Meeryn ass Traa dy Liooar, Jelune 18oo Mee Houney 2024
Jemayrt yn 19 Mee Houney, hig toshiaght er teiy dy gheddyn magh barel fir lhee er jantys jeadyssyagh bentyn da'n argane oc er faill. Bee'n teiy foshlit derrey Jesarn yn 23 Mee Houney Ren yn Sheshaght Lhee Ghoaldagh fograghey magh y vee shoh chaie dy jinnagh ee cur y chooish roee son teih, choud's t'ee shirrey bishaghey 12.6% son y vlein argidoil 2023-24.
Ta Caairlagh Coonceil y Heshaght Lhee Ghoaldagh, yn Olloo Philip Banfield, er n'ghra dy vel eh er chlashtyn veih fir-lhee ayns Ellan Vannin as wheesh t'ad tar-mestit, dy vel ad sheeyn magh rour as nagh vel ad cosney argid dy liooar. T'eh gra dy vel fir-lhee chummalagh as fir-lhee choyrlee as fir-lhee er-lheh as son cooishyn er-lheh er n'yannoo red ennagh dy speeideilagh as dy vel ad er n'ghoaill toshiaght er cur er-ash y feeuid va caillt jeh'n aill oc son yn obbyr t'ad dy yannoo. T'eh gra dy vel fir-lhee 'syn Ellan toilchin yn red cheddin, as dy vel yn Sheshaght shassoo aarloo dy phohlldal fir-lhee 'syn Ellan ayns caggey son enn cooie er ny schleiyn as oaylleeaght oc.
Dinsh Ard Sheckter Kiarail Vannin, Teresa Cope, da Radio Vannin er y gherrid nagh row Kiarail Vannin eer faggys da reaghey yn argane er faill rish yn Sheshaght Lhee Ghoaldagh. Ta Kiarail Vannin gra, neayr's v'ee currit er bun Mee Averil 2021, dy row ee er leeideil ayns barganaghyn bentyn da faill ny fir-lhee as ny feeackleyryn, as dy vel ee er chur roish ny chebbyn shoh 'sy traa shen :-
3% son y vlein argidoil 2021-22 (er ny hoiaghey jeh liorish yn Cheshaght);
6% + £1,000son y vlein argidgoi 2022-23 (er ny hoiaghey jeh liorish yn Cheshaght);
6% son y vlein argidoil 2023-24 (er ny yiooldey liorish yn Cheshaght); as
4% son y vlein argidoil 2024-25 (er ny yiooldey liorish yn Cheshaght).
---oooOooo---
As ta co-choyrle noa goll er jannoo mychione faill son boandyryn. Ta creear goll er jannoo liorish Colleish Reeoil y Voandyrys mastey olteynyn ta gobbraghey da Kiarail Vannin mychione cheb son bishaghey 4% son 2024-25. Bee'n chreear jeant ayns yn daa hiaghtin shoh cheet. Ta'n cheb veih'n 1 Mee Averil mleeaney.
Ta Stiureyder Ardjynagh Colleish Reeoil y Voandyrys son Hostyn Heear-hwoaie, Estephanie Dunn, gra dy vel ee greinnaghey whilleen oltey as vees possible dy cheu teiy 'sy chreear cho leah's t'ad geddyn y kianglys. T'eh gra nagh vel agh shoh yn aght foddee ad soilshaghey magh lajerys ennaghtyn ny boandyryn mychione yn aght t'eh jeeaghyn daue dy vel Kiarail Vannin as Reiltys Vannin cur feeuid orroo. T'ee gra nagh vel ee coyrlaghey da boandyryn yn aght lhisagh ad ceau teiy, agh briaght jeu dy cheau teiy. T'ee gra dy vel eh son olteynyn vel ad smooinaghtyn dy vel y cheb ry hoiaghey jeh ny dyn.
T'ee gra dy vel y Cholleish boirit reesht nagh vel y cheb goaill stiagh faill son ooryn jeant ec sleih t'er naagail Kiarail Vannin hannah ayns ny meeaghyn neayr's lhisagh y cheb er ve jeant, as dy vel ad er chur doolane fo Kiarail Vannin reesht er y chooish. T'ee gra, adsyn t'er chooilleeney ny ooryn shen, dy vel ad toilchin y faill cooie daue.
Ta'n creear coyrleydagh foshlit nish as nee ee tannaghtyn foshlit derrey munlaa, Jerdein yn 28 Mee Houney.
---oooOooo---
Ayns soie yn Chiare as Feed Jemayrt shoh chaie, yn 12 Mee Houney, va feyshtyn er yn Ard Shirveishagh, Alfred Cannan, reesht mychione ceau rour Kiarail Vannin as mychione giarraghyn ayns shirveishyn 'sy strane toshee veagh jannoo er surransee, dy yannoo shickyr dy vel Kiarail Vannin cheet gys jerrey ny bleeaney argidoil shoh foast cheusthie jeh'n chlaare argidoil eck.
Va sarey currit da Kiarail Vannin liorish Coonceil ny Shirveishee mysh kegeesh er dy henney nagh row ee dy ghiarrey shirveishyn yinnagh dy jeeragh er surransee, agh dy row eh urree spaarail argid ayns aghtyn elley. Ta Mnr Cannan gra dy vel smooinaghtyn Coonceil ny Shirveishee feer chleeir, dy jean ad tannaghtyn lesh livrey shirveishyn 'sy strane toshee gys shirveishee da surransee, cur enn er, dy jarroo, trimmid y cheau rour. T'eh gra dy vel feme er cur stiagh ayn kuse dy haaseyn dy chur eab er kiartaghey y stayd shoh, fakin y builley jeh er y stayd ain 'sy traa sodjey bentyn da ny tashtaghyn ain dy argid freillt as ablid dy ve ry chummal seose ayns aght argidoil goll er nyn doshiaght gys y traa ry heet.
