Traa dy Liooar, 21ed Jerrey Fouyir 2024

Meeryn ass Traa dy Liooar, 21ed Jerrey Fouyir 2024, as meeryn elley nagh row traa dy liooar dy chur stiagh ayns Traa dy Liooar choud's v'ee goll er skeayley-magh.

Jemayrt shoh chaie, yn 15 Jerrey Fouyir, va'n chied soie Tinvaal lurg y varney houree, as myr cheayll shin ayns Traa dy Liooar y cheayrt shoh chaie, ren Oltey yn Chiare as Feed son Carbory, Balleychashtal as Malew, Tim Glover, shirrey as geddyn kied dy chur feysht mychione ny vees taghyrt bentyn da shirveishyn slaynt, lesh Kiarail Vannin fograghey magh dy beagh lheiys ymmyd sloo jeant jeh shamyryn obbraidagh as dy beagh shiartanse dy obbyr scryssit magh dy shallidagh, dy spaarail argid roish jerrey ny bleeaney argidoil shoh.

Ta Mnr Glover gra dy vel Olteynyn yn Chiare as Feed chaghteryn y theay, as t'eh briaght cre ta'n theay loayrt mychione ec y traa t'ayn, as cur yn feysht, ny giarraghyn ayns shirveishyn Kiarail Vannin, myr shoh dy beagh eh er cur er Tinvaal jeeaghyn olk dy liooar mannagh row shen currit roish myr cooish dy loayrt mychione lurg y varney houree. T'eh gra dy vod ad feddyn magh hoshiaght yn oyr ta'n reaghys shoh er ve jeant – er-lesh dy vel shen red bunnidagh; ny ardyn elley ayndaue t'ad er chur eab er jannoo giarraghyn, roish my vel ad dy baghtal cur builley er shirveishyn 'sy strane toshee; as ayns rieughid, cre veih haink yn sarey shoh.

Ta Mnr Glover gra dy vel shin er chlashtyn yn Shirveishagh Tashtee gra nagh ren yn Tashtey briaght jeu dy chur bree, as dy vel eh co-ennaghtagh dy mooar rish Kiarail Vannin, myr shoh cre veih haink yn sarey: row eh fogrey yn Ard Shirveishagh mychione feme er giarrey £10 millioon ersooyl veih shirveishyn tra haink fys mychione yn chied cheau rour – er-lesh dy vel feme er cur freggyrt da shen. 

Ta Mnr Glover gra dy vod sleih cur argane dy lhisagh y chooish shoh – shen dy ghra, giarraghyn jeh'n wooadys shoh, vees goll noi y churrym va currit er Kiarail Vannin lesh coardail Tinvaal - er ve currit roish Tinvaal. T'eh smooinaghtyn neesht, er yn oyr oyr dy vel eh er n'yannoo eh ayns aght baghtal dy liooar neesht, dy vel yn Shirveishagh Slaynt geearree cur roish fogrey, dy vel red ennagh er haghyrt as dy by chronnal eh dy nee eshyn yn Shirveishagh ta cochianglt rish ny s'jeeree, as dy beagh eshyn er smooinaghtyn, as dy vel eh smooinaghtyn, dy vel eshyn geearree jannoo fogrey.

Er-lesh Mnr Glover nagh row ny fograghyn jeant dy mie. T'eh cheet er-lheh er yn argane dy vel yn chooid smoo dy Hreishtyn y Hirveish Claynt Ashoonagh hoal cur shaghey obbraidyn myr reih ec traa shoh ny bleeaney dy yannoo reamys son tooilley sleih ayns lhiabbeeyn ayns meeaghyn y gheurey, dy row ad dy ve giarrey sheese obbraidyn myr reih er-coontey ny imbaghyn, shaghey er-cooney y chostys, nagh beagh shen agh er haghyrt, nagh beagh fogrey mooar eh, myr shoh t'eh briaght cre'n oyr ta wheesh goll er jannoo jeh shoh as dy nee baghtal eh dy vel eh er chroo musthaa mooar mastey'n theay, as dy vel eh er Olteynyn yn Chiare as Feed myr chaghteryn y theay dy chur ny feyshtyn shoh.

As ish loayrt rish Radio Vannin roish soie Tinvaal, ta Ard Sheckter Kiarail Vannin, Teresa Cope, gra, ayns seihll jeh'n sorch share, tra va Kiarail Vannin as yn Rheynn Slaynt as Kiarail y Theay goll er scarrey myr freggyrt da moyllaghyn veih Jonathan Michael, dy beagh claare dy obbyr er ve ayn dy yannoo ny aa-scrutaghyn shoh jeh shirveishyn, dy chroo bun-choontaghyn feer vaghtal son ny veagh cummey ny shirveishyn shoh dy row ad slanejeant – cre gollrish ta lheelann booiagh jeeaghyn dy ve; cre ta ny stundayrtyn son ny shirveishyn shen as feme er cooilleeney ad; cre ta ny eiyrtyssyn ta shin dy hirrey son ny shirveishyn shen; cre ta ny ard-chowraghyn jeh cooilleeney nee towse livrey ny shirveishyn shen?  

Ta Bnr Cope gra, ayns seihll jeh'n sorch share, son dy chooilley pheiagh cochianglt rish y chooish, dy row shen y boayl veih veagh Kiarail Vannin er n'ghoaill toshiaght, lesh bun-choontaghyn feer vaghtal y ve eck, myr shoh dy beagh feme eck er claare argidoil cho kiart as oddagh ee y ve kiart veih'n toshiaght. T'ee gra nagh row shin ayns seihll jeh'n sorch share, as ayns rieughid dy row shin baghey lesh pandemagh dowanagh, myr shoh nagh row shen ry yannoo er chor erbee. T'ee gra dy vel yn Rheynn gobbraghey feer, eer chreoi dy lhiassaghey ooilley ny bun-coontaghyn shen, myr shoh dy vod mayd cosney gys yn ynnyd shen, ayn t'ad gra dy vel shoh y bun-choontey son yn shirveish er-lheh shoh, shoh nee ee costal dooin, as shoh yn aght bee eh livreit.

Ta Bnr Cope gra nagh vel ad er roshtyn yn ynnyd shen foast, as dy bee feme er ceau traa dy liooar dy ve abyl dy roshtyn yn ynnyd shen. T'ee gra, er-lhee, ny t'er haghyrt ayns ny shiaghteeyn jeieanagh, as lesh y stayd argidoil ayn ta shin ooilley baghey, harrish dy chooilley Rheynn, dy vel feme er y veer dy obbyr shen ny smoo na va rieau. 

Ta Bnr Cope gra, tra t'ou cosoyley y stayd rish y tuarasyl Darzi, abbyr, 'sy Reeriaght Unnaneysit  – shen tuarastyl liorish yn Chiarn Darzi ren scrutaghey Shirveish Claynt Ashoonagh Hostyn er y gherrid - dy nee feer chronnal eh dy vel feme ain er jeeaghyn queig ny jeih bleeaney 'sy traa ry heet, as ta aggyrt ain bishaghey, dy bee feme ain er jannoo reddyn ayns aght elley, as dy bee feme ain er jannoo tosheeaghtyn as jannoo reaghyssyn elley mychione kiarail slaynt, er yn oyr dy vel yn aggyrt, crampys y chiarail slaynt, costys y chiarail slaynt, y jerkalys bentyn da kiarail slaynt, bishaghey blein er vlein. 

