Meeryn ass Traa dy Liooar, Jelune 25oo Mee Houney 2024
Va'n Ard Shirveishagh, Alfred Cannan, gra foddee dy jinnagh eh tannaghtyn ayn myr Shirveishagh interim Slaynt as Kiarail y Theay rish ghaa ny three mee shoh cheet dy chur-lesh oaseirys kiart 'sy chirveish claynt.
Haink Mnr Cannan stiagh 'sy phaart dy shallidagh lurg da'n eear Hirveishagh, as Oltey yn Chiare as Feed son Rhumsaa, Lawrie Hooper, as oltey politickagh yn Rheynn, as Oltey yn Chiare as Feed son Doolish Hiar, Joney Faragher, irree ass mysh shey shiaghtin er dy henney.
Haink Oltey yn Chiare as Feed son Doolish Hwoaie, David Ashford, as Oltey yn Chiare as Feed son Doolish Veanagh, Chris Thomas, dy ve olteynyn politickagh yn Rheynn, as va'n bayr currit da Mnr Thomas agh kegeesh ny s'anmee, tra ren eh votal dy ghra nagh row barrant echey ayns Mnr Cannan myr yn Ard Shirveishagh.
Ta Oltey yn Chiare as Feed son Carbory, Balleychashtal as Malew, Jason Moorhouse, gra dy row eh tayrn geill veih cooishyn elley nagh vel Shirveishagh Slaynt as Kiarail y Theay ayn. Agh ta Mnr Cannan er veeraghey dy vel eh fosyn niartaghey fwirran politickagh yn Rheynn dy leah, agh v'eh shassoo er nagh bee driss er jannoo briwnys er peiagh ennagh dy gholl stiagh ayn myr Shirveishagh.
Myr shoh lhig dooin clashtyn Mnr Cannan choud's v'eh loayrt mychione y chooish shoh as ny v'eh dy ghra laa ny ghaa er dy henney.
Ta Mnr Cannan gra dy vel yn obbyr goaill toshiaght nish, dy vel eh goaill toshiaght son shickyrys nish, as nagh nee roortys eh hig gy kione blein ny ghaa woish nish, as dy vel eh er n'yannoo feer chleeir shen gys Wendy Reid, ta Caairlagh Boayrd Kiarail Vannin, as da Teresa Cope, Ard Sheckter y heshaght shen, as dy vel ad ooilley gobbraghey son yn un dean shen, as dy vel fys echey cheusthie jeh'n cheshaght nish dy vel enn shickyr er ve currit er nish dy vel feme er shoh caghlaa. T'eh gra, liorish yn 1 Mee Averil 'sy vlein shoh cheet dy vel eh jerkal rish ooilley ny oltyn ayn, dy gholl stiagh 'sy nah vlein lesh argid currit dy kiart, bentyn da toiggalys cleeir er ny vees shen rere y phlan obbree as er ny vees shen rere y currym.
Ta Mnr Cannan gra dy vel shoh yn earroo nane, tosheeaght mooar t'ayn son Coonceil ny Shirveishee, dy by vaghtal eh dy vel tosheeaghtyn mooarey elley oc neesht bentyn da'n thieys ain as nyn shickyrys as nyn darmaynys, agh dy nee baghtal dy bollagh ta'n doolane lane phreayssagh bentyn da ny baggyrtyn ta ceau er kiarail slaynt cur er y shickyrys argidoil ain. T'eh gra, myr shoh, dy vel Coonceil ny Shirveishee currit dy bollagh da'n jannoo shoh, as dy vel ad cur wheesh eab as couyr stiagh ayn as foddee ad, dy gheddyn kiart eh son shickyrys 'sy traa liauyr jeh'n Ellan.
Ta Mnr Cannan gra, bentyn da'n phohlldal vees ry gheddyn echey, dy vel eh geddyn mooarane pohlldal veih ny cumraagyn echey ny Shirveishee ayns earroo dy ardjyn, as dy dooghyssyagh, bentyn da ve currit da'n chooish veih cheu y claynt, dy vel sett cleeir as strughtoor as doaie er jeh reddyn daueysyn t'ad currit mychione yn traa bee eshyn ry gheddyn dy ghoaill ayns laue cooishyn slaynt. T'eh gra, ny bee jeant echey son shickyrys ec yn chooid sloo, shen niartaghey y fwirran politickagh bentyn da shen, as dy vod sleih jerkal rish kuse dy ograghyn mychione yn aght bee shen jeant ny stroshey.