Ta Mnr Cannan gra, my vees Kiarail Vannin feddyn magh dy vod ee feddyn aghtyn smoo fondagh cheusthie jeh shen, eisht dy lhisagh ad shen y yannoo. T'eh gra dy vel ee ny sheshaght ta gobbraghey scarrit veih'n Reiltys, as nagh vel ad agh cur roish y nhee, dy vel ad er jeeraghey ard-hoilshey er kuse dy hirveishyn t'ad livrey ec y traa t'ayn, as dy vel ad credjal dy voddagh ad jannoo ny sloo ad ny scuirr vouseyn, agh nagh ren Coonceil ny Shirveishee pohlldal shen. T'eh gra, my vees saaseyn dy yannoo fondagh bentyn da ny obbraghyn shen eisht dy lhisagh ad dy jarroo jeeaghyn dy gheddyn ad.
Ec y traa cheddin ta'n Shirveishagh Tashtee, yn Fer-lhee Alex Allinson, gra reesht dy nee feer neu-lickley eh dy bee possible eh dy chur ayns ynnyd jeh caghlaa ny bleeaney shoh chaie ayns rate syrjey y cheesh cheet stiagh lesh tailley son yn Shirveish Claynt Ashoonagh myr ayrn jeh'n chlaare argidoil son y nah vlein. T'eh gra dy row eh fogrit magh Toshiaght Arree mleeaney dy row y chlaare argidoil goaill stiagh reaghys dy ve currit da bishaghey rate syrjey y cheesh cheet stiagh son y vlein shoh veih 20% gys 22%, freayll er-lheh yn cheet stiagh elley shoh dy chummal seose yn Shirveish Claynt Ashoonagh ain, as eisht dy ronsaghey cur roish tailley noa son yn Shirveish Claynt Ashoonagh, oddys cheet stiagh ayns ynnyd jeh'n vishaghey shoh 'sy rate syrjey dy cheesh cheet stiagh, dy leeideil gys aght smoo cairagh er-nyn-son ooilley 'sy cho-voodeeys ain dy chooney dy chur argid son shirveish y chiarail slaynt ta shin ooilley nyn lhie er.
Ta'n Fer-lhee Allinson gra, geiyrt er yn yss s'noa hug eh er y stayd argidoil 'sy vee shoh chaie ayns soie Tinvaal, dy ren eh feeraghey da'n whaiyl shen dy vel y plan shoh foast fosyn, agh dy vel feme er tooilley obbyr rish edyr yn Tashtey as yn Reiltys s'lhea dy livrey saase dy chur argid vees smoo fondagh as ry chummal seose. T'eh gra dy vel yn Tashtey freayll rish ronsaghey cur roish tailley noa son yn Shirveish Claynt Ashoonagh mleeaney, as dy vel eh er jeet dy ve baghtal dy vel eh smoo cramp na va sleih smooinaghtyn ec y toshiaght.
Ta'n Fer-lhee Allinson gra, dy insh yn irriney, dy beagh tailley son yn Shirveish Claynt Ashoonagh ny keesh noa. T'eh gra dy nee ymmyrchagh eh dy vel ad gobbraghey dy kiarailagh dy yannoo shickyr dy vel caghlaaghyn erbee da'n choarys keesh sur-smooinit er dy kiart, dy vel buillaghyn erbee oolit dy kiart, as dy vel lheid ny caghlaaghyn cooneydagh ayns cur yn argid cheet stiagh ta Slaynt as Kiarail y Theay feme edyr nish as 'sy traa ry heet.
---oooOooo---
Ta eear Hirveishagh, va Oltey yn Chiare as Feed son Doolish Hiar, Chris Robertshaw, gra dy lhisagh yn Reiltys t'ayn nish gynsaghey veih eear olteynyn yn Chiare as Feed as gobbraghey dy yannoo corrym coontyssyn yn Ellan.
Ta Mnr Robertshaw gra, ec y traa ghow eshyn toshiaght er obbyr dy anmagh ayns ny 1960yn, dy row Olteynyn yn Chiare as Feed cur-lesh stiagh 'sy pholitickaght y cheeayll chionnit oc 'sy theihll dellal, as dy ren ad job mie, agh ayns rieughid, harrish ny bleeantyn, dy vel shin er jeet dy ve ny s'buiggey as ny s'buiggey, as dy vel argid aashagh er lhiggey da'n Reiltys dy heet dy ve ny smoo, as y geill echey tayrnit ersooyl veih ny cooishyn ard-scanshoil. T'eh gra nish dy vel shin cheet back gys ny bun-chooishyn toshee, nagh vel shin baghey cheusthie jeh'n argid vees ry gheddyn ain, as yn aght oddys mayd shen y yannoo.
---oooOooo---
Ta'n Shirveishagh Tashtee, yn Fer-lhee Alex Allinson, gra dy vel yn traa er jeet dy ghoaill toshiaght er jannoo reaghyssyn dy yannoo shickyr nagh jean tashtey yn Ellan son pensionyn cheet dy ve follym. Ta tuarastyl clouit nurree jannoo faaishnys dy beagh tashtey yn Urryssaght Ashoonagh follym cho leah as 2047 mannagh caghlaaghyn jeant.
Neayr's va'n faaishnys clouit, ta'n Tashtey er ve shirrey saaseyn dy yannoo shickyr dy vel yn tashtey tannaghtyn ayn 'sy traa sodjey, as nee'n Fer-lhee Allinson cur docmand roish Tinvaal laa ny vairagh, as ta reihyn goaill stiagh geddyn rey rish y ghlass tree filley. Ta'n Fer-lhee Allinson cur raaue nagh nee reih eh, jannoo veg.