Ta Bnr Cope gra dy vel ee ayns coardail dy bollagh rish raaghyn Bnr Christian – shen Oltey yn Chiare as Feed son Doolish Yiass, Claire Christian – mychione plannal ny shirveishyn ain rere claare hraa foddey ny sodjey. T'ee gra, dy ve abyl dy yannoo shen, plannal argidoil dy strateishagh, cha nee agh gobbraghey veih blein gy vlein, agh cur eab er jeeaghyn foddey ny sodjey roin 'sy traa ry heet dy vod mayd jannoo ny reaghyssyn kiart as jannoo tosheeaghtyn rere shen. 

Ta Bnr Cope gra nagh dooar Kiarail Vannin y towse 'sy chlaare argidoil ren yn Reejerey Jonathan Michael coyrlaghey, ny, dy jarroo, y sorch shen dy phlannal dy chur argid harrish three bleeaney, myr shoh dy vel eh ny cooish as ta Kiarail Vannin er n'yannoo recortys j'ee reesht as reesht, as er n'ghra dy beagh shoh feer, eer chooneydagh er nyn son dy phlannal livrey kiarail slaynt harrish traa foddey ny sodjey. T'ee gra dy vel ad toiggal dy vel shen doillee as myr shoh dy vel ad toiggal dy bollagh as soiaghey jeh ny oyryn nagh vel shen ayn.

Ta Oltey yn Chiare as Feed son Connaghyn, Julie Edge, gra, bentyn da reirey argidoil ooilley cooidjagh son Reiltys Ellan Vannin as pobble Vannin, dy vel oaseirys ec yn Tashtey er shen, agh dy vel ee clashtyn jiu – shen dy ghra, ayns soie Tinvaal Jerrey Fouyir – nagh vel yn Tashtey cheet stiagh dy ghoaill ayrn ayns reaghyssyn obbree. T'ee gra dy vel yn reirey argidoil ny oardagh obbree cheusthie jeh Rheynn erbee, myr shoh dy vel eh boirey urree dy vel yn Tashtey gennaghtyn nagh vod eh cheet stiagh dy ghoaill ayrn ayns shen.

Ayns soie Tinvaal Jerrey Fouyir, va feyshtyn er yn Shirveishagh Slaynt as Kiarail y Theay, Lawrie Hooper, mychione giarraghyn da shirveishyn slaynt son surransee. T'eh gra dy row eh er y Rheynn as Kiarail Vannin jannoo reddyn as assdaue harragh eiyrtyssyn chelleeragh, as fy yerrey dy vel shoh bentyn da cur sthap er argid goll magh ass y dorrys, as dy vel shen y chaghteraght cleeir veih Coonceil ny Shirveishee, dy vel shen yn anney cleeir veih'n Reiltys as dy vel shen yn oyr ta shin er jeet 'syn ynnyd shoh jiu.

Nurree ren yn Shirveishagh Tashtee, as Oltey yn Chiare as Feed son Rhumsaa, yn Fer-lhee Alex Allinson, fograghey magh dy row eh bishaghey rate syrjey y cheesh cheet stiagh liorish daa phing, veih 20p gys 22p 'sy phunt, as dy beagh yn argid er ny ghientyn liorish shen currit son shirveishyn slaynt. Ny yeih shen, as ga dy dooar shirveishyn slaynt towse smoo dy argid 'sy chlaare argidoil son y vlein argidoil shoh, haink eh magh dy jinnagh Kiarail Vannin ceau £16.8 millioon punt erskyn y chlaare argidoil eck. Ta ny giarraghyn ayns shirveishyn er jeet ayns eab dy yannoo ny sloo yn towse shen dy argid.

Ny s'anmee va kied ec Mnr Hooper dy yannoo fogrey persoonagh. T'eh gra, three bleeaney er dy henney, dy ren eh soiaghey jeh'n phaart myr yn Shirveishagh Slaynt as Kiarail y Theay 'sy lught-reill shoh, as dy nee vondeish v'eh dy hirveishagh 'syn oik shen. T'eh gra dy vel eh goaill moyrn ass ooilley t'er jeet lhieu 'sy traa shen. T'eh gra, dyn y wooise da preayssyn mooar dy liooar, dy vel eh credjal ayns rieughid as dy mooar dy vel reddyn er n'gholl er nyn doshiaght dy yannoo corrym shirveishyn slaynt as kiarail as dy hareaghey mieys as sauchys ny shirveishyn vees goll er chebbal. T'eh gra, karraghey ny shirveishyn slaynt ain, dy bee turrys liauyr doillee eh dy kinjagh, fer as feme dy ve currit da dy shickyr as jeeaghyn er rere reayrt 'sy traa liauyr, agh atreih, nagh vel shoh red ennagh ta'n Ard Shirveishagh currit da. T'eh gra, er yn oyr shen, dy vel eh kiart nish er chur stiagh e hregeil da'n Ard Shirveishagh, as nagh jean arragh shirveishagh 'sy reiltys echey.

Ta Mnr Hooper gra dy row eh smooinaghtyn dy by chooie eh dy chur freggyrtyn da feyshtyn ny olteynyn y voghrey shen er yn oyr dy vel olteynyn toilchin freggyrtyn da nyn veyshtyn ec y traa ard-scanshoil shoh, as nagh row eh geearree lhiggey voish y currym echey da Tinvaal. T'eh gra, ayns ny shiaghteeyn jeieanagh, dy vel eh er jeet ny s'baghtaley as ny s'baghtaley da nagh row yn Ard Shirveishagh goltaghey ny barelyn echey as nagh vel arryltagh dy eaishtagh rish ny barelyn as yn feanish vees currit roish, as dy vel ny barelyn echey as ec Mnr Hooper er y traa ry heet son shirveishyn slaynt cheet dy ve ny smoo as ny smoo scarrit, as dy row eh shickyr dy row dean fy yerrey yn Ard Shirveishagh dy chur eab er preevaadjaghey y shirveish claynt, as nagh vel shen red ennagh fod eh pohlldal.

Ta Mnr Hooper gra dy vel eshyn er n'yannoo cleeir er-lheh y barel echey er shoh gys Coonceil ny Shirveishee ayns ny shiaghteeyn jeieanagh. T'eh gra, yn shiaghin shoh chaie – as myr shoh veagh shen nish kegeesh er dy henney – va yeearree currit roish y Choonceil dy aa-hickyraghey dy row eh currit da shirveish claynt ashoonagh va nastee tra va sleih jannoo ymmyd j'ee, as nagh row ad arryltagh dy ve currit da shoh. T'eh gra neesht dy row er ny chur da'n Choonceil va'n coheks as buillaghyn lickly er surransee jeh ny giarraghyn ayns kiarail slaynt ta'n Ard Shirveishagh cur eam er roish y theay, as eh treishteil, lurg daue fakin yn eiyrtys trome cummyssagh, dy jinnagh ad shirrey raad elley. T'eh gra, atreih, yn ard-ghaue jeh assee da surransee va er ny hoilshaghey magh dy baghtal, nagh daink veg veih shen er chor erbee.