Gys yn eie foddee dy row eh cho tarroogh ve ny Hirveishagh shallidagh Slaynt as Kiarail y Theay nagh beagh traa dy liooar er ve echey dy loayrt rish olteynyn yn Chiare as Feed elley mychione ny cooishyn shoh, ta Mnr Cannan gra dy row traa echey dy loayrt rish dy chooilley pheiagh ayns Tinvaal, ny rish bunnys dy chooilley pheiagh, mychione yn ynnyd oc ec y traa t'ayn bentyn da ny foddee ad cur stiagh 'sy Reiltys as ny yinnagh ad sur-smooinaghtyn er jannoo lurg shen, agh nagh jean eshyn as Coonceil ny Shirveishee lhig da'n chooish shoh cheet dy ve gyn streean urree ayns ny three ny kiare mee shoh cheet, as pointeil Shirveishagh as lhiggey da dy chooilley red siyrraghey ry lhiattee ayns corneil as gyn ve goll er cur-rish. T'eh gra dy nee tosheeaght eh er-nyn-son.
Ta Mnr Cannan gra dy vel y clane Coonceil goaill ayns laue y chooish, as er-lesh dy vel y clane Tinvaal goaill ayns laue ee, as dy row shen red ennagh haink eh er rish olteynyn Tinvaal tra v'eh loayrt ayns soie Tinvaal yn chiaghtin shoh chaie, dy vel shoh goaill stiagh ooilley jin, cagh as dy chooilley pheiagh jin, as dy vel eh cho scanshoil dy vel eh jannoo er dagh ayrn jeh'n vea ain as bea ny lughtyn-thie ain, myr shoh dy vel feme er geddyn livrey kiarail slaynt 'sy chummey share vees possible ain, as my vees doilleeid ayn, as dy vel doilleeid ayn son shickyrys, eisht dy lhisagh shin ooilley goaill ayrn dy kiart ayns livrey eh.
Ta Mnr Cannan gra, son Coonceil ny Shirveishee, shen dy ghra oaseirys kiart, toiggalys kiart er ny vees goll er, as my vees shen dy ghra dy vel eshyn leeideil fwirran rish ghaa ny three mee shoh cheet dy gheddyn kiart y chooish shoh, as goaill ersyn y currym persoonagh, fakin y builley haink veih shoh as ta cheet dy cummyssagh veih shoh er shickyrys ain 'sy traa sodjey er nyn tashtaghyn argidoil, eisht shen myr bee eh, agh nagh bee eh son yn traa liauyr, agh foddee dy bee mee ny ghaa traa bee sleih geddyn eh son daa cheayrt y phrios, myr dy beagh eh.
---oooOooo---
Agh nish ta Mnr Cannan er vograghey magh dy vel aa-reaghys er ve jeant ayns Coonceil ny Shirveishee, as mastey ny caghlaaghyn shen ta Oltey yn Chiare as Feed son Doolish Yiass, Claire Christian, er jeet dy ve ny Shirveishagh Slaynt as Kiarail y Theay.
Caghlaa elley, ta'n Shirveishagh Oik Coonceil ny Shirveishee, Kate Lord-Brennan, er nirree ass, as t'ee gra dy vel shen dy yeeraghey er cooishyn y rheynn reihyssagh eck, Glionfaba as Purt ny Hinshey, agh t'eh jeeaghyn dy row y bayr currit jee liorish Mnr Cannan, myr nee mayd clashtyn. Ayns ynnyd j'eeish ayns Oik Coonceil ny Shirveishee, she Oltey yn Chiare as Feed son Doolish Hwoaie, David Ashford t'er cheet stiagh myr Shirveishagh ayns shen.
Chammah's irree ass yn oik eck myr Shirveishagh Oik Coonceil ny Shirveishee, ta Kate Lord-Brennan coayl y paart eck myr Caairlagh y Commishoon er Shirveishyn Theayagh. Hig stiagh Oltey yn Chiare as Feed son Connaghyn, Rob Callister, dy ve ny Chaairlagh, as hig eh dy ve oltey politickagh Oik Coonceil ny Shirveishee neesht, chammah's Lhiass-Chaairlagh Undinys Pensionyn y Cherroo Theayagh.
Ta caghlaa er jeet ayns yn Rheynn Bun-troggalys neesht, lesh Oltey yn Chiare as Feed son Rushen, yn Doctor Michelle Haywood goaill yn oik myr Shirveishagh ayns shen, agh ta'n eear Hirveishagh, Oltey yn Chiare as Feed son Glionfaba as Purt ny Hinshey, Tim Crookall, foast ny Hirveishagh as oltey Coonceil ny Shirveishee, agh ayns paart noa myr Shirveishagh gyn Portfolio.
