon elley stiagh aynjee 'sy vlein shoh cheet (shen dy ghra, y vlein argidoil shoh cheet). T'eh gra dy vel feme ain er aa-chummey yn aght vees shen goll er livrey, agh dy vel feme neesht er cur-rish ny vees ny lhie foee, cur argid er-e-son, as dy vel shen yn oyr ren eh gyrjaghey keesh cheet stiagh veih 20% gys 22% nurree, dy chur-rish y varney shen ayns cur argid, as nish dy vel ad er chur sheese shen gys 21% 'sy vlein argidoil shoh, agh dy vel feme ain er jeeaghyn er aghtyn elley dy gheddyn y cheet stiagh ta shin feme dy chur argid son yn Shirveish Claynt Ashoonagh.
Ta'n Fer-lhee Allinson gra dy vel fer jeh ny reihyn ren eh cur roish nurree, va shen dy chummal co-choyrle er tailley son yn Shirveish Claynt Ashoonagh, as t'eh cur leshtal dy ren eh goaill tammylt liauyr dy gheddyn aarloo eh, agh dy vel ad er lhunney shen nish dy chur eab er geddyn son shickyrys barelyn y cho-voodeeys ain, bentyn da'n aght kiart dy chosney y cheet stiagh as feme oc er dy eeck son Shirveish Claynt Ashoonagh vees nastee ec y traa ta sleih feme eh.
Ta'n Fer-lhee Allinson gra dy vel ad er chur coontey giare jeh mysh dagh ooilley reih er-lheh dod ad smooinaghtyn er ayns shoh, as reesht nagh vel eieyn reaghit rolaue ayn. T'eh gra dy vel fys echey foddee dy vel sleih goll er greinnaghey liorish y nhee dy vel ad jeeaghyn er cur y tailley er sleih as t'ad cosney cheet stiagh feer ard, as foddee dy vel ad goll gys y cagliagh syrjey er keesh, as cur eh orroosyn shen; dy chur tailley orroosyn shen ta cosney argid har vooir nagh vel geeck y cheesh ayns shoh er yn oyr dy vel ad geeck ee har vooir, agh ta foast jannoo ymmyd jeh'n Shirveish Claynt Ashoonagh ain, dy beagh ad geeck tailley er y cheet stiagh oc ooilley cooidjagh.
Bentyn da'n cho-choyrle shoh, ta'n Fer-lhee Allinson gra dy vel ad er vriaght neesht mychione cooney cadjin argidoil, dy vel kuse dy leih geddyn cooney cadjin argidoil ayns ynnyd jeh cosney argid as ec y traa t'ayn nagh vel ad geeck keesh er y chooney cadjin argidoil shen: lhisagh ad ve geeck tailley? T'eh gra nagh vel shoh dy chur eab er jannoo ny sloo yn eaghtyr dy chooney cadjin argidoil t'ayn, dy vel eh cur eab er gra, my vees entreilys ec dy chooilley pheaigh da coarys slaynt co-chadjin, lhisagh dy chooilley pheiagh eeck son shen, as lhisagh shen ve cairagh as corrym. T'eh gra nagh vel shen dy ghra dy vel ny freggyrtyn echey da shen, agh dy vel eh feer jeean dy vel whilleen sleih as vees possible goaill ayrn 'sy cho-choyrle dy hoilshaghey magh yn aght t'ad gennaghtyn mychione y chooish.
Bee'n co-choyrle er y chooish goll rish 12 hiaghtin derrey yn 18 Mean Souree. Veagh tailley currit ynrican son shirveishyn slaynt, as veagh eh scarrit veih keesh cheet stiagh. Agh ta'n Tashtey gra dy bee eh cramp feddyn aght dy chur bree da tailley, as nagh darragh eh stiagh ayn derrey y vlein argidoil 2027-28.
---oooOooo---
Hed Billey Geddyn Baase lesh Cooney gys y nah cheim nish lurg da'n Choonceil Slattyssagh ceau teiy ayns foayr jeh soiaghey jeh ny caghlaaghyn treealit ec yn Chiare as Feed. Cha row yn Chiare as Feed ayns foayr jeh ooilley ny caghlaaghyn jeant da'n Villey liorish y Choonceil Slattyssagh, goaill stiagh caghlaa dy yannoo ny sgirrey yn traa va peiagh ennagh ny chummaltagh dy ve reihalagh da bree y slattys. Ga dy row kuse dy Olteynyn y Choonceil Slattyssagh gra dy row imnea oc mychione feme er peiagh ennagh ve ny chummaltagh rish queig bleeaney dy ve reihalagh, ren ad reih dy hoiaghey jeh ny va'n Chiare as Feed dy ghra.
She Rob Mercer hug y Billey roish y Choonceil, as t'eh gra dy vel eh smooinaghtyn dy vel y Billey eer ny share son ooilley ny caghlaaghyn t'er ve jeant da, chammah's 'sy Choonceil Slattyssagh as ayns yn Chiare as Feed. T'eh gra, bentyn da sleih as sym oc as ta foast imneaghyn oc mychione y Villey, dy vel eh scanshoil dy hayrn geill da, nagh vel shoh agh jerrey yn toshiaght, dy vel towse feer vooar dy obbyr as dy eab foast dy ve jeant, roish my vod y Billey shoh cheet dy ve gobbraghey.
Bee feme er y Villey ve signit ec queiq Oltey y Choonceil Slattyssagh as ec 13 Oltey yn Chiare as Feed roish my vees caa da ve currit son Kied Reeoil.