Ta Mnr Hooper gra, ayns cooinsheanse mie, nagh vod eh freayll rish shirveishagh er Ard Shirveishagh as v'eh fo roish y theay as dy preevaadjagh dy chleiy fo'n ablid echey dy yannoo yn obbyr vees femoil, dy chleiy fo ablid y Rheynn Slaynt as Boayrd Kiarail Vannin dy obbraghey dy fondagh, as ta gobbal dy hoiaghey jeh'n reggyrtys son eiyrtyssyn ny reaghyssyn shoh. T'eh gra dy row eh treishteil nagh jean y chooish cheet gys yn ynnyd shoh, agh dy vel eh er jeet dy ve baghtal nagh vel eh arragh abyl dy yannoo caghlaa veih cheusthie Coonceil ny Shirveishee, as, er yn oyr dy vel eh dy bunnidagh neu-choardail rish yn immeeaght as t'eh credjal dy row reaghys jeant er-e-hon, nagh vel reih elley echey agh dy irree ass. 

Ta Mnr Hooper gra dy by vie lesh jannoo ymmyd jeh'n chaa yerrinagh shoh dy chur booise dauesyn ooilley as ta'n obbyr creoi oc er n'yannoo caghlaa cho mooar ayns ny three bleeaney t'er n'gholl shaghey – olteynyn politickagh y Rheynn, oaseiryn as olteynyn y wirran 'sy Rheynn as ayns Kiarail Vannin, as Boayrd Kiarail Vannin, as dy hirrey leshtal jeh pobble yn Ellan shoh nagh vod eh caghlaa coorse y reiltys shoh veih'n cheu-sthie. T'eh gra dy vel irree ass yn un chaart er-mayrn echey dy chur sheese. 

Yn eear Hirveishagh Slaynt as Kiarail y Theay, Lawrie Hooper, choud's v'eh cur fogrey persoonagh roish Tinvaal, kiart lurg da cur e hreigeil da'n Ard Shirveishagh Jemayrt shoh chaie, yn 15 Jerrey Fouyir. 

Geiyrt dy jeeragh er shen, va'n nah chooish 'syn agenda Fogrey yn Ouyir liorish yn Ard Shirveishagh, Alfred Cannan. T'eh gra dy by vie leshyn goaill toshiaght liorish cur booise da Lawrie Hooper son y jeeanid t'er ve jeant echey ayns ny three bleeaney shoh chaie, as dy row mie lesh son yn traa ry heet. T'eh gra dy by hreih eh e hregeil, agh dy vel eh feer vaghtal dy jarroo 'syn ynnyd shoh dy vel y varney eddyr y bun-chredjue echey as rieughid y stayd ta Kiarail Vannin feddyn ee hene dy ve ayn jannoo seose keim choud er-e-hon. T'eh gra dy vel fys echey dy row y chlaare argidoil nurree jannoo seose laa doillee son ymmodee sleih ayns thieyn dellal lesh bishaghey ayns keesh son ceau er kiarail slaynt, as ceau y Reiltys freayll rish ayns stayd lesh kioneys currit er ayns ymmodee aghtyn liorish kiarail slaynt.

Ta Mnr Cannan gra, nurree, lesh bishaghey 'sy cheesh goit stiagh, dy dooar Kiarail Vannin £43 millioon elley dy argid, va ny lhie er y ghialdyn eck dy reayll cheusthie jeh'n chlaare argidoil eck. T'eh gra ny nee cronnal eh nagh bee shoh yn aght, as keayrt elley dy bee ny vees ceaut er kiarail slaynt ymmodee millioonyn erskyn shen va currit jee. T'eh gra dy vel y ceau rour shoh jannoo neu-hickyr claare y reiltys son ceau argid vees jeant corrym agh dy keyl, as nagh vod eh tannaghtyn ayn, gyn cur ayns gaue shickyrys ny tashtaghyn freillt theayagh ain.

Ta Mnr Cannan gra dy vel eh er ny Rheynnyn, goaill stiagh y Rheynn Slaynt, freayll cheusthie jeh'n chlaare argidoil oc, dyn y wooise daue credjal nagh vel argid dy liooar currit daue ny dyn, as dy vel feme nish er kiarail bentyn da shen ayns Kiarail Vannin. T'eh gra dy vel adsyn ta goit ec bun-chredjue bentyn da cur argid son kiarail slaynt jeeaghyn ersooyl veih'n rieughid, as nagh vod mayd fordrail coarys dy chiarail slaynt nagh vod freayll smaght er ny ta goll er ceau echey. T'eh gra dy vel eh er chlashtyn yn eam son tooilley argid veih keeshyn, agh nagh jean shoh feaysley y cront tra ta coarys dy chiarail slaynt ain nagh vod plannal as gobbraghey cheusthie jeh'n chlaare argidoil echey.

Ta Mnr Cannan gra, ny smoo na shen, dy vel eh baghtal nagh vel ablid y heshaght dy ghoaill urree claare argidoil as plannal argidoil as dy chur shen freggyrtagh da eiyrtyssyn baghtal, ayn. T'eh gra dy vel eh oyr son ve mollit erskyn credjue dy vel shin 'syn ynnyd shoh, lesh yn argid baiht ayns kiarail slaynt ayns ny three bleeaney shoh chaie, agh ny yeih shen, dy vel feme orrin gleashaghey dy ghoaill ayns laue y doolane shoh. T'eh gra nagh vel shoh yn traa dy chur enn er nagh vod y stayd shoh ve currit-lesh, as nagh vod mayd dooney ny sooillyn ain as treishteil dy jean shoh goll ersooyl. T'eh gra dy vel shoh yn traa er-nyn-son ooilley dy obbraghey cooidjagh, as dy vel fys echey, trooid jannoo dy jeeragh, trooid resooney magh dy smooinaghtagh, as ymmyrkey jarrooagh, dy vod mayd feddyn ny freggyrtyn ta femoil.

Ta Mnr Cannan gra dy jean eshyn hene goaill ersyn yn oik myr Shirveishagh Slaynt as Kiarail y Theay rish paart dy hraa dy chur y shickyrys choud's t'eh smooinaghtyn er reihyn son leeideilys politickagh y Rheynn 'sy traa ry heet. 

As lurg da Mnr Hooper cur stiagh e hreigeil myr Shirveishagh da Mnr Cannan, ren oltey politickagh yn Rheynn, as Oltey yn Chiare as Feed son Doolish Hiar, Joney Faragher, irree ass neesht. T'ee gra dy bee feme er lhieeney y varney shoh 'sy chlaare argidoil ayns aght ennagh, as dy ren shin clashtyn jeh ny giarraghyn ayns shirveishyn, nagh vod ish coardail rish. T'ee gra er-lhee 'sy traa ry heet dy jean mayd fakin taillaghyn currit er bun, as dy ren ee briaght jeh'n Ard Shirveishagh dy yannoo baghtal vel eh coardail rish y chummey dy vel eh nastee 'sy voayl ta sleih jannoo ymmyd jeh, as nagh row eh abyl dy yannoo baghtal shen, as dy dug eh freggyrt va lane dy liooar dy ockleyn nagh ren ayns rieughid scryssey veg magh, as dy row feme ain er jeeaghyn er cummaghyn son cur argid.  T'ee gra cho mooar nagh vel shen freggyrtagh da ny bun-eieyn eck nagh vod ee dy ethicoil dy ve ny soie 'sy phaart shen dy reill harrish ny giarraghyn shoh as yn cummys son cur er bun taillaghyn, as nagh vel shen t'ee credjal ayn.