Myr shoh, lhig dooin clashtyn ny vees Mnr Cannan dy ghra mychione ny caghlaaghyn shoh, as eh goaill rish dy vel caghlaa er ve jeant, as dy vel ad goltaghey stiagh ayn three Shirveishagh noa, as caghlaa beggan kuse jeh ny paartyn ta sleih goaill ayns laue. T'eh gra dy vel Kate Lord-Brennan er nirree ass ny er naagail y paart eck, er yn oyr dy vel ee geearree jeeraghey er yn ynnyd eck 'sy rheynn reihyssagh eck, as er-lheh bentyn da Plan Ard y Twoaie as y Heear-hwoaie, ren cur ee ayns streeu rish y phaart eck myr Shirveishagh Oik Coonceil ny Shirveishee, as t'eh gra dy vel Tim Crookall scughey stiagh 'sy vean dy chooney dy phohlldal Mnr Cannan lesh paart jeh'n obbyr echey, rish mee ny ghaa shoh cheet.
Ta Mnr Cannan gra, ass shen, dy row ynnydyn follym ayns Oik Coonceil ny Shirveishee, 'sy Rheynn Bun-troggalys as neesht, myr va fys ec sleih, ayns Slaynt as Kiarail y Theay. T'eh gra dy vel Claire Christian (Doolish Yiass) ny Shirveishagh noa Slaynt as Kiarail y Theay, as dy vel ad niartaghey y portfolio shen liorish cur stiagh ayn neesht David Ashford, ta ny oltey ayns shen ec y traa t'ayn aght erbee, agh dy jean eh tannaghtyn ayn myr oltey yn Rheynn Slaynt as Kiarail y Theay dy phohlldal Claire Christian.
Ta Mnr Cannan gra dy jean Jane Poole-Wilson cheet dy ve oltey y wirran shen dy jarroo dy chur stiagh ayn yn ablid smoo veih cheu y Choonceil dy chooney dy chur-rish kuse jeh ny doilleeidyn ta roin ec y traa t'ayn vis-à-vis yn ceau rour, as jeeaghyn neesht er yn aght ta'n reill as y currym as y plan obbree gobbraghey son livrey kiarail slaynt trooid Kiarail Vannin.
Ta Mnr Cannan gra dy vel eh feer, eer scanshoil as dy vel fys oc er ny cummyssyn mannagh vel ad jannoo eh dy kiart, as dy vel ad toiggal dy slane ny imneaghyn mychione y cheau rour as y builley ass shen er ny tashtaghyn freillt ain, as neesht y nhee, mannagh vel ad geddyn kiart eh, fakin er ny haghyr Toshiaght Arree shoh chaie lesh bishaghey ayns keesh, eisht foddee dy beagh cummyssyn elley ayn, myr shoh dy nee doolane feer vooar son dy chooilley pheiagh.
Ta Mnr Cannan gra dy vel feme ain er cur doaie er shoh, chammah's veih cheu y Reiltys as neesht veih cheu y vaarail, as shen yn oyr dy vel ad cur stiagh ayn couyr feer vooar, ny foddey ny smoo couyr bentyn da'n pholitickaght mygeayrt yn Shirveishagh, quoi erbee veagh ayn, dy row rieau y barel dy beagh feme oc er tooilley couyr 'sy Rheynn shen, as dy vel shen ny t'ad dy yannoo, as reaghys neu-chadjin eh, agh dy vel feme er geddyn kiart yn eh shoh.
Lesh yn Doctor Michelle Haywood cheet stiagh dy ve Shirveishagh Bun-troggalys, ta Mnr Cannan gra dy vel ee er nobbraghey dy creoi neayr's v'ee reiht, dy vel ee er n'ghoaill kuse dy phaartyn 'sy Reiltys, yn fer s'noa 'sy Tashtey, as dy vel ee er hoilshaghey magh sym trooid yn obbyr eck 'sy rheynn reihyssagh eck hene bentyn da bun-troggalys, myr shoh dy vel caa ayns shen as dy vel yn Doctor Haywood er ve aarloo dy heet stiagh ayn as dy vel eh jeant booiagh goltaghey ee gys Coonceil ny Shirveishee. Ayns Purt le Moirrey, ren yn Doctor Haywood cuirr blaaghyn ayns kuse jeh ny tuill 'sy raad mooar dy hayrn geill da drogh-stayd ny raaidyn, as ta Mnr Cannan gra, mastey ny ymmodee doolaneyn foee ayns ny vees portfolio aggyrtagh dy liooar dy bee ny raaidyn as raaidyn mooarey son shickyrys fer jeusyn shen.
