Meeryn ass Traa dy Liooar, Jelune 20oo Jerrey Geuree 2025
Ta'n Sheshaght Lhee Ghoaldagh er veeraghey dy vel coardail er ve currit son jantys jeadyssagh liorish fir lhee ta nyn olteynyn j'ee veih 7.00am Jecrean shoh cheet, yn 22 Jerrey Geuree, derrey 7.00am Jeheiney, yn 24 Jerrey Geuree. Agh choud's ta Traa dy Liooar goll er creeley, cha nel reaghys jerrinagh er ve jeant, nee ad stholkey ny dyn ny laghyn shen. Ta'n Sheshaght gra dy vel yn reaghys shoh er jeet er yn oyr dy vel Kiarail Vannin er vailleil dy chur cheb er faill s'cairee ta ny fir lhee soaiaghey jeh. Agh choud's t
Ny laghyn as t'ad stholkey, nee fir lhee gobbraghey 'syn aght t'ad reaghey son Laa ny Nollick, as magh ass shen bee kiarail egin ry gheddyn er nyn son as ta feme oc urree, agh dy bee ymmodee shirveishyn as caglieeyn orroo.
Ta Caairlagh Sheshaght Lhee Ellan Vannin, yn Fer-lhee Prakash Thiagarajan, gra nagh vel mian erbee ec ny fir lhee dy stholkey, as dy ren ad baghtal eh da Kiarail Vannin dy beagh shen yn eiyrtys gyn cheb er faill v'ad soiaghey jeh. T'eh gra dy vel foast traa son cheb dy ve currit roish as dy chur shaghey ny stholkyn shoh. T'eh gra dy vel fir lhee toilchin geddyn faill cairagh son yn obbyr leaghagh vees goll er jannoo oc, as dy vel ny giarragyn ayns fail t'ad er nakin ayns ny jeih bleeaney shoh chaie er jeet dy ve neu-hurralagh. T'eh gra dy nee oyr son ve mollit eh dy vel ny fir lhee 'sy stayd shoh, agh dy nee baghtal eh yn aght dy eaysley y cront, as shen dy chur er-ash daue y faill t'er ve caillt oc.
Ta ny fir lhee er ve shirrey bishaghey 12.6% 'syn aill oc son y vlein argidoil 23-24. Mee ny Nollick, ren 121 fer lhee ass 127 ceau teiy ayns foayr jeh jantys jeadyssagh.
Ta Caairlagh y Heshaght Lhee Ghoaldagh, yn Olloo Philip Banfield, gra dy vel yn Sheshaght Lhee Ghoaldagh ny shassoo rish fir lhee ayns Mannin choud's t'ad reaghey dy stholkey son yn chied cheayrt er dyn rieau. T'eh gra dy vel eh treishteil dy vel Kiarail Vannin fakin cre cho trome as ta'n chooish as jannoo red ennagh dy bieau dy chur cheb er faill gys ny fir lhee oddys geddyn rey rish stholkey as vees freggyrtagh da feeuid y schlei oc ayns cummal seose slaynt as foays yn Ellan.
Agh ta'n Shirveishagh Slaynt as Kiarail y Theay, Claire Christian, gra dy vel shen goll trooid oardagh, as rere shen veagh shen currit roish gys yn Tashtey, agh dy vel y stayd t'ayn, dy vel y chlaare argidoil er ve reaghit son 24-25, as dy vel shen 'sy Lioar Jiarg-bane, as myr shoh dy vel eh ayn hannah.
Ta Bnr Christian gra nagh vel y stayd argidoil son kiarail slaynt er jeet gys ynnyd dy chreoighys, agh ta'n eear Hirveishagh Slaynt as Kiarail y Theay, ren irree ass yn oik shen, Lawrie Hooper, gra dy harrymagh nagh vel eh ayns coardail ree er shen.
---oooOooo---
Ta Slaynt Theay Ellan Vannin er lhunney co-choyrle theayagh er ynnyd eggey y Reiltys dy gheddyn barelyn mychione sleih gyn thie. T'eh shirrey freggyrtyn da 25 feysht mychione y toiggalys oc er y chooish, as vel keeayll chionnit oc j'ee, ny vel ad ayns gaue jeh geddyn keeayll chionnit j'ee.
Ta'n creear briaght vel freggyrtee smooinaghtyn er sleih gyn thie myr doilleeid trome, ny gyn ve ny ghoilleeid er chor erbee; quoi er ta'n currym dy chur-rish; as vel geill dy liooar currit da shirveishyn ta pohlldal sleih gyn thie.
Ta'n creear son arryltee dy ghoaill ayrn ayn as bee ooilley ny freggyrtyn follit. Ta'n date s'jerree dy chur stiagh freggyrt yn 27 Jerrey Geuree, shen dy ghra shiaghtin jiu. Ta'n Reiltys greinnaghey chiarnyn thallooin dy ghoaill ayrn 'sy chreear.
She Madeleine Sayle ta'n Fer Toshee son Slaynt y Phobble, as t'ee gra dy vod caghlaaghyn oyr y ve ayn son sleih dy ve gyn thie, as dy vel eh scanshoil dy gheddyn magh yn aght ta'n theay jeeaghyn er y chooish, 'sy chied ynnyd rere keeayll chionnit erbee oc, dy vod ad feddyn magh tooilley mychione yn aght ta sleih cheet dy ve gyn thie 'syn Ellan. T'ee gra dy bee'n creear currit magh gys chiarnyn thallooin as kiareyderyn aaght.