Myr cheayll shin choud's va Mnr Hooper loayrt mychione yn oyr ren eh irree ass, v'eh gra dy row eh er jeet dy ve shickyr dy row kiarail Mnr Cannan fy yerrey dy phreevaadjaghey shirveishyn slaynt. Agh ta Mnr Cannan shassoo er nagh vel smooinaghtyn goll er cur da shen myr reih. T'eh gra nagh vel ad loayrt mychione preevaadjaghey yn shirveish chiarail slaynt, agh dy vel feme ain er cur baght ooilley cooidjagh er y keim livrey y hirveish vees goll er aggyrt, as yn ablid ain ayns rieughid dy eeck son shen.

As eh loayrt rish Radio Vannin ny s'anmee, ta Mnr Hooper gra, lesh dy chooilley red va taghyrt ayns kuse dy hiaghteeyn jeieanagh, ayns kuse dy veeaghyn jeieanagh, bentyn da cur argid, bentyn da costyssyn, dy vel eh er jeet dy ve ny s'baghtaley as ny s'baghtaley dasyn dy vel dagh keayrt t'ad er n'gholl stiagh ayn as er n'ghra dy vel shoh yn rieughid, as shirrey orroo dy eaishtagh rish ny fir-oayllee, nagh row geill currit da shen, as dy vel yn eiyrtys jeh shen nagh vod ve currit shaghey, dy vel eh er Kiarail Vannin giarrey shirveishyn as nagh vel ad jannoo veg lesh y choarys keesh, myr shoh my vees shirveishyn slaynt geearree tooilley argid t'eh er sleih goaill toshiaght er eeck son kiarail slaynt. T'eh gra dy vel shen yn ynnyd ta dy chooilley pheiagh ayn, as dy row shen yn oyr dy dug eh treealtys roish Coonceil ny Shirveishee – t'eh gra yn shiaghtin shoh chaie, agh kegeesh er dy henney liorish nish – briaght orroo row ad credjal ayns shirveish nastee 'sy voayl ta ymmyd jeant j'ee, row ad ny dyn, as nagh vel eh bun-eie ta ro doillee dy hoiggal.   

Ta Mnr Hooper gra nagh row olteynyn Coonceil ny Shirveishee arryltagh dy ghra dy row ad currit da shen, nagh row ad arryltagh dy ghra dy feer dy row shen scanshoil dy liooar as dy jinnagh ad glackey shen. T''eh gra nagh row ad currit da'n un cheu ny'n cheu elley, as dy row shen hene jannoo seose oyr son imnea, agh dy vel y boirey smoo shen haghyr eisht, va loayrt mychione giarraghyn cummyssagh, as dy ren ad clashtyn ooilley jeh y moghrey shen, dy vel ynnyd y reiltys feer vaghtal, dy vel eh er Kiarail Vannin freayll cheusthie jeh'n chlaare argidoil eck, as dy vel yn rieughid jeh shen dy vel giarraghyn ayns shirveishyn, as ny giarraghyn t'er ve treealit choud's nish feer, eer veg cosoyley rish ny reddyn as feme er jannoo ad dy yannoo ny ta'n Ard Shirveishagh shirrey. 

Ta Mnr Hooper gra dy row shen currit roish Coonceil ny Shirveishee, agh nagh row sthap erbee ayn dy farkaght, dy hayrn ennal er shoh, as dy smooinaghtyn er row shoh yn raad kiart, as nagh row agh yn sarey dy heet back lesh fys as tooilley myn-phoyntyn ayn jeh'n rolley dy ghiarraghyn. Er-lesh dy vel shen yn red neu-chiart dy yannoo.

Ta Mnr Hooper gra nagh row eh loayrt magh roish yn theay, as er argid cheet stiagh dy vel eh er ve caggey ass-lieh y chooish cheusthie jeh Coonceil ny Shirveishee as caggey ass-e-lieh 'sy chamyr er yn oyr dy vel eh smooinaghtyn dy vel shen y red kiart dy yannoo. T'eh gra cho leah's t'ou geearree loayrt roish y theay nagh vod oo tannaghtyn ayn, dy vel eh ort's irree ass, nagh vel shen agh yn red kiart as cooie dy yannoo. T'eh gra, myr dooyrt eh roish Tinvaal, dy vel eh er jeet dy ve shickyr ayns yn daa hiaghtin t'er n'gholl shaghey, lurg da cur-lesh stiagh ayn Caairlagh Kiarail Vannin, as dy jarroo fir phrofeshoonagh as mooarane keeayll chionnit oc dy heet as dy loayrt rish Coonceil ny Shirveishee mychione ny vees yn bun jeh shoh, as ny ta'n rieughid jeh, as yn aght nagh row ad goll er eaishtagh rish.

Ta Mnr Hooper gra dy row shen er-e-hon – gyn ve goll er eaishtagh rish 'sy chamyr, mannagh vod eh jannoo sleih shickyr jeh'n red kiart dy yannoo tra t'eh 'sy chamyr, eisht nagh vel oyr erbee er-e-hon dy ve 'sy chamyr shen. T'eh gra nagh vel eh son soie ny lhie as cur seose ny prinsabylyn echey son veg agh dy ve ny hoie mygeayrt y voayrd shen. T'eh gra, by hreih eh, quoi erbee vees cheet stiagh dy yannoo y startey t'eh kiart er naagail follym, dy bee annaghyn feer vaghtal currit da'n pheiagh shen dy gholl ersooyl as dy ghiarrey shirveishyn, as er-lesh dy jean eh caggey noi shen lesh dagh ayrn jeh'n vioys echey er yn oyr nagh vel eh smooinaghtyn dy vel eh ry hoiaghey jeh. T'eh gra dy vel fys echey er barel Kiarail Vannin er shoh, nagh vel ee geearree jannoo shoh, veg foddee cur sleih ayns gaue, as er-lesh nagh vel shen raad vees cooie da'n reiltys dy gholl.

Ta Mnr Hooper er n'ghra dy vel yn Sheshagh Lhee er n'ghra dy nee drogh eie eh, dy vel Kiarail Vannin gra dy nee drogh eie eh, dy vel yn Rheynn Slaynt as Kiarail y Theay gra dy nee drogh eie eh, agh fy yerrey dy ren ad goll rhymboo as dy row fograghyn theayagh jeant as dy row ad currit da roish y theay, dyn y wooise da ooilley yn trimmid shen jeh coyrle. T'eh gra, mannagh vel oo geaishtagh rish yn sleih as lhisagh fys ve echey er ny vees taghyrt, nagh vel fys echey er yn sleih dy eaishtagh roo.

Ny s'anmee neesht ren Mnr Cannan loayrt rish Radio Vannin, as reesht t'eh gra dy by vie lesh cur booise da Lawrie Hooper son yn obbyr t'eh er n'yannoo, agh dy vel ymmodee doolaneyn fo coarys as Rheynn y chiarail slaynt ec y traa t'ayn, as dy vel yn obbyr echey – shen dy ghra, myr Shirveishagh Slaynt as Kiarail y Theay shallidagh – dy gholl roish as dy yannoo yn eer red share vees ry yannoo dy ghoaill ayns laue ny doolaneyn shen as dy chur eab er geddyn argid son kiarail slaynt reesht ayns ynnyd ayn t'eh gobbraghey cheusthie jeh'n chlaare argidoil currit da as dy vel sorch ennagh dy enn ain er ny vees femoil dy cummyssagh son y traa ry heet my vees caghlaa erbee dy jarroo jeant. 