Ta'n Doctor Haywood cheet stiagh ayns Bun-troggalys ayns ynnyd jeh Tim Crookall, as myr cheayll shin, t'eh er jeet dy ve Shirveishagh gyn Portfolio. Ta Mnr Cannan gra nagh vel fys echey er yn traa shoh chaie er-lheh va Shirveishagh gyn Portfolio ayn, agh son shickyrys dy vel feme er pohlldal eshyn 'sy vean ec y traa t'ayn, dy vel mooarane goll er, myr ta fys ec dy chooilley pheiagh: lesh claareyn argidoil, lesh y tarmaynys, lesh claareyn son fondid ta er chee goll er fograghey magh, lesh cochianglyssyn mooie, as, dy jarroo, dy vel eh er ve cochianglt dy mooar 'sy chlaare son slaynt as kiarail y theay neayr's ren Lawrie Hooper irree ass.
Ta Mnr Cannan gra dy vel obbyr dy liooar echey dy yannoo, as lesh Tim Crookall liorish, magh ass shen, dy bee ablid echey dy ghoaill ersyn paart dy churrymyn, jeeaghyn er paart jeh obbyr ny shaleeyn, foddee eer ve ny haghter er-e-hon ayns paart jeh'n obbyr ayns cochianglyssyn mooie, myr shoh dy bee eh mie dy vel shen ayn, as neesht dy bee ymmydoil ee, y choraa elley shen as keeayll chionnit aynjee mygeayrt boayrd y Choonceil, fakin dy vel son shickyrys daa Hirveishagh noa ayn, agh paart dy aa-reaghys ayn bentyn da strughtoor y Choonceil.
Ta Mnr Cannan gra dy vel feme son pohlldal, dy vel mooarane obbyr ry yannoo ec y traa t'ayn, as lesh y chooney elley echey dy bee shen, t'eh shickyr, jeh ymmyd mooar daue, choud's t'ad seiy trooid kuse dy chooishyn ta doillee as cramp dy liooar.
Ta Mnr Cannan gra dy vel eh oyr son ve booiagh dy vel sleih 'sy Chiare as Feed ta arryltagh dy heet stiagh dy chooilleeney ny paartyn shoh ec y traa t'ayn, as dy nee obbyr creoi eh ayns ymmodee aghtyn, dy vel mooarane dy chur doaie er, agh er cheu elley y skeeal dy vel ymmodee caaghyn ayn son yn Ellan, dy vel mooarane ain dy hebbal ayns paart dy staydyn dowanagh ta cur boirey dy liooar mygeayrt-y-mooin. T'eh gra dy vel eh orrin cummal seose chammah's y vondeish argidoil ain as troggal seose neesht er ny vondeishyn t'ain 'syn Ellan.
Ta Mnr Cannan gra dy vod mayd jannoo shoh, agh dy vel feme ain er cur doaie er ny claareyn argidoil ain, shegin dooin cur claareyn son fondid fo raad, as dy vel eh orrin neesht stiurey trooid ny preayssyn bunnidagh gollrish preayssyn veih cummey y phobble er-lheh, agh aggyrt vees bishaghey son shirveishyn er-lheh ayns slaynt as kiarail y theay.
Ta Mnr Cannan gra, myr shoh, cur cooidjagh possan ta braew lhean as neu-reggyragh, as er-lesh dy vel shen ain nish, son shickyrys reayn lhean dy varelyn, ayns Coonceil ny Shirveishee, cur orroo ooilley gobbraghey ry cheilley as feddyn ny aghtyn feayslee kiart, dy bee shen ard scanshoil as dy vel barrant echey dy bee y possan t'ayn nish abyl dy reayll rish yn obbyr mie as ny undinyn t'er ve currit ayn hannah.
Myr shoh, lhig dooin goll trooid y clane rolley nish jeusyn ta jannoo seose Coonceil ny Shirveishee – as nish ta jeih jeu, lesh yn oik noa t'er ve currit er bun - as hoshiaght adsyn v'ayn hannah:
• yn Ard Shirveishagh – Mnr Cannan, Ayrey as Maayl;
• yn Shirveishagh Chymmyltaght, Bee as Eirinys – Clare Barber, Doolish Hiar;
• yn Shirveishagh Cooishyn Sthie – Jane Poole-Wilson, Middle;
• Shirveishagh Gastid Dellal – Tim Johnston, Ayrey as Maayl;
• yn Shirveishagh Tashtee – yn Fer-lhee Alex Allinson, Rhumsaa;
• Shirveishagh Ynsee, Spoyrt as Cultoor – Daphne Caine, Garff;
as ny aa-reaghyssyn:
• Shirveishagh Bun-troggalys – yn Doctor Michelle Haywood, Rushen;
• Shirveishagh Oik Coonceil ny Shirveishee – David Ashford, Doolish Hwoaie;
• Shirveishagh Slaynt as Kiarail y Theay – Claire Christian, Doolish Yiass; as
• Shirveishagh gyn Portfolio – Tim Crookall, Glionfaba as Purt ny Hinshey.