Ta coipyn pabyr ry gheddyn veih Parteayssyn Foays y Jiass as y Heear as veih lioarlannyn ayns Doolish as Rhumsaa, as ta Madeleine Sayle gra dy vel Slaynt Theay Ellan Vannin jeeaghyn roish dy chlashtyn barelyn veih dy chooilley pheiagh, as dy vel shen femoil son speeideilys y vree trooid yn Ellan.
---oooOooo---
Ta'n Ard Shirveishagh, Alfred Cannan, gra nagh nhegin da'n Ellan cur ersyn hene credjal dy vel dy chooilley chooish goll dy holk liorish jeeraghey ynrican er doilleeidyn, tra t'eh freayll rish ve lajer, fondagh, speeideilagh.
Va Mnr Cannan loayrt ec taghyrt reaghit ec Shamyr Lught-traghtee Ellan Vannin, as t'eh coardail dy vel doolaneyn ayn son shickyrys, as ymmodee cooishyn as feme er freayll rish goaill ayns laue ad, agh nagh lhisagh sleih jarrood dy vel yn aght ta reddyn goll bentyn da'n tarmaynys, tra t'eh goll er towse cosoyley rish cheeraghyn mygeayrt-y-mooin, foddey ny share as foddey ny stroshey, as dy vel feme ain er geiyrt er y chaa dy reayll rish cleayney dellal gys yn Ellan ain, as cur er y tarmaynys ain aase.
---oooOooo---
Ta'n Shirveishagh Gastid Dellal, Tim Johnston, gra dy vel bishaghey 'syn aill sloo, bee bree currit da 'sy vlein shoh, femoil my vees yn Ellan geearree freayll rish cohirrey rish lughtyn-reill elley. Nee'n aill sloo yrjaghey liorish £1.60 s'yn oor dy ve £13.05 per oor ayns daa cheim. Hig yn chied cheim Mee Averil, lesh bishaghey 80p as eisht y nah cheim Jerrey Fouyir, tra nee eh yrjaghey liorish 80p syn oor reesht.
Ta Shamyr Lught-traghtee Ellan Vannin er n'ghra dy lhisagh yn Reiltys smooinaghtyn reesht vel shoh yn traa kiart dy yannoo caghlaa, as dy jig builley trome er shiartanse dy hieyn dellal. Ta'n Shamyr loayrt son ny shlee na 500 thie dellal, goaill stiagh thieyn dellal beggey neu-chrogheydagh 'sy cherrooyn myn-chreck as oltaghey. Ta'n shamyr gra 'sy vlein t'er n'gholl shaghey dy vel shin er nakin kuse dy hieyn dellal beggey neu-chrogheydagh ynnydoil dooney, myr shoh nagh vel ad geearree costys elley vees gyrjaghey as yn baggyrt dy bee startaghyn caillt as thieyn dellal dooney.
Ta'n Shamyr gra dy vel shiartanse dy chostyssyn gollrish son stooghyn aw veih'n Reeriaght Unnaneysit nagh vel smaght ec yn Ellan orroo, agh dy vel reddyn elley gollrish ny rateyn dy aill sloo ny dy aill vioghee, Keesh Tooilley Feeuid, Keesh Cheet Stiagh as paart dy haillaghyn son bree goll er stiurey liorish Reiltys Ellan Vannin.
Shaghey yrjaghey yn aill sloo dy chooney lhieusyn as ta bishaghey 'sy chostys bea jannoo orroo ny smoo, ta'n Shamyr coyrlaghey cur seose ny caglieeyn sloo son eeck keesh, nee cooney lesh obbreeyn as yn faill sinshley oc. Ta'n Shamyr gra dy jinnagh shen cur tooilley argid ayns poggaidyn sleih as jannoo ny sloo yn errey er dellal – as er-lheh er-nyn-son ayns ny kerrooyn myn-chreck as oltaghey, as ta'n builley strimmey orroo ayns ny queig bleeaney t'er n'gholl shaghey.
Ta'n Shamyr gra neesht, my vees ny treealtyssyn dy vishaghey yn aill sloo coardit, dy nee lane-femoil eh son yn Reiltys dy chur er bun saaseyn noa dy phohlldal thieyn dellal dy chooney lhieu caghlaa. T'ee briaght jeh politickeyryn dy hur-smooinaghtyn dy kairailagh vel shoh yn traa kiart dy vishaghey yn aill sloo, ny vel caa dy chur shaghey eh derrey ny s'anmee 'sy vlein.
Agh va Mnr Johnston loayrt ayns chaglym y Hamyr, y chaglym cheddin as va'n Ard Shirveishagh, Mnr Cannon, kionefenish, as t'eh gra dy vel eh toiggal nagh bee ennoil eh lesh ymmodee kerrooyn as dy bee doolane rieugh eh, dy vel eh toiggal shen. Agh t'eh gra, ny sodjey ta shin cumrail shoh, cha nee agh ny smessey nee eh cheet dy ve, as dy vel feme er cooinaghtyn er, myr lught-reill, dy vel shin cohirrey neesht rish lughtyn-reill elley.
Ta Mnr Johnston cheet er Jersey myr sampleyr, raad bee sleih geddyn £13 'syn oor veih'n 1 Mee Averil as dy vel claare argidoil y Reeriaght Unnaneysit fograghey magh £12.21 cheet stiagh ayn yn 1 Jerrey Souree, myr shoh dy vel feme ain goll y raad shen, er-nonney bee mayd faagit ergooil, nagh vel shin cohirreydagh, as eisht dy nee cooish eer s'doillee ee dy hurral ny s'anmee.