She Billey Oltey Preevaadjagh ta'n Billey Geddyn Baase lesh Cooney, as v'eh currit roish liorish yn Fer-lhee Alex Allinson. T'eh gra nagh vel shoh red ennagh foddee sleih yannoo as driss orroo, agh dy vel ad er chur stiagh ayn slane reayn dy haaseyn coadee, as dy vel feme er gobbraghey er slattys syrjey as ynsagh as codeyn dy chliaghtey liorish co-choyrle sodjey rish yn sleih shen 'sy cho-voodeeys ain as foddee dy jean ad geearree y reih shoh 'sy traa ry heet, agh neesht rish yn sleih bee cur eh: ny fir lhee phrofeshoonagh, ny boandyryn.
Ta'n Fer-lhee Allinson gra dy row eh neu-hurransagh dy liooar dy vel ad er ve loayrt mychione shoh rish feed blein as dy vel ymmodee olteynyn y cho-voodeeys ain er ve cummal troddan er-e-hon rish eer ny sodjey, as dy vel eh mie dy ve abyl dy livrey dauesyn yn chied cheim jeh'n oardagh sodjey. T'eh gra dy vel eh dy bollagh kiart dy vel ad jannoo shickyr dy vel ad shirrey coyrle yn sleih shen 'syn Ellan as dy jean y slattys shoh orroo, as dy vel fys echey dy vel shiartanse dy leih foast goaill aggle roish as ta dy mooar noi echey, as dy vel eh toiggal shen, as dy vel shen yn oyr dy nee feer scanshoil eh, dy vel feme er reillyn as slattys elley cheet trooid Tinvaal, er cummal coloayrtyssyn my-nyn-gione as aghtyn feayslee er-nyn-son, roish my vod bree ve currit da shirveish erbee.
Bentyn da'n traa t'er ve ceaut er y chooish, ta'n Fer-lhee Allinson gra dy row shoh er ve Billey Oltey Preevaadjagh currit roish liorishyn hene, lurg resooney magh v'oc 'sy vlein 2020, as dy nee Tinvaal ren shirrey yn traa dy hur-smooinaghtyn er, dy nee Tinvaal ren cur er bun bingyn, dy nee Tinvaal ren ceau shiaght soie goll trooid ronnaghyn er-lheh jeh, as dy vel shen kiart dy bollagh bentyn da'n ard whaiyl ain goaill yn traa dy ve freggyrtagh da kuse jeh imneaghyn as aggleyn y cho-voodeeys ain, agh chammah's shen, dy ve currit da'n yeearree dy lhisagh ad cur son yn sleih ta eddin ry eddin rish y vaase oc hene, yn ablid oc dy gheddyn baase lesh cooney.
Ta'n Fer-lhee Allinson gra, lesh y chooid smoo jeh ny lughtyn-reill t'er chur stiagh ayn slattys, dy vel eh er n'ghoaill eisht eddyr 18 mee as daa vlein dy chur er yn shirveish shoh ve gobbraghey, as dy nee baghtal eh dy vel mooarane co-choyrle as feme echey er taghyrt, myr shoh dy jinnagh eh treishteil, nish dy vel y Billey er ve coardit ec Tinvaal, dy vod mayd eisht geddyn eh dy ve er ny yeeaghyn er liorish yn Airey Cairys, dy vod mayd geddyn Kied Reeoil, as eisht dy jean yn obbyr goaill toshiaght bentyn da'n cho-choyrle shen rish ooilley jeusyn as ta shoh jannoo orroo, dy chur-lesh eh dy ve gobbraghey, agh dy jinnagh eh jerkal rish dy beagh shen 18 mee ny daa vlein roish my vod sleih ayns rieughid geddyn vondeish ass yn reih jeh baase lesh cooney ve oc 'syn Ellan shoh.
Ta Caairlagh banglane Manninagh y heshaght, My Vaase, My Reaghys, Vicki Christian, gra dy vel ee feer, eer wooiagh as dy vel relief feer, eer vooar eck, dy row eh goll er rish traa liauyr as dy gheddyn eh shaghey y cheim shen, nagh vel eh jeant foast, agh son y traa t'ayn dy vel eh cho mie as oddys eh y ve. T'ee gra dy vel eh er fir lhee goll er traenal dy vod ad cronnaghey tranlaase, dy vel palchey saase coadee ayn hannah, agh dy vel ee shickyr, lesh y fo-clattys ayn, dy bee saaseyn coadee eer ny s'chenney ayn.
Ta Bnr Christian gra dy vel y troddan t'ish er ve stiurey, ec y hoshiaght dy beagh eh er ve mie lhee dy beagh surranse nagh vel ry hurral chammah's diagnosis jeh baase ayns shey mee goit stiagh 'sy Villey ain, agh dy row shen kesmad choud son politickeyryn Vannin dy gholl, dy vel eh foast goll er jeeaghyn er ayns lughtyn-reill elley, as dy vel eh foast gobbraghey dy mie ayns kuse jeh ny cheeraghyn as ta geddyn baase lesh cooney oc hannah. T'ee gra dy ren ny politickeyryn ain reaghey noi shen, agh myr eiyrtys jeh ny chaghteraghtyn oc, dy row ad goll son diagnosis jeh baase ayns 12 vee, as shen dy ghra dy bee caa foddey ny smoo ec sleih as gorlaghyn agglagh vees neuro-vrishey sheese gollrish gorley nearane gleashaghey, myr sampleyr, dy gheddyn entreilys da baase lesh cooney nish, er yn oyr dy bee fer lhee abyl dy ghra nish dy by chosoylagh eh dy vel reaish y vioys ec peiagh ny sgirrey na blein nish, agh dy beagh briwnys doillee eh son fer lhee dy yannoo dy beagh eh shey mee.