Ta'n Fer-lhee Allinson gra dy jean yn tashtey dy ve follym, as dy vel yn traa dy jig eh dy ve follym cheet dy ve ny s'girrey, ny s'niessey as ny s'niessey, as dy vel feme ain er jannoo red ennagh mychione shoh. T'eh gra dy vel shoh soit er yn tuarastyl va clouit as currit roish olteynyn Tinvaal nurree, as dy vel ad er cheau yn traa eddyr eisht as nish jeeaghyn er ny caghlaaghyn reih.
Ta'n Fer-lhee Allinson gra, ny t'ad er n'ghra neesht 'sy tuarastyl shoh, dy jean eshyn cheet back lesh tuarastyl elley roish y chlaare argidoil 'sy vlein shoh cheet, as eisht dy jean ad goll er lesh y choloayrtys shen 'sy chlaare argidoil 'sy vlein shoh cheet. T'eh gra dy vel eh er n'ghra rish traa dy liooar dy vel feme ain er goaill toshiaght er ny foddee sleih fakin dy ve reaghyssyn doillee, agh ayns rieughid dy vel ad, rere y varel echey, ny reaghyssyn kiart, as dy by vie lesh jannoo shickyr dy vel adsyn goll er soilshaghey magh as goll er toiggal, as er nyn soiaghey jeh liorish olteynyn elley Tinvaal.
---oooOooo---
Ta olteynyn y heshaght cheirdey Unite er n'yiooldey cheb liorish y Varrantys er Shirveishyn Theayagh son dellal harrish three bleeaney er faill. Shoh yn trass cheb t'er ve jiooldit ec olteynyn. Liorish y cheb shoh, veagh bishaghey 4% ayns faill 'sy vlein argidoil shoh, lesh bishaghey 2.5% 'sy vlein shoh cheet, as eisht bishaghey 2% 'sy trass vlein.
Ta'n cheb cheddin goll er sur-smooinaghtyn er liorish olteynyn y heshaght cheirdey Prospect, vees ny chaghter ass-lieh obbreeyn ny shirveishyn theayagh.
Ta Unite gra dy vel eh fuirraghtyn nish er chaglym rish y Varrantys dy chur er y hoshiaght y choloayrtys eck er faill.
---oooOooo---
Ta Oltey yn Chiare as Feed son Doolish Hwoaie, David Ashford, shirrey er Tinvaal dy chur er bun bing reiht dy hur-smooinaghtyn reesht er baih argid ayns jannoo filmyn 'syn Ellan.
Va aghin currit stiagh ayn ec bun Cronk Keeill Eoin y 5 Jerrey Souree mleeaney liorish James George Hargreaves, ta cheet er skeim as £20 millioon currit dy chooney dy yannoo filmyn as soilsheenyn ayns shoh 'syn Ellan. Ta Mnr Hargreaves cheet ersyn hene myr fer profeshoonagh 'sy cherroo eunysseyrys rish ny sodjey na 50 blein as keeayll chionnit echey jeh kiaull, chellveeish, jannoo filmyn as cur filmyn er nyn doshiaght. T'eh ny Stiureyder jeh bree noa, Feailley Film Eddyr-Ashoonagh Ellan Vannin.
Ren yn Reiltys scuirr veih baih argid 'sy cherroo shoh kuse dy vleeantyn er dy henney, as imnea dy row £26 millioon caillt echey. Agh ta Mnr Hargreaves gra dy vel gennid dy vroddyn argidoil femoil dy ghreinnaghey sleih dy yannoo filmyn 'syn Ellan vees soilshaghey magh yn Ellan as y cultoor echey, as ta jeeraghey ard-soilshey er cowraghyn thallooin jeusyn ta sleih coontey mooar.
Ta Mnr Hargreaves gra dy lhisagh yn Ellan jeeraghey er cur er y hoshiaght filmyn, shaghey jannoo filmyn hene, lesh sleih gobbraghey er cheu y vargee jeh'n jeadys film abyl ayns rieughid dy heet dy ve cochianglt rish cur er y hoshiaght filmyn, cha nee ynrican ayns Ellan Vannin agh harrish y theihll, as er-lheh ayns ny Steatyn Unnaneysit. T'eh gra dy jean shen cleayney enmyn feer vie er enn gys yn Ellan, as dy jarroo dy vel shalee oc er t'ad gobbraghey as hannah ta actor t'er chosney daa Oscar goaill ayrn ayn ny cochianglt rish. T'eh gra, ny yeih shen, nagh vel ad son jannoo y film ayns shoh, as dy vel eh skeeal yn Ellan nagh vel seyrsnyssyn veih keesh ayn ny broddyn cleaynee dy yannoo shen.
Ta Mnr Hargreaves gra dy vel eh geearree fakin choud's ta shin dy gholl er nyn doshiaght, dy vel broddyn cleaynee ayn, as dy vel y barel echey ayns rieughid cur er bun aght aghtal cummeydagh dy chleayney sleih gyn coayl argid. T'eh gra dy vel shen skeim cur barrant er eeasaght son cur er y hoshiaght filmyn, cha nee son jannoo filmyn. T'eh gra dy nee'n marran eh va jeant, shen dy dug Ellan Vannin argid stiagh ayns jannoo filmyn nagh row currit er y hoshiaght fy yerrey, as myr dooyrt P C Barnum, dy ren red quaagh taghyrt tra nagh vel sleih cur er y hoshiaght – veg.