---oooOooo---
Ta boirey er jeet 'sy pholitickaght er coontey yn aght ta Kiarail Vannin jannoo faaishnys reesht mychione ceau towse dy argid erskyn y chlaare argidoil va reaghit er-e-son. Ta Stiureyder Argidoil Kiarail Vannin, Jackie Lawless, gra dy vel tooilley argid ceaut er druggaghyn ayns meeaghyn y gheurey cur preays feer vooar er Kiarail Vannin. T'ee gra dy vel fys mie ec Kiarail Vannin er ny vees taghyrt lesh druggaghyn, dy vel ad dy jarroo cur preays orroo. T'ee gra dy vel ad jeeaghyn er, tra t'ad jannoo yn faaishnys oc, as dy vel ad jeeaghyn er ny t'er haghyrt ayns bleeantyn roish nish, as dy vel fys oc dy vel raiee s'jerree ny bleeaney dy vel ad fakin bishaghey as yrjaghey ayns ooilley ny costyssyn shoh, as dy vel ad troggal seose choud's t'ad abyl dy ooley, dy vel ad troggal seose gys ny t'ad jannoo faaishnys jeh. T'ee gra dy vel ad ve arreydagh 'syn aght t'ad jannoo faaishnys, dy chur eab er ve freggyrtagh da kuse jeh ny gaueyn shen.
---oooOooo---
Ta bunnys £76,000 jeh argid ny tackeyderyn er ve ceaut er soilshaghey magh plannyn son gowaltys geayee ayns Earystane. Ren Lught-reill Bun-shirveishyn Vannin cummal hoght seshoon keayrtagh mygeayrt yn Ellan Jerrey Fouyir dy chur er y hoshiaght yn Shalee Geayee Cair Vie echey. Ta'n lught-reill gra dy jean y shalee cur streean er couyr dooghyssagh dy vree vees aa-noaghey oddys gientyn bree son ny smoo na'n cherroo ayrn jeh feme yn Ellan er lectraghys.
Va ny smoo na £8,000 ceaut er troddan ayns ny meanyn as £7,500 er jannoo as cur magh duillagyn. Ta £59,600 ceaut er cummal taghyrtyn theayagh, as va 700 dy leih kionfenish ooilley cooidjagh – ta'n sym shoh goaill stiagh cur mayll son ny hallaghyn ayndaue v'ad er nyn gummal, geeck son fer oayllee dy ve kionefenish as gaarlaghey feeshag.
Ayns soie Tinvaal Mee Houney, vrie Oltey yn Chiare as Feed son Carbory, Balleychashtal as Malew, Jason Moorhouse, jeh Caairlagh Lught-reill Bun-shirveishyn Vannin, John Wannenburgh, row imnea erbee echey mychione y rate dy vaarail vees goll er ec y traa t'ayn 'syn ard echey. Ta Mnr Wannanburgh gra dy vel yn Lught-reill 'sy vlein shoh chaie tra v'eshyn ayn, dy vel ard-chiarail er argidys jannoo seose fer jeh ny niartyn ec ny oaseiryn as ec y voayrd, as nagh vel veg goll er baarail gyn kied ve currit er-e-hon.
---oooOooo---
Ayns soie Tinvaal Mee Houney yn shiaghtin shoh chaie, tra va Tim Crookall foast yn Shirveishagh Bun-troggalys, dinsh eh da olteynyn dy row reireyderyn as oaseiryn er cheau ny shlee na 360 oor ayns gimman barrooseyn ayns ny three mee t'er n'gholl shaghey. Mee Luanistyn ren ard oaseiryn fwirran Bus Vannin ceau 45 oor cooney dy chooilleeney shirveishyn, agh ren shoh bishaghey gys ny shlee na 122 oor Mean Fouyir, as gys ny shlee na 190 oor Jerrey Fouyir.
Agh ta Mnr Crookall gra nagh row costys elley er Bus Vannin er yn oyr dy row ny ooryn recortit son shirveishyn skedjalit as va argid currit er nyn son ec rateyn cadjin son imman barroose. T'eh gra my vees reireyder ny oaseir er ny vriaght dy ghoaill ayns laue currymyn imman 'sy laa obbree cadjin oc, eisht dy nee baghtal eh dy vel y peiagh shen cosney yn rate cadjin dy aill echey, as dy vel argid goll er spaarail ec yn cheshaght nagh vel eh urree ceau son ny 15 oor son rate yn immanagh.
