Meeryn ass Traa dy Liooar, Jelune 13ss Jerrey Geuree 2025
Ta Slaynt Theay Ellan Vannin gra nagh vel fys er ve currit da mychione earroo ass cadjinys jeh cooish jeh Metapneumovirus Dooinoil cheet dy ve ayn. Ayns ny shiaghteeyn jeieanagh ta'n earroo dy chooishyn er ve gyrjaghey 'sy Cheen as ayns buill elley, agh ta Lhiass Stiureyder Slaynt Theay Ellan Vannin, yn Fer-lhee Ross Keat, gra dy nee chingys cadjin geuree eh. T'eh gra neesht dy jean Slaynt y Theay cooney lesh fwirranyn kiarail slaynt as lesh buill chiarailagh my vees yn earroo dy chooishyn bishaghey
Ta ny monnaghyn jeh Metapneumovirus Dooinoil gollroosyn jeh feayraght as dy cadjin t'ad cheet dy ve ny share jeh nyn jioin hene, as ny keayrtyn t'ad yn oyr son doghanyn tromey jeh ny scowanyn, as foddee shen cur assee da lhiennoo as da fir aasit shinney.
Ta'n coyrle da sleih erbee as ta monnaghyn jeh Metapneumovirus Dooinoil oc, ny jeh chingys ennalagh erbee, dy hannaghtyn sthie derrey vees ad ny share, dy yannoo ymmyd jeh cliaghtaghyn miey bentyn da glennid, dy ghoaill palchey dy iu as dy reayll ersooyl veih sleih elley. Mannagh vel monnaghyn lhaggaghey, lhisagh sleih cur eam er yn er lhee cadjin oc.
---oooOooo---
Bee scrutaghtyn jeant as reillyn currit er colughtyn 'sy cherroo slaynt as kiarail y theay dy yannoo shickyr dy vel y theay geddyn kiarail erreeishagh, sauchey, fondagh as jeh mieys, rere Billey Reill Slaynt as Kiarail y Theay dy ve currit roish ec yn Rheynn Slaynt as Kiarail y Theay ny s'anmee 'sy vlein shoh.
Ta currym hannah ere Fwirran Recortey as Scrutaghey son jannoo recortys jeh, as scrutaghey, as freayll arrey er kiarail y theay as kiareyderyn shirveish chiarail slaynt cheumooie jeh'n Shirveish Claynt Ashoonagh. Ta shoh goaill stiagh brastylyn oikanagh, arreyderyn clienney, thieyn kiarailagh son fir aasit as kiarail sthie.
'Sy villey noa ta'n Rheynn er n'yannoo shoh ass ynoa dy ghoaill stiagh kiareyderyn elley as edyr nagh row ad fo reill roish nish, ny va scrutaghtyn jeant jeu liorish reilleyderyn cheumooie jeh'n Ellan. Shen dy ghra dy bee currym er y Wirran Recortey as Scrutaghey son oardreil dy chooilley red vees jeant bentyn da slaynt as kiarail y theay as ta gaue cochianglt rish da sauchey sleih.
Bee daa heshoon dy chur fys da sleih mychione ny caghlaaghyn veagh cheet dy ve ayn: yn derrey heshoon Jecrean yn 14 Jerrey Geuree veih 5.30pm gys 6.30pm ayns Scoill Ard Balley Kermeen ayns Doolish; as yn seshoon elley Jecrean yn 21 Jerrey Geuree ec y traa cheddin, 5.30pm gys 6.30pm, ayns Scoill Grammadys Rhumsaa.
Bee'n Billey Reill Slaynt as Kiarail y Theay currit roish Tinvaal 'sy vlein shoh, as tra ta Kied Reeoil er ny geddyn, nee'n Rheynn Slaynt as Kiarail y Theay goaill toshiaght er cur bree da ayns keimyn. Cha jig caghlaaghyn chelleeragh da'n aght ta kiareyderyn shirveish goll er reill.
---oooOooo---
Ayns Traa dy Liooar yn chiaghtin shoh chaie cheayll shin data va clouit ec yn Rheynn Slaynt as Kiarail y Theay as va soilshaghey magh dy row bishaghey 15% 'syn earroo dy leih va jannoo ymmyd jeh shirveishyn Thie Lheiys Noble cosoyley rish jeih bleeaney er dy henney. Haink ny fysseree shen myr freggyrt da feysht liorish Oltey yn Chiare as Feed son Connaghyn, Julie Edge.
Rere ny data shen, ta'n earroo dy hurransee goll fo skynn yn er-lhee; goll gys yn rheynn radio-oaylleeagh son goullyn-X; son quaaltyssyn myr surransee mooie; as goll gys yn rheynn drogh-haghyrt as egin : er vishaghey liorish bunnys 15% ayns ny jeih bleeaney shoh chaie.
Ta bunnys 265,000 dy leih er n'gholl trooid ny kiare ardyn shoh jeh'n thie lheiys 'sy vlein 2024, vees foddey ny smoo na beggan ny shlee na 230,000 dy leih 'sy vlein 2014.
Cha row agh bishaghey beg 'syn earroo dy leih goll fo skynn yn er-lhee, nagh ren bishaghey agh veih 5,092 gys 5,120.
Ren yn earroo dy hurransee mooie bishaghey liorish beggan ny smoo na 6,000 gys 129,453.
Va bishaghey smoo 'sy rheynn drogh-haghyrt as egin, lesh bunnys 48,000 dy chooishyn mleeaney, cosoyley rish beggan ny smoo na 35,000 'sy vlein 2014.
Ren yn aggyrt son radio-oaylleeaght bishaghey neesht, lesh ny shlee na 82,000 dy whaaltyssyn son goullyn-X mleeaney, vees bunnys 16,000 quaaltys ny smoo na jeih bleeaney er dy henney.