Ta Mnr Hargreaves gra dy vel speeideilys faagail leeidyn, as t'eh cheet er Barbie myr sampleyr, as fys ec dy chooilley pheiagh er Barbie, row ad er nakin y film ny dyn, dy ren eh costal $145 millioon dy yannoo, agh dy row y chlaare argidoil son cur er y hoshiaght y film $150 millioon, myr shoh t'eh coyrlaghey gyn cur argid stiagh ayns jannoo, dy jean jeantee dy kinjagh feddyn argid dy yannoo ny filmyn oc, agh nagh jean ad dy kinjagh feddyn argid dy chur er y hoshiaght y film oc tra t'eh jeant oc.
Lesh Mnr Ashford nish troggal seose aghin Mnr Hargreaves er y chooish shoh, t'eh gra, er-lesh ny vees scanshoil, shen dy vel shin jeeaghyn er y jeadys film, as ny foddee dy jarroo cheet magh ass bing erbee, cha nee dy vel shin feme tashtey as £20 millioon ayn agh dy vel fys ain ooilley er argidys: shen ny ta'n aghinagh geearree, agh geddyn y ving dy yeeaghyn er yn aghin, dy yeeaghyn er aghtyn dy chur er y hoshiaght nheeghyn, er yn oyr dy row jeadys film ry chummal seose ain 'syn Ellan, agh dy row feyshtyn mychione row eh currit-rish 'syn aght kiart, as row reddyn livreit dy slane 'syn aght kiart, agh dy row ayns rieughid kuse dy speeideilyssyn ain, as er-lhiam dy vel yn traa er jeet dy hayrn ennal as dy yeeaghyn reesht, as dy vel yn aghin jannoo seose saase dy yannoo shen.
Ta Mnr Ashford gra, foddee dy jean bing cur freggyrt as gra ayns rieughid nagh vel eh ry chummal seose as nagh vod mayd cur shoh er y hoshiaght, agh foddee dy bee aghtyn elley ayn gyn ayns rieughid feme er goaill argid y tackeyder dy chur er shoh goll er y hoshiaght. T'eh gra dy voddagh bing erbee gra dy vel reddyn elley oddys oo jannoo gyn ceau argid y tackeyder. T'eh gra dy vel slane poynt y treealtys, shen dy ghra dy vel ad troggal neese yn aghin, lhig dooin cur er bun bing as three olteynyn aynjee dy yeeaghyn er shoh, as dy yeeaghyn er ny vees ry yannoo ain bentyn da'n aghinagh my vees reddyn mygeayrt y mysh shen oddys ve jeant dy jarroo nagh jean costal mooarane da ny tackeyderyn.
---oooOooo---
Ta Mnr Ashford gra dy vel gennid dy reillyn mychione sleih chebbal shirveishyn coyrlee er stiagh-ymmyrkey, bentyn da sleih cheet veih cheeraghyn elley gys yn Ellan. Haink eh er y chooish Jemayrt shoh chaie ayns soie yn Chiare as Feed.
Ayns freggyrt da Mnr Ashford, ta'n Shirveishagh Tashtee, yn Fer-lhee Alex Allinson, gra, 'sy Reeriaght Unnaneysit, dy vel Oik y Varrantagh son Shirveishyn Stiagh-ymmyrkey jannoo reillyn son coyrleyderyn er stiagh-ymmyrkey, as ayns shen, dy nee loght kimmee eh son peiagh dy chur coyrle er stiagh-ymmyrkey ny shirveishyn 'sy Reeriaght Unnaneysit, mannagh vel yn sheshaght goll er reill ny dy vel eh coardail ayns aght elley rish Slattys Stiagh-ymmyrkey as Kemmyrkyn 1999. T'eh gra, choud's t'eh toiggal eh, dy vel kied ec olteynyn jeh shiartanse dy heshaghtyn profeshoonagh dy chur coyrle er stiagh-ymmyrkey gyn goll er reill liorish y Varrantagh. T'eh gra nagh vel oardagh jeh'n sorch cheddin ec y traa t'ayn ec Reiltys Ellan Vannin.
Ta'n Fer-lhee Allinson gra dy beagh feme er y strughtoor as yn obbyr-oik cochianglt rish reill coyrleyderyn ayns shoh ve cooie, as dy beagh feme er yn Reiltys ve abyl dy chur bree da'n reill. T'eh gra dy vel yn Rheynn Gastid Dellal ec y traa t'ayn fo raad rish co-choyrle theayagh er aa-scrutaght jeh Slattys Jantysyn Obbyr 1975, ayn t'ad er hirrey barelyn er, lhisagh y vun jeh jantys obbyr goaill stiagh cur coyrle er stiagh-ymmyrkey. Soit er freggyrtyn da'n cho-choyrle theayagh shoh, bee sur-smooinaghtyn er y feme as y chummey jeh reillyn son fir er-lheh as son colughtyn goll er jannoo 'sy vlein noa, lesh lhiassee polasee as slattys dy eiyrt er shen cho leah's vees possible ny lurg shen.
Ta Mnr Ashford gra dy nee barney hrome dy liooar ee ec y traa t'ayn dy vod peiagh erbee dy bollagh, s'cosoylagh eh, gyn qualleeaght eer dy hebbal coyrle er stiagh-ymmyrkey ayns rieughid jannoo shen 'syn Ellan shoh, agh dy vel y Reeriaght Unnaneysit jeeaghyn er cho trome-chooishagh dy nee loght kimmee eh ayns rieughid dy yannoo shen, er-lhimmey jeh ayns shiartanse dy staydyn er-lheh. V'eh briaght jeh'n Er-lhee Allinson, nagh row eh credjal dy vel shoh as feme er jeeaghyn er dy preayssagh, er yn oyr ec y traa t'ayn dy nee'n Neear Feie t'ayn dy bollagh mooie ayns shen.