Agh er cheu elley y skeeal, ta possan Creestiaght, Kialteenyn Bio ayns Mannin, ass-lieh dy chooilley rheynn Creestiaght, gra dy vel Billey Geddyn Baase lesh Cooney jeh imnea dowin. Ayns fogrey ta'n possan gra dy vel eh er n'obbraghey ayns ny three bleeaney shoh chaie dy chur roish ny drogh-ouryssyn lajer echey, as choud's t'eh gra dy vel eh cur enn er dy vel ymmodee sleih, ayns cooinsheanse mie, smooinaghtyn er y chooish ayns aght elley, t'eh gra dy vel eh trimshagh clashtyn dy vel Tinvaal er choardail rish y Villey.
Ta'n possan cheet er y voirey echey ayns three ard. Hoshiaght, t'eh cheet er imnea mychione coadey y co-voodeeys, as choud's ta Tinvaal er resooney magh y chooish, nagh vel eh er n'yannoo ny sloo yn imnea, as er-lheh mastey sleih as foddee t'ad ayns gaue smoo, as gyn ourys dy vel kuse dy leih ta shenn, anlheiltagh, ayns gaue, gennaghtyn ny smoo dy vel ad cur errey er y lught-thie oc as er y cho-voodeeys. T'eh gra, choud's t'eh cur enn er y chiarail dy hraenal fir lhee phrofeshoonagh dy chronnaghey tranlaase, dy beagh saase coadee smoo eh dy beagh sleih traenit Hannah ayns cronnaghey tranlaase, gollrish obbree sheshoil ny turneyr, goaill ayrn 'sy chooish.
Ta Kialteenyn Bio ayns Mannin cheet eisht er imnea bentyn da'n voraltaght, as ta'n possan gra, rish thousaneyn dy vleeantyn, dy vel yn sarey, Cha jean oo dunverys, er n'yannoo seose undin ethicoil son ymmodee co-voodeeyssyn. Ta olteynyn y phossan credjal dy vel bioys jeh dy chooilley pheiagh ny ghioot casherick veih Jee, as nagh vel feeuid ec oltey erbee y cho-voodeeys goll er ooley liorish mieys bioys y pheiagh shen. T'eh gra, er yn oyr shoh, nagh vod eh ve currit shaghey dy jean cur kione er bioys peiagh ennagh roish yn traa jannoo ny sloo yn ard leagh currit er y vioys jeh ooilley.
As fy yerrey, ta'n sheshaght gra dy vel eh gobbraghey son y vieys cadjin jeh ooilley. T'eh gra, choud's ta fo clattys as reillyn as codeyn dy chliaghtey goll er lhiassaghey nish, dy jean eh ooilley vees possible echey dy obbraghey ayns coadey as goaill kiarail jeh ooilley ayns co-voodeeys Vannin, as er-lheh jeusyn ta gyn coraa as ayns gaue. T'eh greinnaghey olteynyn Tinvaal dy chur bree da'n chiarail oc dy yannoo shickyr dy vel ad goaill ayns laue ny saaseyn coadee shoh as currit stiagh myr ayrn jeh'n chliaghtey ayns cur bree da'n chooish.
---oooOooo---
Ta Kiarail Vannin as Shirveish Carbyd Lheihys Aer y Twoaie Vooar er choardail conaant noa dy reayll yn shirveish goll ayns yn 12 vee shoh cheet. Nee Kiarail Vannin eeck son yn chirveish per mishoon. Ta Ard Sheckter Kiarail Vannin, Teresa Cope, gra dy vel ee booiagh dy row aght feayslee ry gheddyn oc dy chummal seose y parteays ard-scanshoil shoh, nee cur vondeish da'n cho-voodeeys, lesh baghtalys ayns ny costyssyn j'ee as vees jeh feeuid son yn argid.
Ta Ard Sheckter Shirveish Carbyd Lheihys Aer y Twoaie Vooar, Joe Garcia, gra dy vel yn sheshaght ghiastyllagh jeant magh neesht dy vel y parteays foast goll er.
---oooOooo---
Ta sarey er ve currit liorish y Varrantagh Fysseree, yn Dr Alexandra Delaney-Battacharya, da Kiarail Vannin dy aa-scrutaghey yn aght t'ee cur-rish yeearreeyn son data persoonagh, lurg feanish dy row ee failleil dy ve biallagh da ny reillyn. Shoh lurg plaiynt veih eear ailleydagh Kiarail Vannin hug stiagh yeearree bentyn da data persoonagh foast goll er freayll ec Kiarail Vannin.
Hooar magh y Barrantagh Delaney-Battacharya dy row earroo dy cheayrtyn nagh row Kiarail Vannin cur-rish yeearreeyn 'syn aght kiart, goaill stiagh dy ren ee failleil dy chur freggyrt gyn cumrail neu-chooie, as dy row ny ronsaghtyn goll er jeeraghey dy boght, dy row ad neu-resoonagh ny dy row ad neu-chooie. Ta'n briwnys gra neesht dy ren Kiarail Vannin failleil dy hoilshaghey magh dy row saaseyn echey dy yannoo ny share yn oardagh, lurg jee geddyn fogrey cur bree son ny oyryn cheddin Mee Luanistyn 2021.