'Sy vlein 2021 va dean coardit ec Tinvaal dy beagh yn aill sloo as yn aill vioghee cheet dy ve yn red cheddin, lurg da Tinvaal soiaghey jeh moylley y Ving Reiht er Boghtynys. Ta'n Shirveishagh Tashtee, yn Fer-lhee Alex Allinson, gra, er-lesh, dy vel reiltyssyn chammah's ayns shoh as hoal er chur eab dy feer er goaill ayns laue yn ard-doilleeid jeh'n voghtynys, vel shen trooid reddyn gollrish y glass tree filley bentyn da pensionyn, as cur-lesh seose pensionyn dy eaysley boghtynys pension, as dy vel shen er ve speeideilagh erskyn credjue, ny trooid gobbraghey er faill sloo as bishaghey shen ayns keimyn dy gheddyn rey rish boghtynys, as dy yannoo shickyr dy vel sleih ta gobbraghey cosney faill lioree foddee ad baghey, shaghey neesht ve nyn lhie er cooney cadjin argidoil, as er-lesh dy vel shen feer scanshoil.
Ta'n Fer-lhee Allinson gra, trooid yn obbyr, tra ren obbyr goaill toshiaght er yn aill sloo 'sy Reeriaght Unnaneysit va imneaghyn dy jinnagh eh imman bolgey-argidoil, dy jinnagh eh imman y vee-startaght, agh nagh vel shin er nakin shen, as nagh vel eh credjal dy vel feanish eddyr-ashoonagh erbee ayn dy nee vel shen builley mooar veih bishaghey yn aill sloo, agh dy vel eh foast imnea veih failleyderyn.
Ta'n Fer-lhee Allinson gra, ny vees scanshoil, choud's ta'n aill sloo bishaghey, dy vel shin jeeaghyn neesht er yn stundayrt dy vioys ta shin jerkal rish sleih ta gobbraghey ve abyl dy ghlackey, as shen yn oyr dy vel cur cooidjagh eh lesh yn aill vioghee scanshoil dy liooar. T'eh gra, ny ta'n Reiltys er chowraghey magh neesht lesh yn ogrey shoh, shen dy aa-scrutaghey eaghtyr yn aill vioghee neesht, er yn oyr dy vel mooarane er chaghlaa neayr's 2020 as 2021 tra ren y Commishoon er Boghtynys cur tuarastyl, as dy vel feme er jannoo shickyr dy vel y fys oc er yn aill vioghee jeeragh, agh chammah's shen resoonagh as ry yannoo.
Ta'n Fer-lhee Allinson gra dy vel shin jeeaghyn er ny caghlaaghyn thie dellal t'er ghooney, as dy vel paart jeu er ve sleih cheet dy ve nyn daaue as reaghey nagh jean ad tannaghtyn lesh dellal; son fir elley t'eh er ve y costys jeh cooid as shirveishyn; as traaghyn elley t'eh er ve y cohirrey. Er-lesh dy vel shin dy kinjagh fakin caghlaa ayns reayrt-cheerey y vyn-chreck as yn oltaghey, as dy vel faill son obbreeyn fer jeh ny preayssyn shen, agh dy vel ymmodee fir elley bentyn da freayll y barrant, ymmyrkey y chionneyder, costyssyn bree as bolgey argidoil dy cadjin myr ta shin er nakin cheet dy ve ayn.
Ta'n Fer-lhee Allinson gra, er-lesh, tra ta sleih jeeaghyn er tarmaynys Ellan Vannin ooilley cooidjagh, dy vel foast ain tarmaynys vees breeoil dy liooar, dy vel shappyn noa ain, thieyn dellal noa ain, cheet dy ve foshlit, dy vel mee-startaght cho injil ain as va rieau recortit, as dy vel yn Reiltys freayll arrey er shen kiarailagh dy liooar ec y traa t'ayn, dy vel yn eaghtyr startaghyn follym cho ard as va rieau recortit neesht, as dy vel caghlaays rere yn imbagh ry akin, as er lheh ayns oltaghey as soccar as myn-chreck. T'eh gra dy vel eshyn ard-jerkallagh bentyn da beoyn cadjin y tarmaynys dy jean eh freayll rish ve breeoil as freayll rish ve ry chummal seose goll er y hoshiaght 'sy vlein shoh.
Ta'n Fer-lhee Allinson gra dy vel paart y Reiltys dy chur ablid da thieyn dellal dy yannoo dy mie liorish croo y chymmyltaght kiart, as dy vel shen t'eh dy yannoo bentyn da'n voylley er yn aill sloo vees cheet roish Tinvaal, dy chur argid ayns poggaidyn sleih dy hynnydoil, dy bee shen ny t'ad dy yannoo 'sy chlaare argidoil, cur tooilley argid ayns obbreeyn, ayns lughtyn-thie obbreeyn ayns nyn boggaidyn dy vaarail dy hynnydoil, as ayns rieughid dy yannoo ymmyd jeh paart jeh ny seyraadyn as jeh ny thieyn dellal feer vie er bastal ayns ny ard straid ain.