Agh ta feysht ec Bnr Edge mychione ny fysseree shen, as t'ee shirrey tooilley baghtalys orroo. Ec y traa cheddin ta'n eear Hirveishagh Slaynt as Kiarail y Theay, Lawrie Hooper, gra dy vel ny fysseree shoh ginsh dooin ny ta fys ain er hannah.
Ta Bnr Edge gra dy vel ee cur cheb er, as nagh nee agh cheb eh, as dy jean ee shirrey tooilley fys as myn-vrishey jeh ny earrooyn, agh y boayl veih haink yn feysht hoshiaght, v'eh ayns rieughid veih docamad ec cur kione er ynnyd y Thie Lheiys Noble noa, as yn jerkalys jeh earrooyn dy hurransee yinnagh goll gys yn rheynn drogh-haghyrt as egin noa-jeant ayns Thie Lheiys Noble.
Ta Bnr Edge gra, jeeaghyn er ny earrooyn shoh, er-lhee foddee dy vel Thie Lheiys Cheerey Rhumsaa er ve currit stiagh ayndaue, myr shoh dy bee ish jeeaghyn as shirrey tooilley myn-phoyntyn. T'ee gra dy nee feer chleeir ta'n freggyrt, as nagh vel eh agh earrooyn ooilley currit stiagh cooidjagh, agh dy vel eam er ve urree veih kuse dy chummaltee y rheynn reihyssagh eck, as dy vel imnea ec sleih foddee dy vel ny earrooyn goaill stiagh Rhumsaa, myr shoh dy vel eh red ennagh as feme er jannoo cleeir eh dy yannoo shickyr dy vel y theay geddyn fys kiart.
Ta Bnr Edge gra dy vel yn imnea elley eck lesh shoh bentyn da ny caghlaaghyn t'er ve jeant ayns yn rheynn drogh-haghyrt as egin, as er-lheh da shirveish ny fir-lhee cheumooie jeh ooryn cadjin, as ish cheet er myr MEDS, as t'ee gra dy nee baghtal eh dy vel MEDS dooney ec shiartanse dy hraaghyn, as dy vel surransee stiurit da'n rheynn drogh-haghyrt as egin, myr shoh dy dooghyssagh dy bee bishaghey ayns ny earrooyn goll gys yn rheynn drogh-haghyrt as egin. Agh t'ee gra dy row yn rheynn drogh-haghyrt as egin 'sy laa ecksh tra v'ee gobbraghey ayns Thie Lheiys Noble ynrican son drogh-haghyrt as egin, as cha nee er yn oyr dy vel feme er sleih fakin fer-lhee cadjin.
Ta'n eear Hirveishagh Slaynt as Kiarail y Theay, Lawrie Hooper, ren irree ass yn oik shen echey, as ta Oltey yn Chiare as Feed son Rhumsaa, gra ayns firrinys nagh vel ny earrooyn shoh ginsh dooin red ennagh ta fys ain er hannah: dy vel bishaghey er jeet 'syn earroo dy obbraidyn, 'syn earroo dy scrutaghtyn, 'syn earroo dy whaaltyssyn son surransee mooie, as 'syn earroo dy whaaltyssyn ayns yn rheynn drogh-haghyrt as egin, as myr red cadjin dy vel yn aggyrt trooid shirveishyn slaynt gyrjaghey, as dy row eh gyrjaghey rish traa feer liauyr, as dy vel kuse jeh ny fysseree lajer dy liooar, bentyn da ny bishaghyn per cent, as dy vel mooarane jeh shen bentyn da, myr nee peiagh erbee ginsh diu, pobble ve ain vees cheet dy ve ny shinney.
Ta Mnr Hooper gra dy vel eh ny smoo bentyn da sleih t'ayns shoh hannah as feme oc er entreilys da'n chirveish ny smoo, as dy vel shen nhee dooghyssagh y vea, er-lesh, dy vel shin ooilley cheet dy ve ny shinney as dy vel feme ain er kiarail as er-lheh ayns yn chirveish slaynt, myr shoh nagh lhisagh veg 'sy freggyrt shen ayns rieughid cur yindys er peiagh erbee. T'eh gra, ny vees cur yindys, shen my vees oo jeeaghyn er yn towse dy reddyn goll trooid, yn earroo dy obbraidyn ta goll er chebbal, ny quaaltyssyn ta goll er chebbal, as cosoyley shen rish yn towse dy argid t'er n'gholl stiagh ayn, dy vel barney feer, eer vooar ayns shen.
Ta Mnr Hooper gra dy vel shoh chaghteraght ta'n tuarastyl neu-chrogheydagh er chur dooin reesht as reesht, choud's t'ou fakin cummey y phobble caghlaa, eisht dy vel feme er jeeaghyn er yn aght ta argid goll er cur neesht, as er-lesh dy vel shen fer jeh ny doolaneyn ta shin dy akin er-lheh lesh ny earrooyn 'sy rheynn drogh-haghyrt as egin. T'eh gra dy vel slane dean y chlaare chaghlaaee ayns tuarastyl yn Reejerey Jonathan Michael as ayns ooilley yn obbyr t'er ve goll er jannoo, shen dy chur eab er cur lhee da sleih ny s'leaie 'sy cho-voodeeys, nagh vel feme er sleih skyrrey cheu-chooylloo dy ve goll stiagh ayns Thie Lheihys Noble, as er-lesh dy vel shen yn ard ta doilleeid oc ayns rieughid, dy gheddyn yn argid baiht ayns shen 'sy chied ynnyd.
Ta Mnr Hooper gra dy nee cooish feer doillee dy chur, dy chur eab er goll gys yn Reiltys as gra dy vel feme er ceau argid nish, nagh vel shin ceau daa cheayrt yn argid laa ny vairagh ny 'sy nah vlein ny 'sy vlein er-giyn.