Ta'n Dr Delaney-Battacharya gra dy vel kuse dy phlaiyntyn er ve currit stiagh da'n oik eck neayr's yn traa va'n fogrey clouit, vees soilshaghey magh nagh vel eh er jeet lesh Kiarail Vannin cur yn oardagh eck dy ve biallagh.
Ren yn ronsaght eck feddyn magh dy row y yeearree va currit stiagh ayn cheet er fys er-lheh as va cleeir, agh dy ren Kiarail Vannin failleil dy ghoaill ayns laue ronsaghtyn resoonagh va jeeraghey er y chooish dy kiart, as magh as shen haink towse mooar dy yss nagh row cooie. Va Kiarail Vannin er hirrey tooilley fys mychione enn y yeeareyder, as dooyrt y Barrantagh dy row eh doillee toiggal yn oyr, fakin yn sorch dy yeearree va currit stiagh ayn. Cha dooar y yeeareyder ny data derrey kiare meeaghyn lurg yn yeearree, as ta'n Dr Delaney-Battacharya cheet er shen myr cumrail mooar as lhisagh lhiettrimmys er ve currit er shen dy haashagh.
Ta 30 laa nish ec Kiarail Vannin dy ve biallagh da'n ogrey cur bree, as mannagh vel ee biallagh da, foddee dy beagh kerrys urree, ny foddee dy beagh y chooish currit da'n ard-whaiyl.
---oooOooo---
Ta'n Rheynn Slaynt as Kiarail y Theay shirrey Ard Offishear interim er faill gys £125,000 'sy vlein. Hig yn Ard Offishear ec y traa t'ayn, Paul Richardson, dy ve ny haaue, lurg da ve pointit ayns aght beayn Mee Luanistyn 2023.
Ta'n reiltys cur y chooish faillee ayns laueyn y cholught Odgers Berndston, ta reaghey failley gys startaghyn er-lheh. Nee'n fer oik noa oaseirey laare argidoil jeh £370 millioon 'sy vlein as goaill ard phaart ayns cummey yn aght ta slaynt as kiarail y theay goll er livrey 'sy traa ry heet.
---oooOooo---
Va'n Shirveishagh Tashtee, yn Fer-lhee Alex Allinson, cur feanish roish Bing ny Coontyssyn Theayagh er y chiaghtin shoh chaie choud's ta'n Ving ronsaghey y Chlaare Argidoil son y vlein argidoil 2025-26, va coardit ec Soie Tinvaal Toshiaght Arree.
Bee bishaghey ayns yn chooid smoo dy chooney cadjin argidoil, as ta'n Fer-lhee Allinson gra dy vel y costys jeh thieys as jeh maayl 'sy cherroo preevaadjagh jannoo seose fer jeh ny oyryn smoo son boirey er sleih as ta cheet stiagh sinshley oc. T'eh gra dy vel chaglymyn marish offishearyn Shickyrys y Theay as chaghteryn sheshaghtyn y trass cherroo er chur trimmid er yn aght dy vel kuse jeh ny doolaneyn smoo fo sleih as ta aaght oc er maayl 'sy cherroo preevaadjagh.
Ta'n Fer-lhee Allinson gra dy vel ad cur geill da dy mooar, my vees ad bishaghey y cooney cadjin argidoil 'sy cherroo preevaadjagh, feer vennick dy vel ny rateyn gyrjaghey dy bollagh dy hautomatagh chelleeragh, myr shoh dy nee caggey beayn dy heeyney magh dauesyn. T'eh gra dy vel yn Tashtey er ve jeeaghyn neesht dy mooar er toyrtyssyn son oyryn erskyn cadjinys as myr egin dy chur da sleih ayns creoighys, as toyrtyssyn neesht son sleih chea raghlid 'sy lught-thie neesht.
---oooOooo---
Ta preays smoo cheet er y Chommishoon son Shirveishyn Theayagh er yn oyr dy vel yn sheshaght cheirdey Unite er n'yiooldey cheb er faill t'er ve caghlaait nish son y wheigoo cheayrt. Ec y traa cheddin ta'n sheshaght cheirdey Prospect cur eam son livrey chelleeragh y bishaghey 4% ayns faill, currit er-ash gys yn 1 Mee Averil 2024, ren olteynyn Prospect soiaghey jeh, agh nagh vel ry gheddyn oc.
Ta Caairlagh y Chommishoon, Oltey yn Chiare as Feed son Connaghyn, Rob Callister, gra dy vel eh mollit nagh ren Unite soiaghey jeh'n wheigoo cheb, agh dy vel eh foast treishteil dy bee caa dy gheddyn aght feayslee da'n chront.
Ta Oaseir Barganey Unite, Debbie Halsall, gra dy vel yn sheshaght cheirdey cummal teiy mastey olteynyn mychione jantys jeadyssagh cummyssagh. T'ee gra dy vel teiy dy chur cowrey er jeet er-ash lane niartal dy vel sleih arryltagh dy chummal jantys jeh sorch ennagh, as er-lhee dy vel eh nish cheet sheese gys y Chommishoon bentyn da ny t'eh geearree jannoo. Va Bnr Halsall loayrt rish Radio Vannin Jeheiney shoh chaie, yn 28 Mee Vayrt, as t'ee gra, neayr's ren yn teiy dooney, nagh vel ad er chlashtyn veg, er-lhimmey, er-lhee, jeh post-l hooar ee yn laa roish shen, (shen dy ghra Jerdein yn 27 Mee Vayrt) as screeuyn, as dy beagh chaglym oc y fastyr shen, Jeheiney shoh chaie, as dy row ad treishteil dy beagh red ennagh grait. T'ee gra nagh vel eh er ve ro chooneydagh tra ren Caairlagh y Chommishoon er n'gholl gys y duillag echey ayns ny meanyn sheshoil dy chur raaghyn roish my vees eh cheet quail fer erbee jeh ny sheshaghtyn keirdey.