Agh ta shellooder y Thie Aaght Welbeck ayns Doolish, Michael George, gra dy bunnidagh dy vel yn Reiltys hannah er chur earroo mooar dy liooar jeh thieyn dellal miey ynnydoil ass goaill ayrn, nagh vel ad foast ayn. T'eh gra dy vel eh er paart jeu jannoo ny sloo shirveishyn, as er-lesh, my vees shin freayll rish goll y raad shoh ta shin ayn nish, nagh jean ad agh bwoalley spaeeyn mooarey dy hieyn dellal ynnydoil ass y vargey, as dy vel eh smooinaghtyn nagh beagh shen mie.
Ta Mnr George gra, er-lesh, dy vel daa jeh ny reddyn ta feme er yn Reiltys jannoo, ayns dy feer credjal son shickyrys dy vel eh orroo cooney lesh sleih as faill injil oc, eisht dy vel eh er yn Reiltys bishaghey y cheesh ny smoo, as jeeaghyn er aght ennagh dy yannoo ny sloo ny eeckyssyn son Urryssaght Ashoonagh. T'eh gra dy vel eh er yn Reiltys – nagh shickyr eh? – dy chooney lesh failleyderyn.
---oooOooo---
Ta'n Shirveishagh Gastid Dellal, Mnr Johnston, gra dy vel enn echey er ny doolaneyn fo'n jeadys troggee, lurg chaglym preayssagh rish chaghter ass lieh yn jeadys, Troggal Ellan Vannin. Va tuarastyl jeant ec Troggal Ellan Vannin, jannoo ymmyd jeh barelyn veih creear va jeant ec jerrey ny bleeaney shoh chaie.
Ta Troggal Ellan Vannin cur raue foddee dy jig shaleeyn jeh scaailley mooar dy ve nyn lhie er obbreeyn veih cheumooie jeh'n Ellan. T'eh shirrey red ennagh dy ve jeant chelleeragh dy chummal seose colughtyn as startaghyn ynnydoil lurg y chreear echey mastey conaantyderyn baght, parteayssyn 'sy slouree cooid, as fir oayllee. Ta Caairlagh Troggal Ellan Vannin, Gary Proctor, gra dy vel y feanish coardail rish ny faaueyn va ry chlashtyn veih'n jeadys rish mysh blein.
Ta Mnr Proctor gra dy row ny doilleeidyn cheet dy ve ayn roish Covid, agh eisht va preayssyn er-coontey bolgey argidoil, as dy row caghlaa ayns oardaghyn y Reiltys bentyn da kionnaghey, as eisht haink claare vun-argidoil y cherroo theayagh dy ve foddey ny sloo, as dy row doilleeid neesht lesh yn traa ceaut er shirrey kied phlannal.
Ta Mnr Proctor gra, my vees yn Ellan geearree jeadys troggee breeoil erskyn ny keirdyn dy chooilleeney obbraghyn ayns thieyn ny cummaltee t'ayn, dy nee lane-femoil eh dy vel bree currit da moyllaghyn 'sy tuarastyl, as er-lheh my vees y jeadys dy ve abyl dy livrey ny shaleeyn bun-argidoil cummyssagh 'sy cherroo preevaadjagh as theayagh 'sy traa ry heet.
Ta Mnr Proctor gra, 'sy vargey sthie, dy vel doilleeid lesh y chostys bea, as dy nee baghtal shen er yn oyr dy vel shen jannoo er yn argid ayns poggaidyn sleih, myr shoh dy vel eh jeeaghyn nagh jean rateyn use shareaghey traa erbee dy leah; nagh vel y costys son conney ny share; myr shoh dy vel builley ass shen er y cherroo thie as cummalagh. T'eh gra ayns kione mooar dellal y vargey, as shen ayns rieughid yn ynnyd ayn ta ny shaleeyn mooarey, dy vel yn bun-argid er ny vaarail ec yn Reiltys, as yn leodaghey ayns shen rish blein ny ghaa shoh chaie, er-lesh dy vel shen soilshaghey magh ny eiyrtyssyn jeh shen nish.
Er-lesh Mnr Proctor, liorish shen, dy vel eh cairagh gra dy vel yn jeadys ny lhie dy liooar er obbyr 'sy cherroo preevaadjagh ec y traa t'ayn, as dy vel fys oc dy vel earroo dy skeimyn scanshoil mooar dy liooar ec caghlaaghyn keim 'syn oardagh plannal, as er-lesh, dy beagh kuse jeu shen er jeet gys y vargey, dy jinnagh shen cooney neesht.
Bentyn da plannal, ta Mnr Proctor gra dy vel coloayrtyssyn rish y fo-rheynn plannal er hareaghey dy mooar, dy vel foast palchey dy yannoo lesh shen, agh dy vel kuse jeh ny aghtyn dy hareaghey, son shickyrys myr sampleyr bunnys 'sy yeearree post-phlannal ayn t'ad cooilleeney ny conaantyn, er-lesh dy vel yn aght reiree jeh shen as yn eddyr-insh mychione yn ard shen er hareaghey. Er-lesh dy vel eh doillee son ny planneyryn er yn oyr dy vel caghlaa dy kinjagh – cha nel shen dy ghra policy elley, agh ayns ooilley ny cooishyn ta goll stiagh ayns yeearree phlannal, as er-lheh rish eco-oaylleeagh, lesh raaidyn mooarey.
Ta Mnr Proctor gra dy vel earroo dy leih as feme er loayrt roo rere slattys as dy vel ad ooilley cur stiagh nyn marel, as dy vel doolaneyn ayn bentyn da'n ymmyrkey vees goll er jannoo ec kuse jeu shen, as dy vel feme ersyn clashtyn ymmyrkey co-cheintagh. Agh t'eh gra, dy ve cairagh bentyn da kuse jeu, dy vel sleih as feme orroo loayrt roo ta cur eab er jannoo shen, ec yn un traa as cooilleeney yn obbyr laa oc, myr shoh ta couyr jannoo seose cooish.