---oooOooo---
Ta Sheshaght Lught-Dellal y Twoaie Vooar er chur eam reesht son yn Rheynn Bun-troggalys dy smooinaghtyn reesht mychione dooney Raad y Clieau, lesh raaue mychione y vuilley cummyssagh er thieyn dellal ynnydoil.
Ta'n Rheynn er reaghey skedjal tra veagh Raad y Clieau whilleen as hoght cheayrt son obbyr towshan dy ve jeant Mee ny Nollick, as ta'n Sheshaght gra dy jean shen cur boirey er dellal 'sy traa tarroogh cheet gys y Nollick.
Ta'n Rheynn gra dy bee'n raad dooint cheumooie jeh traaghyn preayssagh tra ta sleih cosney gys yn obbyr oc as thie reesht, as er-coontey shen nagh bee tooilley traaght er raaidyn elley eddyr Rhumsaa as Doolish.
Ta Caairlagh Sheshagh Lught-traghtee y Twoaie Vooar, Keith Dalrymple, gra dy vel y kerroo myn-chreck er ninsh da'n Cheshaght – as nagh vel shoh red noa – dy vel y bishaghey beg ayns ny t'ad cosney Mee ny Nollick 'sy traa cheet gys y Nollick, dy vel adsyn ny reddyn ta freayll goll ad, ny reddyn ta cummal seose y creeaght oc, as freayll jarrooagh yn aght ta'n argid roie. T'eh gra dy vel shin dy kinjagh clashtyn ayns ymmodee ardyn, mychione jantys as feme er dy chur-rish doilleeidyn lesh slaynt inchynagh, foays as cre erbee elley, as t'eh gra nagh vel veg vees boirey ny smoo er shellooder dellal beg na gindys bee ablid oc cummal seose y dellal oc, bee y saase beaghee oc ayns shen 'sy shiaghtin er-giyn. T'eh gra dy vel shen cur boirey mooar.
Ta Mnr Dalrymple gra dy vel shoh er jeet myr builley. T'eh gra, foddee nagh jean laa ny ghaa dooint jeeaghyn dy ve jerrey yn theihll, agh foddee eh ve jerrey jeh thie dellal ny ghaa. T''eh gra dy vel eh geiyrt dy chionn er fograghyn mychione bancyn cheet dy ve dooint as traa jeant giare son bancal – shen reaghys Banc Lloyd dy ghooney y banglane echey ayns Rhumsaa, kiart myr ren eh ayns Purt ny Hinshey blein ny ghaa er dy henney – as ymmodee cooishyn tromey elley vees jannoo er foays sleih ta stiurey thieyn dellal beggey.
Ta Mnr Dalrymple gra dy vel fys dy bollagh ec yn lught-reill – dy hynnydoil as 'sy vean – er doilleeidyn traghtee as yn stayd tarmaynagh. T'eh gra nagh vel un aght feayslee er-nyn-son, agh, oddys cooney cheet foddee veih gobbraghey ry cheilley. T'eh gra dy vel yn un red fod mayd shaghney, shen jannoo jeeill dooinyn hene, as nagh vel eh agh imnea elley, builley elley, son sleih ta dy feer caggey dy reayll rish dellal.
---oooOooo---
Reireyder y thie aaght Welbeck ta Lucy George, as ta'n thie aaght er ve goll er stiurey ec yn lught-thie eck rish 46 blein. Agh t'ee gra nagh vel yn Reiltys jannoo reddyn dy liooar dy chur er y hoshiaght y feeuid jeh thieyn dellal ynnydoil. T'ee gra dy vel yn lught-thie eck as ymmodee fir elley 'sy cherroo turryssid feddyn doillee eh lhieeney ny lhiabbeeyn 'syn aght ta reddyn goll, as dy vel mooarane jeh shen er-coontey y Reiltys as y Paggad Bree failleil dy chooilleeney ny aghtyn dy hareaghey dy mooar ny cochianglyssyn troailt as feme ain orroo cho debejagh.
Myr sampleyr ta Bnr George cheet er fer jeh ny keayrtee reiltagh oc shirrey fys mychione lieh-imbagh ny scoillyn dy chur-lesh paitchey noal, as fy yerrey cha ren ee goll er lesh bookal er yn oyr nagh dod ee treishteil dy jinnagh y Paggad Bree goll, as dy row imnea eck mychione gyn ve abyl dy chosney thie reesht ny ayns traa dy gholl gys yn obbyr eck, myr shoh nagh daink ee noal. T'ee gra dy row creckys caillt, as dy vel ee gindys whilleen custymeyr cummyssagh ta shin er choayl veih shen ynrican.