Lesh yn sheshaght cheirdey Prospect soiaghey jeh'n cheb hannah, ta Bnr Halsall gra dy vel ad toiggal dy vel olteynyn Prospect, as ee ny sheshaght cheirdey myr shuyr da Unite, er votal dy hoiaghey jeh'n cheb, agh dy vel Unite er n'yiooldey eh, as y barel oc nagh nee cheb resoonagh eh, dy vel eh agh ayns ynnyd faghidagh veih'n aght myr v'eh, as nagh vel eeckys jeh £200, nagh vel currit cooidjagh lesh faill elley, as vees harrish dy chooilley oltey freggyrtagh, as dy jinnagh oo fakin pro rata obbreeyn paart-hraa cosney £100, agh goaill magh Urryssaght Ashoonagh as y cheesh, nagh vel eh faagail agh feer veg, agh keayrt elley dy jean y kione ec y vullagh geddyn yn £200, as dy beagh shen currit 'sy vanc ny ceaut er cocktail boayl ennagh 'sy theihll. T'ee gra nagh vel shen ry hoiaghey jeh, as dy beagh y Commishoon currit da, son y chosneyder sinshley as 'sy vean, dy jinnagh ad ymmyd jeh'n choodagh costys shen dy chur yn argid shen da'n sleih shen as ta feme oc er.
---oooOooo---
Ta'n eear Hirveishagh Ynsee, Spoyrt as Cultoor, Oltey yn Chiare as Feed son Connaghyn, Julie Edge, er chremmey y reiltys mychione yn aght ren eh clou aa-scrutaght jeh lhongaghyn ayns scoill agh lesh palchey jeh dollit magh. T'ee gra dy vel y theay coayl barrant ayns baghtalys y reiltys as yn aght t'eh livrey shirveishyn.
Ren Bnr Edge faagail yn Rheynn Toshiaght Arree 2024, as t'ee gra dy nee ish ren reaghey y currym son cooilleeney yn aa-scrutaght. Va'n currym goaill stiagh aa-scrutaghey y cummey obbree ec y traa t'ayn, kionnaghey as yn aght va cuirrey currit son chebbyn, yn aght va lhongaghyn currit ayns ny scoillyn as ny costyssyn jeu. T'ee gra dy row yn aa-scrutaght jeeraghey er shickyrys jeh feeuid, jannoo shickyr dy row y bee currit da paitchyn freggyrtagh da stundayrtyn cooie, as cur feeuid kiart son yn argid son ny paarantyn.
Va'n tuarastyl clouit ny s'moghey 'sy vee shoh, lurg cumrailyn reesht as reesht, as t'eh cur coontey jeh'n aght ta £2.5 millioon punt ceaut dagh blein er lhongaghyn ayns scoill as ta strane dy voyllaghyn bentyn da beaghey, kionnaghey as aa-chummey cummyssagh.
Agh ta ny shlee na 100 duillag ass 159 duillag as meeryn dollit magh ayndaue, lesh kuse jeu dollit magh dy slane. Ayns chaghteraght postit ayns ny meanyn sheshoil, hug Bnr Edge er nagh row ee er nakin yn aa-scrutaght 'sy traa v'ee 'syn oik eck myr Shirveishagh as nagh ren ee goaill ayrn erbee ayns screeu y tuarastyl. T'ee gra dy vel currym son yn tuarastyl myr t'eh er jeet dy ve ny lhie er y pheiagh haink dy ve'n shirveishagh ny lurg – as shen dy ghra Oltey yn Chiare as Feed son Garff, Daphne Caine – as t'ee gra dy vel y theay as Tinvaal toilchin baghtalys er y chooish.
Ta Bnr Edge gra dy vel yn reiltys cheet dy ve ro vie ec clou tuarastylyn as meeryn dollit magh dy trome, as dy vel y clane oyr son shoh, nagh row aa-scrutaght mooar er ve ayn jeh lhongaghyn ayns scoill rish earroo dy vleeantyn, as er-lhee dy row yn fer s'jerree mysh y vlein 2012. T'ee gra dy row y clane oyr er-e-hon dy yannoo shickyr choud's ta shin goll er nyn doshiaght dy row shin geiyrt er y chummey kiart son lhongaghyn ayns scoill, lesh reih slayntoil son ooilley ny paitchyn ayns ny scoillyn ain. Myr cooish er-lheh, t'ee gra dy vel corrillagh mooar dy liooar ta geddyn lhongaghyn nastee ayns scoill, dy yannoo shickyr dy vel ad geddyn beaghey mie as mieys jeh lhongey ayns scoill.
Er-lesh Bnr Edge nagh vel y reiltys t'ain ec y traa t'ayn son shickyrys geaishtagh rish y theay as ny t'ad dy ghra 'sy cho-voodeeys, as dy vel feme er ve mooie loayrt rish cummaltee y rheynn reihyssagh, as cheet er sleih, as dy nee feer chleeir eh dy vel ad skee jeh, dy vel ad geearree fakin tuarastylyn kiart, as t'ee gra dy row y currym va currit orroo feer chleeir son y tuarastyl shoh, as dy vel shen yn sarey son screeu y tuarastyl, as eisht ayns rieughid dy chur magh fys lesh dateyn neu-chiart cochianglt rish, etc, er-lhee nagh vel shen agh neu-chooie. T'ee gra, ny ta shin laccal, shen slane baghtalys as freggyrtys ny shirveishee as ta currym orroo son livrey ny shirveishyn, as nagh vel y theay fakin livrey mie jeh shirveishyn ec y traa t'ayn.