Bentyn da colughtyn t'er ghooney hannah, ny ta gra dy vel ad smooinaghtyn er dooney, ta Mnr Proctor gra nagh vel colughtyn vees ry chummal seose dooney. T'eh gra dy vel paart jeu t'er naagail yn Ellan; paart jeu as ta ny parteayssyn hug ad er bun shirrey cheet dy ve nyn daaue, as nagh vel plannyn currit stiagh oc son ny vees cheet nyn jei, ny nagh row ad abyl dy yannoo eh, ny row barrant oc ayns cur stiagh plannyn son ny vees cheet nyn jei; as yn leodaghey cadjin ayns baarail.
Ta Mnr Proctor gra dy vel y kerroo troggee cur stiagh dy mooar, chammah's ayns baarail as vel shen ayns argid cheet stiagh veih keesh ny baarail harrish, vel daanys echey dy ghra, boayrd coontee Tesco nish. T'eh gra myr shoh dy vel shen ayn, agh dy vel eh yn reayrt 'sy traa ry heet vees oyr smoo son imnea: cha nel eh ynrican ny vees goll er baarail nish, she'n barrant ayns ve abyl dy gholl er y hoshiaght.
Bentyn da'n imnea dy beagh yn Ellan ny lhie er obbreeyn veih cheumooie jeh'n Ellan cooilleeney shaleeyn troggee mooarey 'sy traa ry heet, ta Mnr Proctor gra nagh vel shoh ynrican mastey ny conaanteyderyn, dy vel eh y fwirranyn ta cur coyrle er cummey neesht. T'eh gra, mannagh vel ablid speeideilagh ayns cummey 'syn Ellan, nagh bee reih ec yn Reiltys as dy jarroo ec y cherroo preevaadjagh, as ny vees feme er cooinaghtyn er ayns shoh, shen dy vel yn chooid smoo dy heyrlannyn cummey, vel ad nyn seyrnee ny fer erbee jeh ny fir oayllee, vel eh ny seyrnee, t'eh cheet er ny fir MEP, shen dy ghra fir obbrinagh, lectragh, plumberaght, ny jeshtaghteyryn strughtooroil, ny fir choyrlee er costyssyn, dy vel ad ooilley nyn gliaghtaghyn beg dy liooar, fo ny harrish.
Ta Mnr Proctor gra, reesht, dy vel shiartanse dy pharteayssyn hug colught er bun ta mee-arryltagh dy vaih argid ayns sleih as keim oc, as, dy jarroo, lhiassaghey parteayssyn elley, mannagh vel ad fakin erraghyn dy obbyr dy yannoo shen. T'eh gra dy daink eh er sleih as keim oc ayns shen, as dy nee scanshoil eh, my vees shin dy ghreinnaghey sleih as keim oc dy heet back gys yn Ellan, dy vel feme oc er shaleeyn anaasagh, ny dy vel feme oc er shalee vees mooar dy liooar, dy ve abyl dy shliee ny schleiyn oc as son ny mentoryn dy ve ayn. T'eh gra reesht dy vel eh cheet back gys y reayrt er oie lesh ve nyn gliaghaghtyn beggey, my vees shaleeyn as t'ad currit dy uirraghtyn orroo, ny ta cumrail orroo son oyr ennagh, nagh vel eh cur da ny cliaghtaghyn yn ablid, dy vod ad reirey ny oardaghyn as dy reirey failley rere shen.
Ta Mnr Proctor gra, bentyn da ny conaanteyderyn, dy vel earroo beg dy ard-chonaanteyderyn 'syn Ellan ta cur obbyr sheese gys fo-chonaanteyderyn, as reesht dy vel shin er nakin ec y chooid sloo nane jeusyn shen goll ersooyl veih'n Ellan ec y traa t'ayn. T'eh gra, mannagh vel shin fakin ayrn shen y jeadys bishaghey, cha bee reih ayn agh dy chur-lesh conaanteyderyn noal.
Ta'n Shirveishagh Gastid Dellal, Mnr Johnston, gra dy vel kuse dy skeimyn mooar dy liooar goll er lhiassaghey, agh nagh vel kiart er ve jeant aarloo foast, jeh'n lheid as Scoill Ard Cashtal Rushen. T'eh gra dy jean yn Shirveishagh Tashtee cur-lesh treealtys gys Tinvaal son kuse dy skeimyn bun-argidoil, skeimyn vees mooar dy liooar, myr shoh dy vel reddyn fo raad, agh t'eh gra dy nee scanshoil eh neesht dy vel yn Reiltys gobbraghey rish y cherroo preevaadjagh as jannoo shickyr dy vel shin greinnaghey y Rheynn ayns baih argid as baih argid preevaadjagh, as dy vel ad er n'yannoo shen trooid yn lheid as yn skeim son bun-troggalys yn Ellan, ayn ta shin er nakin mysh £90m dy argid baiht dy preevaadjagh, currit gys shareaghey y bun-troggalys 'syn Ellan.