Ta'n Fer-lhee Allinson gra dy vel eh coardail rish Mnr Ashford dy vel shoh ny cooish as feme er jeeaghyn urree. T'eh gra dy vel shin er vakin paart dy chooishyn er y gherrid ta jeeraghey ard-soilshey er dy nee cooish hrome ee as feme er cur-rish ee. T'eh cheet er coyrle er-linney as soilsheenyn er-linney son shirveishyn er stiagh-ymmyrkey, raad veagh edyr reillyn y Reeriaght Unnaneysit ny dy jarroo reillyn erbee Ellan Vannin 'sy traa ry heet streeu dy chur-rish, er-lesh dy vel shen yn oyr dy nee feer scanshoil eh dy vel yn fys kiart mooie ayns shen, dy chur sthap eddyr er peiagh erbee geddyn y coyrle neu-chiart ny dy jarroo eer rour vondeish ve goll er jannoo jeu liorish sleih as t'eh foue cur y coyrle neu-chiart son y vondeish argidoil oc hene.
---oooOooo---
Ta foast obbyr mooar dy liooar dy yannoo bentyn da plannyn son scoill ard noa ayns Balleychashtal roish my vees ad currit roish Tinvaal dy hirrey coardail rish ceau yn argid femoil. Ta'n Fer-lhee Allinson gra dy vel yn shalee dy hroggal scoill ard noa ayns ynnyd jeh Scoill Ard Cashtal Rushen foastyn ec yn chied cheim echey, lesh eabyn goll er jeeraghey er cur er bun boayrd dy stiurey y shalee, as dy yeeaghyn er aghtyn dy livrey eh. T'eh treishteil dy bee kione currit er y cheim shoh Jerrey Geuree 2026, lesh yeearree son argid ve currit roish Tinvaal Toshiaght Arree. Rere ny plannyn, harragh toshiaght er yn obbyr troggee mee ny s'anmee, as dy beagh 30 mee ceaut er shen dy chur kione er y chalee.
She'n Rheynn Ynsee, Spoyrt as Cultoor ta shirrey y shalee, vees goll er reirey liorish yn Rheynn Bun-troggalys.
Jerrey Souree va myn-vrishey jeant jeh reihyn son ny saaseyn share dy chionnaghey ny vees femoil son y ghlout vees goaill stiagh scoill as ynnyd spoyrt. Ta'n Fer-lhee Allinson er cur leshtal son y chumrail ayns cummal chaglymyn dy loayrt mychione y shalee goll er e hoshiaght, as lhisagh ad y ve er nyn gummal 'sy tourey. Agh t'eh gra dy jean obbyr rolaue nish cooney dy haghney costyssyn elley.
Ta'n Fer-lhee Allinson gra, ny vees yn Rheynn Ynsee, Spoyrt as Cultoor, ayns co-pharteays rish yn Rheynn Bun-troggalys jannoo ec y traa t'ayn, shen jeeaghyn er cummey kiaddey as troggal. liorish ta mooarane obbyr toshee jeant dy chur kione er shen, myr shoh tra vees eh cheet roish Tinvaal lesh costys son shoh, dy vod slane barrant ve currit ayns shoh, agh neesht dy vod mayd jannoo shickyr dy vel yn livrey jeh jeant rere yn traa as rere y chlaare argidoil.
---oooOooo---
Ta briwnys er ve jeant ec y Varrantagh Fysseree, yn Dr Alexandra Delaney-Battacharya, dy ren yn Rheynn Bun-troggalys failleil ayns ymmodee aghtyn ayns cur freggyrt da aghin rere seyrsnys fysseree liorish Radio Vannin. Mean Fouyir 2022, ren Radio Vannin briaght jeh'n Rheynn Bun-troggalys son chaghteraghtyn bentyn da treealtyssyn erbee son dooney as geddyn rey rish raaidyn yiarn eiraght yn Ellan. Mee Houney y vlein shen ren yn Rheynn gobbal cur yn fys shen, gra dy row eh seyr veih'n churrym er yn oyr dy row eh cochianglt rish cummey polasee. Va'n chooish currit roish y Varrantagh Fysseree son aa-scrutaght, as ta'n Barrantagh Fysseree er chummal seose y plaiynt.
Hooar yn Dr Delaney-Battacharya nagh ren yn Rheynn Bun-troggalys coardail rish yn aghin cheusthie jeh'n traa cadjin, dy ren eh failleil dy hoilshaghey magh dy row eh goaill ayns laue ronsaghyn ressoonagh son yn yss, dy ren eh failleil dy chur coyrle as cooney, as dy ren eh failleil dy chur oyr son gra dy row eh seyr rere yn clattys.
Cha dod yn Dr Delaney-Battacharya jannoo briwnys row ronsaghyn resoonagh er ve goit ayns laue, as hooar ee magh nagh row recortys jeh prowalys jeh sym y theay ve jeant, as t'ee gra dy vel eh jeeaghyn jeeish dy vel yn Rheynn Bun-troggalys gra dy vel eh seyr veih dy chooilley churrym rere y Clattys bentyn da freggyrtyn cochianglt rish pabyryn Coonceil ny Shirveishee, shaghey jeeaghyn orroo ayns aght er-lheh, cooish er chooish.
Myr eiyrtys jeh shoh, t'eh er yn Rheynn nish goaill ayns laue ny ronsaghyn femoil, dy aa-scrutaghey dagh nhee as dy chur y fys da Radio Vannin. My vees yn Rheynn credjal dy vel feme er tayrn follit shiartanse dy vyn-phoyntyn, shegin da cur y fys da'n Varrantagh Fysseree lesh coip ny data as oyr nee jannoo shickyr y Barrantagh.