Ta Bnr Edge gra dy vel yn Shirveishagh ec y traa t'ayn – as shen dy ghra Bnr Caine – fer jeusyn va loayrt ny s'menkey veih ny cooyl-vinkyn, bentyn da wheesh bee ultra-obbrit da va ymmyd goll er jannoo, as dy row eh loayrt feer vooar dy jarroo mychione shen, as ayns yn tuarastyl shoh dy vel eh gra ayns lhongaghyn ayns bunscoillyn dy vel ad gooley dy vel eh 15% harrish chymsal three shiaghtin, cha nee 15% per laa, cha nee 15% per shiaghtin, lesh ymmyd jeant jeh bee ultra-obbrit. T'ee gra myr shoh dy vel shen jeeaghyn jeeish dy vel shen slane condaigagh rish ny smooinaghtyn eck tra nagh row ee ny Shirveishagh.
Lesh Bnr Caine myr cooyl-vinkeyr cremmey Bnr Edge myr yn Shirveishagh Ynsee, Spoyrt as Cultoor, ta Bnr Edge gobbal dy vel ny t'ee dy ghra nish aght dy geddyn cooilleeney politickagh. T'ee gra dy by vie lhee fakin feeuid son yn argid, lhongaghyn dy vieys ayns scoillyn livreit gys ooilley ny paitchyn ain ayns ny scoillyn ain as ayns ny ynnydyn ynsee ain. T'ee gra dy row shoh obbyr dy gheddyn magh nheeghyn lesh currym er-e-hon feer vie as chleeir, as eisht dy lhisagh sleih geddyn plan jantys ass shen.
Ta Bnr Edge gra lesh y tuarastyl shoh as meeryn dollit magh dy trome dy vel eh feer doillee dy feer dy hoiggal, vel raad son lhongaghyn ayns scoill ny vel eh dy ve ro chreoi, ro ghoillee dy yannoo caghlaa erbee, as dy bee tuarastyl eh vees faagit er y skelloo ayns treishteil dy hroggal neese eh ec date s'anmee. Er-lhee nagh vel shen aght currymagh dy chur tuarastyl, as dy jinnagh ee er n'yerkal rish plan jantys ennagh veih agh son shickyrys dy jinnagh ee er smooinaghtyn dy beagh eh fer jeh ny ard tosheeaghtyn.
---oooOooo---
Ta treisht ec Lught-reill Bun-shirveishyn Vannin dy bee caa dy ghoaill toshaiaght er obbyr dy hroggal mwyllin vooynlee ayns Purt ny Hinshey dy leah. Va cumrail er yn obbyr tra va aghin currit stiagh noi ny plannyn, agh ren Caairlagh Lught-reill Bun-shirveishyn Vannin, John Wannenburgh, cur fys noa er y chooish da Oltey yn Chiare as Feed Jemayrt shoh chaie.
Ta Mnr Wannenburgh gra dy row yeearree phlannal son ny mwyljyn dy ghlenney ushtey sollagh ayns Purt ny Hinshey coardit yn 20 Mee ny Nollick 2024, lurg aghin noi echey ve jiooldit er coyrle scruteyr plannal neu-chrogheydagh. T'eh gra, neayr's y date shen, dy vel fwirran claare argidoil Lught-reill Bun-shirveishyn Vannin er ve gobbraghey dy jeean dy lhiggey da obbyr troggee goaill toshiaght. Fakin crampys y halee troggee mooar er multi-villioonyn dy phuint, dy vel earroo dy reddyn jeant as feme orroo ve cooilleenit roish my vees toshiaght jeant.
Ta Mnr Wannenburgh gra, ga dy ren eh cur bree da cur stiagh y yeearree phlannal, nagh row caa ec y reiltys dy gheddyn y thalloo, as dy vel feme er cur kione er oardagh dy chur jerrey er y dellal shen. T'eh gra nish dy vel eh feer faggys dy ve jeant, booise da cooney cumraagyn yn Tashtey, as dy vel eh jerkit dy bee'n thalloo lesh y reiltys feer leah. T'eh gra dy vel earroo dy chonaantyn plannal as feme er cooilleeney ad, ta ny rolley dy heet stiagh er, veih shareaghey bio-chaghlaays gys fungi as reddyn elley, as dy vel eh booiagh gra dy vel, trooid co-obbraghey rish cumraagyn yn Rheynn Chymmyltaght, Bee as Eirinys, dy vel adsyn ooilley er nyn gooilleeney.
Ta Mnr Wannenburgh gra, choud's ta Bun-shirveishyn Vannin er ve gobbraghey rish ny reih-chonannateyderyn rish ymmodee meeaghyn son yn troggal oc dy ghoaill toshiaght cho leah's vees possible, dy vel jerrey er ve currit er y chonaant. T'eh gra dy vel shoh conaant cramp troggee mooar t'ayn, as va feme er draghtey eh as barganey er dy kiarailagh, as dy nee mie lesh gra dy vel y conaant shoh nish signit, as dy vel yn conaanteyder nish aarloo dy ghoaill toshiaght cho leah's vees ad abyl, as dy vel shen naight mie t'ayn.