Ta Bnr Edge gra dy vel eh jeeaghyn dy vel obbraidyn 'sy thie lheiys as ny earrooyn er vishaghey, agh reesht vel paart jeusyn shen ayns Rhumsaa, vel paart jeu synaptagh, as dy vel shen yn oyr dy bee ad jannoo shickyr dy vel ad geddyn tooilley myn-vrishey as yn jeerid mychione yn aght t'eh jeant seose, er yn oyr, fy yerrey hoal, my vees shiu jeeaghyn er yn staddystaght shoh, dy vel, red yindyssagh eh, Kiarail Vannin dy jarroo jannoo dy mie. Agh t'ee gra, yn staddystaght roish Kiarail Vannin, foddee dy row eh ynrican Thie Lheiys Noble, shaghey Rhumsaa, as yn obbyr synaptagh preevaadjagh yinnagh costal millioonyn da'n phobble, da tackeyderyn.
---oooOooo---
Bee tooilley coloayrtyssyn eddyr Kiarail Vannin as yn Sheshaght Lhee Ghoaldagh yn chiaghtin shoh lurg da Kiarail Vannin cur cheb caghlaait er faill da olteynyn y heshaght cheirdey. Chammah's bishaghey 6% son y vlein argidoil 2023-24 as bishaghey 4% 'sy vlein argidoil shoh, ta Kiarail Vannin gra dy jinnagh eh cur faill elley da dy chooilley er lhee as ec y traa t'ayn ta scaailley faillee oc ny sinshley na scaailley faillee ayns Sostyn.
Ta Caairlagh Sheshaght Lhee Ellan Vannin, yn Fer-lhee Prakash Thiagarajan, gra dy vel eh credjal nagh jinnagh fir lhee 'syn Ellan jiooldey caa dy gheddyn faill vees cosoyley rish shen va coardit hannah 'sy Reeriaght Unnaneysit. Ta'n Sheshaght Lhee Ghoaldagh er ve shirrey bishaghey 12.6% 'sy vlein argidoil 2023-24, agh ta Kiarail Vannin gra dy vel feme urree freayll cheusthie jeh'n chlaare argidoil eck. Y vee shoh chaie ren 95% jeh olteynyn y Heshaght Lhee Ghoaldagh ren goaill ayrn ayns teih votal ayns foayr jeh jantys jeadyssagh bentyn da'n argane er faill.
Ta'n Fer-lhee Thiagarajan cheet er cheb foddee sleih credjal ayn, as liorish shen t'eh meanal cheb vees cho mie as shen ayns ny Hellanyn Goaldagh elley, vees ry hoiaghey jeh liorish ooilley nyn olteynyn. T'eh gra my vees sleih jeeaghyn mygeayrt ny Hellanyn Goaldagh, dy vel chebbyn er faill son 23-24 er ve red erbee veih 10.5% gys 11.26%. Er-lesh nagh jean fer erbee jeu jiooldey cheb cosoyley rish shen.
Ta'n Fer-lhee Thiagarajan gra dy jinnagh ny fir-lhee cur eab er jannoo ny sloo builley erbee er sauchys surransee. Agh t'eh gra dy by chosoylagh eh dy jean eh er keeayll chionnit y hurransagh, agh lurg da gra shen, dy vel feme ayns rieughid er loayrt rish ny olteynyn ayns aght s'lhea roish my vees ad reaghey dy jeeragh cre yn jantys dy ve jeant oc.
She'n Fer-lhee Sean Crerand ta Eaghtyrane y Heshaght, as t'eh gra dy vel reddyn jannoo er paart jeh keeayll chionnit ny surransee ec y traa t'ayn liorish y nhee dy vel doilleeid ayn rish failley, dy vel doilleeid ayn rish freayll sleih, ta doilleeid lesh obbreeyn ve booiagh as currit da'n obbyr oc, dy vel ooilley ny reddyn shoh cur er yn ablid oc dy chur kiarail ymmydoil sauchey son surransee.
Ta'n Fer-lhee Crerand gra, ayns rieughid, 'sy traa sodjey, dy jean shoh, my vees kione speeideilagh currit er barganeaghyn, dy jean shoh ayns rieughid, cooney lesh kiarail surransee dy bee obbreeyn ayn foddey smoo booiagh, obbreeyn ayn foddey ny smoo currit da'n obbyr oc, as dy jean ooilley jesh, myr ta fys mie ec sleih, cooney dy livrey kiarail.
Cha nel y Sheshaght Lhee Ghoaldagh er hoaiaghey jeh'n cheb, as t'ee er hirrey saasey dy hareaghey eh, as t'eh shirrey fys s'baghtaley er myn-phoyntyn y cheb, er yn oyr dy beagh caghlaaghyn bishaghey son caghlaaghyn grade dy ir lhee.
Ta fogrey clouit ec Reiltys Vannin gra dy vel yn daa pharteays coardail foddee dy vel feme er yn Ellan goll ny sodjey na cormys rish scaillaghyn faillee ayns Sostyn dy chooney lesh cleayney stiagh olteynyn noa y wirran. Ta Kiarail Vannin as yn Sheshaght Lhee Ghoaldagh er choardail dy veeiteil reesht lesh cooney Shirveish Cochianglyssyn Jeadyssagh Vannin dy gholl er lesh barganeaghyn.
---oooOooo---
Ta Colught Paggad Bree Ellan Vannin er chaghlaa y corrillagh jeh'n earroo dy ir aasit femoil dy ve marish possanyn dy phaitchyn er-boayrd y vaatey. Choud's nish va reill dy lhisagh un er aasit freayll arrey er jeih paitchyn, agh ta shen er ve caghlaait dy ve un er aasit marish queig paitchyn.
Ta'n Colught gra dy vel yn ard tosheeaght echey dy kinjagh sauchys ny troailtee, as dy vel y currym er y cholught son yn sauchys jeh ooilley ny pashneyryn as olteynyn y skimmee ec dy chooilley hraa. T'eh gra dy row aa-scrutaght ooilley-ghoaillagh jeant jeh ny sessyn gaue jeant, as cur geill da ooilley ny cooishyn bentyn da arraghey paitchyn, as yn sauchys harrish ooilley jeh dy chooilley pheiagh er boayrd, goaill stiagh y skimmee, dy ren eh caghlaa y corrillagh jeh fir aasit marish paitchyn. T'eh gra dy row coloayrtyssyn echey rish yn Rheynn Ynsee, Spoyrt as Cultoor mychione cur bree da'n chorillagh noa.