Bentyn da Mnr Hooper gra dy row Mnr Cannan shirrey dy phreevaadjaghey y coarys kiarail slaynt, ta Mnr Cannan gra dy by hreih eh nagh vel eh agh ayns fardeil lesh shen. T'eh gra dy vel y bun jeh'n chooish, yn oyr son ve 'sy stayd dy chreoighys shoh, dy vel yn eiyrtys jeh'n cheau rour kinjagh shoh nish dy yannoo jeeill, lesh ny towseyn cheet cooidjagh, da ny claareyn argidoil ain as er ny claareyn argidoil ain 'sy traa ry heet as yn towse t'eh goaill dy cummyssagh ass ny tashtaghyn freillt ain.

Jecrean va kied ec Mnr Hooper dy ve assaaragh, agh ren Mnr Cannan loayrt mychione ny va grait ec Mnr Hooper Jemayrt, as liorish Jecrean t'eh jeeaghyn dy row Mnr Cannan er jeet dy ve corree. T'eh jeeaghyn dy ren eh goll, er yn oyr dy row eh gra dy jinnagh eshyn goaill ersyn y currym myr Shirveishagh Slaynt as Kiarail y Theay dy shallidagh, dy loayrt rish ard oaseir yn Rheynn, as 'syn aght shen dy daink eh er tuarastyl mychione Kiarail Vannin va jeant Mee Averil, agh nagh ren Mnr Hooper cur roish Coonceil ny Shirveishee. 

Ta Mnr Cannan gra dy ren Mnr Hooper shirrey cur yn foill son ny lheamyssyn echey hene er Coonceil ny Shirveishee liorish cur roish y Choonceil treealtys va cur eam son kiarail slaynt nastee 'sy voayl t'ee goll er livrey, as slane fys echey rolaue dy jinnagh y Coonceil jiooldey ny yeearreeyn echey lesh faaishnys jeh £16.8 millioon ceaut rour as gyn aght feayslee rhymboo er-lhimmey jeh giarrey shirveishyn. T'eh gra dy vel yn un pheaigh eer cheet er preevaadjaghey, shen yn eear Hirveishagh, as t'eh cheet er shoh myr strateish kayt marroo – shen dy ghra cur cooish roish sleih dy chur yindys orroo as dy chur geill ersooyl gys y chooish shen ayns ynnyd jeh'n chooish scanshoil. Ta Mnr Cannan gra nagh daink eh lesh Mnr Hooper.

Ta Mnr Cannan gra dy vel eh kiart er jeet magh dy row fys ec Mnr Hooper, as dy row fys currit da Mee Averil, nagh row plannal argidoil Kiarail Vannin fondagh ny jannoo seose tosheeaght. T'eh gra dy row fys echey er shoh Mee Averil tra dinsh co-chorp mooie da nagh row fys ocsyn as va claare argidoil oc, as nagh row costyssyn goll er cur er obbraghyn va goll er jannoo as nagh row plan argidoil ayn son y traa sodjey, as nagh row enn eer currit er dy row cooishyn argidoil jannoo seose gaue mooar. T'eh gra, shaghey ginsh shen da Coonceil ny Shirveishee, shaghey cur magh y tuarastyl shen, shaghey jannoo dy jeeragh dy chur-rish shen, dy ren eh reaghey dy volley y theay liorish gra nagh row argid dy liooar currit da Kiarail Vannin, as dy row eh smooinaghtyn dy row shen y raad share dy gholl 

Ta Mnr Cannan gra dy vel Mnr Hooper er chur y foill er yn towse dy argid va currit da Kiarail Vannin, as reesht as reesht t'eh er chur yn foill er yn aght nagh row argid dy liooar currit da'n chirveish, ga dy row eh er ny insh da, 'sy tuarastyl, dy row oaseirys argidoil as plannal argidoil ry laccal dy agglagh. Ta Mnr Cannan gra, dy beagh fys er ve echeysyn hene ny ec Coonceil ny Shirveishee mychione y tuarastyl shoh,  dy beagh skeeal elley roish Tinvaal y laa shen. Agh t'eh gra nagh shen myr v'eh, as ayns ynnyd jeh shen dy row eh orroo strepey lesh tuarastylyn va goll noi y cheilley as va cheet dy jeeragh veih Kiarail Vannin, as dy row molley er ny yannoo nagh row agh dy row towse ro veg dy argid ec yn cheshaght.

Ta Mnr Cannan gra dy vel y firrinys eh nagh vel fys ain vel towse ro veg goll er cur da'n cheshaght, agh veih'n laa shen dy vel fys ayn dy vel y trimmid er plannal argidoil as er gurneil argidoil ry laccal, rere yn tuarastyl t'er ve clouit echey. T'eh gra dy vel fys ain neesht dy vel yn eear Hirveishagh geearree bishaghey ayns keeshyn as argid currit gyn caglieeyn er son slaynt, as dy by chummey da yn aght ta shoh goll er cooilleeney - keeshyn er vondeishyn bun-argidoil, er eiraght, keesh cheet stiagh – agh dy vel eh geearree kiangley shoh er y phobble ain as er y tarmaynys ain, choud's va fys echey, scruit sheese, dy beagh yn sheshaght neu-lickly dy cheau yn argid ayns aght fo ghurneil as fondagh.

Ta Mnr Cannan gra dy vel eh er jeet quail rish ard oaseir yn Rheynn Slaynt as Kiarail y Theay as yn Tashtey y moghrey shen, as dy jean ad gobbraghey rish Kiarail Vannin dy ghoaill toshiaght er geddyn y cooney argidoil cooidjagh dy vod yn sheshaght aarlaghey plan dellal son y vlein shoh cheet. T'eh gra, 'sy traa derrey shen, dy jean eh shirrey er Tinvaal dy chooney lesh myn-vrishey as aa-scrutaghey currym Kiarail Vannin, dy vod shin roshtyn ynnyd currymagh ayn ta ny shirveishyn freggyrtagh da'n chlaare argidoil vees currit jee, lesh paart dy reamys son caghlaa currit stiagh ayn dy vod yn sheshaght jannoo myr femoil dy ve freggyrtagh da'n aggyrt.

Ta Mnr Cannan gra dy vel feme er gobbraghey dy bieau, as dy jean eh cur-lesh y currym dy son Tinvaal dy resooney magh y vee shoh cheet, dy chlashtyn treealtyssyn ny barelyn erbee dy jeeragh, as dy vel eh geearree fakin currym noa liorish y chlaare argidoil Toshiaght Arree.

Ga nagh row Mnr Hooper kionefenish Jecrean, hug eh freggyrt ayns ny meanyn sheshoil, cheet er ny va Mnr Cannan er n'ghra myr un eab s'jerree debejagh dy liooar, as cur coontey jeh myr ymmyrkey erskyn credjue dy bollagh liorish peiagh ennagh as sleih jeeaghyn er myr fer toshee. T'eh gra nagh row eh neu-yerkit as dy vel eh treishteil dy vel eh soilshaghey magh ny v'eh strepey rish. T'eh cur feysht, vel ny Shirveishee echey arryltagh dy ve nyn shassoo rish peiagh ennagh ta gymmyrkey eh hene myr shoh.