Ta 30 laa son yn Rheynn dy ve biallagh da briwnys y Varrantagh Fysseree, as 28 laa son aghin noi'n vriwnys.
Ren aa-scrutaght y Varrantagh Fysseree feddyn magh neesht dy vel yn Rheynn Bun-troggalys cur enn er yn sorch dy yeeareyder – 'sy chooish shoh, ny meanyn – tra t'ad geddyn aghinyn rere seyrsnys fysseree. Ta'n Dr Delaney-Battacharya gra dy vel feme er cur freggyrt da aghinyn gyn fys erbee er y yeeareyder, as choud's nagh vel coontey gollrish 'ny meanyn' cheet er ennym er-lheh, t'ee gra nagh vel eh coardail rish yn Clattys Seyrsnys Fysseree as t'ee coyrlaghey dy vel yn Rhenn scuirr chelleeragh veih jannoo shen.
Ta'n Rheynn Bun-Troggalys gra dy vel eh goaill-rish briwnys y Varrantagh Fysseree as dy jean eh cur freggyrt da'n Ogrey dy Vriwnys cheusthie jeh'n chlaare hraa va soit.
---oooOooo---
Ta'n Shirveishagh Bun-troggalys, as Oltey yn Chiare as Feed son Glionfaba as Purt ny Hinshey, Tim Crookall, cur raaue dy vel traaghyn doolaneagh ny lhie 'sy traa ry heet as dy jig caghlaaghyn ayns shirveishyn. Shoh choud's ta'n Rheynn er chlou Plan y Rheynn, 2024-24. Ta Mnr Crookall gra dy vel traa feer doillee ry heet son yn Rheynn choud's ta fysseree argidoil soilshaghey magh dy vel y costys jeh ymmodee shirveishyn y Rheynn mleeaney er ve erskyn yn argid vees cheet stiagh voue.
'Sy vlein argidoil shoh chaie ren yn fo-rheynn son Steatyn as Theiys Theayagh recortey costys net jeh £28, 658,000 net, lesh £43,154,000 ceaut echey, cosoyley rish £14,495,000 cheet stiagh ayn.
Ren Bus Vannin costal £6,985,000 net, lesh cheet stiagh jeh £5,210,000 as costyssyn jeh £12,195,000.
Ren Purt-aer Runnysvie cosney £4,613,000 ayns argid cheet stiagh, as va £13,472,000 ceaut echey.
Haink stiagh £2.2 millioon veih ny raaidyn yiarn eiraght, as va £5.7 millioon ceaut orroo.
Ren yn Rheynn cosney £15,937,000 veih taillaghyn son Kied Carbid as Kied Imman as Reireydys bentyn daue, as haink stiagh £2.377 millioon veih ny Puirt.
Ta Plan yn Rheynn Bun-troggalys soilshaghey magh paart dy obbyr t'er ve jeant 'sy vlein t'er n'gholl shaghey, goaill stiagh fosley y Stashoon Marrey noa ayns Leyrphoyl as towseyn smoo na va rieau recortit ayns cur eaghtyr noa er raaidyn mygeayrt yn Ellan.
Ga dy daink y Stashoon Marrey noa ayns Leyrphoyl dy ve foshlit Mean Souree mleeaney, va shen lurg mooarane cumrail as cha nel fys foast er y chostys ooilley cooidjagh jeh'n shalee bun-argidoil, ga dy vel sleih gooley dy bee shen eddyr £70 millioon as £80 millioon.
Ta'n Plan cheet neesht er yn obbyr dy hareaghey as dy heeyney magh Calloo yn Ree Edard VIII ayns Purt Ghoolish dy ve freggyrtagh da baatey noa Colught Paggad Bree Ellan Vannin, Manninagh.
Ayns roie-raa y Phlan ta Mnr Crookall gra dy bee ny kuse dy vleeantyn shoh cheet wheesh as doolaneagh choud's ta'n Ellan goaill toshiaght er couyral veih strane dowanagh dy vuillaghyn argidoil as t'eh aa-chormaghey y chlaare argidoil echey. T'eh gra dy vel eh 'sy cho-heks doolaneagh shoh dy vel y plan argidoil shoh currit roish, as dy jean sleih fakin dy vel eh jeeraghey er aa-chummey yn Rheynn dy vel ablid share echey dy ve freggyrtagh da ny doolaneyn ry heet. T'eh cur raaue dy bee feme er caghlaa shirveishyn; dy bee feme er yn cheshaght caghlaa dy ve freggyrtagh, as dy bee feme er reirey ny vees goll er jerkal rish veih'n Rheynn.
Ta Mnr Crookall gra, gyn ourys, dy bee shoh traa feer chreoi son yn Rheynn as dy vel eh soiaghey jeh dy vel y Plan jannoo ny sloo jeh ny doilleeidyn ry heet, agh dy vel eh scanshoil dasyn dy vel shoh jeant ayns aght cairagh baghtal. T'eh gra dy vel reddyn er jeet lesh yn Rheynn dy mooar ayns ny 12 vee shoh chaie, as dy vel shoh er-coontey ny obbreeyn ta gobbraghey dy creoi as ve currit wheesh da cur eab er cooilleeney ny eiyrtyssyn share ass-lieh theay Vannin, as dy jean ad freayll rish ve freggyrtagh da ny doolaneyn fouesyn 'sy traa ry heet.