Ta Mnr Johnston gra dy vel mooarane goll er 'sy cherroo, as fys echey dy vel ymmodee jeh ny keirdee beggey feer tarroogh, agh dy vel paart dy ghoolaneyn ayn, as dy vel yn Rheynn cur enn er shen. T'eh gra dy kinjagh dy bee'n stayd ayn as ta cremmey goll er jannoo mychione eddyr-insh, as dy vel eh toiggal shen, as er-lesh dy vel shen fer jeh ny bun-eieyn jeh Troggal Ellan Vannin ve ayns shen, as shen, tra t'ad clashtyn dy vel doilleeid ayn, dy vel cooishyn 'sy cherroo, shen dy bollagh yn oyr ta Troggal Ellan Vannin goll magh as cummal ny coloayrtyssyn shen rish y jeadys, as cur cooidjagh shen, as cur-lesh shin back dauesyn 'sy Reiltys, as ve abyl dy loayrt my-e-chione, as dy vel shen ny t'ad dy yannoo.
Ta sleih er n'ghra dy by vie lhieu fakin Co-chorp Lhiassee Vannin cur barrant dy jean ad ymmyd jeh conaanteyderyn as kiaddeyderyn ynnydoil, as ta Mnr Johnston gra son shickyrys dy vel shen paart jeh'n varel t'ad er n'gheddyn veih Troggal Ellan Vannin tra va'n chaglym oc, as myr v'eh gra, dy vel shiartanse dy cherrooyn feer tarroogh, paart jeh ny keirdee beggey feer tarroogh, agh dy nee baghtal eh dy vel doilleeidyn bentyn da ny seyrnee as baghteryn mooads as ardyn elley, as er-lhiam dy vel feme er yn Reiltys cur geill da shen, as jannoo shickyr dy vel ad jannoo ny vees ry yannoo oc dy chooney lesh as dy phohlldal shen, as dy vel eh toiggal shen. Er-lesh dy vel feme er toiggal y doilleeid dy mennick roish my vod ad jannoo veg my-e-chione, myr shoh dy nee scanshoil eh dy vel ad geaishtagh, as veih cheu Co-chorp Lhiassee Vannin, dy vel eh paart feer scanshoil jeh'n reayrt s'lhea.
Ta Mnr Johnston gra dy vel y Skeim son Bun-troggalys Vannin jeeaghyn dy mooar er ynnydyn preevaadjagh as t'ad er ve tannaghtyn gyn veg ve jeant rish ymmodee bleeantyn, as dy vel Co-chorp Lhiassee Vannin jeeaghyn dy mooar er ynnydyn as s'lesh y theay ad as yn aght fod mayd aa-ghientyn ad as cur-lesh ad back ayns ymmyd reesht, vel eh son ymmyd cummalagh ny son oyr elley, myr shoh dy vel eh ooilley jannoo seose ayrn jeh reayrt smoo jeh shareaghey y bun-troggalys ain.
Lesh yn chaghteraght veih Troggal Ellan Vannin dy vel y stayd 'sy cherroo troggee trome dy liooar, as ta Mnr Johnston gra, er-lesh, dy vel feme er jeeaghyn er ny barelyn oc feer trome-chooishagh, as dy vel ad, as dy vel feme er jannoo shickyr dy vel ny barelyn shen cheet back ayns ny plannyn oc son y traa ry heet.
---oooOooo---
Ren y Possan Loayrt Magh er Dyslexia cur feanish roish Bing Reiht Tinvaal y chiaghtin shoh chaie, lurg da cur er bun aghin dy chur eam son aghtyn share dy chur enn er y stayd as son couyryn share er-nyn-son as ta dyslexia jannoo orroo. Ta'n Possan gra dy lhisagh tooilley cooney ve currit ayns ny scoillyn.
Ta Peter Washington oltey y phossan, as t'eh cheet er yn earroo dy phaitchyn as va smaght currit orroo, freillt stiagh ayn er yn oyr nagh row nyn arnane jeant oc, as nagh vel eh er yn oyr nagh vod ad jannoo yn arnane oc, nagh vel eh er yn oyr nagh vel ad jannoo yn arnane oc. T'eh gra dy vel eh ny fir ynsee, yn aght ta ny fir ynsee fakin eh, nagh vel ad toiggal yn aght ta neuro-chaghlaays gobbraghey.
---oooOooo---
Ta'n Shirveishagh Tashtee, yn Fer-lhee Allinson, gra dy vel yn Tashtey soiaghey jeh dy nee cairagh eh cur kied chellveeish nastee da dy chooilley pheiagh ny shinney na 75 blein dy eash eer mannagh vel ad reihalagh son Cooney lesh Cheet Stiagh. Agh t'eh gra, myr ta fys ec Coonceil ny Shirveishee neesht, foddee dy vod sleih jeeaghyn er myr mee-chiart bentyn da tro coadit rere eash.
Ren Oltey yn Chiare as Feed son Rhumsaa, Lawrie Hooper, briaght jeh row sess erbee jeant jeh'n vuilley er cormid ass shoh, as ren yn Fer-lhee Allinson feeraghey nagh row lheid y hess jeant ec yn Tashtey, agh dy row yn Tashtey er chur geill da sess jeant ec y BBC Mean Souree 2019. T'eh gra dy vel y reaghys freggyrtagh da coardail liorish olteynyn Tinvaal 2016 dy lhisagh dy chooilley chummaltagh ny shinney na 75 blein dy eash geddyn kied chellveeish nastee.