Ta Joney Faragher gra dy vel feme er cur shilley er y reayrt jeh'n clane cooish, as nagh vod mayd gra nagh vel shin ayns coardail rish red ennagh tra nagh vel reih elley ain, agh dy vel eh ayns rieughid doillee dy liooar dy chur yn reih elley tra nagh vel oo dty hoie ayns paart lane-femoil y Hirveishagh Tashtee ny'n Ard Shirveishagh, dy vel eh doillee dy liooar dy gheddyn reayrt ooilley cooidjagh jeh'n argidys theayagh, cre gollrish t'ad jeeaghyn. T'ee gra dy vel saaseyn ayn dy chosney tooilley argid cheet stiagh, agh dy vel eh jeeaghyn dy vel yn Tashtey faagail mooie ad ass yn strateish er keeshyn ren olteynyn resooney magh Mee Vayrt ny s'moghey 'sy vlein shoh. 

Ta Bnr Faragher gra dy row yn chooid smoo jeh ny saaseyn yinnagh ish er smooinaghtyn er dy chosney tooilley argid cheet stiagh, er nyn vaagail magh hannah, eer dy row ad gra dy row ad son ronsaghey ad, as dy ren ee loayrt mychione shen 'sy resooney magh, dy row chionnid ayns shoh er yn oyr dy row ad gra dy jinnagh ad ronsaghey saaseyn, agh dy row ad faagit mooie hannah 'sy strateish shoh – as dy feer nagh row strateish v'ayn agh sett dy phrinsabylyn er polasee. T'ee gra dy vel eh ayns shen dy vel eh gennaghtyn jee dy vel ad failleil, dy vel aigney soit feer reen er yn aght ta shin cosney argid cheet stiagh, as nagh vel eh agh dy chosney keesh veih obbreeyn, as dy vod ad smooinaghtyn cheumooie jeh shen.

Ta Bnr Faragher gra, 'naght cheddin, dy nee ard-scanshoil er-lheh eh dy vel ad goaill stiagh y theay ayns ny coloayrtyssyn shoh, as dy vel ymmodee coloayrtyssyn t'er ve oc er kiarail slaynt er ve cheu-chooylloo jeh dorryssyn dooint, as dy row shen gennaghtyn jee feer neu-houyr, er yn oyr dy vel shoh jannoo er dy chooilley pheiagh 'syn Ellan shoh, as dy lhisagh fys ve ec dy chooilley pheiagh er. Er-lhee, ayns rieughid, dy vod ad cur magh eh son referendum, da theay Vannin, cre vees traa ry heet y chiarail slaynt, as cre'n aght vel shin gennaghtyn dy lhisagh argid y currit er-e-son; vel shin foast dy bunnidagh coardail dy lhisagh ee y ve nastee 'sy voayl t'ee goll er ymmydey. 

Ta Bnr Faragher gra dy vel shen y barel ecksh, as er-lhee dy vel y chooid smoo dy leih smooinaghtyn shen, as, my vees shen y barel, cre'n aght fod mayd jannoo shickyr dy vel cosney yn argid cheet stiagh freggyrtagh da shen ta shin feme. T'ee gra nagh vel doilleeid erbee ayn gyn aght feayslee da, agh dy bee'n aght feayslee shoh cramp, as foddee dy jean eh goaill stiagh reddyn ta sleih feddyn dy ve neu-ennoil, as er-lhee dy vel shen yn boayl ta'n olt gast, as politickeyryn feer neu-arryltagh dy yannoo reddyn as foddee dy bee ad neu-ennoil, as nagh vel eie eck er yn aght dy chosney mygeayrt shen. T'ee gra, my vees shin geearree goll er y hoshiaght myr Ellan, foddee dy bee feme, ayns jeeaghyn er saase dy chosney argid, er jeeaghyn er yn aght ta ny coaryssyn ain cummit, as foddee dy bee feme er jeeaghyn er y choarys keesh as aa-chummey eh, foddee.

Ta cumraag Bnr Faragher myr Oltey yn Chiare as Feed son Doolish Hiar, Clare Barber, ny oltey jeh Coonceil ny Shirveishee 'syn oik eck myr Shirveishagh Chymmyltaght, Bee as Eirinys, as t'ee gra, er-lhee, dy vel eh mie er fys da sleih dy vel Coonceil ny Shirveishee gobbraghey lesh currym cooidjagh, as er-lhee dy vel shen feer scanshoil, ayns rieughid, er yn oyr nagh vel parteeyn politickagh ain rere yn cheeayll chadjin, raad ta manifesto coardit rolaue, myr shoh dy vel mooarane resooney magh ayns Coonceil ny Shirveishee, kiart my lhisagh eh y ve. T'ee gra nagh vel ad ooilley nyn soie as coardail, as dy vel ee clashtyn sleih gra dy vel ad gollrish moddee vees snoggal, agh dy vel paart j'ee as by vie lhee stroo dy bio kuse jeh seshoonyn Coonceil ny Shirveishee, jus dy chur y vreag da'n far-skeeal shen dy bollagh. T'ee gra dy vel coloayrtys feer lajer ayns Coonceil ny Shirveishee, as dy vel shen yn aght dy bollagh lhisagh eh y ve.

Ta Bnr Barber gra, cho leah's t'ad er hoaiaghey jeh polasee er-lhee dy vel eh kiart dy bollagh dy vel ad tannaghtyn cooidjagh er ny polaseeyn shen. T'ee gra dy vod ee toiggal yn oyr ny keayrtyn dy vel eh jeeaghyn tra ta peiagh ennagh cheet magh ass nagh vel y barel oc er shiartanse dy reddyn coardail rish yn aght foddee dy vel ad er cheau teiy, agh ayns rieughid, son y chooid smoo, er-lhee dy vel ad gobbraghey rere consensus, dy vel ad ayns firrinys gobbraghey rere consensus, as dy vel ad ceau traa, tra ta mee-choardail ayn, dy gheddyn magh cre veih ta shen cheet, 'naght cheddin as t'ad jannoo ayns Tinvaal, ayns rieughid, dy vel ad geearree cummal ny resoonaghyn magh shen, dy vel ad geearree cummal ny coloayrtyssyn shen, as dy bee dy kinjagh reayn lhean dy varelyn er cooish er-lheh. T'ee gra dy vel shen slayntoil, shen yn aght kiart dy ve ayn, as dy row ad ooilley jeh'n un varel, dy beagh feysht eck row ad scrutaghey reddyn dy kiart.       

Bentyn da cheet dy ve'n Shirveishagh Slaynt as Kiarail y Theay, as ish ny eear er phrofeshoonagh lhee, ta Bnr Barber gra dy vel ee ayns aght cadjin neu-houyr mychione yn towse dy streeughyn veagh eck dy cummyssagh 'sy phaart shen. T'ee gra dy vel ee gobbraghey dy breeoil myr boandyr dy reayll rish ve recortit, as dy vel eh urree cooilleeney 450 oor harrish three bleeaney, myr shoh t'ee ny keayrtyn jannoo shayll oie ec y chione shiaghtin, as dy vel ee gobbraghey 'sy Spital as ayns thie kiarail dy chooilleeney shen, agh er-lhee dy vel shen cur keim dy streeu er-e-son ayns rieughid dy gholl stiagh 'sy phaart shen. T'ee gra, 'naght cheddin, dy vel ee smooinaghtyn dy vod oo ve bunnys ro faggys, myr shoh dy vel ee son shickyrys ny shassoo lane aarloo dy pholldal y peiagh vees goll stiagh 'sy phaart shen, agh er-lhee dy vel yn streeu er-e-son jannoo seose doolane feer vooar.