Ta Bnr George gra dy vod y Reiltys cooney, lesh y vun-troggalys, as ynnydyn Eiraght Ashoonagh Vannin, ny raaidyn yiarn as trammyn cabbil, jannoo shickyr dy vel ad foshlit, as rere claare hraa share. T'ee gra dy row doilleeid oc rish y claareyn traa mleeaney va oyr son goaill nearey dy mooar, lesh ny claareyn traa son ny barrooseyn gra dy row Raad Yiarn Lectragh Vannin rere claareyn traa v'ayn nurree, myr shoh nagh row eh jeant oc dy kiart.
Ta Bnr George gra, ooilley ny sorchyn shoh dy reddyn, dy vel ad troggal seose as dy vel sleih er jeet noal as t'ad gra roo nagh vel reddyn dy liooar foshlit, nagh vel shappyn rish y Chooylaghan, nagh vel dy liooar ayn dy chur-lesh ad noal, myr shoh dy vel kuse dy reddyn feme obbyr roish my vod mayd jannoo shickyr mychione ny earrooyn shoh ta'n Reiltys geearree.
Er-lesh Bnr George dy vel sleih smooinaghtyn dy vel ny vees goll er chebbal ec thieyn aaght as ayns buill son turryssee cheet dy ve beggan ceaut, agh dy vel shen cheet veih'n Reiltys cur meerioose da kerroo y turryssid. T'ee gra, dy row ny earrooyn shen ain, nagh beagh eh wheesh jeh doilleeid, er yn oyr dy beagh ad abyl dy ghoaill kiarail jeh as cummal seose eh, er yn oyr dy beagh yn argid oc ayns shen, agh nagh vel yn argid goll er cur ayns ny buill chiart, as y veg vees cheet gys yn Ellan, myr shoh dy vel shin troggal er veg, dy bunnidagh, as dy vel ad jannoo nyn gooidshare dy chummal seose ny ynnydyn eiraght shoh, agh nagh vel agh towse er-lheh ry yannoo.
Ta Bnr George gra dy vel sleih briaght, cre'n poynt jeh tram cabbil ve ain, cre'n poynt jeh raaidyn yiarn ve ain tra nagh vel sleih dy liooar ayn. T'ee gra dy vel ymodee sleih geearree goll er, agh dy vel eh jannoo shickyr dy vel olteynyn dy liooar 'sy wirran, as dy vel feme er y wirran as ny custymeyryn cheet dy ve freggyrtagh ec yn traa cheddin, as mannagh vel yn argid goll er cur ayns nyn ynnydyn kiart dy yannoo shickyr ny reddyn shoh, dy vel eh y bun-troggalys nagh vel goll er cummal seose, dy niartaghey eh, dy vel eh yn eiyrtys domino
Ta reaghys preevaadjagh er ve jeant ec y Phossan Tevir nish son banglane Travelodge dy ve troggit myr ayrn jeh lhiassaghey Kerrin Villiers ayns Doolish. Ta Bnr George gra dy row yn chied eysht eck, cre'n fa, as v'ee gindys cre woish harragh ny keayrtee, olteynyn y wirran, cre'n aght nee ad lhieeney ny lhiabbeeyn oc tra nagh vod mayd lhieeney adsyn ainyn, cre'n aght nee shen taghyrt? Agh t'ee gra dy row traa eck dy aa-smooinaghtyn er neayr's shen, as foddee dy bee tooilley keayrtee da'n Ellan my vees Travelodge soilsheeney magh er yn oyr dy vel ad skeayley-magh ny smoo, as dy bee feme er cummal seose y bun-troggalys, myr shoh dy vel feme ain er earrooyn son ynnydyn Eiraght Ashoonagh Vannin, as ny raaidyn yiarn as ny trammyn cabbil dy reayll ad ry chummal seose, chammah's thieyn bee as reddyn ta cleayney sleih ta goll er stiurey dy preevaadjagh.
Ta Bnr George gra dy vel gaue ayn lesh whilleen lhiabbee ayns thieyn aaght lesh ymmyd injil son wheesh jeh'n vlein, as dy jean cur stiagh thieyn aaght goaill ersooyl ymmyd veih ny t'ayns shoh hannah. T'ee gra, myr shoh dy vel pro-yn as conyn, as dy vel sleih loayrt mychione lesh sleih geearree sloo-chostallagh as noa-emshiragh, vees cairagh, agh dy vel ad chebbal neesht rate sloo costallagh, agh er coontey gennid y turryssid ayns ny bleeantyn jeieanagh as Covid as Brexit as reddyn elley, nagh row ad dy yannoo ass y noa as dy chummal seose ny reddyn elley, dy row eh orroo jeeraghey er ny va feme er jannoo, shaghey ny v'ad geearree jannoo.