Mastey tosheeaghtyn as deanyn y Rheynn Bun-troggalys 'sy vlein shoh cheet, ta'n Plan cheet er cur er bun sheshaght thieys, lhiassaghey strateish er ymmyrkey theayagh as aa-scrutaghey shirveishyn marrey rish y Cholught Paggad Bree. T'eh fo'n Rheynn neesht croo Boayrd Neu-heckteragh y Phurt-aer dy obbraghey er creatlagh y pholasee, strateish as plan son baih argid 'sy traa sodjey son cummey noa ayns stiurey Runnysvie.
---oooOooo---
Cheayll shin veih Plan y Rheynn Bun-troggalys dy ren Bus Vannin costal £6,985,000 net, lesh cheet stiagh jeh £5,210,000 as costyssyn jeh £12,195,000. Ren Oltey yn Chiare as Feed son Carbory, Balleychashtal as Malew, Jason Moorhouse, cur feysht er yn Shirveishagh Bun-Troggalys, Mnr Crookall, vel shiartanse dy immanee barroose gennaghtyn dy vel ad goll er ymmyrkey ayns aght smessey na immanee elley er yn oyr dy vel three sorch dy chonaant faillee ayn.
Ta 19 immanagh lane-hraa as kiare immanagh paart-traa gobbraghey rere shenn chonaantyn.
Ta 44 oltey y wirran lane-hraa goll er failley rere conaantyn ta shenn agh ny s'noa na ny shenn chonaantyn.
As eisht ta 22 immanagh lane-hraa as 10 immanagh paart-traa as ta ny conaantyn jeh'n sorch va jeant myr conaantyn noa son sleih noa ta goaill toshiaght.
Ta ooilley ny immanee cosney yn rate bunnidagh cheddin 'syn oor, agh ta caghlaaghyn rate ny mast'oc bentyn da ooryn erskyn y towse bunnidagh.
Agh ta Mnr Crookall gra nagh vel eh fakin doilleeid ass yn aght ta shiartanse dy immanee ta foast gobbraghey rere ny shenn chonaantyn. T'eh gra dy vel sleih er n'yeeaghyn er ny conaantyn shen blein er vlein rish, dy by chosoylagh eh, ny 12 vlein t'er n'gholl shaghey, mannagh vel eh ny sodjey na shen, as s'cosoylagh eh dy vel eh foddey ny sodjey na shen. T'eh gra dy row ad er nyn yeeaghyn er, agh dy vel adsyn ny conaantyn ec ny 19 immanagh shen, as dy vel cairys oc daue, as dy by chosoylagh eh dy beagh feme er kionnaghey ad voue dy yannoo caghlaa, agh dy vel ad booiagh dy ve fo ny conaantyn shen.
---oooOooo---
Ta'n Rheynn Chymmyltaght, Bee as Eirinys er chlou data veih creear va jeant echey dy howse yn earroo dy wallabeeyn ta baghey er y cheer. Va ymmyd jeant jeh chagnoaylleeaght jannoo caslyssyn rere chiass, as yn chullee shen currit er drone dy eiyrt er ny marsupialyn harrish 988 acre rish shey laghyn. Va bunnys 300 wallaby er-lheh recortie, agh jeeaghyn er fysseree veih'n studeyrys shoh as veih creear va jeant 2023, va jeeraghey er Curragh Balley ny Loghey ynrican, ta'n tuarastyl gooley dy vel yn earroo ooilley cooidjagh dy wallabeeyn ny sniessey da 1,000.
Ta Stiureyder Treisht Bea Feie Vannin, Leigh Morrish, gra dy vel y Treisht cur barrant ayn, dy vel ny date veih'n drone kiart son ny ardjyn ren ad jeeaghyn er, agh nagh vod eh ve currit shaghey dy row kuse jeu ren shaghney ny ronseyderyn. T'eh gra, roish y creear, dy row caghlaaghyn cheb er gooley yn earroo, veih feedyn gys cheeadyn, as er yn oyr shoh dy vel shoh keim toshee scanshoil ayns toiggal ny share ny earroo dy wallabeeyn t'er n'gholl back dy ve feie. T'eh gra dy vel dean y Treisht dy yannoo shickyr dy vel fys cooie ry gheddyn tra hig coloayrtyssyn erbee 'sy traa ry heet mychione reirey ny earrooyn jeu.
Ta'n Shirveishagh Chymmyltaght, Bee as Eirinys, as Oltey yn Chiare as Feed son Doolish Hiar, Clare Barber, gra dy vel yn Rheynn nish jeeaghyn er ny aghtyn share dy hessal slaynt y phobble dy wallabeeyn. T'ee gra, cho leah's ta'n fys shen ec yn Rheynn, dy bee caa da toiggal y builley er y chymmyltaght ynnydoil as toiggal vel feme er caghlaaghyn dy reirey yn earroo dy wallabeeyn.
Choud's va'n chreear shoh goll er jannoo, ren ad recortey neesht yn earroo dy ghoair t'er n'gholl back dy ve feie er y twoaie. Va 245 goayr fakinit ayns ardjyn Skyrrey Lonan as Skyrrey Vaghal, as va'n earroo shen goaill stiagh mannanyn.
---oooOooo---
Ta Oltey yn Chiare as Feed son Rhumsaa, Lawrie Hooper, er chur roish treealtys dy chur er bun rate soccar son y clane Ellan, lesh yn argid dy ve currit er-lheh dy eeck son ny loghanyn snaue ynnydoil. Ta Mnr Hooper gra dy vel feme er coarys s'cairee er yn oyr nagh vel cummaltee 'sy hiar geeck er-lheh son yn loghan snaue 'syn Ynnyd Spoyrt Ashoonagh, choud's ta sleih ayns buill elley geeck keesh vees cummal seose yn Ynnyd Spoyrt Ashoonagh, goaill stiagh y loghan snaue ayns shen, choud's t'ad geeck son y loghan snaue ynnydoil oc hene.