Agh ta Sheshaght Ashoonagh ny Ard Fir Ynsee er chremmey y caghlaa, as t'ee cur eam er y Cholught dy smooinaghtyn er y chooish reesht dy preaysagh. Ta'n Sheshaght gra dy vel shoh neu-freggyrtagh da coyrle yn Rheynn Ynsee, Spoyrt as Cultoor bentyn da keayrtyn ynsee as da'n choyrle er cliaghtaghyn share trooid ny Hellanyn Goaldagh. T'ee gra nagh vel couyryn dy liooar oc dy ve biallagh da'n feme noa as dy jean shoh cur lhiettrimmys trome er turryssyn ny scoillyn ersooyl veih'n Ellan, as dy jean eh faagail paitchyn gyn caaghyn ynsee ard-scanshoil.
Ta Fer Toshee Ard y Heear-Hwoaie jeh Sheshaght Ashoonagh ny Ard Fir Ynsee, Rehana Azam, gra dy jean y policy neu-cairagh shoh cur er paitchyn Ellan Vannin ve fegooish cosney keeayll chionnit as caaghyn vees ry gheddyn ec paitchyn elley 'sy Reeriaght Unnaneysit. T'ee gra dy vel eh cur errey neu-phossible er scoillyn, as dy vel eh doilleee hannah dy reaghey dy vel olteynyn dy liooar y wirran seyr dy gholl er turryssyn veih'n Ellan, as nagh bee eh ry yannoo dy chummal turryssyn ersooyl veih'n Ellan. T'ee gra dy vel kuse dy scoillyn hannah scryssey magh ny plannyn oc er coontey jeh shoh.
Ta Bnr Azam gr dy vel ee toiggal y feme son coadey dy sauchey, agh dy vel y corrillagh noa shoh foddey erskyn ny ta fir oayllee ynsee shirrey as dy vel eh cur stiagh lhiettrimmyssyn neu-ymmyrchagh er ny lhisagh y ve taghyrtyn dy chooilleeney paitchyn. T'ee gra, choud's foddee dy jean kuse dy scoillyn as co-voodeeyssyn eabyn mooarey dy reaghey turryssyn rere y chorrillagh noa mleeaney, dy vel Sheshaght Ashoonagh ny Ard Fir Ynsee cur trimmid er nagh vel eh ry chummal seose 'sy traa sodjey. T'ee gra nagh vod eh ve shaghnit dy jean preayssyn argidoil as reiree elley ny sloo yn earroo dy hurryssyn ersooyl veih'n Ellan, as dy jean shen faagail cohortyn dy phaitchyn 'sy traa ry heet gyn keeayll chionnit vees ard scanshoil daue.
Ta'n Colught gra dy row coloayrtyssyn echey rish yn Rheynn Ynsee, Spoyrt as Cultoor, as dy vel eh mollit nagh ren Sheshaght Ashoonagh ny Ard Fir Ynsee loayrt rish mychione y chooish dy hoiggal dy bollagh wheesh as ta'n Colught currit da sauchys ny pashneyryn jeh dy chooilley eash.
---oooOooo---
Ta'n Commishoon son Shirveishyn Theayagh y failleyder jeh ny smoo na'n lieh-ayrn jeh obbreeyn 'sy cherroo theayagh. T'eh er chur roish treealtys son faill ny obbreeyn rish daa vlein, lurg da ny sheshaghtyn keirdey jiooldey cheb er faill rish three bleeaney. Ayns chaglym er y gherrid, dooyrt ny sheshaghtyn keirdey dy row imnea oc foddee dy beagh yn eiyrtys jeh coardail rish cheb rish three bleeaney dy beagh bishaghey fo'n rate bolgey argidoil 'sy trass vlein.
Ta'n Commishoon nish chebbal bishaghey 4% 'sy vlein argidoil shoh, lesh bishaght 2.5% 'sy nah vlein. Ta treealtys ayn neesht bentyn da laghyn seyrey bleinoil, as liorish yinnagh failleydee as shirveish jeih bleeaney oc geddyn 30 laa ayns ynnyd jeh 28 laa.
Ta'n Commishoon er chur fys mychione y cheb da ny sheshaghtyn keirdey Prospect as Unite, as t'eh gra dy by vie lesh ny sheshaghtyn keirdey reaghey teiy mastey ny olteynyn oc.
---oooOooo---
Ta Oltey yn Chiare as Feed son Doolish Hwoaie, John Wannenburgh, gra dy vel eh scanshoil dy hoilshaghey magh barelyn sleih ta gennaghtyn dy vel neu-vondeish currit orroo liorish ny vees jeant ec yn Reiltys. Nee eh cur roish Tinvaal aghin liorish cummaltagh Doolish veanagh, Andrea Krüger.
Myr cheayll shin ayns Traa dy Liooar yn cheayrt s'jerree, ta Bnr Krüger boirit mychione obbyr dy lhiassaghey yn ard mygeayrt Raad Westmoreland as eear thie ny boandyryn ayns shen, dy yannoo cummalyn rea. T'ee gra dy vel ard jysk eh son pairkal hannah, lesh kied ec cummaltee yn ard, agh lesh sleih cheet stiagh 'sy phreeu-valley as pairkal choud's t'ad goll gys yn obbyr oc, dy nee doillee eh son cummaltee dy mennick dy phairkal ec cheu ny raaidey faggys da ny thieyn oc.