Ta Oltey yn Chiare as Feed son Doolish Hwoaie, David Ashford, as Oltey yn Chiare as Feed son Doolish Veanagh, Chris Thomas, er ve pointit myr olteynyn politickagh y Rheynn Slaynt as Kiarail y Theay, lurg da Mnr Hooper irree ass myr Shirveishagh as Bnr Faragher irree ass myr oltey politickagh. Va Bnr Faragher ny oltey politickagh marish Oltey y Choonceil Slattyssagh, Tanya August-Hanson, myr shoh nish bee three olteynyn politickagh, as ta'n Shirveishagh Shallidagh, Mnr Cannan, gra dy vel palchey cheeayll chionnit ec yn troor dy olteynyn politickagh as dy vel eh jeeaghyn roish dy obbraghey maroo dy gholl er y hoshiaght dy bieau ayns aa-scrutaghey currym Kiarail Vannin chammah's jeeaghyn er ny femeyn cochianglt roo 'sy chlaare argidoil. 

Va Mnr Ashford yn Shirveishagh Slaynt as Kiarail y Theay rish kuse dy vleeantyn, goaill stiagh choud's va'n pandemagh Covid-19 goll, agh ren eh faagail 2021 dy heet dy ve yn Shirveishagh Tashtee. 

Neayr's shen she'n Fer-lhee Alex Allinson t'er jeet dy ve'n Shirveishagh Tashtee, as t'eh gra nagh vel eh er chlashtyn veg mychione plannyn dy phreevaadjaghey kiarail slaynt, as nagh vel eh coardail rish Lawrie Hooper er shen. Agh t'eh gra dy vel ardyn jeh kiarail slaynt jeant preevaadjagh: dy vel yn shirveish feeacklagh jeant preevaadjagh, er yn oyr nagh row ad arryltagh dy choardail rish conaant y Hirveish Claynt Ashoonagh; dy vel shirveishyn ophthalmagh jeant preevaadjagh neesht; t'eh gra dy vel eh er haghyrt. Agh t'eh gra dy vel ny shirveishyn lane-femoil ec y chree bentyn da kiarail lhee as kiarail y theay, dy vel fys ain dy vel ad currit foddey ny share liorish kiareyder smoo gollrish Kiarail Vannin, dy vel ayns shen spaarail er-coontey mooadys, eer ayns Ellan beg.

Ta'n Fer-lhee Allinson gra, son shickyrys, tra t'ad er ve loayrt mychione cur argid son kiarail slaynt as ny tosheeaghtyn son kiarail slaynt, dy vel shen ooilley er ve liorish currym Kiarail Vannin as yn feme dy reayll Shirveish Claynt Ashoonagh son yn Ellan ain, vees currit magh ayns slattys. T'eh gra dy vel dy kinjagh paart dy lhiggey lesh y cheilley ayn, as er-lesh dy vel Lawrie Hooper gra nagh vel eh arryltagh dy lhiggey lesh y cheilley bentyn da kuse jeh ny prinsabylyn echey. 

Ta'n Fer-lhee Allinson gra, tra ta shin jeeaghyn er jannoo cormid jeh ny tosheeaghtyn, dy vel feme er paart dy lhiggey lesh y cheilley boayl ennagh, as er-lesh dy row eh er ooilley jeu ayns Coonceil ny Shirveishee as goaill stiagh yn Ard Shirveishagh hene dy hoiaghey jeh shen. T'eh gra, tra t'ou jeeaghyn er ny t'ad er n'gholl trooid ayns ny three bleeaney shoh chaie bentyn da pandemee, caggaghyn 'syn Oarpey, bolgey argidoil, rateyn use, slane reayn dy chooishyn cheusthie jeh'n reiltys, trooid y cho-voodeeys ain as mygeayrt y theihll, y nhee dy vel shin foast gobbraghey, y nhee dy vel ain foast shickyrys argidoil, lane-yerkallys, as aase tarmaynagh, jannoo seose prowalys rieugh jeh shickyrys Ellan Vannin as tarmaynys Ellan Vannin.
  
Ta Mnr Hooper gra dy vel mooarane obbyr ry yannoo ayns slaynt, as nagh row eh ayns rieughid geearree faagail shen neu-jeant, nagh row eh geearree faagail y fwirran ayns cront, nagh row eh geearree faagail Kiarail Vannin gyn coraa ayns Coonceil ny Shirveishee, nagh row eh ayns rieughid geearree faagail paart jeh'n obbyr va goll er harrish y reiltys, ayns firrinys, er yn oyr dy vel mooarane obbyr vees goll er jannoo as feme er dy debejagh. T'eh gra, ny yeih, fy yerrey, tra t'eh cheet gys ny prinsabylyn ayd ec y chree as ny credjueyn ayd ec y chree, er-lesh nagh vel reamys son gleashaghey, er yn oyr my vees red ennagh ayn t'ou credjal dy vel oo shassoo seose as gra dy vel oo credjal ayns shen as dy vel shen scanshoil.

Da'n faaue foddee dy row Mnr Hooper neu-arrymagh dy chur stiagh e hreigeil doaltattymagh da'n Ard Shirveishagh y moghrey shen, t'eh gra, rere y varel echey, dy vel cooyrtoilid goll daa hroa, as my vees yn Ard Shirveishagh dy insh da un red 'sy chamyr as eisht goll magh ass as gra roish y theay reddyn elley, nagh vel shen cooyrtoilid, nagh vel shen soilshaghey magh keim dy arrym ayns shen, as eer dy row eh er n'yannoo y red cooyrtoil as er chur screeuyn da Mnr Cannan rolaue, dy jinnagh eh er n'gheddyn magh aght dy chur yn raad da ansherbee as dy cheau eh dy jeeragh fo varroose, myr shoh dy vel eh booiagh dy liooar, ayns rieughid, dy row yn aght ren eh irree ass yn un aght dy gra ny va feme er gra as dy ve er ny chlashtyn gyn shen ve caillt ayns ooilley y vusthaa.

Ta Mnr Hooper gra dy row Coonceil ny Shirveishee feer chleeir dy row ad er choardail dy nhegin da Kiarail Vannin freayll rish y chlaare argdoil ec y traa t'ayn, eer dy row rolley goll er cur daue jeh ny va'n eiyrtys jeh shen bentyn da giarraghyn da shirveishyn, er yn oyr dy row ad cleeir, dy row Kiarail Vannin feer chleeir, my vees ad geearree spaarail y towse dy argid t'ad shirrey orroo dy spaarail harrish y traa va ry gheddyn, dy vel ad shen saaseyn trome dy liooar, ayns rieughid, dy chur streean er ceau, as nagh vel fys echey ayns firrinys yn aght foddee Mnr Cannan shassoo seose as dy neu-faitagh insh da Tinvaal nagh row shen red ennagh va jeant oc tra shen ren ad dy jeeragh.

Ta Mnr Hooper gra dy vel y coloayrtys mychione lhisagh shin ve cur taillaghyn er nheeghyn, lhisagh eh ve nastee 'sy voayl t'eh goll er ymmydey, reeshtagh, dy row Coonceil ny Shirveishee feer chleeir, as dy vel ny fockleyn jeusyn ta'n giare-hennaghys draghtit cur coontey, dy ren ad coardail nagh vel feme er caghlaa dy chelleeragh da'n phrinsabyl shen. T'eh gra, y cheayrt s'jerree dooyrt yn reiltys shoh shen, dy dooyrt ad nagh row oyr chelleeragh ayn dy vishaghey keeshyn, as eisht queig mee ny s'anmee dy ren ad bishaghey keeshyn, as dy row shen dy jeeragh ny fockleyn t'ad gymmydey bentyn da'n bishaghey 2% ayns keesh tra v'ad loayrt rish y theay, myr shoh nagh vel oyr chelleeragh son jannoo caghlaa, agh dy ren oo clashtyn yn Ard Shirveishagh gra ayns ny raaghyn echey hene dy vel eh son caghlaa reddyn, dy vel eh geearree y currym dy ve caghlaait.