---oooOooo---
Ta'n colught Thieyn Oast Okell gra dy row freayll Cheu y Phurt ayns Doolish son cosheeyn ynrican ny keayrtyn nurree feer vie son colughtyn 'syn ard, as dy ren eh cur caaghyn son co-obbraghey, as t'eh gra dy by vie lesh fakin y skeim, lesh yn ard dooint son traaght ayns imbagh ny Ratchyn TT as ec ny king shiaghteeyn 'sy tourey, goll er.
Ta Stiureyder Reiree Thieyn Oast Okell, Jason Rowe, gra dy row eh mie 'sy tourey shoh chaie, dy row ymmodee taghyrtyn anaasagh oc, er yn oyr dy row y bluggan coshey oc, va'n chied phrowalys, row ablid oc freayll rick er yn sleih, as eisht hie ad gys y Feailley Blues, as eshyn smooinaghtyn dy row eh fer jeu v'eh goaill smoo taitnys jeh lesh caghlaaghyn sorch dy leih ayn, as dy dug ad jerrey er lesh feailley yn ouyir, va ny smoo son lughtyn-thie, myr shoh feer vie son yn dellal oc, as caghlaaghyn eiyrtys jeh cagh.
Er-lesh Mnr Rowe dy beagh feer vie dy beagh ynnyd meanagh ayn, as er-lesh dy vel Cheu y Phurt dy kinjagh fer mie son ard valley erbee ayns rieughid, myr shoh dy vel ad er ve co-obbraghey dy creoi lesh y Cho-chorp dy yannoo shickyr dy vod ad reirey eh dy kiart.
Ta Chris Walmsley reireyder cadjin y Thie Oast British, as t'eh gra dy vel eh son shickyrys ayns foayr jeh'n eie, er yn oyr dy ren eh cur-lesh cheeadyn dy leih ta baghey mygeayrt yn ard, as dy row ad abyl dy chur ny Euro-yn er y scape, va feailley yn ouyir oc, va taghyrt jazz, ny snagchiaull, as dy vel eh credjal dy ren ooilley jeh goll dy mie.
Ta Coonceil Ghoolish jeeaghyn er jannoo prowalys jeh freayll yn ard son cosheeyn ynrican ooilley yn traa, shaghey jus ec ny king shiaghteeyn. Ta Mnr Rowe gra, er-lesh foddee dy beagh caa ayns shen, agh dy nee baghtal eh dy vel eh ny lhie er yn earish heese ayns shoh as dy beagh feme oc jeeaghyn er baih tooilley argid, myr shoh dy vel eh orroo fakin ny vees jeant ec y Cho-chorp maghey shoh.
Ta Chris Walmsley gra, son shickyrys 'sy tourey, lesh palchey dy leih shooyl mygeayrt, goll mygeayrt, dy vel eh cooney dy mooar; ayns y gheurey, s'cosoylagh eh cha nel wheesh, nagh vel monney argid veih sleih goll shaghey heese ayns shoh, lesh yn earish ve cho olk.
Nee'n Coonceil cummal co-choyrle rish thieyn dellal, rish custymeyryn as rish cummaltee 'syn ard roish my vees yn vreid tayrnit veih plannyn jerrinagh.
Ta'n Coonceilagh Devon Watson gra, ny by vie lhieu jannoo, shen dy yannoo ymmyd jeh ymmyrkey jannoo prowalys as jannoo ymmyd. T'eh gra, feer vennick, dy vel shaleeyn y Reiltys siyrraghey er y hoshiaght, nagh vel ad shirrey coyrle veih sleih, nagh vel ad dy kinjagh cur geill da'n stayd ynnydoil, myr shoh dy vel ad geearree goaill ayrn ayns co-choyrle lhean rish ny colughtyn, co-choyrle lhean rish ymmyderyn ny colughtyn shoh, as goaill shoh stiagh ayns ny plannyn oc son y traa ry heet son yn ard valley, as cur eab er reddyn, jannoo prowalys dy gheddyn magh ny vees gobbraghey as ny nagh vel. T'eh gra nagh vel eh feeu goll er y hoshiaght lesh red ennagh nagh vel smooinit er agh ayns paart, as er-lesh dy vel eh feeu glackey caaghyn choud's t'ad cheet dy ve ayn, myr shoh dy jean shoh taghyrt, agh dy bee ad er nyn dwoaie.
Ta Leeideilagh y Choonceil, yn Coonceilagh Clare Wells, gra, fy yerrey, dy vel ad ayns shen dy chummal seose ny colughtyn, as yn sleih ta cummal as ta gobbraghey ayns Doolish, as my vees ad abyl dy yannoo shen ayns aght vees jannoo seose paart jeh'n chooish, dy vod sleih jannoo ymmyd jeh sorch erbee dy red dy hroailt mygeayrt, as ayns aght sheshoil neesht, shooyl mygeayrt yn ard-valley, eisht dy lhisagh ad ve jannoo shen. Bentyn da Cheu y Phurt, t'ee gra dy vel ad er ghooney y raad, as dy vel eh er n'gholl feer vie, as dy row paart dy haghyrtyn yindyssagh ayns shen, myr shoh dy vel ad geearree sheeyney magh shen as jeeaghyn er aghtyn foddee ad jannoo eh ny share son y cho-voodeeys, agh son ny colughtyn ta heese ayns shen neesht, dy vod ad goaill toshiaght neesht ayns baih argid ayns yn ard mygeayrt-y-moo.