Ta Bnr Kruger gra, lesh cummalyn rea as cummaltee noa elley 'syn ard, dy jig eh eer ny s'doillee son cummaltee dy phairkal faggys da ny thieyn oc, as ta'n aghin eck cur eam son lhiettrimmissyn er pairkal ec cheu ny raaidey son sleih nagh vel nyn gummaltee 'syn ard hannah. T'ee gra neesht dy lhisagh ard er-lheh ve currit son cummaltee ynrican dy phairkal.
Ta Mnr Wannenburgh gra nagh vel shoh mychione lhiassaghey noa ny er-lheh mychione lhiassaghey ayns ynnydyn magher dhone. T'eh gra dy vel ish, Bnr Krüger, ayns coardail rish shen, as dy vel eshyn ayns coardail rish shen. T'eh gra dy vel eh mychione baih ard son pairkal vees baiht hannah foddee lesh 200 gleashtan elley. T'eh gra nagh vel shen jannoo co-voodeeyssyn miey, nagh vel shen jannoo bea aashagh, dy vel eh croo tooilley oyryn son ve tarmestit son sleih ta baghey ayns shoh hannah.
Bentyn da aghtyn glassey son troailt as greinnaghey sleih dy gholl er barroose, shaghey jannoo ymmyd jeh gleashtanyn, ta Mnr Wannenburgh gra, ayns yn daa laa v'er n'gholl shaghey, nagh row eh er nakin monney sleih er roaryn, ny monney sleih shooyl, er coontey yn earish, myr shoh wheesh as ta shin geearree cur ny reddyn shoh, dy vel feme er ve rieughagh, as reesht, nagh vel eh noi yn lhiassaghey noa, caghlaa thieyn t'ayn dy ve cummalyn rea ny thieyn noa-hroggit. T'eh gra, ny t'ad cur eab er jannoo ayns shoh, shen dy choadey yn ablid dy phairkal ec cummaltee ny thieyn t'ayn hannah, nagh vod croo pairkal er-nyn-son liorish goll er ash.
Ta Mnr Wannenburgh gra dy vel thieyn er Raad Demesne as er Straid Tinvaal, etc, feer phlooghit bentyn da pairkal, as s'goan ta reamys dy liooar son nyn goir hrustyr wheeylagh as ny closeyn cooyl oc, gyn garagheyn roish nyn dhie er chor erbee. T'ee gra, eer my vees garaghyn roish nyn dhieyn ec sleih as linnaghyn buigh dooblit cheumooie jeh, nagh vel kied plannal dy cadjin currit dy chaghlaa ny garaghyn roish ny thieyn dy ve ynnydyn pairkal preevaadjagh. T'eh gra dy beagh yn aghineyr er-lheh shoh maynrey dy yannoo shen as yn costys urree hene, agh dy nee ard freillt eh as nagh vod ee jannoo shen, myr shoh t'ee fo vyghin ny lughtyn-reill.
Ta Mnr Wannenburgh gra nagh vel Bnr Krüger goll magh son chaglymyn lurg, er-lesh, three er y chlag 'syn astyr, er aggle nagh vod ee pairkal y gleashtan eck tra t'ee cheet back. T'eh gra, vel sleih ayns foayr jeh shen ny dyn, dy vel shen yn aght t'ee gennaghtyn, as dy vel yn aght t'ee fakin eh, as yn aght t'ee fakin eh, shen yn rieughid er-e-son, as dy vel eshyn gennaghtyn dy lhisagh eh ec y chooid sloo cur eab er jannoo reddyn ny share er-e-son.
Ver Mnr Wannenburgh treealtys mychione y chooish roish soie Tinvaal Jerrey Geuree shiaghtin laa ny vairagh, Jemayrt yn 21 Jerrey Geuree.
---oooOooo---
Cooish elley hed roish Tinvaal yn shiaghtin shoh cheet, shen yn Strateish son y Tarmaynys Ynnydoil, as yn dean jeh dy aa-vioghey ny kerrooyn oltaghey, myn-chreck as soccar. Shoh cochianglt rish y doilleeid jeh freayll bio mean ny co-voodeeyssyn lesh thieyn dellal bioyr. Agh neayr's toshiaght ny bleeaney ta kuse dy thieyn dellal myn-chreck er vograghey magh dy jean ad dooney ny dy vel ad caghlaa yn aght t'ad gobbraghey.
Ta Boutique Lhiannoo Yasmin ayns Doolish cur eab er cheet dy ve freggyrtagh da'n vargey chaghlaait liorish dooney y shapp hene as jeeraghey er creck cooid er-linney. Ta shellooder y happ, Jade Thomas, gra dy vel yn doilleeid lesh yn eaddagh ve 'sy chapp, dy vel feme urree freayll sthock ayn, myr shoh nish ta shin cheet gys yn arragh dy beagh feme eck geddyn sthock dy chooid arree, myr shoh dy vel feme urree dy kinjagh ceau argid er, agh dy vel jannoo photographyn er ve cheet dy ve ny s'tarroogh as ny s'tarroogh, as my vees ee geddyn rey rish ny eaddeeyn, as caghlaa shen dy ve er-linney, magh ass shen dy bee ablid eck fosley dy yannoo seshoonyn photograph y voiraghys as reddyn gollrish shen, er yn oyr, ec y traa t'ayn, nagh vel ee jannoo ymmyd jeh agh reamys beg 'sy chapp; agh my vees ee geddyn rey rish ny eadeeyn bee ablid eck dy hebbal seshoonyn photograph smoo, seshoonyn photograph son y lught-thie as seshoonyn photograph y voiraghys as reddyn gollrish shen.
Ta Bnr Thomas gra, er yn oyr dy vel yn shapp eck, dy vel ymmodee custymeyryn leighoil eck, as gyn y ve urree cummal sthock dy howse ennagh dy chooid, dy vel fir jannoo magh feer vie eck as dy vod ee oardrail voue choud's ta'n custymeyr goardrail voee, dy vod ee cummal towse beg dy sthock 'sy chapp 'sy cheu chooylloo jeh, agh dy bee'n chooid smoo agh cheet dy jeeragh veih ny fir jannoo magh eck, myr shoh nagh jeean ee agh oardrail voue, as dy vel eh cur sthap er feme er yn argid ve eck rolaue.