Ta Mnr Hooper gra dy vel shen lane vie, as dy vel kied echey da ny barelyn shen, agh dy vel eshyn neu-choardail rish dy bunnidagh, as er-lesh nagh lhisagh shin ve cur taillaghyn er sleih son quaaltyssyn rish fir lhee chadjin as tannaghtyn ayns thieyn lheiys as cur eam er carbyd lhee, er-lesh nagh vel shen kiart, agh dy vel y raad ta Mnr Cannan geearree cur-lesh shin, as dy vel shen dy bollagh er-e-hon hene, agh myr va Mnr Hooper gra, nagh vel shen caghlaa foddee eh pohlldal. 

Ta Mnr Hooper gra dy vel eh loayrt mychione shirveish aynjee ta ny shirveishyn hene ec y chree nastee. T'eh gra, ayns seihll jeh'n sorch share, dy beagh oardrailyn lhee nastee 'sy voayl t'ad goll er ymmydey neesht, agh nagh vel ad, myr shoh er-lesh dy vel feme er ve pragmatagh bentyn da reddyn as er-nyn-son hannah ta shin shirrey taillaghyn, my vees shen keeayllagh. T'eh gra nagh jinnagh eh arragh jeeaghyn er cur taillaghyn er reddyn noa as er-lesh dy vel shen yn raad ta shin goll nish, dy vel eh jeeaghyn dy vel y reiltys shoh arryltagh dy loayrt mychione cur taillaghyn er tooilley stoo, as gyrjaghey keeshyn, as erskyn gyrjaghey keeshyn dy jean eh cur taillaghyn er sleih son nheeghyn neesht.

Ta Mnr Hooper gra dy ren yn Shirveishagh Tashtee bunnys fograghey magh ayns soie s'jerree Tinvaal nagh vel y bishaghey 2% shen ayns keesh shallidagh lurg shoh, agh nagh jinnagh eh feeraghey shen, dy vel reddyn er chaghlaa, dy vel y stayd tarmaynagh er chaghlaa, nagh row eh arryltagh dy ghra dy nee shallidagh va'n red shen as dinsh eh da sleih dy row eh shallidagh. T'eh gra myr shoh cha nee ynrican dy vel bishaghey 2% ayns keesh, agh dy bee ad jeeaghyn er cur taillaghyn er reddyn, ny dy bee ad jeeaghyn er giarrey ayns ny shirveishyn, er yn oyr dy nee'n rieughid eh dy vel kiarail slaynt costallagh as dy vel mooarane aggyrt mooie ayns shen, as cre erbee vees ry yannoo rish strughtooryn son taillaghyn, cre erbee vees ry yannoo rish ny aghtyn t'ou cosney argid, nagh jean cur-rish yn aggyrt shen derrey vees oo goaill ayns laue eh, vees oo ayns rieughid cur lheiys da sleih.   

Ta Mnr Hooper gra, liorish insh da sleih dy bee tailley orroo son entreilys da fer lhee cadjin, nagh jean ad agh goll gys Drogh-haghyrt as Egin; liorish insh da sleih dy bee tailley orroo son goll gys Drogh-haghyrt as Egin, nagh jean sleih goll er chor erbee, as dy jean ad fuirraghtyn derrey vees feme dy bollagh oc er, as liorish shen dy bee ad foddey ny s'chingey, as nagh vel yn aggyrt goll ersooyl. T'eh gra myr shoh tra ta shirveish ayd vees livrey er yn aggyrt shen, cre yn aght 'sy theihll vees yn aght dy spaarail argid. T'eh gra dy vel daa aght dy chur-rish: liorish goaill ayns laue yn aggyrt, as fys ain nagh jean shen taghyrt, nagh vod taghyrt, myr shoh dy vel oo scuirr veih cur lheiys da sleih, as dy vel shen eh.

Ta Mnr Hooper gra dy vel cheu elley y chooiney, shen ayns rieughid dy vel feme ain er tooilley argid dy chur stiagh ayns shoh, dy ve freggyrtagh ayns rieughid da'n aggyrt shen, agh yn aght t'ou cosney yn argid cheet stiagh shen, dy nee feysht feer doillee eh. Er-lesh nagh lhisagh oo ve cosney yn argid shen veih sleih as feme oc er kiarail chlinicoil, nagh vel shen kiart. T'eh gra dy vel shen dy jeeragh ny coloayrtyssyn ta goll er cummal, shen yn raad t'ad goll, as shen dy jeeragh y raad er-lesh ta'n Ard Shirveishagh geearree goll, as dy vel shen ynnyd feer ghaueagh dy ve ayn, as er-lheh lesh ooilley y fys t'er ve rheynnit er y Choonceil harrish ny meeaghyn gys shoh, as dy row y fys goll er cur daue cha nee ynrican liorishyn agh liorish ny fir phrofeshoonagh, liorish sleih ayns Kiarail Vannin, liorish y Chaairlagh, agh nagh row ad goll er eaishtagh roo as cha row geill currit daue er chor erbee, er yn oyr nagh row eh freggyrtagh da barel yn Ard Shirveishagh er y theihll.    

Myr cheayll shin, ta Mnr Cannan goaill ersyn currym y Hirveishagh choud's t'eh smooinaghtyn er pointeil Shirveishagh noa, agh t'eh gra er-lesh, jeeraghey rour er yn Shirveishagh noa, dy vel shen yn raad neu-chiart dy gholl. T'eh gra dy vel feme er cur doaie er shoh, as dy chur doaie er shoh dy bieau, as shen dy ghra jeeaghyn er y chlaare argidoil, jeeaghyn er y churrym, jeeaghyn er y chochianglys rish sleih chammah's cheusthie jeh'n chirveish claynt as neesht ny s'lhea trooid y cho-voodeeys, as er-lheh rish ny cumraagyn echey ayns Tinvaal. T'eh gra nagh vel traa oc son co-choyrleyn mooarey, as dy vel shoh ayns rieughid mychione toiggal dy tappee ny cooishyn as coardail er ny aghtyn-feayslee ta femoil.

Yn chiaghtin shoh chaie dooyrt Oltey yn Chiare as Feed son Carbory, Balleychashtal as Malew dy row eh credjal dy row yn traa er jeet son olteynyn Tinvaal dy cheau teiy er, row barrant oc foast ayns lught-reill Mnr Cannan. Ta Mnr Glover gra, my vees Tim Glover geearree goaill ayns laue eh dy vel feme er jannoo eh, agh dy vel feme er neesht scuirr veih cur ass cormid obbyr ny co-chorpyn ard-whaiylagh ain as y reiltys neesht. T''eh gra dy bee eshyn jeeraghey jiu as rish kuse dy hiaghteeyn ry heet er cur er y chooish shoh ve reaghit. T'eh gra nagh vel Coonceil ny Shirveishee as ymmodee sleih elley ayns Tinvaal as Chris Thomas as David Ashford as fir elley t'eh er loayrt rish geearree agh dy ghoaill ayrn as dy chur er shoh ve reaghit.