Ta Bnr George gra dy vel ooilley ny thieyn aaght sloo er ve gobbraghey choud as cho creoi, as dy vel ad currit da'n turryssid, as nagh vel ad agh geearree dy jinnagh y Reiltys jannoo arrish jeusyn as fakin dy vel ad currit da neesht dy chur-lesh sleih noal as cur traa yindyssagh da sleih. T'ee gra, yn aght ta foast ain ny buill shoh vees goll er stiurey ec lughtyn-thie as nagh vel agh fer ny ghaa jeu er-mayrn, nagh jean lhiggey dauesyn ve caillt ayns ny thieyn dellal traghtee shoh.
Ta Bnr George coyrlaghey da'n Reiltys gyn lhiggey da shen taghyrt, er yn oyr dy jean shiu coayl ambee as y persoonid Ellan Vannin. T'ee gra dy vel sleih cheet gys Ellan Vannin son y phobble, as y chaarjys as y chultoor as y hennaghys. T'ee gra dy jig shen dy ve caillt my vees shin tannaghtyn ynrican lesh cur stiagh ayn reddyn noa, shaghey goaill kiarail jeh ny vees ayns shoh hannah.
---oooOooo---
Bentyn da Colught Paggad Bree Ellan Vannin, ren y possan cosney vondeish jeh £8 millioon punt 'sy vlein 2023, vees £3 millioon punt ny sloo na 'sy vlein roish shen. Ta ny coontyssyn er ve clouit ayns tuarastyl bleinoil ny stiureyderyn. Ta'n possan gra dy vel y leodaghey 'sy vondeish echey son y chooid smoo er coontey bishaghey 12.5% ayns costyssyn obbree as bishaghey ayns taillaghyn va fo'n rate dy volgey argidoil.
Ren argid cheet stiagh veih arraghey lught bishaghey liorish 2.6%, ny yeih dy row leodaghey 2.8% 'sy lhiurid ooilley cooidjagh dy charbid, as ta'n Colught gra dy vel shen er coontey leodaghey ayns aggyrt liorish custymeyryn, lesh preays er argid cheet stiagh ec lughtyn-thie.
Ec y traa cheddin, ayns freayll argid son baatey ayns ynnyd jeh Manninagh 'sy traa ry heet, ren y possan baih £16.4 millioon ayns Noteyn Soit rish Three Bleeaney ec 4.75% Mee Vayrt 2023.
Hed y clane tuarastyl roish Tinvaal y vee shoh cheet.
---oooOooo---
Ta'n Possan Loayrt ass-lieh sleih lesh Dyslexia treishteil dy jean yn aghin speeideilagh echey da Tinvaal cur aghtyn dy chooney lhieusyn as ta neuro-chaghlaays oc roish y theay. Ren Tinvaal coardail rish un aigney dy chur er bun Bing Reiht dy ronsaghey y chooish as dy chur tuarastyl roish Tinvaal liorish Mee Averil 2025.
Ta oltey y phossan, Peter Washington, gra, er-lesh ny smoo na veg elley, dy jean eh cur caa son coraa dy loayrt ass-lieh ymmodee sleih elley, er yn oyr dy row eh sorch dy folliaght follit son ymmodee paarantyn as paitchyn, as t'eh treishteil dy jean shoh cur caa da ooilley ny feallee shoh dy heet magh as dy chur nyn marel ayns ny t'er ve goll er ayns ny laghyn t'er n'gholl shaghey as yn aght t'ad geearree eh goll er y hoshiaght 'sy traa ry heet.
Ta Mnr Washington gra, mannagh vel fir ynsee toiggal ny ta'n doilleeid ec kuse jeh ny studeyryn oc, cre'n aght oddys ad eer cur eab er charraghey eh. T'eh gra, lesh y ving shoh ayn dy yeeaghyn er shoh, dy nee kesmad feer vooar er oaie eh, as dy row shoh goll er rish bleeantyn, dy row y caggey shoh goll er rish bleeantyn, as er-lesh dy vel eh orroo cur shoh magh roish y theay.
Ta Mnr Washington gra dy vel ad er jeet gys ynnyd nish as coloayrtys goll er jannoo mychione y chooish ayns Tinvaal as dy chooilley pheiagh coardail rish cur er bun bing, dy nee ard-obbyr dy chooilleeney eh, as dy vel yn traa er ve kiart, agh t'eh gindys er yn oyr va choud ceaut er cosney gys shoh, as cre'n fa ve choud ceaut roish my row dy chooilley pheiagh coardail dy row doilleeid oc as feme er cur-rish eh. T'eh gra dy vel jannoo eh rere traa y clane chooish, as dy vel eh cur creeaght ayn dy vel dy chooilley pheiagh ayns Tinvaal coardail rish cur er bun y ving shoh.