Ta Ard Sheckter Dellal Ellan Vannin, as jantys eh jeh'n Rheynn Gastid Dellal, Tim Cowsill, gra dy vel ad er n'yannoo mooarane obbyr lesh yn Strateish son y Tarmaynys Ynnydoil dy hoiggal towse y cherroo as ny vees taghyrt, myr shoh dy vel eh mysh 8,000 startey t'eh cummal seose, harrish myn-chreck, oltaghey as soccar. T'eh gra dy vel ad toiggal dy nee gienteyder mooar eh jeh argid cheet stiagh, bentyn da keesh, bentyn da Keesh Tooilley Feeuid as argid cheet stiagh son faill, etc. T'eh gra dy vel fys oc dy vel mysh 965 unnidyn myn-chreck trooid yn Ellan, vees earroo mooar dy liooar son 84,000 dy leih.
Ta Mnr Cowsill gra dy vel fys oc dy vel kerroo mooar dy liooar ain vees goll harrish hoght baljyn as un ard valley, myr shoh dy vel reayn lhean dy liooar ain, as dy row eh er ve feer vaghtal dy vel red er-lheh dy mooar goll er chebbal ec dagh balley – t'eh gra my vees oo smooinaghtyn er Rhumsaa dy vel eh jeerit feer neu-chrogheydagh, bentyn da shappyn neu-chrogheydagh; dy vel Doolish jeerit ny smoo ayns aght multi-ashoonagh; as eisht dy vel ardyn ayn gollrish Balleychashtal vees jeeraghey ny smoo er yn eiraght as oltaghey; as ta Purt Chiarn ayn, vees dy feer soccar lesh y traie as stoo currit magh. T'eh gra, myr shoh, dy nee baghtal eh dy vel ardyn er-lheh ayn as troyn oc dy feer gyn cosoyley.
Ta Mnr Cowsill gra, ooilley cooidjagh, dy vel fys ain dy vel yn rate dy happyn entreilagh ain ny sinshley na 'sy Reeriaght Unnaneysit, liorish mysh 4 ny 5%, as dy vel fys ain dy vel shen soilshaghey magh dy mie cre cho slayntoil as ta'n kerroo. T'eh gra dy vel reddyn caghlaa, dy vel ny reddyn shoh taghyrt bentyn da dellal, agh ooilley cooidjagh dy vel rate feer ard dy baarail 'syn Ellan bentyn da ny vees er ny vaarail ec kionneyderyn, dy vel ny fir ynnydoil ain goll magh as baarail cho mie as oddys ad, as dy vel shen feer vaghtal lesh ny vees goll er chebbal ec y traa t'ayn.
Ga dy vel sleih fakin shappyn follym ayns Doolish, foddee, ny ayns Balleychashtal, as smooinaghtyn, foddee dy vel doilleeid er-lheh ayn, ta Mnr Cowsill gra, er-lesh, dy vel eh ny lhie dy mooar er mooadys yn unnid, as foddee dy vel un unnid ayn ta jannoo seose corrillagh mooar ny straiddey, myr shoh dy vel y co-heks shen ayn. Ny yeih, t'eh gra dy vel Mannin ayns stayd share na'n Reeriaght Unnaneysit. T'eh gra dy vel caghlaaghyn, as dy vel shappyn noa er vosley, dy row paart er ve ayn, agh dy vel cubbyl dy vlein chreoi er ve ayn son y cherroo – Covid, costys y vea – as dy vel fys ain dy vel yn chooid smoo dy hieyn dellal ynnydoil ayns shen, t'er ve soit rish tammylt liauyr, foast ain, as dy vel ad cur ny poyntyn strateishagh as rieugh ta shin feme 'syn Ellan, as dy daink shen dy ve feer vaghtal tra ren ad cheu ny kionneyderyn neesht, bentyn da ny vees sleih geearree lesh ny vees goll er chebbal, dy nee baghtal eh dy vel reamys dy yannoo, dy vel tooilley dy ve currit da, myr shoh nagh vel ad gra dy nee slane jeant eh, agh dy vel yn strateish shoh er ve currit er y hoshiaght dy chur jeeragh shen as dy chummal seose cur beggan ny smoo trimmid stiagh ayn, dy chummal seose y breeoilid shen, dy vel ny shirveishyn goll er chebbal.
Agh vel shoh cheet ro anmagh? Er-lesh Oltey politickagh Dellal Ellan Vannin, Diane Kelsey, foddee dy voddagh shoh er jeet feed blein er dy henney, agh dy beagh eh neu-chasley nish. T'ee gra dy vel er-linney jannoo seose yn doolane smoo fo myn-chreck, agh dy nee anaasagh eh, my vees sleih smooinaghtyn mychione y clane keeayll chionnit jeh geearree red ennagh dy ve breeoil, dy vel shin feme ny thieyn dellal elley dy ve liorish, dy chur er sleih shooyl sheese y straid, as eisht dy gholl stiagh ayns ny shappyn neesht.
Ta Bnr Kelsey gra dy vel yn oyr dy vel y Strateish son y Tarmaynys Ynnydoil er n'ghoaill tammylt beg dy chur cooidjagh, shen er yn oyr dy vel ad shirrey coyrle dy lhean as dy vel ad er neaishtagh, as dy vel ad ayns rieughid er caghlaa y draght oc, soit er barelyn cheet back, tra t'ad er n'gholl magh dy loayrt rish thieyn dellal. T'ee gra dy vel y Strateish dy feer dy ghra foddee dy voddagh eh cheet lesh ayns geddyn tooilley sleih 'syn ard, dy ghreinnaghey tooilley sleih dy hooyl shaghey eddin y happ shen, as smooinaghtyn dy vel ad geearree goll stiagh ayns shen.