Bee'n treealtys currit roish Tinvaal Jerrey Geuree 'sy vlein shoh cheet, as t'eh shirrey er yn Tashtey dy chur tuarastyl er y chooish roish Tinvaal Mee Vayrt, lesh claare hraa dy chur er bun yn rate soccar roish jerrey yn lught-reill t'ayn nish – shen dy ghra, roish y reihys mooar cadjin, Mean Fouyir 2026.
Ta Mnr Hooper gra dy vel shin er nakin er y gherrid ny doilleeidyn t'er ve ain mychione cur argid son loghan y jiass, myr sampleyr, lesh loayrtys mychione eeckyssyn dy lhieeney y varney as reaghyssyn as dy chooilley horch dy nhee, as dy vel eh ayns rieughid jannoo seose keeayll dy mooar dy ghra, my vees couyryn ashoonagh eu gollrish ny loghanyn ardjynagh, gollrish yn Ynnyd Spoyrt Ashoonagh, ayns rieughid dy lhisagh paart dy co-chormid as dy dy chormys y ve ayn son cur, as dy jarroo cormys ayns cur argid. T'eh gra, my vees oo smooinaghtyn er yn aght ta argid currit son ny loghanyn snaue shoh ec y traa t'ayn, dy vel dy chooilley pheiagh 'syn Ellan ceau rate son loghan snaue er-lhimmey jeh sleih vees beaghey 'sy hiar, nagh vel geeck rate son loghan snaue, as dy vel yn Ynnyd Spoyrt Ashoonagh goll er eeck dy bollagh ass keesh.
Ta Mnr Hooper gra, ayns rieughid dy vel sleih ayns Rhumsaa, myr sampleyr, geeck daa cheayrt: dy vel ad geeck son y loghan ashoonagh 'syn Ynnyd Spoyrt Ashoonagh as dy vel ad geeck son loghan ynnydoil ayns Rhumsaa. T'eh gra, dasyn, dy vel eh cairagh dy vel dy chooilley pheiagh geeck son y loghan ynndyoil oc, as dy vel yn aght sassey dy yannoo shen trooid rate soccar son y clane Ellan. T'eh gra dy vel eh cur neesht vondeish, as dy vel sleih goaill toshiaght lesh loghanyn, agh ayns rieughid foddee dy beagh sleih geearree cur argid son reddyn gollrish lioarlannyn ayns aght ashoonagh, foddee dy beagh sleih geearree cur argid son ynnydyn y cho-voodeeys ayns aght ashoonagh, as dy vel reddyn elley as foddee dy beagh sleih geearree cur argid er-nyn-son ayns aght smoo keayllagh shaghey ve nyn lhie er strane dy chaghlaaghyn aght t'ain veih sorch dy choarys rere code post.
Ta Mnr Hooper gra dy nee'n red scanshoil eh nagh vel shoh agh bentyn da'n aght ta sleih cur argid son ny reddyn shoh, cha nee bentyn da'n aght t'ad goll er livrey. T'eh gra dy vel eh foast smooinaghtyn dy lhisagh loghanyn ynnydoil goll er livrey liorish barrantee ynnydoil, dy vel shen gobbraghey feer vie. T'eh gra nagh vel monney coloayrtys er ve ayn mychione rateyn 'sy lught-reill shoh, as er-lesh dy vel yn Reiltys er n'yannoo reaghys jeh yioin gyn dy gholl y raad dy aa-chummey rateyn ny dy aa-chummey lughtyn-reill ynnydoil. Er-lesh ayns rieughid nagh vel shen kiart ayns rieughid, as dy vel sleih cheet er rateyn mennick dy liooar as mee-chairys y choarys, as dy vel shen yn ard oyr son cur roish y chooish shoh, dy vel eh bentyn da cairys.
---oooOooo---
Ta caa nish son yeearreyderyn dy chur stiagh dy ve nyn Olteynyn y Choonceil Slattyssagh, lesh reihyssyn skedjalit Mee Vayrt 'sy vlein shoh cheet. Foddee olteynyn y theay cur stiagh nyn enmyn dy jeeragh, nish nagh vel feme er sleih ve enmyssit liorish Oltey yn Chiare as Feed. Agh she foast Olteynyn yn Chiare as Feed ynrican nee goaill ayrn 'sy teiy dy reih Olteynyn y Choonceil Slattyssagh. Shegin da shirreyderyn feddyn peiagh ennagh dy chur roish yn ennym oc as peiagh ennagh elley dy niartaghey shen.
Bee caa dy chur stiagh yeearree derrey yn 9 Jerrey Geuree, lesh co-haglym son yeeareyderyn dy heet quaiyl Olteynyn yn Chiare as Feed yn 24 Jerrey Geuree. Eisht foddee Olteynyn yn Chiare as Feed cur roish ennym myr shirreyder, ny niartaghey reih Oltey Ellan, liorish yn 13 Toshiaght Arree.
Bee shirreyderyn cur roish nyn eieyn as cur freggyrtyn da feyshtyn Olteynyn yn Chiare as Feed yn 24 Toshiaght Arree, as fy yerrey hig yn reihys hene yn 4 Mee Vayrt, lesh ny shirreyderyn speeideilagh ve currit fo loo yn 11 Mee Vart.
Ta Loayreyder yn Chiare as Feed, as Oltey yn Chiare as Feed son Rushen, Juan Watterson, treishteil dy jean yn coarys aa-reaghit jeeaghyn as gennaghtyn dy vel gollrish coarys cadjin dy chur faill as entreilys share da sleih nagh vel cho oayllagh rish oardaghyn Tinvaal.