Ta'n Coonceilagh Wells gra, my vees raaidyn foshlit ny keayrtyn as dooint keayrtyn elley, cha nee ynrican vel shen doillee son y theay dy hoiggal cuin vees eh taghyrt, agh dy vel eh neesht foddee red ennagh ayn nagh vel ny colughtyn geearree baih argid, er yn oyr dy vel feme orroo ve abyl dy ghleashaghey cre erbee t'ad er vaih argid ayn. T'ee gra dy vel y nah cheim ayns ny vees feme er jannoo nish, shen dy yeeaghyn er dooney eh dy beayn, dy vod ny colughtyn baih argid ayns ny t'oc. T'ee gra dy vel feme orroo goaill tastey jeh'n eiyrtys er colughtyn elley heese ayns shen, ta nyn lhie eer sleih gimman gys y voayl ta feme oc goll; dy vel keeill heese ayns shen, as dy vel ad goaill tastey jeh shen, as dy vel adsyn paart jeh ny reddyn nee ad jeeaghyn er, agh dy vel shoh ayns rieughid y nah cheim ayns yn ard-vian oc dy yannoo ard eh vees seyr veih carbid.
---oooOooo---
Nee Barrantee Connaghyn bishaghey yn rate dy cheesh valjagh 'sy vlein argidoil shoh cheet liorish 4% gys 431 ping 'sy phunt. Ta'n oltey vees leeideil er cooishyn argidoil, Anthony Allen, gra dy vel shoh er-coontey preayssyn mooie veih shiartanse jeh ny shirveishyn lane-femoil t'ad kionnaghey, myr sampleyr yn urryssaght. T'eh gra dy vel costyssyn elley t'er vishaghey currit orroo liorish y reiltys meanagh as nagh vel smaght erbee orroo. T'eh gra dy row eh er ny Barrantee cur stiagh towse dy argid dy eeck son ny reihyssyn da ny lughtyn-reill ynnydoil yn 24 Mee Averil mleeaney, 2025, myr shoh t'ad er chur towse dy argid dy eeck son shen.
Ta Mnr Allen gra, ec y traa shoh nagh vel fys oc bee reihys ny dyn, bee reihys as cohirrey ayn, agh dy vel yn aght kiart dy gholl er y hoshiaght, shen dy chur towse 'sy chlaare argidoil, as t'eh treishteil dy bee reihys oc.
Ta Mnr Allen gra dy vel ny reddyn cowreydagh son ceau argid goaill stiagh jannoo rere yn date stoo bog bentyn da'n cheesh valjagh hene; dy vel oc tooilley obbyr ayns reirey as cummal seose biljyn; dy vel oc cullee cloie noa son close cloie; dorrys noa son garreish traghtee; dy vel shaleeyn oc son soilshaghyn straiddey ayns caghlaaghyn boayl cheusthie jeh'n lught-reill. T'eh gra, son ooilley ny oyryn shen, chammah's baih argid ayns ny couyryn oc as ayns y wirran hene, as reiltys mie, lesh paart dy neu-arryltys dy vel eh orroo gyrjaghey ny rateyn dy ghoaill stiagh ooilley jeusyn.
---oooOooo---
Ta troddan er ve lhunnit ec Treisht Bea-feie Vannin dy ghreinnaghey sleih dy Yannoo Reamys son Najoor, as dy yannoo red ennagh dy chooney lesh bio-chaghlaays. Ta'n Treisht shirrey er sleih dy chaghlaa ardyn cheumooie jeh ny thieyn oc – as 'sy cho-voodeeys s'lhea – dy ve kemmyrkyn son bea-feie.
Ta Ard Sheckter yn Treisht, Leigh Morris, gra dy vel cooney lesh cur back najoor ayns breeaghyn vees goll er leeideil ec y cho-voodeeys hene jannoo seose ard dean son yn Treisht, as dy vel eh credjal dy feer dy vod dy chooilley er er-lheh jannoo red ennagh dy chooney lesh. T'eh gra dy vel yn Treisht geearree bishaghey cassanyn son bea-feie as moggylyn dy chur back najoor dy vod bea-feie breh, troailt, fassaghey as goaill fastee trooid yn Ellan.
Ta Mnr Morris gra dy vel feanish cheet ny smoo as ny smoo dy vod ynnydyn glassey as bio-chaghlaays ayns buill ta sleih baghey as gobbraghey cur builley jarrooagh er slaynt corpagh as inchynagh sleih. T'eh gra dy by vie lesh yn Treisht cur trimmid er as dy yannoo ard eailley jeh cre cho scanshoil ta cochianglys rish najoor ayns nyn mea laaoil son y foays ain. T'eh gra veih kishtey beg ec uinnag vees cummal seose beishteigyn ta garraghey pollen gys gareaghyn mooarey y cho-voodeeys, dy vel dagh red jannoo seose caghlaa son bea-feie as dy voddagh eh caghlaa y vea ocsyn ta goaill ayrn.
Ta'n troddan goll er janno ec Treisht Bea-feie Vannin lesh cooney veih'n cholught Ørsted, as ta'n Ard er oayllee er bio-chaghlaays da'n cholught, Samir Whitaker, gra dy vel Ørsted currit da jannoo caghlaa jarrooagh 'sy traa liauyr son yn sleih as y chymmyltaght ayns ny buill t'eh gobbraghey. T'ee gra dy vel y colught toiggal y scansh jeh'n cho-voodeeys, as dy vel y troddan shoh soilshaghey magh yn aght fod mayd ooilley cheet cooidjagh as cur stiagh ayns traa ry heet vees ny s'glassey as smoo ry chummal seose son Ellan Vannin.