Ta Caairlagh Dellal Ellan Vannin, Steve Pickett, gra nagh row ad geearree jannoo driss dy chur trooid Strateish nagh row ayns rieughid er chooilleeney sess magh as magh as myn-phoyntyn ayn ayns rieughid jeh'n ynnyd ta shin ayn, cre vees ny doolaneyn foin, as cre vees ny caaghyn t'ayn. as myr shoh dy ren ad shirrey son shickyrys coyrle ayns lughtyn-reill elley neesht, vouesyn fod mayd ynsaghey, lesh reddyn speeideilagh as failleilyn ayns shen neesht. T'eh gra dy row ad geearree jannoo shickyr, tra yinnagh ad reaghey y Strateish ain, dy row ad er hur-smooinaghtyn er ooilley ny doolaneyn foddee vees foin, ny bee ayn ayns yn chubbyl dy vleeantyn shoh cheet, dy bee ad abyl dy hoilshaghey magh yn traa v'eh jeant, agh dy jarroo she traaghyn creoi t'ayn, as dy vel shen yn oyr ta feme ain er shoh.
Ta Mnr Cowsill gra, my vees y Strateish goll er pohlldal, son y chied cheayrt dy bee mayd freayll arrey er slaynt y cherroo, red ennagh t'er ve doillee dy liooar dy yannoo. T'eh gra, myr shoh, dy bee ad cur shamraigyn dy hoilshaghey magh yn earroo dy leih mygeayrt yn Ellan, myr shoh dy jean mayd toiggal ny vees goll er. T'eh gra dy bee ablid oc jannoo cowrey arjid jeh shen rere yn earish, agh rere buill elley 'sy Reeriaght Unnaneysit, as toiggal dy jeeragh ny vees taghyrt. Jeh ny shappyn follym, t'eh gra dy vel ad geddyn reayrt formoil harrish ooilley, gollrish 'sy Reeriaght Unnaneysit, as dy bee ablid oc toiggal. T'eh gra, troggit stiagh 'sy Strateish, dy vel ynnydyn ayn tra nee ad geddyn magh veih kionneyderyn, geddyn magh veih thieyn dellal, as toiggal.
Ta Mnr Cowsill gra dy vel yn feysht, vel eh anmagh, shen feysht as foddee ad cur freggyrt tra ta nheeghyn as fysseree oc dy hoiggal ny vees goll er 'sy cherroo, as er-lesh dy vel shen feer scanshoil, er yn oyr nagh vel eh rieau un phoynt t'eh cheet lesh dy charraghey, as eer tra t'ad er n'gholl ny hrooid, my vees oo goll gys caghlaaghyn balley, dy row oc ooilley caghlaaghyn ashlish jeh ny t'ad geearree jannoo as yn aght t'ad geearree cleayney as cre cho mie ta dellal goll. T'eh gra dy vel y clane cooish cur pooar da ny ardjyn shen dy imman er y hoshiaght ny thieyn dellal as ny lughtyn-reill ynnydoil. T'eh gra, myr shoh, dy vel ad treishteil, lesh ny data shen, dy vod sleih gleashaghey er y raad kiart myr ayrn jeh shen, myr shen dy vel shen yn eie.
My vees y Strateish coardit ec Tinvaal, bee £2.4 millioon currit ry lhiattee son ny ard straiddyn trooid yn Ellan. Agh vel y currym dy reayll bio ny ard straiddyn er y Reiltys ny lomarcan.
Ta Valerie Miller stiurey shapp gioot ny Vayrey T ayns Laksey as t'ee gra nurree, myr shoh veih Jerrey Geuree 2024, dy row eh myr dy beagh yn argid cheet stiagh er duittym harrish oirr eaynin, dy row eh olk dy liooar, bunnys giarrit gys yn lieh-ayrn, yiarragh ee, as eisht dy row shen taghyrt reiltagh dy liooar shiaghtin er shiaghtin. V'ee gra dy row ad smooinaghtyn 'sy tourey dy jinnagh reddyn bishaghey reesht, as foddee dy ren ad beggan, agh veg ayns cosoyley rish y chubbyl dy vleeantyn roish shen.
Ta Bnr Miller gra, myr shoh, eisht reesht, dy row ad tannaghtyn ayn son y Nollick, as smooinaghtyn dy beagh y Nollick yn traa, as reesht dy jarroo ve ny s'tarroogh, agh y preays shen as y cheeayll chionnit v'oc ayns y chubbyl dy vleeantyn roish shen, dy row eh ayns rieughid gollrish oie as laa, y neu-chosoylid rish (a) yn earroo dy leih va cheet stiagh ayn as eisht quoid va sleih baarail.
Ta Bnr Miller cur cheb er dy row shoh er coontey creoighys y chostys bea. Er-lhee 'sy vlein roish shen dy row ad jerkal rish reddyn lhaggaghey beggan er yn oyr doaltattymagh va coontyssyn ec dy chooilley pheiagh gyrjaghey, agh nagh ren eh, as eisht dy ren eh berraghtyn er sleih. Er-lhee dy vel eh miolaghey dy mooar dy yeeaghyn gys yn Reiltys dy hauail ad, myr ta'n bun jeh, agh dy persoonagh dy vel ee gennaghtyn dy nee fir er-lheh foddee dy jarroo sauail ad liorish jannoo ny caghlaaghyn shoh – shen dy ghra, jannoo ymmyd jeh shappyn ynnydoil shaghey shappal er-linney as yn lheid myr shen - as dy vel eh thieyn dellal neu-chrogheydagh ta dy jarroo cur-lesh cultoor da soleyn y dorrysh ain, dy vel ad jannoo seose creeaghyn ta bwoalley as pumpal bree y vioys trooid ny co-voodeeyssyn ain, as nyn-vegooish dy vel shin ooilley surranse.