Ta Mnr Wannenburgh gra dy yn dean son yn ynnyd, dy ghoaill toshiaght dy moghey Mee Averil, agh nagh vel ad foast er feeraghey date lesh sleih cochianglt rish y chalee, derrey ta ny dellalyn bentyn da'n thalloo jeant. T'eh gra cho leah's ta fys feerit oc er y date dy ghoaill toshiaght, dy jean ad clou shen chammah's tooilley fys elley mychione y chlaare. T'eh gra dy vel eshyn as fwirran Lught-reill Bun-shirveishyn Vannin jeeaghyn rhymboo gys livrey y shalee shoh as sleih fuirraghtyn er rish foddey, bee jeh vondeish cha nee ynrican da Purt ny Hinshey agh da slane chymmyltaght yn Ellan.
---oooOooo---
As nee Lught-reill Bun-shirveishyn Vannin goaill toshiaght er obbyr dy hareaghey y moggyl son ushtey sollagh ayns Doolish Jerdein shoh cheet, yn 3 Mee Averil, as bee obbyr goll er rish 23 shiaghtin, dy chur stiagh seyraad noa ayns ynnyd jeh'n stashoon pumpal Kewaigue. Bee sornaig tromaghys noa 'syn ard jeh'n shenn raad gys Balleychashtal as ynnyd Heron as Brearley ec Kewaigue.
Er coontey yn sorch dy obbyr dy ve jeant, bee feme er dooney yn shenn raad gys Balleychashtal ayns paart ny dy slane eisht as nish. Son y chooid smoo bee traaght un troa goll, fo soilshaghyn reill, agh daa cheayrt ta'n raad skedjalit dy ve dooint dy bollagh, veih'n 23 gys yn 30 Mean Souree, as veih'n 25 Jerrey Souree gys yn 7 Mee Luanistyn.
Ta kione skedjalit dy ve currit er yn obbyr yn 28 Mee Luanistyn.
---oooOooo---
Ta'n Rheynn Bun-troggalys er veeraghey dy vel eh er noardrail 11 varroose neay'r's 2021, myr ayrn jeh eabyn dy yannoo noa-emshiragh ny carbid son arraghey theayagh as dy yannoo ny sloo yn costys jeh cummal seose ad.
Ayns freggyrt scruit da feysht Tinvaal liorish Oltey yn Chiare as Feed son Doolish Hwoaie, John Wannenburgh, ta'n Shirveishagh Bun-troggalys, as Oltey yn Chiare as Feed son Rushen, yn Dr Michelle Haywood, gra dy row queig barroose hybrid Citaro Mercedes er nyn oardrail dy hanmagh 'sy vlein 2023 as dy row ad er nyn livrey Mee ny Nollick 2024, er y chostys jeh £934,000. Va tooilley barrooseyn, StreetDeck Wright, er nyn oardrail dy hanmagh 'sy vlein 2024, as dy vel yn Rheynn jerkal rish geddyn ad Jerrey Fouyir mleeaney, er y chostys jeh £1,437,000.
Ta'n Dr Haywood gra dy vel geddyn barrooseyn elley ayns ynnyd jeusyn t'ayn ec y traa kiart cosney ny smoo son yn argid va baiht ayndaue, as dy vel eh cooney dy yannoo ny sinshley yn towse dy charbon lhiggit magh ec ny barrooseyn. Choud's nagh vel fer erbee jeh barrooseyn y rheynn er ve creckit trooid y vargey son carbid aa-laue ayns ny queig bleeaney t'er n'gholl shaghey, dy vel plannyn fo raad dy chreck whilleen as kiare charbid Mercedes shinney. Bee briwnys mychione creck barrooseyn elley jeant ny sniessey da'n traa hig ny barrooseyn StreetDeck noa gys yn Ellan, as goaill tastey jeh femeyn son yn earroo dy hroailtee as shirveishyn.
Ayns freggyrt scruit da feysht liorish Mnr Wannenburgh, ta'n Dr Haywood gra dy row policy er pairkal liorish Olteynyn Tinvaal er ve coardit er y gherrid ec Coonceil ny Shirveishee as dy bee shen currit mygeayrt dy leah. Rere shen, bee kione currit er Olteynyn pairkal nastee. Va taillaghyn castit Mee Averil 2020, ec y traa fo ghlass er coontey Covid-19, as sleih gobbraghey sthie. Va'n reaghys shen dy chastey taillaghyn pairkal jeant lurg coardail Possan ny Ard Offishearyn as sarey er y chooish liorish yn Ard Sheckter ec y traa shen.
Ta'n Dr Haywood gra dy bee screeuyn currit magh dy leah da dy chooilley Oltey Tinvaal dy chur coontey giare jeh'n pholicy lurg da ve aa-lhiassit, yn aght bee bree currit da, as yn aght bee eeckyssyn er nyn jymsaghey.
---oooOooo---
Ayns reihys son kiare oltey noa y Choonceil Slattyssagh er y gherrid, haink Gary Clueit dy ve fer jeh ny olteynyn noa. Ren eh goaill toshiaght ayns Soie Tinvaal son y chied cheayrt 'sy vee shoh, as roish olteynyn va treealtys liorish Oltey yn Chiare as Feed son Connaghyn, Julie Edge, as v'ee shirrey caghlaaghyn dy ve jeant da'n aght va shirreyderyn dy ve Olteynyn y Choonceil Slattyssagh reiht, as da'n phaart oc lurg daue ve currit fo loo. Agh ren olteynyn jiooldey ooilley agh un phaart jeh'n treealtys, as va shen cur er shirreyderyn soilshaghey magh ny cooishyn oc roish my vees y reihys goll er jannoo.