---oooOooo---
T'eh fo'n Shirveishagh Tashtee, as Oltey yn Chiare as Feed son Rhumsaa, yn Fer-lhee Alex Allinson, cur treealtys roish Tinvaal yinnagh cur cair da olteynyn erbee nagh daink eh lhieu ve aa-reiht dy gheddyn faill rish wheesh as shey meeaghyn lurg jerrey yn traa oc myr oltey. Nee'n Fer-lhee Allinson shirrey er olteynyn dy choardail rish lhiassaghey Skeim Olteynyn Tinvaal (Toyrtys Aa-hoiaghey) 2018.
Ec y traa t'ayn foddee Olteynyn Tinvaal ta coayl yn ynnyd oc as ta fo 60 blein dy eash cur stiagh son toyrtys aa-hoiaghey vees y towse cheddin jeh faill rish shey mee. Ta ny caghlaaghyn treealit cheet lurg briwnys liorish y Ving Faillee as y Chormid dy row ny lhiettrimmysyn 'sy skeim bentyn rish eash neu-leighoil rere Slattys Cormid 2017. Ren y Ving briwnys dy row y lhiettrimmys er eash syjrey jeh 60 blein, va currit er bun dy ve freggyrtagh da cur olteynyn harrish gys Skeim Unnaneysit Reiltys Ellan Vannin, jannoo seose far-reih rere eash.
Yinnagh caghlaaghyn treealit yn Tashtey geddyn rey rish y lhiettrimmys rere eash, dy yannoo shickyr dy row dy chooilley oltey reihalagh son toyrtys gyn scansh da'n eash oc. Ta'n Tashtey cur trimmid er dy beagh yn dean ayns cur bree da ny caghlaaghyn dy chummal seose naeeraght rere costyssyn dy ve freggyrtagh rish policy harrish ooilley ayns eeckyssyn da olteynyn Tinvaal. Choud's ta sleih jerkal rish, liorish geddyn rey rish y chagliagh eash, dy jean shen jannoo ny shlee yn earroo dy olteynyn vees reihalagh dy gheddyn y toyrtys, ta dean ny caghlaaghyn dy ve biallagh da'n feme leighoil son cur-rish sleih dy corrym as dy chur undin slattyssagh son aggyrtyn 'sy traa ry heet.
Ta Olteynyn yn Chiare as Feed geddyn £75,907 per annum and Olteynyn y Choonceil Slattyssagh £71,659 per annum, as shen dy ghra dy beagh faill shey meeaghyn son eear Oltey yn Chiare as Feed £37,953.50 and son eear Oltey y Choonceil Slattyssagh £35,829.50.
---oooOooo---
Ta David Cretney er jeet dy ve yn chied hirreyder dy ghra dy jean eh goaill ayrn ayns Reihyssyn da ny Lughtyn Reill Ynnydoil Mee Averil. Nee eh shirrey ynnyd son Doolish Yiass, va'n rheynn reihyssagh echey tra ve Oltey yn Chiare as Feed roish nish. Ta Mnr Cretney ny oltey jeh Partee Obbraghys Vannin as t'eh credjal dy vel gennid dy hieyn vees ry ordrail chammah's thieyn follym 'sy phreeu-valley jannoo seose oyr son imnea.
Ayns fogrey, ta Mnr Cretney gra, ga dy vel yn earroo dy phooaraghyn as dy churrymyn Coonceil Ghoolish er n'gholl sheese harrish ny bleeantyn, dy vel eh foast goaill ayrn ayns livrey kuse dy hirveishyn theayagh, goaill stiagh thieyn 'sy cherroo theayagh, as dy nee'n barel echey eh dy lhisagh ad coardail rish slattys er chiarnyn thallooin as tannyssyn, vees jannoo er y cherroo preevaadjagh agh nagh vel er thie erbee as s'lesh y reiltys ny lught-reill ynnydoil eh.
Ta Mnr Cretney gra, 'sy traa echey myr Oltey yn Chiare as Feed, dy row eam er dy mennick dy chooney lesh tannyssyn, myr shoh dy row y smooinaghtyn dy row ny lughtyn-reill gyn foill neu-chiart, agh nagh vel shoh dy ghra nagh vel obbyr mie er ve jeant ayns cur thieyn noa. T'eh gra dy row eh cochianglt rish cummaltee ayns reaghey dy lhieggal as dy hroggal ass-y-noa Poyll Roish Sinshley, as dy vel skeimyn elley er jeet ny yei shen. T'eh gra dy vel ny thieyn coadit currit liorish y Choonceil er ve feer speeideilagh, 'naght cheddin ny skeimyn s'noa er Raad Purt ny Hinshey as unnidyn dy ve foshlit er y gherrid ayns Willaston.
Ta fogrey Mnr Cretney cheet er pairkyn theayagh trooid Doolish, dy vel ad jannoo seose vondeish scanshoil as dy vel ad cur oasis sheeoil as dy vel shin cosney y vondeish jeusyn as faaishnys oc dy ghoaill stiagh lheid ny seyraadyn ayns lhiassaghey ardyn cummalagh as ardyn elley. T'eh gra dy nee scanshoil eh dy vel sleih jannoo mooar jeh ny ardyn shoh, as dy vel closeyn cloie son paitchyn fo churrym y Choonceil neesht, as dy nee mie eh fakin ny t'er ve jeant ayns ny bleeantyn jeieanagh, as dy vel feme er shen tannaghtyn goll. T'eh gra dy vel premmeeyn theayagh, reirey closeyn pairk gleashtan as pairkal gleashtanyn, as lampaghyn straiddey, ooilley fo churrym y Choonceil neesht.
Va Mnr Cretney Oltey Tinvaal rish bunnys 35 blein as ny Hirveishagh rish 18 blein jeusyn shen, as roish nish neesht v'eh Oltey Coonceil Ghoolish rish 18 mee.
Bee ny Reihyssyn da ny Lughtyn-reill Ynnydoil goll er cummal Jerdein 24 Mee Averil.