Ta Mnr Clueit gra dy vel eh ayns foayr jeh caghlaa yn aght ta reihyssyn er nyn gummal, agh dy vel eh credjal nagh vel eh jannoo seose yn tosheeaght smoo son yn ard-whaiyl. T'eh gra dy vel nheeghyn feer scanshoil as dy vel eh orroo goaill ayns laue ad laa er laa, agh nagh vod ad freayll rish cur shaghey reddyn as gra nagh vel ad scanshoil. T'eh gra dy vel ad scanshoil, as er-lesh dy vel feme er sur-smooinaghtyn er jannoo ny reddyn shoh, goll dy jeeragh 'sy chooylrey, as nagh vel eh dy ghra dy vel ad scuirr veih jannoo ny reddyn scanshoil, agh dy vel eh scanshoil ec keim elley, nagh vel eh preaysagh.
---oooOooo---
Ta Barrantagh Skylley Chreest Lezayre ta faagail yn oik eck lurg my sodjey na feed blein myr barrantagh, Vivian Quane, cremmey y reiltys as sharvaantyn y steat. T'ee gra dy vel yn reiltys brishey stiagh rour er lughtyn-reill ynnydoil, as nagh vel sharvaantyn y steat scuirr traa erbee veih brishey stiagh orroo, dy vel ad smooinaghtyn nagh vel ad veg er chor erbee, as er-lhee dy vel eh agglagh. T'ee gra dy vel ish er cheau feed blein ayns lught-reill ynnydoil, as ny caghlaaghyn t'ee er nakin, cha nel ee ayns rieaughid fys y ve eck my-nyn-gione, as nagh vel eh 'syn aght cheddin myr v'eh er chor erbee tra v'adsyn yn red smoo as va co-choyrle roo er ny cooishyn. T'ee gra jiu dy vel reddyn goll er jannoo gyn fys erbee oc mychione shen.
---oooOooo---
Ta fys ain nish er ny lughtyn-reill ynnydoil as bee feme oc er cummal reihyssyn yn 24 Mee Averil, er yn oyr y row yn earroo dy hirreyderyn ny smoo na ta ynnydyn ry gheddyn. Bee feme neesht er shiartanse dy lughtyn-reill ynnydoil er cummal fo-reihyssyn, er yn oyr dy row yn earroo dy hirreyderyn ny sloo na va ynnydyn ayn, as magh ass shen hig adsyn va nyn shirreyderyn dy ve nyn Marrantee, agh bee feme er ny lughtyn-reill shen fogrey magh fo-reihys dy chur eab er lhieeney ny ynnydyn follym. Ta fys ain neesht dy vel ymmodee lughtyn-reill ynnydoil ayn as cha bee feme oc er cummal reihys ny fo-reihys erbee.
Ayns Doolish bee feme er reihys ayns un ward as er fo-reihys ayns ward elley :
- Doolish Yiass, dy reih un Choonceilagh as ta kiare shirreyder ayn : Steven Crellin, ta'n Coonceilagh ec y traa t'ayn, David Cretney, Karel Ver Elst as William Smedley,
- as ayns Doolish Veanagh, cha row agh daa hirreyder son three ynnyd, myr shoh ta'n daa feerit hannah ayns shen, agh bee feme er cummal fo-reihys son trass chaghter 'sy ward shen.
Ayns Balleychashtal ta nuy shirreyder son shiaght ynnyd, as ta ny shirreyderyn ayns shen : Tony Brown, Beth Cannan, John Cringle, William Galley, Colin Leather, Alan Leonard, Mahendrakumar Patel, Carol Quine as Laurence Watterson.
Ta hoght shirreyder son shiaght ynnyd ayns Purt ny Hinshey, myr shoh bee reihys ayns shen, as ny shirreyderyn : Katryna Baptist, Frank Crompton, Alistair Cubbon-Wood, Stuart Hardingham, Roay Harmer, Sharon Lambert, Christine Moughtin as William Otieno-Costain.
Ayns Rhumsaa, ta feme er reihys 'sy Ward Twoaie, as er fo-reihys ayns Ward y Jiass.
- ayns Ward y Twoaie ta hoght shirreyder son shey ynnyd. Ta ny hoght shirreyder : Emma Honey, Pauline Johns-Garrett, Juan McGuinness, Katrina Netelat, Andrea Nolan, Elizabeth Shimmin, Margaret Webb as Wilf Young;
- as ayns Ward y Jiass, va queig shirreyderyn son ny shey ynnyd, as myr shoh ta ny queig fir shen er ve feerit hannah, as bee feme er fo-reihys son yn sheyoo oltey.
Ta shey enmyn er ve currit stiagh son ny queig ynnyd ayns Boayrd Barrantagh Skeerey Pharick, myr shoh bee feme er reihys ayns shen eddyr : Robert Anderson, Henry Bridson, Gordon Clague, Paul Craker, Leo Cusson as Simon Mellor.
Ayns Purt Chiarn ta shey shirreyder er chur stiagh nyn enmyn son shiaght ynnyd, myr shoh bee feme er ro-reihys dy lhieeney yn ynnyd follym shen.
Cha row agh three shirreyder ayns Jourby, myr shoh bee feme er fo-reihys son daa ynnyd follym.
Agh myr shoh cha nel feme er reihyssyn ny fo reihys ayns Doolish ayns Ward y Hiar as Ward y Twoaie; ny ayns Andreas, Ballaugh, Braddan, Carbory as Rushen, Carmane, Connaghyn, Garff, Lezayre, Skylley Vaayl, Stondane, Malew, Marooney, Purt le Moirrey ny Skyll' Vreeshey
